POČAKAJ (PO-ČA-KAJ) - Lipa naša čakavska

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 2/7


obašli smo

Bela nedeja bez petešića ni Bela nedeja
 
Mi dečina smo se najveć veselili petešiću. Onemu kemu se v rit puše. Potekovali smo š njin, puhali mu v rit, se dokle nas usta ne bi zabolela. Još čujen taj fik. Petešići su bili storeni od jila. Sledić opiturani, najveć va kafeno, a imeli su božanski glas

Piše Cvjetana MILETIĆ
Slika Marin ANIČIĆ
 
Slika :
Vredna Maja je sega parićala
javascript:openWindow('aspx/showimage.aspx?id=450327',400,381,'');

 
Nedeju je Bela nedeja. Veli blagdan Grada Kastva. Ne crkveni, magar je odvavek nedejna maša, leh narodni blagdan al blagdan za judi. Štima ga se zdavni. Ne zna se od kad. Neš je zapisano va Kastafsken zakone, neš i va stareh spiseh. Tako čitamo da se za Belu nedeju delavci sa zasluškon vrnjaju doma pa se na taj dan na starine najde sa rodbina i svojbina. Za Belu nedeju su se i dugi poplaćevali i zasluški splaćevali da bi se naprvo živelo s laginjun va duše. A onputa bi se za Belu nedeju naručila i pogodila veća dela. Nekemu j' trebal nov kabal, nekemu nove bačvi za vino, novi koši al košari, kotal za rakiju, peča bele robi za divojke dotu ušit... Se to se naručevalo za drugo leto. Tako su dela imeli, koliko su oteli, i bačvari i stolari, i ženske ke su robu tkale al vunu gardašale i prele. Si su ponaprvo znali kemu te ča prodat. Ča j' bilo odveć, prodalo se na samje.
    Samju su se najveć veselila dečina. Već od suboti strgali su po grade, tekli zgorun zdolun, kurijoži za videt ki j' ča prnesal za prodat, magar ni jedan od nas ni imel ni prebijenega šolda va žepe. Nedeju jutro komać smo sfehtali lateni dinar za ringešpil. So drugo vreme porabili smo samo za gledat. Puzali pobožno od stola do stola. Sledić bliže kade se mendulato seklo da nan se kušćić za majicu taka. Slatki kušćić. Fermali smo se pul onega ki j' zijal: »Tko nabije, taj dobije!« više zato ča j' jako zijal, nego ča smo razumeli čemu se stareji smeju. Trebalo je nahitit kolonbarić na vrh od boci i ki j' to storil, smel se boce i sen okolo. Bila j' to igra za mladići. Mladići su v rukah stiskali i balicu na laštike. Š njun su zbijali divojki. Ne bilo ku, leh saku. Tako je bilo po seh samjeh. I na rukavašken, kamo j' hodil Zoran Kompanjet, ki j' ovako zapisal: »Mladići su hitali va malice / na laštike vezane balice, / a one su se na to jadile, / ma ne zaspraven / leh nekako po sile.« Takoveh balic više ni. Bile su storene od harti i punjene s pilotinun. Na njimi je bil laštikić, ki se stavjal na srednji prst pa bi se hićena balica vavek vrnjala va pest. Neken je to bil senjal od jubavi, neken samo škerac.
    Za starejeh je Bela nedeja bil dan počinka. Materi su mesile njoki, oci ćakulali s kumpari, brati, susedi, svojinun i z onemi ki su lih pasevali. Oni su komać pred večer šli va Grad. Na kapuz i kunbasice i na dva deci belice. Drugi dan na posajmice je bilo se ceneje pa se drugi dan i kupjevalo. Palentari i kuharice, dasku za robu prat, kablić, škamblicu al ribež za kapuz. Ako niš drugo kakovu pršku al roštalce za otroka.
    Mi dečina smo se najveć veselili petešiću. Onemu kemu se v rit puše. Potekovali smo š njin, puhali mu v rit, se dokle nas usta ne bi zabolela. Još čujen taj fik. Petešići su bili storeni od jila. Sledić opiturani, najveć va kafeno, a imeli su božanski glas. Prnašali su ih s Kranjske, negdere z Ribnice. Trgovci su bili lepo obučeni, onako po svoju. Stali su zad banka i puhali sad jenemu sad drugemu v rit. Otac je naslišal i kupil mi onega za kega mu se činelo da ima najlepji glas. Potle se ni jadil ča fičen po kuće. I taj čas kad san trepela i čekala da zamen petešića v ruki je moj najlepji spomen. Potle su počeli prnašat lateni petešići. Bilo ih je i od plastiki. Samo oneh »mojeh« više ni bilo. Mislela san: nikad maj već ne bude petešić va Grade. Mislela i pogrešila.
    A sad štorija od tega novega, kastafskega i »mojga« petešića.
    Pojavil se pred deset let na Beloj nedeje jušto onakov kakovega moji spomeni čuvaju. Čin je na banke glavu zdignul i zafikal, prodal se na grabanju. Mej judi su oživeli stari spomeni. A jas san kurijožo šla san za njigoven sledon. Od kuda su prišli ti novi, »moji« stari petešići? Ki se domislel storit ga? Ki ga je oživel da opeta po Beloj nedeje peteši? Kemu reć hvala za to ča već deset let dečina opeta onako milo pušu petešiću v rit?
    Put me pejal drito h Pobron. Tu san našla jene zlatne ženske ruki i pred njimi puno jila. Na stole i pred vrati se puno petešić pripravneh za izložbu. A izložba će se otpret jutra, petak, dva dana prej Bele nedeji va Crekvice sv. Trojice na Lokvine. Na izložbe nete bit samo petešići leh si Majini kastafski suveniri mej kemi je i on, a keh već deset let dela ženska od struki, umenja i znanja, mr. sc. Maja Štrk-Snoj. I da znate, nisu to bilo kakovi petešići, nego oni z vremena mojga otroštva. Lepi, mići, storeni na meru od usta i nosa, s škujicun na rite da se ima va ča puhat. Gledan tako posloženeh. Oni moji va spomeneh i ovi sadašnji jenaki su, samo ovisti su lepje opiturani, neki i zlaton pozlaćeni. Malo gledan petešići, malo Majine ruki kako ih mese. Reklo bi se lahko kot niš. Ma, ni baš lahko. Ona to dela ovako:
    Najprej zame kus jila i stori boćicu toliko veliku da njoj stane va pest. I mesi, mesi ju se dokle ne oćuti da j' jilo postalo mehko kot testo i da od njega more storit figuru. Onput mu zivuče telo i nogi na keh će stat pak na jenu stran zitegne vrat i glavu, a na drugu rep. Sad petešića pusti da počine, a ona za to vreme parića krejuti, rožicu, kjun i oče. I ta čas, kad petešić progleda, ona zna na čen je. Ovako mi govori: – Zajeno vidin kakovo je to blago. Veselo al jadno, pametno al blesavo, staro al mlado, opasno, štimano al lajavo... Pogledan ga, nasmejen mu se v oče i rečen: »Boh, mali, gremo daje!« Sad mu treba regalat švik. To j' najtežo delo. Treba storit škujicu na rite i skroz nju – a da se ne zmasti još mehkega petešića – zidust vanka so jilo znutri da se dobije mesto za glas. Ako ne, neće bit švika. Kad je petešiću trbuh prazan, popravi se škujicu na rite i stori još dve na hrbate da švik more vanka. Sakemu Maja mora puhnut v rit za videt ako se va trbuhe raja dobar švik. A trebalo je provi i provi za navadit kamo stavit škujice da budu na praven meste. Kad se to stori, more se i delo dofinit. Sad Maja pusti da se petešići dobro osuše prej leh ih stavi peć. Ne va šparget, nego va keramičku peć, kade se peču deset ur na tisuće gradi. Još deset ur njin treba da se ohlade. I komać se onputa peć otpre. Vanka pridu si petešići beli, beli kot sneg. A ako se dva mej sobun ćuknu, čuje se ono cinggg, kot kad se ćuknu dve kikarice od majoliki. Takovi beli petešići Maja stavja v ruki svojoj hćere Metke, akademskoj slikarice, ka s pinelićen dela čudesa. Saki opiturani petešić je samo svoj. Jedan jedini. Dva nikad nisu jenaka. I ni dvojčić.
    Gledan kako Maja i Metka stoje pred svojen delon. Sad sponova treba fikat. Jenega po jenega zet v ruki i v rit njin puhat. Ako je švik kako treba, Metka ih va finu hartu zamota, Maja slaže va škatulu. Parićani su za samanj.
    A kako se Maja domislela storit petešića?
    Najprej se rodilo jeno prijatelstvo zmed Maji, kot ženske od struki, i grada Kastva, va ken su oteli imet svoj grb. Trebalo je kopat po stareh hartah, a ona je to umela i želela. Videla je da judi čuvaju grafiki svojga grada keh je Valvasor storil još va 17. veke. Jenako tako judi vole i onu šternu na Lokvine va ku su svojni utopili zločestega kapetana Frana Morellija sporad česa su sucu kuntento ponavjali: »Ča ki ga je? Si smo ga, ja i moj brat, i od mojga brata brat, i sudac Kinkela, i si do vragu tega. Još ga je i stara Mare s preslicun v rit badnula, da gre dubje va fondo«. Kad je kašneje zela jilo v ruki, najprej je umesila grb. Onputa tu šternu. Za ten je storila i jenu bukaletu jenaku onoj staroj z leta 1845. ka je va Zavičajnoj zbirke Kastva i na koj piše »Živila Hrvacka«. Sled ju j' oplela z bršjanon, ki va Kastafšćine tako obilo raste. A onda j' videla i neki stari petešići pa j' pomislela da more storit novega. Za prvega je od ondašnje gradonačelnice Sonji Brozović Cuculić dobila srdašni bušić i to j' bil senjal da j' na praven pute. Pred njun je bilo delo ko j' trebalo storit. Va ten je dobila, danas bi rekli, i podršku Turističke zajednice Grada Kastva ka još vavek dura, ča će se videt i po ovoj izložbe kastafskega suvenira. Za teh deset let petešić se pozlatil. Od bušić.
    »Bela nedeja, beli dan, homo jutra na samanj...« svojni su kantali i mlaji i stareji. A samju su se odvavek najveć veselila dečina. Sad se veselimo i mi, vremešni. I s pravon moremo reć – ja i moj brat i od mojga brata brat – da Bela nedeja bez petešića ni Bela nedeja!

Kako ga storit?
   
    Zamite boćicu jila toliku da stane va pest.
    Mesite ju mej rukami kot testo.
    Sad zivučite nogi da more stat.
    Na jenu stran zitegnite vrat i glavu, na drugu rep.
    Petešića pustite da počine.
    Vi parićajte krejuti, rožicu, kjun i oče.
    Čin to takate, blago vas već lepo gleda.
   
    Sad malo strpjenja.
    Železnen žlebićen storite mu škujicu na rite.
    Skroz nju morate zivuć so jilo s trbuha
    da se dobije mesto za glas.
    Sad mu storite još dve škujice na hrbate
    i puhnite v rit.
    Ako švik pride vanka, vaš je petešić oživel.
   
    Prnesite ga h mane da ga spečemo.
    Belega ćemo skupa opiturat.
    Doma mu morete puhat v rit al ga stavit va veltrinu.


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285A285F28632863286328592863N

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 3/7


da se ne pozabi

»Smešice« od Bertota Lučića zavavek će živet
 
Već je sedan let pasalo od kako se j' Berto Lučić z svojun jubavi za domaće »ča« premestil na on drugi svet

Piše Tatjana UDOVIĆ
 
Slika :
Večer pul Matetićevega ognjišća
javascript:openWindow('aspx/showimage.aspx?id=450347',400,416,'');

 
Va spomen na svojga člana, Ustanova Ivan Matetić Ronjgov je va suradnje z Narodnun knjižnicun  i čitaonicun »Halubajska zora«, pozvala Pučki teatar – KPD „Istarska vila» z Kastva pak se pul Ronjgi održala Večer pul Matetićevega ognjišća pod nazivon »Smešice« od Bertota Lučića.
    Već je sedan let pasalo od kako se j' Berto Lučić z svojun jubavi za domaće »ča«, premestil na on drugi svet. Lahko bi bilo za verovat da još i tamo sada spićuje starejeh o još starejemi užancami od keh ni arival niš zapisat – aš on je za se rekal da va glave ima kot jenu kartoteku va ku spravja se štorije i užanci keh čuje i vidi pak jih potla stavja na hartu da se ne pozabe. A barbi Bertota, kako ga j' čuda njih zvalo, nan već ni, ma zavavek živu njegovi zapisani versi, smešice i kumedije.
    I dok se Kastafci i drugi smeju s Kastafsken pučken teatron, rabi reć da j' Berto Lučić bil jedan od njegoveh začetniki. Kastafski pučki teatar je potekal od kastafskega zabavnega programa »Naš domaći glas« kega j' 1974. i vodil sam Berto Lučić na Šporovoj jame, a za ku je, kako bi bilo čin živje, napisal» po ku kumedijicu« ku su se navadili i za daski parićali člani Dramske sekcije KPD »Crvena zvijezda« Kastav. Se j' to bilo amaterski, ma se j' juden jako pijažalo pak se j' z »Našen domaćen glason« nastavilo – arivala se j' složit jena grupa judi glumci-amateri ki su bili za to da se juden prikažu neke od našeh stareh užanci, a ča je još važneje, da se bude na domaćoj besede.  Radi te kunpanije i oduševjene publiki, Berto Lučić se j' zaspraven moral ćapat pisanja. Jena za drugun nastajale su kraće štorijice (»Va rakijnice«, »Idealan brak«...), a onda i malo veće kumedije (»Dota«, »Otepuhi«...). Berto Lučić je se sam režiral i glumil. Dogodilo se j' i to da je potla desetak let, delo tiste kastafske kunpanije zamrlo, ma j' od 1992. leta opeta se znova krenulo kad se j' opet osnovala dramska sekcija KPD »Istarska vila« Kastav. Pozvani su judi ki su voleli glumit i nastala j' nova glumačka družina ka se danas zove Kastafski pučki teatar i vaje za ten, nastale su nove kumediji Bertota Lučića keh su glumci navadili i to je bil početak Kastafskega kulturnega leta. Rabi posebe napomenut da j' ovista družina na čele z Bertoton Lučićen dobivala pohvale i priznanja na Festivaleh hrvatskeh kazališneh amateri, a Berto Lučić je za tekst i režiju dobil priznanje Hrvatskega sabora kulture. A zač je pisal, va jenoj svojoj autobiografije j' rekal :»Kad jedanput čoveku neč gre za rukun i kad vidi da su judi z  njegoven delon kuntenti onda se ni ča fermat, mora se poć napred«.
    Kako j' on šal naprvo pišuć, pozvali su ga z KUD-a Ivan Matetić Ronjgov oko 1979. leta , da bi i on doprinesal delu čakavske katedri. A da j' doprinesal, sigurno je, aš Društvo j' pod vodstvon Dušana Prašelja i oneh ki su bili va užen rukovodstve, storilo čuda Mantinjad pul Ronjgi, Večeri pul Matetićevega ognjišća, a bila su i druženja čakavac pul Ronjgi. Domaću besedu nisu držali mej četiri zidi lego su z člani Čakavske katedri obašli skoro se školi va Primorsko-goranskoj županije, povedajuć i čitajuć o našoj starine, užancah i vavek po domaću. Berto Lučić je va čakavskoj katedre ostal aktivan  se do kraja svojga živjenja (2002.), a radi njegove jubavi za čakavštinu, užanci i starinu, Ustanova Ivan Matetić Ronjgov, svojga člana neće nikada pozabit, a mi ćemo se i daje smet njegoven » Smešican«i kumedijan ke nan je njegovo teplo halubajsko srce zapisalo...
    »Smešice« (isječki z komedij) Botrinje, Matica, Zlatni pir, Talijanska penzija, Vela ženidba, Pred rastavun i Tištament su pul Ronjgi odigrali: Vojka Blečić, Meri Cech, Miljenko Valenčić, Zvonko Turak, Mirna Frlan, Fredi Šaina, Matea Lukić, Vesna Slosar, Floriano Slosar, Andrija Frlan, Jasna Kinkela, Ervin Jardas, Jasna Turak, Luis Slosar i Lorena Jardas, va režije Serđa Dlačića, a pod budnen okon inspicijentice Edite Valenčić. Šapićale su Sekana Grgurina i Gordana Jardas.


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285C285F28632863286328592863L

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 4/7


ča je čaSLIKOVNI RJEČNIK

Kvadar
 
Piše i slika Marija GRAČAKOVIĆ
 
Slika
javascript:openWindow('aspx/showimage.aspx?id=450328',365,520,'');

 
Kad pročitate ov naslov ćete morda pomislit: „Ča nas to Marija vrnjuje u školu? Kakova: kocka, kvadar, piramida...? Ča je kvadar?» Niki će se odmah domislit, sve ako su to zdavna učili, da je kvadar geometrijsko telo komu je „baza prvokutnik i koje ima šest strana, sve pravokutnici».
    Ma ne, ne mislin na ta kvadar, leh na oni okviri za slike, za letrati kih su nigda bili puni beli zidi naših starinskih kuć. Se spominjete? Danaska svi jimamo aparati i pune škatule letrati od sakakovih prilik: rojendani, proslav, putovanj, od piri da i ne govorimo. Ma ne kladamo jih u kvadar na zid. Sve su to spomeni kih poišćemo kad nan ča rabi i – opet zo šnjimi u škatulu. A nigda jih nisu bile pune škatule, ni bilo ni tih škatul, leh se ono malo lipih, šesnih, vridnih ča je bilo, za celi život kladalo u kvadar i na zid!
    Eko, tote smo! Za saku važnu priliku u život hodilo se je u studijo u Veju, al u Riku, letratat se. Za prvu pričest, za bermu, prstenovanje (zaruke), za pir, a posebojno su hodile cele fameje: otac i mat zo prestrašenu dičinu ka bi se bojala ča će njin to ta barba delat. A barba bi rekal: „Ne ukočeno..., ne gljedajte u aparat..., mene zabite, mene ni.» Ma vraga vas ni. A ča je to spod te črne krpe? Ma kako god bilo za šetemanu dan se je hodilo po letrati i najprvo se je nikoliko dan u njih buljilo, kontroliralo ako su svi lipo „ostali», da ni ki letrat pokvaril ako je otvoril usta, al na krivu bandu pogljedal. Ontrat bi se letrat klalo u kvadar i na zid. Kad bi ki prišal u kuću, najprvo bi pogljedal ča je to u kvadri na zid, posebojno ako je bilo i novih letrati i ako je morda ki z Merik prišal.
    Kvadri su bili drveni, sprida je bilo staklo. Danaska su plastični i od drugih matrijali, je jih zo rožice, al zo pužići i škrabljice polipčanih. Sve je više i malih kvadrići ki jimaju ozada „nožicu» za stat pa jih se klada na komodinu, na boro, a poslovni ljudi i političari jih drže na radni stol. U ta kvadrić kladu sliku svoje žene, tobože od vele ljubavi, ma šempre je sve to jena vela laž.
    I da, sve je više ljudi ki spomen od godišnjega odmora, od leta na more žele pospravit u kakov kvadrić koga kupe od „morskih» prodavači, a to su kvadri od pužići i škrabljic. Da sve bude „originalno». Vidila san čera u Bašku, kadi je još fanj turisti, kako kupuju takovi kvadri. I da znate i ja san jenoga kupila!
    I seda: ča me je domislilo na ovu besedu? Čitan knjigu od Jura Kaštelana »Pobude i prizori«. On na jeno mesto govori: „Bio je pravi nepatvoreni čovjek, kao 'iz kvadra', kako se kaže uz more.» Eko, nisan to znala, a ča ni lipo? Čovik kako zi kvadra! Pravi čovik! Aš u kvadar se ne klada bilo ča leh nič jako važno, lipo i vridno. Baren za gospodara od toga kvadra. Hvala profesoru Kaštelanu za ovu novitad. Seda i to znamo.


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285A286028632863286328592863B

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 5/7


Škura bura

Va Kastav i na Križišće

Piše : SLAVICA MRKIĆ-MODRIĆ

Slika
javascript:openWindow('aspx/showimage.aspx?id=450329',200,263,'');


Vrime j od trgadbi. Je za onoga ki ima ča za pobrat, a on ki nima zame takujin, posede se va auto i gre na prvu velu placu po grozje. Tamo ga j, kuliko san imela čut kakovog god da ćeš. Odsakuda, a kako grozju na bobice ne piše kade j raslo i zrijalo, onput on ki ga prodaje more reć ča god ga je volja. Me par da puno njih i reče, a siroti ljudi kupuju i plaćaju, da ni ne znaju ni ča, ni skud. Govori mi kolega Šuljo da kilo grozja na velo košta od četire i pol do šest kun, ma da ga se lipoga najde i za pet. Poveda da j čuda ljudi, i da trgovina gre fanj dobro, ča će reć da i ni takova mižerija kako si skucaju. A more bit i obrnuto – ča j veća mižerija, to ljudi već kupuju. Ako ćemo pravo, ča nan sen skupa preostaje leh napit se i kantat.
    Štajon od trgadbi i grozja govori da j ta drugi dan Bela nedeja. Bela nedeja va Kastvu, a Bela nedilja na Križišću. Kod mića san hodila na Križišće aš je nan, z bakarskoga kraja poć na Križišće naredneje leh poć va Kastav, a kad bi i šli va Kastav to ne bi bilo po nedelje leh na pondeljak kad je posajmica i kad je manja gnjeta leh je dan prvo, a i ceni gredu zdolun. Domišljan se da san va Kastav prvi put koraknula kod mula od kakoveh deset let. Me par da san bila peti razred osnovne i šla san po nekakovu nagradu za sastav ki san napisala o Velomu Jožu. Mane j to bilo koda gren Meriku, na kraj svita. A kad smo konačno učiteljica i ja došle na tu priredbu, kad san zašla va Kastav zajedno san znala da mi to neće bit prvi i zadnji put. Zapijažal mi se j na prvi korak. Ta osjećaj se do dandanska ni promenil, kod ča se ni promenilo to da ja, ako radi dela ne moran, nikada ne gren na Belu nedelju leh na Beli pundejak. I to ne zato aš san škrtobija, kamo sriće da san leh jedan sled šparneja leh san, pa da gljedan kako ceneje pasat leh zato ča me ti kastavski pundeljki vrnjaju va djetinjstvo kad je se bilo drugačje.
    Retko arivan i na Križišće, ma kad dojden vidin da j i tamo se drugačje leh je nekada bilo. Vina je, grozja je, tanca se i kanta i danaska, ma ni to već to. Mat mi uža reć tr da ni ja nisan ista kod ča san onda bila. Znan ja se to i prež nje, ma sedno, nekako mislin da san se manje promenila leh ča su se promenile te fešti. Ja bin i sad najraje petešića komu se vrit puše kupila, rad bin šla na ringišpil, rad bin kumediju komu načinila, ma petešića j teško nać, ringišpil ni onakov kakov bin ja otela, a kumediju ionako delaju si, i saki dan. Za to ne rabi čekat ni Belu nedeju, ni Belu nedilju, kumedije nan ne fali. Jedino ča ovoj sakidanjoj niki ne uživa.


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285A286128632863286328592863E

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 6/7


Jena od Jardas

Merlin jači


Slika
javascript:openWindow('aspx/showimage.aspx?id=450330',400,403,'');
 

Kakov drugačeji merlin bi mogal bit, lego ovakov pul Jačega, kako zovu Darkota Jardasa od Jardas! Pune lehi su mu salati, fažola, konpira, špinači, od ruž ni grozja da se ne govori! Istina je da se je priroda, ale neki drugi malo s ten merlinon poigral, ma trebe reć, da je pogodil jušto pravega gospodara. A morda i to pomore ča već let Jači zvonci nosi z Halubajskemi zvončari, a i vnuka mićega je s ten zarazil. Da je više takoveh nonoti i takoveh vnuki! Kako je počelo, ni straha da neće bit još takovega merlina pul Darkota. Ma kakov Guiniss, Jardason hote!

B. KUKURIN


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285B285828632863286328592863W

[Ljudevit Kaj]

Réčki „Nôvi list“, 01.10.2009. / Kolumně
Beseda
7 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 7/7


zapisano va srcu

Generalna prova za »okruglu« feštu
 
Nekadajni školani ki su finili lovransku osnovnu školu pred 37 let, vrnuli su se va svoji najlepši dani...

Aleksandra KUĆEL – ILIĆ
 
Slika :
Si ki su mogli su prišli – nekadajni lovranski školani i njihi učitelji
javascript:openWindow('aspx/showimage.aspx?id=450348',400,352,'');


Živjenje je vavek parićano složit kakovu lepu i srdačnu štoriju. Tako su na red prišli Lovranci ki su nekada hodili va osnovnu školu i prvi put su se pokle puneh 37 let odlučili opet skupa nać.
    Tako su se tri razreda, 8.a, 8.b i 8.c Osnovne školi Viktora Cara Emina lepo dogovorili i seh ki su bili va generacije 1971./72. na jenu srdačnu feštu pozvali.
    Kako su nan povedeli, od nekadajneh 75 školani, na puntament je prišlo njih 44, a šest od njih već ni živo. Va njihovu čast, kako i va čast seh nastavnici ki su umrli, šli su i na cimiter.
    A kada je prišlo vreme od fešti, va jenoj šesnoj kumpanije su se našli i još i njihovi razrednici Tereza Babić i Vinka Vlašić. Domisleli su se i pokojnega razrednika Hanibala Radoševića, kega je na tistoj večeri zamenil Milan Babić, a od profešuri su prišli još i Vesna Baldigara, Dorti Kinkela, Ana Kričković i Mira Laković.
    Va živote ne mora baš se bit okruglo, pa tako ni njihova letnjica ni bila »okrugla«. Kako nan je povedela Ranka Janjetić, odlučili su se nać na vreme, kako bi se pripravili za iduću feštu, ka će bit kada budu slavili 40 let otkada su šli ća z osnovne školi. Baren, kako školani.
    – Od kolijevke pa do groba – najljepše je đačko doba – poveda jena narodna poslovica, a moglo bi se dodat i da je sako doba na svoj način lepo i kada se gjeda na leta ka su pasala, čovek vavek pomisli »ma kako nan je bilo lepo«. A da bi se tako moglo pomislet jutra, va onen ča je lepo trebe znat uživat danaska, jušto va oven momente i ćapat ga ča bi se reklo – z jenun velun žlicun. More i z dve ki more.
    Inicijator vele lovranske fešti ov put je bil Božidar Grgur i kako smo doznali, si su bivši školani ki su mogli prišli, pa čak i jedan šinjor ki biva va Njemačkoj. Prišal je da bi videl svoju nekadajnu kumpaniju ka se je va dobren štimunge domišljala lepeh dani ki su pasali, povedala štorije i štorijice i kako na jenoj generalnoj prove, pripravjala se za onu glavu feštu ka će bit do tri leta.


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285C286028632863286328592863Z

[Ljudevit Kaj]

Vuz ljubilarni 800. broj „Besédě“ – čakavskoga priloga Nôvoga lista v četrtek

* * * * * * * * * * * * * * * * * * * * * * * * * * * * * * * * * * * * * * * * * * * *

Réčki „Nôvi list“, 03.12.2009. / Kolumně
 
Beseda

9 člankov na čakavskomu

Pregled:
http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D2863286328632863286328592863N

* * * * * * * * * * * * * * * * * * * * * * * * * * * * * * * * * * * * * * * * * * * *
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 1/9


BESEDE ZA 800. ROJENDAN NAMESTO ČESTITKI

Judići naši, je to moguće?
 
V rukah držite osanstotu Besedu. Veli je to kup novin, ki se nabral va 800 šeteman prez prestat. Novi list je jedina novina va Hrvackoj, ka j' imela jenu pa dve, a sada ima četire stranice pisane na domaćen zajike

Piše: Cvjetana MILETIĆ
Slikaju: Marin ANIČIĆ, Marko GRACINi Sandro RUBINIĆ
 
Slika:
Beseda je »pisani i slikovni dokument«
javascript:openWindow('aspx/showimage.aspx?id=462997',400,513,'');


Ljudi moji, je li to moguće? Zazijal je naš poznati sportski komentator Mladen Delić. Danaska to zijamo mi. Judići naši, je to moguće? Je. V rukah držite osanstotu Besedu.
    Veli je to kup novin, ki se nabral va 800 šeteman prez prestat. Najprej je bila tiskana na jenoj, pak na dveh stranicah. I vavek je falelo mesta. Onda je Besedu i urednicu zadela nagrada HND-a Marija Jurić Zagorka za najboje urejenu rubriku va celoj Hrvackoj, s čen se naša Aleksandra Kućel Ilić – Anda s pravon štima i to su va Noven liste prepoznali pa su Besedu poduplali. Pozlatilo njin se.
    Još neš je dobro znat. Novi list je jedina novina va Hrvaskoj, ka j' imela jenu pa dve, a sada ima četire stranice pisane na domaćen zajike. To znači da se va Noven liste štima svoj kraj, svoj govor i svoj zajik! Tr tako i tako od onega s čen se čovek rodi i ča s prvemi koraki navadi, ne more se pobeć.
    Beseda se rodila jenega četrtka dana 18. va martinjsken mesece leta 1993. Još ni punoletna, magar je napunila lepeh 16 let. Z oven brojon i va sedavnajsto je zamastila i zaslužila onu Robićevu "Sedamnaest ti je godina tek..."
    Koliko je česa tiskano na njijeh stranicah, teško je najušto reć, ma neš slikun a neš z besedun zavavek je va spomen pospravno više od 700 dobreh, vredneh i štimaneh žen, muži, dovic, dovac, mladić i divojak, pa i dece ka su to zameritala. Za seh njih znat će se i potle sto let. Jušto kako se danaska išće knjiga "Pet pitanj za..." tiskana za 400. broj, iskala bi se i nova da ju je storit za oneh ki su se našli va oveh drugeh 400. broji. Si su ti judi na svoj mod zasenjali ovo vreme s početka dvajset i prvega veka. Kakogod neki danaska išću stari broji za videt kako se j' svojni govorilo, delalo, živelo, tako te neke nove generacije iskat današnje Besedi za doznat kako se menjalo i živjenje, i užanci, i govor... A judi, si keh smo pospravili na stranice Besedi, živet te zavavek i ovo njin je najlepji spomen.


Pisat, pisat i samo pisat
   
    Beseda je »pisani i slikovni dokument«, ki će z vremenon dobivat na valore pa će i za nju jenega dana govorit: »Ča stareja, to vredneja!«
    A koliko te si ti broji Besedi vredit za jeno pedeset let, ne znan. Ma da te ih iskat, znan! Danaska samo rabi poslušat srce i delat po duše, a to znači pisat.


    Pul pogovori seh kraji Lepe naše zapisano je i more štorij, užanci, smešic, pjesmic od školani... Va zadnjo vreme zapuhala j' i Škura bura, a saku drugu šetemanu zapahne nas i Dih tramontani. Da se ne pozabe besedi i govor, sakega se četrtka pokaže ka stara reč, rič, riječ, beseda, besida obučena va štoriju od zajika. I s ten se struke prikuntentalo. Da si oni ki vole čitat, vole i pisat, imeli bimo i rubriku va koj nas se hvali al špota. Ma kako naš čovek ni navajan zamerat se, raje pozabi ča j' otel reć leh da zame lapiš v ruku. Zato nas hvala potrefi na ceste, preko telefona, tu su i SMS poruki, pa mejli, ma mi starinski još vavek više štimamo pismo al hartulinu. Da se hvalimo. Tu sledić spodabjamo onemu Bodulu, ki j' na rive zijal da ima kuću, vilu i vikendicu, brod i barku i još miću brodicu pa kad su ga pitali ča to prodava, je rekal: »Niš ne prodavan, samo se hvalin. «
    Danaska se i mi, bez zameri, hvalimo. Lih malo. Va Besede je do sada pisalo jeno tri stotine judi. Nabrojit seh ni moguće, a preskočit nekega bil bi greh. Zato treba pohvalit seh ki su se javjali, posebe školani ken je to bil prvi korak. Oni oštajonani, zreli al vremeniti pisali su o semu i sačemu. Tako je va 800 broji posložena dota cele Liburnije, Kastafšćine, Halubja i Gromišćini pa se zdolun do Kirije i preko mora do Bodulije. Sako toliko javili bi nan se s Hvara i Slavonije, Zagreba i Slovenije, ma anke i z Gorskega kotara. To j' dobar senjal da Beseda sakamo zajde. I sakamo pride. Znamo da ju svoji svojen šaju va Meriku, Australiju, Novi Zeland, Švedsku, Irsku, va Taliju i Austriju, a pred malo čuli smo da su neki broji finili i va Izrael. Lepo je čut pohvalu s teh kraji i doznat da se Beseda i na internete čita. A nan od pohval krejuti vilezaju.
    Saku Besedu treba i lepo obuć. To delaju fotoreporteri i grafički urednici. I njih je dosta. Aš Beseda mora bit vesela i šesna, posebe sada kad je pasala va sedavnajsto leto, a za mesec dan i za osavnajsto leto tiskanja. Kad tako zrihtanu na četire stranice urednica zlamena i pusti va živjenje, delo je za tu šetemanu odbavno. Sad pošne Besedin hod od ruk do ruk, od ust do ust.
    Reču da novina živeje samo jedan dan. A Beseda živeje čuda duje. Posebe pul oneh ki ju spravjaju, a je i oneh ki imaju si broji od prvega do zadnjega. Neki ih spravja za spomen, neki za struku. Tako se broji čuvaju doma, po knjižnicah i po školah, posebe na fakulteteh od zajika, folkloristike i etnologije. Neken je gušt pisat, iskat prave besedi i pokaževat kako se i na čakavice more se reć, samo trebe umet. Drugen, bimo rekli juden od struki, Beseda je zvir na ken se još vavek vidi nekadajno živjenje i užanci, posebe govor sakega sela i vasi i to još na praven najstarejen hrvasken zajike.


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285A28612861285F28632863286328592863C

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 2/9
 

razgovor: MAGISTRICA AMALIJA ZORIČIĆ, PJESNIKINJA NA TRI ZAJIKA, ČAKAVSKOMU NOVLJANSKOMU, KNJIŽEVNOMU HRVATSKOMU I NJEMAČKOMU

Uzburkani stih va portu nade
 
Prevela j' na njemački jezik knjigu Milana Krmpotića s njegovimi haiku pjesmami, i dala svoj znatan doprinos knjigi »Živjeti s glazbom«, o životu i glazbenon stvaranju Ljube Kuntarića, ki je i uglazbil mnoge Amalijine stihove
 
Slika:
Profesorica i magistrica Amalija Zoričić
javascript:openWindow('aspx/showimage.aspx?id=462999',313,520,'');

Amalija Zoričić, Novljanka, ka j' pasala svoj radni krug profesorice od maloga sela odzad Velebita, pa do Varaždina kadi j' živela svoje najvažnije leta formiranja – i afirmiranja – ko pedagoška djelatnica, nakon trejset i tri leta od nikidan je va mirovini. Na prvi pogled nespojivo s temperamenton kakov joj znamo i ki joj ne da mira, pa i va ove nove dani nastoji planirat novo vrime va novomu »rasporedu sati«.
    - Kad smo se nedavno rastajali va Srednjoj školi doktora Antuna Barca va Crikvenici bilo je i rožic i suz, ali i onih besed ke se pamte: »Bili ste nan dragi i strogi ali ćemo vas pamtit po dobru i – volimo vas, profesorice«, pripovida profesorica i magistrica Amalija Zoričić va Novon, va kući va koj se i rodila.
    »To su ti moji krugi okolo pišćaca kad ga hitite va more«, a ti nje i naši primorski obli pišćaci, opivani su va nje stihu već odavna. Krugi su se širili ne samo do Varaždina i Zagreba nego i dalje…
    Ona je književnica i prevoditeljica, profesorica njemačkoga jezika i književnosti, i povijesti umjetnosti, znanstvenica ka j' magisterij 'z područja književnosti, s posebnin osvrton na njemačku književnost, stekla pred skoro će bit dvajset i pet let, i to pod mentorstvon prof.dr. Viktora Žmegača.
    Razgovaramo va Amalijinoj rodnoj kući i spominjanje doktora Žmegača ju potiče da pokaže njegovo kapitalno djelo »Od Bacha do Bauhausa« va komu j' i posveta ovoga nje mentora: – Dragoj kolegici, pjesnikinji i prevoditeljici, znanstvenici Amaliji…
    Svestrani intelektualac i enciklopedist, germanist Viktor Žmegač, potaknul je i Amaliju na pojedina angažiranja, prava posvećenja sakomu delu ko j' poduzimala.
    Usavršavajuć njemački jezik pasala je najbiranije sveučilišne gradi va Njemačkoj – Heidelberg, Berlin, Muenchen, Weimar, kadi j' pripremila i diplomski, pa Dresden, hospitirala poli benediktincih va Sankt Ottilienu…
    - Profesor Žmegač je zaslužan ča san bila počašćena prevest na njemački jezik naših Balotu i Domjanića, a to je objasnil na ov način: – Vi ste, Amalija – rekal je tun prilikun dr. Žmegač – čakavica, pjesnikinja i germanistica, dakle po svim trima osobinama i svojim darovitostima kompetentna za taj pothvat!
    Kad bimo na karti Evrope ucrtali Amalijine puti bili bi to krugi ki bi zagrlili i mediteranski Zadar, kadi j' studirala, pa onda barokni Varaždin, kadi ju j' uz stih i književnu besedu oplemenila i glazba, likovna umjetnost…


Puna san ljubavi tvoje                         

Kad umorna                                               
do zore ne sklopin oči                               
čeznen more                                         
misli se roje                                                 
duša tugun poje                                           
a puna san ljubavi tvoje.                             
                                                                   
 Ljubav me tvoja uči                                   
 da leta niš ne znače                             
 i vrime zimljen                                       
 kako god oću                                     
 zač ona pali luči                                       
 ke va nebesa zrače.   

Amalija ZORIČIĆ 
 

    - Tamo san upijala se te emocije i senzacije emocionalnoga sazrivanja, a kad san prišla va Novi onda me j' motivacija navela i na najbolji, najlipši mogući način primorala da počnen objavljivat. Moji su odlasci z Novoga va Varaždin bili ispunjeni nostalgijun za zavičaj ki san ostavljala a moji dolasci v Novi, kad san bila dalje od baroknoga grada, budili želju za ponovnin vraćanjen va Varaždin. Tamo san najveći del svoje pedagoške prakse provela va Zavodu »Arboretum«.Va Gradu Varaždinu bila san član Predsjedništva va Muzičkoj omladini. Kad san prišla 1991. va zavičaj, va svoj Novi, od tad predajen va Srednjoj školi va Crikvenici. Novi mi j' odvavik bil luka, porat, riva i sidrište s koga san mogla poć dalje, ali i vraćat se…
    Amalija piše pjesme na rodnoj novljanskoj čakavštini, na književnon jeziku i na njemačkomu književnon jeziku, a va sakon stihu osjeti se da j' rođena pjesnikinja. Objavila j' trinajst knjig: »Pišćaci«(1992.), »Petrovo uho«(1994.), »Pred licem mora« (1995.), »Psalmi zore«(1997.),»Vedrine«(1999.), »Žalo«(19999.), »Das Gesicht des Meeres«(1999.), »Vrutak vruće lave« (Sibirea, Senj, 2000.), »Sedefasti oblak«(2003.), »U valovlju stati« (2005.), »Šapat zvijezda«(2005.), »Očima duše« (ogledi i recenzije), »Mrvice tajne tuge«…
    Posebno j' ponosna na to ča su joj iznimno plodne 1999. godine objavljene pjesničke zbirke na tri jezika, na čakavštini, na hrvatskomu književnom i na njemačkomu književnomu jeziku –»Žalo«, »Vedrine« i »Das Gesicht«…
    Piše recenzije i kritike na književna djela i likovna umjetnička događanja, član je riječkog Ogranka Društva hrvatskih književnika, Društva za književnost i kulturu »Senjsko književno ognjište«, Novljanskoga književnoga kruga Katedre Čakavskog sabora »Novljansko kolo«, KUD-a »Ilija Dorčić« Novi Vinodolski, Međunarodnoga instituta za književnost pri Uredu UNESCO-a za književnost, Društva hrvatskih učitelja i profesora njemačkoga jezika u Zagrebu, Hrvatsko-austrijskog društva Rijeka, laureat je godišnje nagrade Grada Novog Vinodolskog, dobitnica priznanja Međunarodnog instituta za književnost za doprinos kulturno-umjetničkom stvaralaštvu u RH…
    Va Varaždinu j' Amalija vodila dramsku radionicu na hrvatskomu književnon jeziku a va crikveničkoj Gimnaziji dramsku radionicu »Faust « na njemačkomu jeziku. S »Fauston« je i s jednočinkami i dramoleti pasala pozornice i škole od Novoga, Crikvenice i Senja do Zagreba i Dubrovnika, a od Bavarskoga ministarstva za kulturu i Goethe-Instituta Zagreba često nagrađivana skupa svojimi đaci.
    Prevela j' na njemački jezik knjigu Milana Krmpotića s njegovimi haiku pjesmami, i dala svoj znatan doprinos knjigi »Živjeti s glazbom«, o životu i glazbenon stvaranju Ljube Kuntarića, ki je i uglazbil mnoge Amalijine stihove…
    Ima puno ostvarenoga za sobun i još više planiranoga, ča se želi i nada se da će napravit. Emocije povezane uz stih nezaobilazni su način kako ona gljeda i vidi svit i život okolo sebe i svit ki žive va njoj. I ona va njemu, va ton životu. I nje svit stiha, glazbe i likovnosti. Nemirni duh stvaranja i uzburkani stih pusti ju samo na kratko va portu smirenja i nade ča joj znači Novi i rodna kuća, mama, sićanje na tatu i rod…
    Surađivala j' i surađuje s časopisimi More, Val, Galeb, Vedri dani mladosti, Mravinjaci, Vijenac, Sutra, Dometi, a znanstveni radovi i stručni članci, te recenzije, moremo nać va časopisu »Fluminensia« Filozofskog fakulteta v Riki, povremeniku za književnost i kulturu »Usponi« Senjskog književnog ognjišta, »Novljanskomu zborniku«, »Vinodolskomu zborniku«, va godišnjaku Srednje škole doktora Antuna Barca va Crikvenici »Postignuća i trenuci«, va izdanjima Goethe-Instituta…
    Novo vrime ko joj prihaja potiče ju i na nove misli, nove emocije povezane s motivacijskimi duhovnimi izazovi, a vraća i na nike neostvarene ambicije povezane uz doktorat, ki će morda sad prit opet va bliži plan…
    Amalija je pjesnikinja po vokaciji, po rimi, po stihu i po pjesničkomu stilu. Ona svoj stih i svoju pismu i interpretira uživljavajuć se i darivajuć taj doživljaj publiki ka ju sluša a ona ju unosi va svoju pismu.

http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285A28612861286128632863286328592863T

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 3/9
 

 tako se reče

Kemu krivo, kemu pravo
 
Ako ovo čitate, znači da j' urednica zadovojna i da ćete me još ki put nać va BESEDE. Onput ćete me opet, kot nekada, zvat doma, pisat mi, fermat na mrkate al va butige i pitat ako znan al ako san čula tu i tu poslovicu al izreku

Piše: Ivanka GLOGOVIĆ KLARIĆ
 
Slika:
Štorijice s poslovicami ponutila za Besedu i – Ivanka Glogović Klarić je nakon čuda vremena opet s nami
javascript:openWindow('aspx/showimage.aspx?id=463003',301,520,'');


Se nadan da se još ki tr ki od vas spameti kako ste čuda let čitali moje Besedi va BESEDE, a onput, najedanput – finjena baraka! I to ne zato aš nisan otela, al više nisan umela pisat, leh su počele vredit neke druge reguli. Pomirila san se s ten, aš trebe j' čut si zvoni, ma kad san šla za ten da se neki judi još vavek naprvo javjaju va BESEDE – a ne verujen da se to pišu za niš – rit mi ni dala mira i zvala san gospu urednicu BESEDI. Ona mi j' neke stvari lepo špjegala, pa san videla da vrag ni tako črn kot ča zgjeda.
    Ne moren više pisat Besedi, aš bin sad saki put morala dodat i sliki, pa san gospe urednice predložila neš ča san ovi dani, čisteć ormari, našla zahićeno.
    Najme, pred nekoliko let san parićevala treću knjigu »Beseda«, pa san otela dodat malo neš novega. Napisala san nekoliko štorijic rabeć izreki i poslovici, i uredniku libra se j' to pijažalo. Ja, ma reče se da čovek snuje, a Bog odlučuje: se se j' neš promenilo, šlo j' atorzijo, ča će reć da je se šlo k vragu i niman više nadi da će ti libar bit tiskan, pa san odlučila se to ća hitit.
    Onput san se, sa sreća, spametila oniste ako si ne pomoreš sam, neće ti ni Bog pomoć, pa san te štorijice s poslovicami ponutila za BESEDU.
    Da skratin – ako ovo čitate, znači da j' urednica zadovojna i da ćete me još ki put nać va BESEDE. Onput ćete me opet, kot nekada, zvat doma, pisat mi, fermat na mrkate al va butige i pitat ako znan al ako san čula tu i tu poslovicu al izreku.
    A mane će – nakon čuda vremena – bit rit na meste, pa kemu krivo, kemu pravo.


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285B28582858285B28632863286328592863Z

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 4/9
 

 ča je ča: SLIKOVNI RJEČNIK

Ocvirki
 

Piše i slika: .....
 
Slika:
javascript:openWindow('aspx/showimage.aspx?id=462998',400,403,'');


Kuliko bi samo kumedije okole jene besedi moglo bit. Najprvo, bi mi neki mogal prigovorit da san jugonostalgičar (pak ča ako i san!!!), aš se je za saki Dan Republiki prasci ubijalo i ocvirki delalo, po celoj ondašnjoj našoj zajedničkoj države, pak se ne sme zaradi ocvirak spamećevat onega ča je bilo. I danaska je to isto štajon za prasci ubijat, samo ča ni slobodneh dan.
    A druga još lepča stvar je da su se neki šegavi domisleli pak bi oteli ocvirki registrirat kot pravi hrvaski proizvod, pače, ne ocvirki leh čvarke. Tako se reče za ocvirki po hrvaski. Najbrže da je to i storeno. Kot da drugde ni prasac ki se ubijaju i od čigovega se sala ale panceti ne delaju ocvirki. Morda zaštićeni hrvatski proizvod čvarci je od prasac ki imaju hrvasku domovnicu ale pasaport. Ma neka njin budu čvarci – samo ča tako reču i va Srbije – pak ča je sada čigovo? Ki je kemu prasci ukral, ale morda ime?
    Najhuje je to ča od čvaraka trubila delaju medjunarodni spor i vas njih brižan nacionalni ponos je u tim čvarcima.
    Mi, pul nas, na sreću imamo ocvirki, a tako reču za nje i Slovenci. Opeta bratstvo i jedinstvo. Ča se more kada su ti naši zajiki si z istega korena, zajedničkega zajika zrasli. Neki misli da je to morda iranski, da je tako ne bilo niš od prasac jili, pak ni ocvirak. Lingvistčki to je jako komplicirana beseda, i čvarak i ocvirak prihajaju od stare besedi cvriti ku su imeli i Slovenci i naši kajkavci a nahajal se je i va Vrbnike, a označuje ono kada se mast topi. Tr kad se ocvirki delaju mast črči.
    I va Slovenije je to neka sorta nacionalne hrani, ma kako i se drugo, saka kmetija, ale regija dela drugčije ocvirki i drugačije jih ji. Neki jih posoli, neki ji s kapulun, neki s kapuzon i kompiron, kako ki voli. Neće valda pul sakega pijata stat carinik i pokušat čigovi su to ocvirki. Slovenci baš nisu tako zagriženi aš smatraju da se ocvirki delaju po celoj Evrope kad je prasac i prašćevini. Jedino ča se
    va Slovenije, i po Evrope pak misli da ocvirki ni panceta nisu zdrava hrana, aš da je previše smošna. Morda je tako. Samo ča su judi nekada čuda fizički delali, pak ni bilo vremena za holesteroli i se ča sten gre. Za delo trebalo je energije ku i panceta i ocvirki davaju.
    Istina je da je kuća sa smrdela po maste ka se je topila kada su se ocvirki delali, ma pokla jih je bilo gušta jist. Pak još kad su onako dosti stišnjeni i škuro kafeni, ne more se čovek fermat jist jih. Danaska se kupuju va butige i nisu baš ceni. To je fanj draga delicija. I neka je. Kemu se grusti z prasci bacelat, neka drago plaća ocvirki.
    Brižni prasci od njih se sačesa dobrega za jist dela i kumbasice, olita, panceta, pršut, zarebrnik, ocvirki, a kada se nekemu ča grdo reče, mu se reče da je prasac. Ma neka je čuda oneh praveh prasac, a onisteh ki se delaju fini, keh su pune novini je ionako preveć - sama gnjusarija i škoda od njih.


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285A28612861286028632863286328592863Q

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 5/9
 

 NA SVETLO DANA JE PRIŠLA 15. KNJIGA »ČAKAVČIĆI PUL RONJGI«

Školani pišu se boje i boje


Piše: ....
 
Slika:
Čuda je besed teklo te večeri va grade na Rečine
javascript:openWindow('aspx/showimage.aspx?id=463000',400,404,'');

Va punoj dvorane Pomorskega i povijesnega muzeja, utorak večer, 24. martinjskega meseca, podeljene su nagradi za ostvarenja na čakavsken zajike. Uredništvo je ocenilo da su ovoletnji radi fanj boji nego lanjski, ča bi reć da se školani više izgrađuju kako pravi pisci.
    »U svakoj se riječi zrcali vaša duša, naročito kad pišete o dragim licima i voljenom zavičaju. Time potvrđujete da njegujete i čuvate materinji jezik, ili naprosto, poštujete jezik svojih prijatelja, učeći ga«.
    Ove lepe besedi uputilo je Uredništvo knjigi »Čakavčići pul Ronjgi« sen školanon ki su i ovo leto, po petnajsti put poštimali »Proljeće pul Ronjgi« i svojemi poetskemi i proznemi radi obogatili čakavsku baštinu.
    Uredništvo, va sastave Cvjetana Miletić, Ljubomir Stefanović i Zdravka Žeželić - Alić, odlučilo je nagradit sledeći školani: va kategorije učeniki mlajeh razredi, 1. nagradu je dobila Emily Brumnić (2. r., PŠ »Brseč«) za pjesmu Čeper, dodeljene su tri 2. nagrade, a dobili su ih Roberta Šabalja (3. r., OŠ »Gelsi«) za pjesmu Dijalektalni multipraktik, Kalista Pohl (1. r., OŠ »Vladimira Nazora)« za pjesmu Božić i Lea Hviždalek (4. r., PŠ »Šmrika«) za pjesmu Moje mesto, dok su 3. nagradu podelili Makso Frančišković (4. r., PŠ »Praputnjak«), za pjesmu Va mojoj kuće vavik neč fali, Mateo Šepić (1. r., PRO »Rukavac«), za pjesmu Daž, Enea Abramović (2.r., OŠ »Turnić«), za pjesmu Jaglac i Anastazija Božić (3. r., OŠ »Dr. Andrija Mohorovičić«), za priču Moja familija.
    Va kategorije školani starejeh razredi, prvu nagradu osvojil je Mateo Kirinčić (8. r., PŠ »Dobrinj«), z pjesmun Čovik z mora, tri druge nagrade dobili su Mate Mrša (5. r., OŠ »Sveti Matej«), za pjesmu Oreh, Gea Ujčić (7. r., OŠ »Dr. Andrija Mohorovičić«) za pjesmu Lanterna i Leo Brdar (8. r. OŠ »Vladimir Gortan«) za pjesmu Stomorina, dok su treću nagradu osvojili Bruno Štefančić (8. r., OŠ »Vladimir Gortan«) za pjesmu Užanci, Mateo Matušan (6. r., OŠ »Maria Martinolića«) za pjesmu Jesen, Andrea Domijan (7. r., OŠ »Kraljevica«) za pjesmu Kirska mlikarica i Damjan Francetić (7. r. OŠ »Fran Franković«) za pjesmu Bez inspiracije.
    Dve Ekološke nagrade dobili su Leo Brdar (8. r. OŠ »Vladimir Gortan«) za pjesmu Primorske minijature i grupa učenika 3. i 4. razreda PŠ »Kukuljanovo« za pjesmu Moderno življenje dok su učenici OŠ »Škurinje« (Ana Jelinić, 1. r., Michella Galich 1. r. i Veronika Rigović, 1. r.), osvojili Skupnu nagradu za pjesmu Ča je jubav?.
    Zbirka je obogaćena i z radi učeniki storeneh va likovneh radionicah. Izbor najbojeh likovnih ostvarenji storil je likovni pedagog Boris Roce, a čast da ukrasi naslovnicu ovoletnje zbirki pripala je radu učenice Emilly Komadina, z 4. razreda OŠ Vladimira Nazora, Crikvenica.
    Na natječaj kega raspišuje Ustanova Ivan Matetić Ronjgov prijavjena su 482 rada z 44 školi. Napisalo jih je 326 školani, z kemi je delalo 88 voditelji. Se je veći broj mladeh ki ziberu čakavski dijalekt za svoj izraz. I jako veseli ta činjenica da dečica štimaju i vole svoje, svoj zajik i svoji koreni. Se ono ča se dogaja va dečjen živjenje, oni su simpatično povedeli kroz priču i pjesmu. Povedalo se tako o sakidajneh igrah, o jubavi, o željami i nadanji, o familije z ke prihajaju i o rodnemu kraju kega iskreno i jako vole. I ova, kot i oneh 14 knjig prvo, bogatstvo je lepoti, jubavi i vedrini djetinjstva povedeneh z dečjega srca. Sako mlado leto z Matetićeveh Ronjgi, tamo z Glavice, kade ni tujice, polete dečica kot tičići, pak pišu i rišu. Prihajaju z Gromišćini, z Bodulije i Kirije, i z gradini pul Rečini. Povedaju o modernemu živjenju i z besedami slikaju svoje žeji.
    Čuda je besed teklo te večeri va grade na Rečine. Zlevale su se z okolneh bregi, okolneh mesti, da bi se stopile va jenu reku ka se j' razlela va more, more jubavi i prijateljstva, more besed , ko nikada neće presušit, aš naslišajuć ovu dečicu, sigurni smo da se domaća beseda neće presušet. I neka ne da!


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285B28582858285828632863286328592863V

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 6/9
 

 Škura bura

Fanj je pota va broju 800
 
Piše: Slavica Mrkić Modrić

Slika:
javascript:openWindow('aspx/showimage.aspx?id=463001',200,263,'');

 
Ki'vo dan dohaja mane Anda, ale Aleksandra Kućel – Ilić, ča će reć glavna i odgovorna od oveh našeh četire stranice »Besede«. Ni mi bilo ćaro ča bi sad ona aš njoj baš ni običaj pohajat po redakcije i još brižna ni ni usta oprla, a ja san njoj već šćeto neto rekla da niman vrimena, i da neka gre komu drugomu naručit to ča j mislela mane. Ja, tr znate da j napad odvavek najbolja obrana, a zaspraven niman vrimena ni za poć curat. Intanto j ona brižna stala va pol koraka i sa onako fina i mehka i va besede i va duše rekla – ma samo san ti otela reć da nan je 3. ovoga meseca, ale četrtak kad je na te red za kolumnicu osanstoti broj. Drek je mane bilo neugodno ča san zijala prvo reda, obrnula san se i rekla njoj – čestitan Anda, fanj je pota rabilo za načinit osansto »Besed«. I je, aš to j va ovo ludo vrime i z nami semi ludemi va tomu istomu vrimenu težak kruh.
    Još pred puno let san od jedne kolegice ka j delala s manun, a srića Bog da već ne dela, čula da ta svahili zajik ki povedamo moj kolega Gromičan i ja ni lahko ni naslišat, a kamo li čitat, i da njoj opće ni jasno ki opće čita te naše kolumni. Na nju ne rabi trošit besedi, aš ča j bolje. Ona i takovi kod ča j ona nikada neće dokončat, ma ni da živeju kod Metuzalem da za povedat, čitat i pisat po čakavski ne rabi škola, da ni bitno kade si se rodil, leh kade si se zgojil, jedino ča moraš va sebe imet je ljubav za svoj zavičaj, za ljudi, za zgradi, za saki kamik i saki valić, saku tičicu i saku rožicu, za sako slovo va domaćoj besede. Neki to ima, neki nima, a sa srića da j onih ki imaju fanj i takovi čitaju, pišu, naslišu i guštaju i va ovoj rubrike »Novoga lista«, i va drugemi tekstimi pisanemi po domaću, i va radijskeh ale televizijskeh emisijah va keh je ča doma.
    Tr »Besedu« su kod neš ča vredi prepoznali ljudi od struki pa j 2007. leta dobila nagradu kod najureneja rubrika, ča j bitno, ma ni tuliko koliko j bitno da ju prepoznaju i od četrtka do četrtka komać čekaju mnogi. More neki reć da j ona kod geto, ni me briga, aš onaj ki ni nikada bival va njoj, ki ju nikada ni posjetil ne zna ča j ona. Najprvo mesto na komu se poveda, misli i piše po domaću, mesto na ken i oni ki nisu čakavci moru čuda toga nać za se, navadit zajik i užanci regiona va ki su se doselili, mesto na ken se oni ki ga štimaju ki put nasmeju, ki put rastuže, ki put zanjurgaju.
    »Beseda« j kod jedan mići vrtić va ken si sade i seju, ma da ni vas ki čitate, pozivate i volite nas takoveh kakovi smo, niš od toga vrtića ne bi bilo. Zato, do osanstotoga broja smo dorivali, a da bi i dalje, ne pozabite na zalevalnik va ken držite su ljubav i povjerenje s ken nas saki četrtak počastite.

http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285B28582858285928632863286328592863Y

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 7/9
 

 kantunić od otročić

Slika:
javascript:openWindow('aspx/showimage.aspx?id=463002',400,432,'');


Čovik z mora

    Teplo sonce jutron me zbudi,
    lipo more pod poneštrun mi šumi.
    Tičići mali na stablih kantaju,
    o najlipšen kraju na svitu pravjaju.
    Kot mali po moru son lumbarda,
    va moru plava i zo rivi se hita.
    Z kumpanijun se smel i igra,
    za druga mesta na svitu nis pita.
    Ali vrime je lumbardalo,
    koti ludo pasivalo.
    Koti mulac son zaspa,
    a koti mladić se sta.
    Va školi son uči,
    na fakultetu bi.
    Va Zagreb se preseli,
    zo fureštun se spravi
    i fameju napravi.
    Vrime je pasivalo,
    koti ludo lumbardalo.
    Koti mladić son zaspa,
    a koti dede se sta.
    I vavik son vnučićen svojin pravja
    o moru i žalu,
    o lipoti sonca.
    On me je slušiva,
    ali ni baš abada.
    A čo da delan,
    njemu se je »fora«
    a ja son bi i osta čovik z mora.

Mateo Kirinčić, 8. razred
OŠ Fran Krsto Frankopan, Krk, PŠ Dobrinj
Voditeljica: Maja Polonijo

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


 Članek 8/9
 

 par besed od nigda

Brozina Kata


Piše:
Slika:
 
Slika:
javascript:openWindow('aspx/showimage.aspx?id=463004',380,520,'');


Treba se rešit uroki.Rasčistit si grihi ki su nastali va teškon, mukotrpnon sakidašnjen žitku..
    Puno toga treba, a pogotovo ne zabit zmolit čin više Očenaši, Zdravih Marij, a i anjelića čuvara, kako bi si oni pred Bogon rasčistili se ča to. Čovik puno toga ne bi smel delat da ne zgriši, ali trefi se ko i dite divojki.
    Trefi, trefi… Ali dite moje, veli mojoj susedi mat još dok je bila maletina.Vavik rabi pazit da se ne zgriši. Ako već da, valje tribi poć spovidi i pričesti. Ne smi se slagat grihi aš bi to moglo kad-tad puknut. Da se to ne trefi uz spovid i pričest va mesnoj crikvi i pokoru ka se redovito obavljala sigurniji su bili ako se na ki veći blagdan ide na prošćenji. Hodilo se va prošeciji na Trsat Majki Božjoj, Svetoj Ani Barcen, Majki Božjoj Napolje, o Veloj i Maloj gospoji Crkvenicu, Svetoj Katarini va Selca, Sveton Petru i Pavlu va Bribir, Majki Božjoj va Lič i druga sveta mesta da bi se olakšalo moleć va se one nevoljne leta ke su pritisnute rati i neimašćinun mučile svit.
    Uz se to, najveća pokora bila je ne imit vodi. Kad bi presušili si studenci i potoki spas se iskalo moleć da brzo pade daž i da se more spasit blago i ljudi. Najmučnije prošćenji bilo je proć v Lič. Moralo se poć v jutro rano oko trete, četrte da se pobigne suncu. Najgore je bilo preć Stran, planinu, a gvoru kad bi se već prišlo ko da je bilo malo laglje jer se va dubokoj jelovini bolje dihalo.
    Va prošeciji se molilo, znalo se je kadi god počinut pa va sen ton i zapivat ku svetu pismu, a i pošalit.
    Jednuč se med simi timi našal Mirošev muž ki se zval Broza. On, kako je ko i si drugi griški muži hodil za zaradun na se strani, pa je tako zabasal i va Bosnu kadi se zagljedal va jednu lipu maletinicu ku je pripeljal Mirošen, a bome brzo za tin ju i oženil.
    Živeli su oni va mićoj starinskoj kućici i on ki je divanel po čakafski z Katun, kako mu se zvala žena moral je malo i po bosanski da se bolje sporazume. Kata je imela i svoju žicu, po koj je, kako bi Broza rakal najbolje tanburala.
    Jednuč tako hodeć va prošeciji v Lič ljudi z popon su se zaustavili na Stojču poli raspela. Onako umorni od vela puta su posidali i saki se zamislel va svoje brigi, zamučali da je nastal muk…
    Najednuč Broza kljekne pred raspelo Isusovo i naglas počme divanit da su ga si čuli: »O Isuse, Isuse…Puno si propatil, a da si još imel moju Katu za ženu još biš bil i više.«
    Ljudi su se pogljedali, malo va sebi i nasmeli, a onda ko da bi furija digla se Brozina Kata, zela leskov šćap, pa trk za Brozun. Ni ga mogla dosagnat, aš on je bil visok z dugačkimi nogami, a ona se ako žveljta premića za njegov korak. Tekli su tako se do Liča i prvi od sih prišli na prošćenji Majki Božjoj. Onako zapuhani našli su se med more ljudi. Šli su pred oltar saki na svoju stran, zmolili nikuliko očenaši, spovideli i tako dočekali svoje seljane.
    Veseli, ko da se ni niš trefilo vrnuli su se pivajuć doma.


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285B28582858285C28632863286328592863C

[Ljudevit Kaj]

Réčki „Nôvi list“, 03.12.2009. / Kolumně
Beseda
9 člankov na čakavskomu
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 9/9
 

Joh pa boh aforizmi 

Ča kega boli?
 
Piše:


Slika:
javascript:openWindow('aspx/showimage.aspx?id=463005',270,520,'');



    Su rekli da nič već neće bit kako je bilo prvo. Jedino to su jimili pravo.
   
    Na televiziju se se već kaže kuhanje. Se već se kuha, se već je lačnih.
   
    Piše u novinu da su na Siciliju zaprli 68 mafijaši. H nan neka pridu. Po mafijaše.
   
    Sinoć mi se je sanjalo/ I have a dream/ je rekal Martin Luther King. Nan se sanja cel božji dan i celu noć, tako sih 60-ak let, a ujutro nas boli glava. Doklje glava boli smo živi.
   
    Na svit bi moglo bit i lipo da ni grdega.
   
    Pozabljanje je spas za dušu.


http://novine.novilist.hr/Default.asp?WCI=Rubrike&WCU=285B28632859285A2863285A2858285828612863288A288D28632863285C285E285B28582858285D28632863286328592863F