ZVONA, Mesečni list čakovečke žup,
IVANŠČAK (KLASEN, ROŽENCVET, LIPEN, LIPANJ) 2019.
NEKAJ ZA ČAS KRATITI Proščeje je cirkveni svetek Neso več niti proščeja kaj so negda bila, rekel bi moj dugoletni pajdaš, profesor Kapun.
Negda je Čakovec bil nejvekša fara ne sam v Međimorjo nek i v celoj Zagrebečkoj nadbiskupiji i zato je mel proščeje dva dni. Odnaveke se je znalo da se
Prcinkulovo obslužavle dva dni. Ali to je ne bilo se vu velikoj čakoskoj fari jerbo je saka filijala mela svoje proščeje, tak smo meli proščeja pre Sveti Jeleni, v Mačkovco, Prislavci, pre Svetomo Roko, v Miholjanaj, vu Vidovco i Vanovco, a i v Saskoj Vesi. Dok se je tua velika fara restepla tak da je saka filijala postala fara došlo je do toga kaj saka nova fara ima i svoje proščeje kak je i red tak da ve hodamo jeni k drugima na proščeja i ne moramo iskati zgovore kaj se bodemo shajali.
Kak so cajti išli pomalem napre tak je i Čakovec dobil još jeno faro tak da ve ima dve. Jena je ostala
na severo i to tak kaj
župa Svetoga Mikule i dale
obslužavle glavno proščeje na Prcinkulovo, a na godovno svetoga Mikule je osvetek i malo proščeje, a
na Jugu je zrasla (čitaj: zazidali smo jo si skupa)
nova cirkva i nova fara Svetoga Tončeka (mojega imejaka) Padovanskoga. Štreka je meja med temi farami, tak da smo jeni drugima prek štreke. I Južna župa ima svoje drugo proščeje i to na Malo mešo da je cirkva bila posvečena. Ve vidite,
Čakovec ima dve fare i dva velika proščeja. Negda, dok je još naš dragi Božek hodal po zemli, je Čakovec mel glavno proščeje na Prcinkulovo i to v glavni vulici, štero je trajalo dva dni. Posle je to proščeje, ruon tak, trajalo dva dni, ali so ga preselili vu vulico prema Semiščo, očem reči, od Kišove krčme do Semišča. Rekli so da se Tito, šteri je držal glavno vulico, pobunil, a kak so naši gracki oci bili vekši katoliki od Pape oni so mam proščeje hitili vum z glavne vulice. No,
čim je Lepa naša dobila svojo državo mam se je i proščeje vrnulo nazaj v glavno vulico. I ne sam to, sako leto je to proščeje trajalo malo duže tak da ve glavno proščeje traje celi tjeden. Gracko proščeje počne predi cirkvenoga, a završi posle. Tuliko sega se najde po vulicama, trgima i parkima Čakovca kaj je teško se rezgledati za teh tjeden dni. Se je to lepo i dobro (a nejveč pot i vroče), se te stiske, ringišpili, lunaparki, koji, kobile, koncertlini, pive, gemišti, gvirc i kaj nem dale nabrajal, a
nejveč placa ga je i nejmenša stiska je v cirkvi. Tam ste odma na redo, tam je mir, tišina i nejvekši i nejlepši hlad. Ali malo je onih šteri to se i hasnujejo. Malo je onih šteri na te veliki svetek glavne čakoske župe delajo stisko v cirkvi. Nebrem reči, na glavni meši se zato zide lepi broj ljudi, a još navek dohajajo Janezi i Mađari kak hodočasniki.
Od da čakoski Jug ima svojo cirkvo, svojo faro ima i svoje proščeje. I na Jugo proščeje traje duže nek sam jeden den. Nebrem reči da tu proščeje traje tjeden dni, ali neje niti čuda meje. Kak se i šika. Pak so ne južni Čakovčanci meje vredni od ovih z stareše fare. Ovo leto je fara mela svoje proščeje, a si ostali svoje, jerbo da bi meli skupa bila bi prevelika stiska. Ne zameriti, rekel bi profesor Vladek Kapun, pak
ovo leto južna fara obslužavle dvajsti let otkak jo je biškup Marko Culej zafremal i od da je prvi župnik, pater Tonček Jesenovič, prevzel cirkvo i vjernike. Posle Tončeka je južne birkice pasel, pater Drago Brglez, a ve pak to dela pater Tomislav Božiček Se razmem, i proščeja i svetkuvanja, ali
tre iti na proščeje črez cirkvo, a ne mimo cirkve. Ak za se imamo cajta unda moramo meti i za Božeka. Tre paziti kaj nas dragi Božek i Sveti Tonček ne bodo na red pobirali.
Vaš Tonček!
Š a l a m a l a
Zajam
Štacunar pita gospođu:
- Gospođo, najbrž ste donesli zadjo rato za dečji beciklin?
- Je, kak vi se znate!
- A, je dečec kaj zrasel?
- Je, je, fčera se je oženil.
Nastavek:
http://www.forumgorica.com/index.php?topic=123.msg56902#msg56902
Zvir:
ZVONA, Mesečni list čakovečke žup,
Leto XXV, br.6, lipen 2019. l.
Nakladnik: ŽUPA SV. NIKOLE BISKUPA, ČAKOVEC,
http://www.ofm.hr/zupa_cakovec/ , http://www.ofm.hr/zupa_cakovec_jug/
Naklada 1200 primerkov
