HR.KAJ.NĚ? - Lépa naša kajkavska / pregled tisKAJna

[Ljudevit Kaj]

Međimurske novine, br. 966, 21.03.2014.
e-vundano 26.03.2014.

Piše: Jožek radnik

Premišlavanje Jožeka radnika

Zakaj nas nišči nikaj ne pita???!

Točno 95 let je minulo od kak se je Međimorje, očem reči, od kak so naši prajapice i pramamice ftrgli lanaca z šterim so jiv zvezali Mađari za sebe i prepojili so se Lepoj našoj.
Kak se nam vse (to) kaže, cugle naše međimorske vlasti, i ne sam naše, bodo vu Varaždino i unda bodemo meli ono protiv čega smo se borili od stoletja sedmog, a to je kaj nam bode Zagorec glavni, očem reči, poverenik za Međimorje. Ak smo se znali pred 95 let brigati za sebe unda znamo i ve da smo čuda spametneši. Jedino me to gvinta i zbogradi toga mi moj črvek neda spati: Zakaj nas nišči nikaj ne pita??!!


Kakša je razlika između 1919. i 2014. leta. Ne bodete veruvali, ali točno 95 let. Točno tuliko let je minulo od kak se je Međimorje, očem reči, od kak so naši prajapice i pramamice ftrgli lanaca z šterim so jiv zvezali Mađari za sebe i prepojili so se Lepoj našoj.  Bil je to veliki svetek za vse Međimorce kaj so, posle hajdig let, znova došli dimo gde so več bili naši brati po krvi, Hrvati, a vsi skupa smo se, onak prek noči, našli vu novo zafremanoj državi Srbov, Hrvatov i Slovencov. Mam po tem smo dobili i poverenika za naš falaček zemle međimorske, očem reči, za nejlepši cvetnjak na sveto med dvemi vodami. Bil je to Ivek Novakov, međimorec z Macinca, šteri je delal i živel kak gastarbajter v Čakovco, kak je to vsima poznato vu našemo krajo. Isto tak vsi znamo da je država SHS bila kraljevina, štera je ne poznala demokracijo vu kakšoj mi denes živimo. A denes vam je to čistam nekak drugač! Mi vsi živimo v demokraciji, a drugi nam kapo krojijo. I ne sam kapo, jerbo so nam kola genula doli z brega. Nejpredi smo se borili za Lejpo našo protiv naših sosedov z Istoka, šteri so jo šteli za sebe. Dok smo jo izborili jeden čas je bila naša, a unda smo jo poslali v Evropo za sneho. Neje dugo trelo čakati, a na svetlo dneva je došla nova evropska regionalizacija, očem reči, Lejpo našo so počeli falatati na čistam druge falate kak so to do ve bile županije. No, političari velijo, pak i naši Međimorci, da bodo županije ostale sam bodo bole kak bistrički bokci i dok bodo nekaj šteli morali bodo iti štečit peneze na vse strane, kak po Briselo, tak i po Zagrebo, ak bode kaj hasnilo. A denes vam je to čistam drugač. Još navek imamo župana šteri još navek ima i bukso, a ne znati kak bode to dugo trajalo i kak to bude unda dok tua demokracija, štero nam Evropa prodavle, bode zela maha. Kak se nam vse to kaže, cugle naše međimorske vlasti, i ne sam naše, bodo vu Varaždino i unda bodemo meli ono protiv čega smo se borili od stoletja sedmog, a to je kaj nam bode Zagorec glavni, očem reči, poverenik za Međimorje. Ak smo se znali pred 95 let brigati za sebe unda znamo i ve da smo čuda spametneši. Jedino me to gvinta i zbogradi toga mi moj črvek neda spati: Zakaj nas nišči nikaj ne pita??!!

Vsi znamo da so nas hadezeovci hajdig zadužili, ali isto tak znamo da so Zoki i Slavek ne mali Iveki i da so i oni hajdig podebljali duga, tak da nišči ne zna da bodemo, itak, došli na zeleno kito. Mogli bi reči da smo dužni kak Grčka. Nekaj si gruntam da so naši ministri vsi od reda spametni i vsi jako čuda znajo. No, tak bar prepovedajo. I zato si furt gruntam kak je nikomo ne palo na pamet kaj bi naše duge kandideral prema Evropskaj fondaj. Malo, malo, pak čujem kak smo ne pozobačili vse peneze štere nam je mama EU preprajla i brzčas bi bilo nejbole za vse da mi te peneze zememo i denemo tua gde smo dužni. Pak je minister Slavek pravi maher za predstečajne nagodbe, kaj maher, on je jiv japa jerbo jiv je on i zmislil, pak bi mogel v Briselo prodati to svojo inovacijo. Kuliko sam mel za čuti to je još nišči v sveto ne zmislil predi Slaveka. To je bormeš niti Grkljanaj ne palo na pamet!   

Ne znati zakaj se svadijo hadezeovci i esdepeovci v čakoskoj varoši. Ili pak je to čistam vredo jerbo so jeni na vlasti, a ovi drugi jif šinfajo i očejo v red dotirati. Vsi mi znamo da dok se politčari prepucavlejo da je istina navek na sredini, očem reči, negdi izmeđo. Kak i navek vu živlejo. Hadezeovci šinfajo gracke oce kaj se nikaj ne dela, a gradonačelnik Štef je ne mogel zmagaditi, a kaj se ne bi pofalil. Nejpredi se pofalil z anglomeracijom Čakovca i kanalizacijom Novoga sela na Dravi, a to jim je vse prepravil negdašji direktor međimorskoga vodovoda Jožek (moj imejak) Zorčec šteroga so zmenili jerbo je hadezeovec. A kaj se dotikavle ovih poslof još so ne zapičili niti prvo lopato. No, nekaj drugo me gvinta i gruntam si gde se zgubilo oporabilište Totovec, posel vreden prek 30 milijonov kuni, štera je več na čekanjo duže od leto dni, a ve najempot se  gradonačelnik Štef več žnjom niti ne fali. Neso mi tu vse birke na brojo jerbo vsi znamo da je direktor državnoga Fonda za čisti zrak, gospon Miler, prijatel od našega Štefa. Brzčas je te posel pobegel gradonačelniko ili pak ga je dal svojemo zamjeniko. Pak to mora iti, jerbo što bo si pomagal, ak si nebodo partiski pajdaši i prijateli?

Na vse zadje smo ipak zazvedili kuliko Čakovčance koštajo gracki oci. To so ne mali penezi, kak veli gradonačelnik Štef, nek so to prekpreveč veliki penezi. Vsi tri koštajo porezne obveznike nekaj meje od sedemdeset jezer. I to mesečno. Kuliko i kaj, itak, tre delati za te peneze? Jako bi bil vesel kaj bi se to i vidlo kaj se dela! Ak sem ja to dobro prečital, pak gradonačelnik ima vekšo plačo od župana, a kuliko znamo, ipak, je Županija vekša, i to ne jempot, od Grada.

Ma, nek politika ide vi več znate kam, a mi pak idemo malo v Železno Goro k pajdašo Lojzo Tomšičo na vrhunski i zlatni savinjon. Morem vam reči da nam je navek bilo lepo v Lojzovoj pelnici sam je malo teško vum dojti, ak nemaš zimske gume, dok sprobaš vse te finote štere tak lepo tečejo i krepijo dušo i telo. Kaj mi drugo preostaja nek kaj čestitam Lojzo i pofalim ga za jegova vina, a posebno savinjon. Ak je on uspel med Dalmošaj dobiti zlatno kolajno onda je to duplik vredno jerbo Dalmoši teška srca nekomo priznajo da je bolši od jiv. No, ak mortik nekomo med vami ne paše savinjon, sam vi genite prema Železnoj Gori jerbo v Lojzovoj pelnici bo se, brzčas, našlo nekaj kaj paše vašemo požeroko i želoco. Savinjon ima i brata crnca, očem reči, Lojz ima i črno vino, a za žene žutoga muškatlina. Tre sam dojti i sprobati. Nišči nau žejen, a niti lačen.

V sredo, of tjeden,smo preslavili godovno svetoga Jožeka, a to je prinas v Lepoj našoj i Den moškarcov. Morem vam reči da se je nišči ne zmislil na naš moški den, a ja sam za Den ženi dosti globoko porinul roko v žep. I parpot sam spomenol, onak pre gemišteco posle obeda, ali nikaj se je ne prijelo. Nekak si gruntam da se nebrejo vse investicije vrnuti črez kratko vreme. Nejsam vupal biti preglasen jerbo sam, pred tri mesece, pozabil na on den da smo jeden drugomo kajkaj toga obečali i porinuli rinčice na prste. No, pak smo ljudi i bodemo se nekak dospomenuli.

Međimorski labodoritaši vu Tretjoj hrvaškoj ligi so alfa i omega lige, očem reči, početak i kraj. Najme kaj, mi Međimorci imamo v ligi sedem klubov, labodoritaši Međimorja so na čelo kolone, a čakoski labodoritaši so čistam na krajo i pazijo kaj ne bi što opal vum. Morem vam reči da se vsi naši klubi držijo bole doli, skupa z Čakovcom (kaj ga nej bilo strah) i oni so pravi fondoš te lige, tak da se tua liga nikak nebre vruhnuti. Tak ne bi zišlo da so se i dospomenuli. Nebrem veruvati da mi v Međimorjo imamo tak malo dobrih labodoritašov kaj vsi igrajo v Međimorjo. A falimo se da nam je labodoritanje v krvi??!


Zvir:
http://www.mnovine.hr/novo/index.php?option=com_content&view=article&id=26374:zakaj-nas-nii-nikaj-ne-pita&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine966i               
i(l) str. 56. sim:
http://www.mnovine.hr/images/pdf/966/mnovine966i.pdf         

* * * * * * * * * * * * * * * * * * * * * * * * * * * * * * * * * * *   

Ansambel Bratov Avbreht - Volim Jožeka, 03:32
Festival oberkrainer glazbe Lobor 2013 www.loborfest.com 

Ansambel Bratov Avbreht - Volim Jožeka           

[Ljudevit Kaj]

Varaždinske vesti, br. 3612, 25.03. 2014.

Piše Barica Pahič

KAJ je naše pitanje i naš odgovor

Kie je razrajtal naš racvieli vert?

 
     Pretekloga tedna sem odišla f naše Kazališče pogledati predstavu “Višnjik”.
Diela se o jenem preliepem višnjiku z ljetnikofcem. Njegvi su plemeniti vlasniki v njemu vživali, prezirali peneze i same se zaduživali. Je, i filozofierali su kak bi trebale delati.
     Sličnest z denešnjicom prinas lehko je prepoznati. Višnjik bu vas mam podsetil na Liepu, se več dužnu, se menj Našu. Vu nje gospodari “elita” štera ne zna kaj i kak treba delati. Se rasprodavlje zadužuje se, a tajkuni kupujeju za male peneze.
 

Pretekloga tedna sem odišla f naše Kazališče pogledati predstavu “Višnjik” (v originalu Višnjev, sad, točne kak se i negda prinas govorile). Prie par liet sem za “Višnjik”, kak i za druge velike Čehovljeve drame, pisala upute za čitanje lektire pa dobre poznam tekst. Predstava je nie one kaj sem očekivala, kaj ne znači da nie dobra. Vidi mi se da je na miesti i preveč modernizierana. More biti da ja to krive razmem.

Diela se o jenem preliepem višnjiku z ljetnikofcem. Njegvi su plemeniti vlasniki v njemu vživali, prezirali peneze i same se zaduživali. Je, i filozofierali su kak bi trebale delati. Niesu ni šteli ni znali kaj i kak delati niti su mislili kaj bu gda penez več nebu. Vlasnica višnjika je živela, zabavljala se f Parizu i rajtala peneze šteri su dohajali z Rusije. I si oko nje su se same zabavljali. Tu je bil i jeden seljak, novi bogataš šteri se oko višnjika omuhaval kak maček oko vruče kaše i predlagal nekakva rešenja za štera gospa Ranjevska ni štela ni čuti. Na kraju je došla ovrha. Višnjik je kupil nuovi bogataš, šteroga je elita deržala za prostaka. Vžival je kaj je kupil imanje na šterom su njegvi dedi bili kmeti. Negdašnji gospodari su morali spakierati kofere i oditi. A zakaj je uprav ta drama uprizorena?

Sličnest z denešnjicom prinas lehko je prepoznati. Višnjik bu vas mam podsetil na Liepu, se več dužnu, se menj Našu. Vu nje gospodari “elita” štera ne zna kaj i kak treba delati. Se rasprodavlje zadužuje se, a tajkuni kupujeju za male peneze. Bar da bi si oni znali kak delati, a nie same slagati milijune, imati aute, vikendice, stane, jahte… Je li nedavne osujeni bivši precednik naša inačica Ranjevske? A kulike je takvih još? Kie i kakvu budućnest predviđa nam? Kie je rasprodal naš rascvieli višnjik? Kie od tega ima koristi? Kie je tuo rajtal naše peneze po svietu od Verone (na operi) do Novega Zelanda (na samoanskem tanc-ritualu), od Kube do Mongolije… Njieve je cvieče, malih ljudi smeče!

Poglečte same kak se naši “demokratski” političari igraju z smetjem: Zakaj nej profitierali “naši”, a nie “njihovi”? Kaj nie i nam Varaždincem pitanje smetja dogorelo do noktov? Hoče se pokazati ča je politička muoč jakša pa kulike košta da košta! Ionak “igrači” ne plačaju z svojega žepa (šteromu si sami odrede koliki je). Oni same zaračunaju, a mi plačame kak god da su nam žepi plitki. Kaj morti onie s plačom od 20 tisučakov more razmeti kak je živeti oniem ki v znoju lica svoga zarađuju kruh svoj? Se kie brine za naš rasvieli vert šteri se ruši?


Zvir:
http://varazdinske-vijesti.hr/kaj-je-nase-pitanje-i-nas-odgovor/kie-je-razrajtal-nas-racvieli-vert.html
i(l) str. 35 sim:
http://varazdinske-vijesti.hr/pdf/3612.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1   

* * * * * * * * * * * * * * * * * * * * * * * * * * * * * * * * * * * * * * * *

Višni(k) nam Bog je do...

Himna Slobodi - A Hymn to Liberty, 03:44
Ivek Gunduličov / Jakopek Gotovec
https://www.youtube.com/watch?v=0FkJ9iZvH54

Višnja Korbar - Kak vragu na rep stati (Krapina 2010) Popevke zanavek HQ, 03:42

Višnja Korbar - Kak vragu na rep stati (Krapina 2010) Popevke zanavek HQ

[Ljudevit Kaj]

Međimurske novine, br. 967, 28.03.2014.
e-vundano 31.03.2014.

Piše: Jožek radnik

Premišlavanje Jožeka radnika

Što je itak te predstečajne nagodbe zmislil???!!

Znam, ženi sam ostal hajdi toga dužen i kak se to zazvedilo, očem reči, zišlo je na svetlo dneva, moral sam pokrenuti predstečajno nagodbo. Ženi je to ne bilo praf, nešči joj je negdi rekel da  tak nigdar nebo dobila vse ono kaj sam joj dužen, pak smo se počeli i sfaditi. Nejpredi smo se sam sfadili, a unda smo počeli i kričati tak da se je med nas zmešala i punica. Morete si misliti kak čovek zide dok je v manjini, a tak sam vam i ja zišel i odišel po riti k meši jerbo je punica pozvala sosedo Bariko za predstečajnoga upravitelja. Ne da sam si z sosedom ne preveč zdobra nek sam tam dužen čuda več nek doma. I unda neš klel onoga vraga šteri je te nagodbe zmislil?

Kaj itak dela šefica i jeni težaki v međimorskom ŽUC-o i je li jif opče treba? To se pitajo čakoski gracki oci (i nešterni večniki), točneše rečeno, čakoski gracki načelnik. Kuliko se vam ja razmem v politiko, meni je šefica ŽUC-a, gospa Ljerka, čuda lepša od našega međimorskoga župana, a i od čakoskoga grackoga načelnika i ne verjem da je jeni posel kaj bode sam delila peneze štere nazobači za popravljanje međimorskih cesti. Ak bi z državne kase vsaki grad ili pak opčina dobila svoj falaček kolača za krpanje lukji po cestama, što bi hodal vu beli Zagreb grad, vu Hrvaške ceste ili pak k ministro pre šteromo dela i naš Veselin Biševac, štečit peneze šteri tam čakajo za one projektline za štere mi v Međimorjo nemamo dosti penez. Nešči mora! A za to vam je naša Ljerka pravi maher, a to bi načelniki, a posebno čakoski gradonačelnik moral znati kuliko je penez Ljerka dovlekla z Hrvaške cestarske kase, pak bi unda drugač govoril i malo lepše se spomjinal.

A kaj se nadvožnjaka dotikavle, jega nam je obečal poprajti gospon Biševac, dok smo ga v Zagreb pošiljali, unda ga je negdašji gradonačelnik kandideral (tak je bar rekel) prema evropskaj penezaj, a na vse zadje je minister Hajdaš Dončič obečal čakoskomo gradonačelniko Štefo da ga on bode v red dotiral skup z Hrvaškaj cestaj. Kuliko vidimo od obečanoga je nikaj ne napravleno, a naš nadvožnjak je vse stareši i vse bole pogjeni, kak stari japica, a ve se počel krhati, a i noge so ga pomalem počele ostavljati (reuma ili pak išijas). Vsi znamo da je toga nadvožnjaka napravil GeKa 1976. leta, a na noge ga je postavil negdašji čakoski i međimorski GK boss, Danijel Režek i da je on mel bar malo vizionarskoga duha bil bi mam osnoval i zaklado za popravljanje, pak bi mi meli denes z čega to naprajti. Ve vidite, ak se nešterni stvari ne napravijo na vreme unda, z cajtom, dojde do problemof.

Malo malo pak mi na pamet padne naša čakoska bolnica i furt si gruntam kaj bo žnje, očem reči, je li nam jo bo minister ostavil ili pak bode odišla za sneho vu Varaždin, kak i vse drugo kaj vredi, kak i vse drugo kaj smo črez leta sami naprajli, a ve nam jemlejo kak da nam je to z neba palo. Kaj se bolnice dotikavle vsi znamo gda je naša bolnica jedna od bolših, ak ne i nejbolša v Lepoj našoj, doktor Miro Horvat, naš denešji ravnatelj bolnice i sanaciski upravitelj je kajkaj dobroga i spametnoga zmislil, a pitam se pitam je li nam to bode dosti kaj bodo i dale naši betežniki v našoj bolnici, a zdraviče jim bodo popravlali i v zmočena tela lekece vlevali naši doktori ili pak bodemo morali vse to hodat iskat prek Drave vu Varaždin. V zadji cajt sem zazvedil da bode najbrž naša bolnica ostala sam bode na potni lesi pisalo: Regionalna bolnica Varaždin, pogon Čakovec.

Nebremo reči da nas naši, očem reči, Milanovičovi ministri ne hodajo glet. Dojdejo glet kak nas i tak i naše malo Međimorje. Je dojdo i vsakipot nekaj odvlečejo prek Drave vu Varaždin. Haenesovi ministri dohajajo v Županijo, a esdepeovi v grad Čakovec. Vsaki ide k svojima. Haenesovi bar nekaj donesejo, napravijo ili pak obečajo, a esdepeovi (bar za ve) dohajajo v soboto ili pak nedelo i skrivlejo se kaj jiv nišči ne vidi, a naši političari nikaj ne pitajo. Ali bil bi red da dok več dojdejo da nekaj naštečimo, a ne kaj jif lepo dočakamo i na obed otpelamo (kak nam to nalažejo šege naših japeki i mamici). Neje ruon Lejpa naša tak bogečka kaj ne bi mogla (od te bokčije) i nam Međimorcaj nekaj dati. Ak se more drugdi trošiti more se i prinas.

Verjem da ste primetili kak so ve vekši broji na štere plačate parking placa v grado Čakovco otkak je Ivek Perhočov došel nazaj v Čakom.  Najme kaj, do ve so to bili sam štiri broji, a ve je napre dopisani još brojček 70, tak jif ga ve šest. Kogagut sam pital kaj bi to moglo biti, nišči je ne znal, a unda so mi rekli čakoski gracki klošari šteri se vsaki den shajajo pre gracki vuri i šteri znajo vse kaj se v Čakovco pripeti, ak ne i vejč. Rekli so mi da je te broj 70 Ivekova kilaža i da so to ovi v Briselo zapovedali kaj se to napiše na tabljo kaj se bode znalo v šteroj varoši je auto bil sparkerani. Ak oni velijo unda, najbrž  tak i mora biti!

Jako sam najgerek kaj bode z našaj čakoskaj labodoritašaj. Kud idejo tud nas sramotijo. Kakša je to uprava, kakši so to treneri, kakši so to labodoritaši šteri se nebrejo ziti niti na utakmici? Tu bi trelo nekaj naprajti. Ak nosijo gracko ime unda bi gracki oci tomo trebali stajti na kraj kaj se ne bi tua sramota i dale širila. Ak ga jif ne dosti nek prestanejo igrati i nek vgasnejo kluba, jerbo ak nekaj nejde nejde. Tak smo i mi moški, dok nekaj nebremo unda to i ženama priznamo. Toj sramoti se mora stati na rep.

Protuletje se otpira, kak veli naša negdšja, ali lepa međimorska popevka. Vse je lepo i dobro, vse se budi, cvetje i sadovje se počelo gibati, vse me to veseli i srco mojemo neda mira, a nejveseleši sam jerbo nam bodo čeki za plin čuda, čuda menši.

Znam, ženi sam ostal hajdi toga dužen i kak se to zazvedilo, očem reči, zišlo je na svetlo dneva, moral sam pokrenuti predstečajno nagodbo. Ženi je to ne bilo praf, nešči joj je negdi rekel da  tak nigdar nebo dobila vse ono kaj sam joj dužen, pak smo se počeli i sfaditi. Nejpredi smo se sam sfadili, a unda smo počeli i kričati tak da se je med nas zmešala i punica. Morete si misliti kak čovek zide dok je v manjini, a tak sam vam i ja zišel i odišel po riti k meši jerbo je punica pozvala sosedo Bariko za predstečajnoga upravitelja. Ne da sam si z sosedom ne preveč zdobra nek sam tam dužen čuda več nek doma. I unda neš klel onoga vraga šteri je te nagodbe zmislil?


Zvir:
http://www.mnovine.hr/novo/index.php?option=com_content&view=article&id=26465:to-je-itak-te-predsteajne-nagodbe-zmislil&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine967i                 
i(l) str. 56. sim:
http://www.mnovine.hr/images/pdf/967/mnovine967i.pdf           

* * * * * * * * * * * * * * * * * * * * * * * * * * * * * * * * * * *   

Zagreb Jazz Portrait (Live - 5. 12. 2013.) - Protuletje se otpira (Spring Time) Trad., arr. M. Igrec, 07:15

Zagreb Jazz Portrait (Live - 5. 12. 2013.) - Protuletje se otpira (Spring Time) Trad., arr. M. Igrec

[Ljudevit Kaj]

Varaždinske vesti, br. 3613, 01.04.2014.

Piše Barica Pahič

KAJ je naše pitanje i naš odgovor

Ni VKD nije prorok vu svem „selu“

21. ožujka ovega 2014. leta Varaždinske književne društve (VKD) slavile je 20 liet postojanja.
Moreme i smeme zaključiti da niesme baš nevažni i da nekaj doprinosime varaždinski kulturi. Ali se zmislime i na staru, na kajkafščinu spreobernutu arapsku poslovicu, da nišče ni prorok vu svem selu pa tak (za naše vladajuče) ni VKD v gradu Varaždinu.


F petek 21. ožujka ovega 2014. leta Varaždinske književne društve (perve takve vu varaždinske kulturne povesti) slavile je 20 liet postojanja. V Gradske knjižnice “Metel Ožegović” skupil se liepi broj publike. Uvodnu rieč dal je njen ravnatelj, gosp. Mario Šoštarić, šteri je liepe govoril o suradnje Društva i Knjižnice i kak priznanje za nju Društvu podaril jenoga srebrnjaka. Saka čast!

S tiem je razveselil članstve tiem več kaj [/b]predstavnikov denešnje “strukture vlasti”, ni gradske ni županijske, nie bile. Na te sme se več naviknuli. Muorame jih razmeti. Zokupljeni su stranačkemi boji; kie je, a kie bu f šteri stranki, a tuo znači kie bu, a kie več nebu sedel na kakvem dobre plačenem stuolcu. [/b]Nemaju časa za svečanest nekakvega društva štere je nie ni političke ni nogometne ni ribolovne. Kaj bi se s tiem zamarali? Ne trebaju nas ni kak glasače. Zate su se fnuogi zmislili na bivšega pročelnika za kulturu i šport Janka Pavetića, šteri je nie propuštal naše svečanesti.

V ime Društva govorili su predsjednik Nenad Slukić i inicijator, osnivač i tajnik VKD-a. Tugomir Orak, a Ružica Marušić-Vasilić napravila je i prikazala filmek o delovanju Društva. Veliki posel! Z njim sme se zmislili na osnivanje Društva, na se njegve predsednike, na pervi Varaždinski književni zbornik (i drugih petnajst) i na “Srebernu cestu”, na natječaj “Senje i meteori”, na natječaj “Katarina Patačić” organizieranu z Maticom hrvatskom i pod pokroviteljstvem Varaždinskih viesti (z negdašnjim direktorom Ernestom Fišerom nagrađivale su zebrane autore), i na pesničko-ekološki recital “Ivanščica diše za cieli sviet”, i na Glazbeno-pesničke večeri f Kavani, i na pune predstavljanj knjig v Gradske knjižnice, Glazbene škole i Kazališču.

Zmislili sme se i fnuegi književni večeri, suradnje s školami z drugimi književni natječaji i društvi, pa i međunarodni (z Makedonci i Slovenci), na naše počasne člane, sveučilišne profesore i akademike i na one šteri su več odišli “k Haleru”. Njim f počast čitali sme njieve popiefke. S zahvalnostju sme se zmislili i na medije; Varaždinske viesti i Varaždinsku televiziju i njene reportaže z naši svečanosti, na Radio Varaždin, Radio Kaj (i mi njegujeme kajkafščinu) i se druge šteri su pratili naše delovanje.

Moreme i smeme zaključiti da niesme baš nevažni i da nekaj doprinosime varaždinski kulturi. Ali se zmislime i na staru, na kajkafščinu spreobernutu arapsku poslovicu, da nišče ni prorok vu svem selu pa tak (za naše vladajuče) ni VKD v gradu Varaždinu.


Zvir:
http://varazdinske-vijesti.hr/kaj-je-nase-pitanje-i-nas-odgovor/ni-vkd-nije-prorok-vu-svem-selu.html
i(l) str. 35 sim:
http://varazdinske-vijesti.hr/pdf/3613.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1     

* * * * * * * * * * * * * * * * * * * * * * * * * * * * * * * * * * * * * * * *

POPÉVKĚ SEM SLAGAL I RÉČICĚ BRÂL
Popevke sem slagal - Zvonko Težak, 02:27

Popevke sem slagal - Zvonko Težak

[Ljudevit Kaj]

Međimurske novine, br. 968, 04.04.2014.
e-vundano 07.04.2014.

Piše: Jožek radnik

Premišlavanje Jožeka radnika

Politika, žene, a na vse zadje i čeki

Isto tak se vseposot pripoveda kak je vse vredo z koalicijama haenesa i esdepea v Grado Čakovco i Županiji i da vse teče kak po lojo, a unda dojdejo gracki komunalni redari i namečejo čeke za krivo parkeranje vsim večnikima županiske skupštine. Tak so si zdobra kaj se prek čeki spominajo. Vsa sreča kaj je rat minul jerbo bi se spominali prek nišana.??!
To vam je isto kak i prinas doma. Najme kaj, žena i ja smo si jako zdobra i to tak kaj si bole nebremo biti sam se več dva tjedne ne spominamo i dok je velika sila ceduljice si pišemo. Prestala mi je kuhati, a ja pak sam se, vtruc, preselil spat v dečjo hižo. I do toga vsega je došlo sam zbogradi toga kaj sam pozabil na godišnjico jene ženidbe. Nebrete veruvati kak je malo dosti za svajo.


Sandra je odišla, Sandra je tu. Tak bi mogli reči posle vsega kaj se je minuloga tjedna pripetilo vu našoj županiji, očem reči, med međimurskaj narodnjakaj. Najme kaj, kak je več parpot rekla, a ve se je pokazala da je mislila onak kak je govorila, zamjenica župana je ostajla svoje pajdaše narodnjake i odišla v slobodne strelce. Bar za jeden kratek čas. Vsi znamo da je, posle raskola vu haeneso, Sandra ostala verna Čačićo, a vsi ostali, skupa s županom Matekom, so ostali na drugoj strani, očem reči, drukajo za svojo šefico Vesno Pusić. Bar za ve. Ne znati kak to bode dugo trajalo jerbo je več zafremana nova stranka, štero bode vodil gospon Čačić čim se vrne z službenoga pota. Sandra je ostajla stranko i stare političke pajdaše, je stranki svojo potprecedničko funkcijo, ali je zato i dale ostala zamjenica župana jerbo to nema komo vrnuti. Biračko telo jo je zebralo i ve mora čakati nove izbore kaj bode znova zazvedila je li je i dale v cukor- piksi biračkoga tela ili pak si je ono štima nekoga drugoga. To vse, do ve, sam razmel sam me furt nekaj drugo gvinta: Je li bode Sandra i dale na vlasti ili bode zamjenica v opoziciji? Najte se nikaj smijati, pak je pred 16 - 17 let prinas v Međimorjo več bila opozicija na vlasti!!

Nebrem vam nikak razmeti te naše političare, malo malo pak čujemo ili pak čitamo da si je Mladen Novak, precednik Županiske skupštine zdobra z županom Matekom, makar med jimi ne cvete nekša velika ljubezen. Isto tak smo, pred par dni, zazvedili kak se vodeči međimorski esdepeovci, Mladen Novak i Štef Kovač, ne svadijo nek so si zdobra makar so bili protivniki na zadjim partiskim izborima. [/b] Šest meseci je minulo od izborov i mi obični smrtniki smo več zazvedili kak je med vodečim partijcima vse vredo, makar se to nebre videti z prostim okom.

Isto tak se vseposot pripoveda kak je vse vredo z koalicijama haenesa i esdepea v Grado Čakovco i Županiji i da vse teče kak po lojo, a unda dojdejo gracki komunalni redari i namečejo čeke za krivo parkeranje vsim večnikima županiske skupštine. Tak so si zdobra kaj se prek čeki spominajo. Vsa sreča kaj je rat minul jerbo bi se spominali prek nišana.??! To vam je isto kak i prinas doma. Najme kaj, žena i ja smo si jako zdobra i to tak kaj si bole nebremo biti sam se več dva tjedne ne spominamo i dok je velika sila ceduljice si pišemo. Prestala mi je kuhati, a ja pak sam se, vtruc, preselil spat v dečjo hižo. I do toga vsega je došlo sam zbogradi toga kaj sam pozabil na godišnjico jene ženidbe. Nebrete veruvati kak je malo dosti za svajo.

Kajkaj toga smo zazvedili o plino, očem reči, o čekima za plin i to za nejkrajši mesec, februar. Plinači so toga meseca restegli od kraja januara do prvih dnevov marcijuša sam kaj bi nas uvjerili da so čeke takši veliki i žmehki morali biti. Neje mi te ček dal mira, pak sam skočil v beli Zagreb grad k profesoro Baltazaro nek mi on proba zračunati i nakup deti te kubike, kilovate i zakaj vejč plačam ak se meje grejem, ali niti jemo je to ne išlo od roke. Morem vam reči da si je lasi skubel, tri kalkulatore je spotral i mobitela, ali neje išlo, tak da je, na vse zadje, strgal i svojo profesorsko diplomo. Zazvedili smo da plinači merijo kuliko vredi plin jempot na mesec i tua mera unda vredi za celi mesec. To vam je isto tak kak da bi policaji nas šofere alkotesterali jempot na mesec, i to bi nam još naprej rekli da to bode, tak kaj bi mi unda bili bez brige celi mesec. Na pamet mi je pala moja soseda Barika, štera je več hajdi dugo v penziji, a vsaki čas bi nekaj štela od mene, a morem vam reči da ima hico sam jempot na mesec, a ostale dneve so ji i noge mrzle. Nebodete veruvali, ali željo ima vsaki drugi den i po tomo i obračuna dela. Zato sam i završil v predstečajnoj nagodbi. Ne znati što bo to vse zmagadil kaj se od nas išče: z jedne strane plin, z druge struja, s tretje  voda štera je pok podražila kak da bi vijagra po njoj tekla i ak to vse uspem preskočiti ili pak zbeči, unda me dočaka soseda Barika. A z sosedaj si navek tre biti zdobra. Nigdar se ne zna da bode vam trebal nešči hrpta paziti.

Poslušam cele dneve te naše velike državne političare, furt se štricajo i jedni na druge skačejo. Ve je of rekel ono, a on drugi ovo, ovi so fkrali čuda vsega, ovi drugi se nikaj ne razmijo v politiko, oni tretji ve kradejo i tak dale i tak dale. Dok vse to poslušam furt mi po glavi rovari črvek i spituvle me: je li je prinas je šteri ispraven političar??! Rečite mi, prosim vas lejpo, kaj mo nek rečem? Dosti ovih kaj so krali je v Remetinco, počeli so pomalem vum iti i prvi potni nalogi za rešt v Lepoglavi, a i prvi računi kaj se fkrađeno vrne. To je vredo, vsaki on šteri je kral je lopov ili tat, kakšo god stranačko majco nosi, i tre nazaj donesti ono kaj je odnesel. Ali kak to more biti da so hadezeovci pokrali milijone, a ve esdepeovci morajo vrnuti milijarde? Pitam vas, a i sebe: gde se zgubila razlika, očem reči, jako sam najgerek što jo je i kam potepel? Mortik je i to odišlo v predstečajno nagodbo ili pak se je nešči z nekim nagodil? Mortik! Što zna!?!

ZADNJA VEST štero smo čakali duže od mesec dni. V tork vjutro je došla prva ponuda za županov BMW. Makar je župan zgubil več vsako nado, ali osvanul je i jemo srečen den. Kuliko sam mel za čuti, ponudo je dal naš čovek, šteri več hajdi dugo dela v Austrliji kak gastarbajter, a minuli tjeden se dopelal na urlab skupa s Zokijom, precednikom naše vlade.


Zvir:
http://www.mnovine.hr/novo/index.php?option=com_content&view=article&id=26608:politika-ene-a-na-vse-zadje-i-eki&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine968i                 
i(l) str. 56. sim:
http://www.mnovine.hr/images/pdf/968/mnovine968i.pdf           

* * * * * * * * * * * * * * * * * * * * * * * * * * * * * * * * * * *   

Sandra Bagrić & ilirci - Jura i koloratura (Popevke zanavek) Krapina 2012. HQ, 02:39

Sandra Bagrić & ilirci - Jura i koloratura (Popevke zanavek) Krapina 2012. HQ

[Ljudevit Kaj]

Senzori?
Sen-zori se-znori(li)

* * * * * * * * * * * * * * * * * * * * * * * * * * * * * * * * * * * * * * * *

Varaždinske vesti, br. 3614, 08.04. 2014.

Piše Barica Pahič

KAJ je naše pitanje i naš odgovor

Sigde moreju zatajiti senzori

Vulične svelte! Bila je pol deveta, liepi i sunčani dien, a električna svetla su gorela. Kaj suncu treba pomoč da bi pervi vuletni dien bil svetleši?
Se ide automatski, ali sigde senzori moreju i zatajiti. Kak onda nebi po liepem i sunčanem dnevu? Zasliepile jih je sunce. Ili vgrađivači senzorov imaju krivotvorene diplome? Ili nemaju senzore za odgovornost?

 
V subotu 29. ožujka (sušca ili gregorščaka) bile je liepe, sunčane i čist vuletnje vrieme. Večer prie tega je na televizije rečene da je tuo pervi dien ovelietnega vuletja pak sem odlučila rane iti v grad; na plac i f štacun. Zapraf mi je glavne bile sprejti se i navživati liepega dneva. Hodajuč po gradu, gruntala sem o čem bi bile najbolje pisati za ovu kolumnu.

O krivotvorenimi diplomami (imaju jih same penežljivi i politički močniki) ili o tem kaj bu z prosvetarskimi plačami? O tem kak su vučiteli plačeni, znam se. Vu te se miešati je zabadav pokle onega kaj je dien prie zjavil minister prosvete, šteri prosvetarsko življenje “ni spoznal ni prepoznal”, a se prosuđuje i o sem odlučuje. Kaj o tem more misliti “obični puk” gda tak misli minister? Da je same lete dni bil f vučitelske kuože, imel bi senzore za tuo kaj su vučiteli osetljivi i za par kuna. Več znam (cieli radni viek, bar deset preživljenih “revolucionarnih”školskih reform) da gda god zaškripi v državnimi financijami, najprie nastružeju prosvetari.

F takvimi premišljanji dojdem v Dučansku vulicu i tu zastanem. Tu mi se presvetlile. Ti bokca, kak mi tuo prie nie opale na pamet? A kaj mi je tuo tak razbistrile misli? Vulične svelte! Bila je pol deveta, liepi i sunčani dien, a električna svetla su gorela. Na šteru stran su mi onda mogle misli pobieči? Išla sem prema placu, prešla priek Korza, kad one, i f Kukuljevičeve goriju svetla. Pa kaj je tuo? Kaj suncu treba pomoč da bi pervi vuletni dien bil svetleši? A f petek se na TV-u govorile o tem kak se špara struja i da f to ime fnogi gradi v svetu, pa i Hrvatske, na jenu vuru buju zgasili sa svetla. I pokazali su kak bu tuo zgledele vu Varaždinu. Buogek moj dragi, pa kaj se denes muora nadoknaditi one kaj je snoči prišparane? Odma mi se razjasnile zakaj mi je ovolietni račun za struju tak zrasel. Kak i ne bi gda ga derže pod svetlem i na topline za šteru i suncu treba električna pomoč. Čitatelji bi morti mogli pomisliti da mi je nie trebale tulike gruntanja, neg nazvati odgovorne za gradsku rasvetu. Jee, kaj god!

V davna duoba, gda sem v svoje zaostale i šparne duše mislila da bi to trebale, i jesem, ali mi je pervi put rečene da tuo nie moja briga, a drugi put (bile je 11 vur), da je to se pod senzori i da oni otčitaju gda je svetle potrebne, a gda nie. Se ide automatski, ali sigde senzori moreju i zatajiti. Kak onda nebi po liepem i sunčanem dnevu? Zasliepile jih je sunce. Ili vgrađivači senzorov imaju krivotvorene diplome? Ili nemaju senzore za odgovornost?


Zvir:
http://varazdinske-vijesti.hr/kaj-je-nase-pitanje-i-nas-odgovor/
i(l) str. 35? sim:
http://varazdinske-vijesti.hr/pdf/3614.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1     

* * * * * * * * * * * * * * * * * * * * * * * * * * * * * * * * * * * * * * * *

Do bu vužgal kmicu?

Don Huan - Ugasi Luč (1982), 03:55
https://www.youtube.com/watch?v=mBng-8XjdNM

Oj, sončece
Ansambl LADO - Lisinski 2012, 02:49
LADO v Lisinskomu, sviben 2012. (Glazba: Oj, sončece - Janja Ivančan)

Ansambl LADO - Lisinski 2012

[Ljudevit Kaj]

e-medjimurje / kolumne

Đuro Pongrac - Jura

LAJAVEC
"KAJKAVŠČINA"

Protuletje se otpira, žena me na fitness tira

Ste fčera čitali gledali one slike na eMeđimurju. Ste vidli kaj ljudi delaju za svoje zdrovje i telo. Ak se jedna direktorica more vrteti oko šipke, stoti na jedni nogi, delati helikoptere, sukati se kak kača, i se to samo radi zdrovja i kondicije, zakaj vi ne bi mogli?

Lefko direktori i menađeri idejo na fitness. Razmem da su im trtice ftrnule od sedenja i možđeni prepuni briga. No jo bi štel videti i nekaj ženskih i muških kaj delajo v direktni proizvodnji. Ili nemajo peneze za fitnes ili se komaj dovlečejo dimo. A domaj treba skuhati za družinu. Pobrigati se za štalu, kotec. Njima ne treba štonga kaj se bojo vrtele ka piškor v loncu. Drugo nemaju cajta za to.


Nemre se reči da je zima rekla zbogom, ali mi se nekak srce narošilo dok sam zgledal, jaglace kraj jorka i picekovo cvetje (tratinčice) po trovi na vrtu. Protuletje je zo me novi štart v novi život. Se betege, nevolje, i druge hude stvori probam ostaviti v megleni, zdeni zimi.

Stojim na lojtri i režem trseka, brajdu, i molim Boga da ne da mraza, kaj su mladice dobro prezimele, i niso pozeble. Ak ne bu mraza i toče moglo bi biti lepe berbe. No nekak mi roke ne posluhneju to kaj im možđeni komandiraju. Pomali dršćeju. Zidem z lojtre a noge mi dršću kak pesu dok sere. Lovim zroka kak riba na suhom.

Pak koja si ve vrožja mater ? Odidem v kuhinju. To zimska hrona bez vitamina, a puna mesa i mosti, jemlje svoje. Žena zgotovlja obeda i veli. - Dobro da si došel, taki idemo jest. - Daj ti meni štamprl vitamina. Nekak nemam snoge. Dršću mi roke i noge, a nemam ni sape. - Nemaš ti kondicije moj Đurek. Celu zimu si sedel za tom tipkovnicom i buhal s prstima po njoj kak stekli.

- Pak sam ne baš stolno sedel za njom. - Ne nisi. Genul si se dok je trebalo na šekret iti ili k pajdošima na belu. Tam ste se šetali do jedne vure fnoći. A dimo ste išli kak harmonikoši.  - Naj se srditi, ali mene se boli da nemrem ni jesti. - Na bo ti nikaj ako šteru kilicu hitiš. Na to nešće pokleplje po vrotima. Žena otpre vrota, a na vrotima pajdoši Kusa i Feri.

- Bok ljudi. Ste obedovali? - Fola Bogu jedni jesu, a drugi niso. Dve vure je rezal brojdu ve tu hmira - odbrusi im moja ženica. - Marica naj tak pripovedati – z mukom otpovrne Feri. Vidiš pajdoš Kusa i jo jednok  tak nikam nemremo. Samo dršćemo i išćemo zroka. Vidim da se i Đurek leči, pak ne bi nam priškodelo malo žganice.

- Je, prešepeće Kusa, sam čul da je dobra cirkulaciju. - Treba vam sema pamet popraviti, nastavi ona moja. Vam su navek najbolji lek žganica i gemišti. Korak jegera, gredica paradajza i luka, malo špeka, meso s tibljice i druge jestvine vrh su vašeg življenja.  - Marica, naj  tak govoriti. Pak kaj smo se ne v ovom življenju dost nadelali ? Nekaj smo herbali, nekaj somi stvorili. Decu smo na noge zdigli, vnuke dočakali, dobili kakve-takve penzijice pak je red da i mi svoj drobec malo f pogon denemo.

- Čuj Kusa se ti jo to razmem, podboči se moja i unese se Kusi u lice. No nikak nemrem razmeti da ste prešli šezdesetu, a glej kakvi ste. Mi se vidi da bote živeli sto let. - Daj bože, po čemu ti to tak misliš? Zapitam ju. Po čemu? Zglediste kak da imate devedeset devet. Pak bote još jeno leto preživeli. Za pet ran božjih genite se.

Ste fćera čitali gledali one slike na eMeđimurju. Ste vidli kaj ljudi delaju za svoje zdrovje i telo. Ak se jedna direktorica more vrteti oko šipke, stoti na jedni nogi, delati helikoptere, sukati se kak kača, i se to samo radi zdrovja i kondicije, zakaj vi ne bi mogli? Kusa jo pogleda.

- Se ti to znami šoliš? - Nikaj se jo ne šolim. Dost je toga vašeg verestovanja pri šanku i punom stolu. Somi sebi z lampama kopate groba. Of moj je zodnji pot bežal dok je dobil sračku. A zakaj bi bežal pak me nišće ne naganja? A kaj se kondicije dotikovle nju bomo mali, pomali natokli. Kaj bo morti nešće drugi se posle napravil? A kaj ak se nekaj vu tom vežbanju pripeti ? Kam se pemo lečit.

Gledi samo Naceka. Dvo meseca ni mogel nikam s postelje kak ga je koljeno zaboljelo. Naručil se v drugom mesecu ortopedu, a na šalteru mu je rečeno da je na redo stopram potkraj aprila. I kaj ve. Koljeno boli, hoditi nemre. V bolnici mu je rečeno nek ide privat ortopedu. Znoš ti droga moja kuljko je tam čakal? Nikaj. Drugi den je došel na red. Pregled i ultrazvuk 350 kuna, injekcija v koljeno 200. Išće je moral dvo pot dojti na injekciju i saki pot po 200 kunica. Mel je nekvoga burzitisa. Jezero kun je ostavil pri doktoru ali ve beži kak zojec.

Daj ti meni reči de bom jo zel peneze za privat doktora ak me v križima stegne od tog tvega vežbanja? - Praf imaš, potvrdi Kusa. Marica, gde se ti mlodi tak fejst zmočijo? Kam gojd pogledaš samo sediju i tipkaj po onim spametnim telefonima. Ako šteroga kaj pitaš ne čuje te jer vu vuhima ima slušalice, sediju v školi, sediju v autobusu, i nedaj bog da se šteri stal starejšoj ženici ili čoveku. Iz škole dojdu trudni kak da so celi den kopali. A poglej kaj jedu.

Nekve hamburgere, čisburgere, pice, bureke, hot dog, ni som neznam kaj se to znoči. Probaj im dati pretepenoga graha pak buš čula spoved. A glej kaj se ne piju. Soma forba i cukor. Ve bodo takvi nas vučili zdravom životu. Te mlode pucke jace ne znaju speći. Nek dečkima tvoj Đurek do škorje v roke i nek režu brajdu. Drugi den nado mogli ni mobitela v roki držati.

- Je, je,  mrmljal je Feri. Em so ti fitnesi, joge, kak se ono veli, aha, makrobiotika, i vegetarijanci samo pomodarstvo. Pak sam se ne rodil kak bik kaj bom samo zelenjavu hrdal. Kaj ne čtaš da su najnovija istraživanja dokozala da je most zdraveša od ulja. Do ve so nam drugač predekovali. Gledi samo po čem je kila cvirki, a počem litra ulja. Provi domoči cvirki so po 120 kuna za kilo. Znoči da vredijo.

Lefko direktori i menađeri idejo na fitness. Razmem da su im trtice ftrnule od sedenja i možđeni prepuni briga. No jo bi štel videti i nekaj ženskih i muških kaj delajo v direktni proizvodnji. Ili nemajo peneze za fitnes ili se komaj dovlečejo dimo. A domaj treba skuhati za družinu. Pobrigati se za štalu, kotec. Njima ne treba štonga kaj se bojo vrtele ka piškor v loncu. Drugo nemaju cajta za to.

- Vi ste jedni, nemam reči kaj bi vam već rekla. Ak već ne mislite no se unda probajte malo misliti na nas. Što vas bo obračal po postelji, i na šekret nosil ak vas prunt vudri? Žena? Ona sa svojih šezdeset kil bo vas sto kiloše nacukovala? Deca kaj so v svet odišla? Ili se genite ili vam Novi Marof stoji na raspolaganju.

Kusa se prvi stal. – Bok dečki jo moram iti. Išće moram jaboke obrezati. Feri me tožno pogleda, mrmljajući kak mu je išće puno posla ostalo i otplozi za Kusom. Žena me pogleda. Idem, idem. Zemem škorje i vujdem prejdi nek je mogla kaj reči.


Zvir:
http://www.emedjimurje.hr/kolumne/kolumna-protuletje-se-otpira-zena-me-na-fitnes-tira

* * * * * * * * * * * * * * * * * * * * * * * * * * * * * * * * * * * * * * * * * * * * *

Protuletje se otpira (Croatian Folk Song), 02:59

Protuletje se otpira (Croatian Folk Song)

[Ljudevit Kaj]

Međimurske novine, br. 969, 11.04.2014.
e-vundano 15.04.2014.

Piše: Jožek radnik

Premišlavanje Jožeka radnika

Osleki i pršut v Međimorjo

Mi Međimorci smo spametni kak vrag, za vse kaj se primemo pretvorimo v zlato. Tak nam je ve palo na pamet da mi prinas, na tem falačko zemlice med dvemi vodami, šteroga nam je Božek dal kaj ga bodemo hasnuvali i na jemo hercuvali, počnemo delati pršuta i prevzememo Dalmošima jivoga brenda ( kak to naši turistički težaki velijo).


Voda je podražila za 2,85 kuni po kubiko i to prvoga aprila. Nekak sam si gruntal da se nešči heca z nami, ali črez par dni nam je vsima v pipi vgaslo jerbo so počeli dohajati računi, očem reči, čeki i to hajdi vekši. Ve so več prekprokleto veliki, vekši i od struje, a kuliko bi stopram koštala da nej meli svojo vodo i da jo nej vlekli vum z naše međimorske zemlice. Dok smo si mi Međimorci plačali samodoprinosa i delali si svojega vodovoda naši sosedi z Hrvaške so pili pive pred štacunaj za te peneze. Isto tak, dok smo mi plačali dve kune po kubiko za vovovodno mrežo po našemo falačko zemlice med dvemi vodami, naši sosedi z Hrvaške so se smejali, a ve dok smo mi svojega vodovoda naprajli, ve nam je naša "kukuriku" vlada vudrila štibro kaj i mi moramo plačati za vodovodno mrežo našim sosedima z Hrvaške. I moremo se slikati. Mi, a naši sosedi se nam ve pak morejo norca delati jerbo smo zišli pravi hrmaki: nejpredi smo sebi naprajli vodovoda, a ve moramo pomagati sosedima i kaj se unda čudimo kaj nas vsi pitajo otkud nam penezi. Velijo "kukurikači" da je Evropa tak rekla kaj vsi prinas v Hrvaškoj morajo meti vodovoda, pak ak oni tak očejo unda jim ga nek i napravijo, a ne kaj nam pak z žepi peneze vlečejo.

To je još ne vse kaj se vode dotikavle. Najme kaj, Čakovčanci imajo svojo štibro (od lanjskoga novoga leta) po šteroj plačajo jedno kuno po kubiko za kanalizacijo v Totovco i selima polek Drave. Još 2012. pred kraj leta je još ondašji direktor naši Međimorski vodi, Jožek (moj imejak) Zorčecov, šteroga je minulo leto naša međimorska partija posprajla v ropotarnico povjesti, je potpisal ugovora (skupa z ondašjim gradonačelnikom Šalamonom) z Evropskom bankom za obnovo i razvoj za delanje kanalizacije v Dravskomo bazeno, a čakoski gracki oci nikud nikam, šlajdrajo na mesti i nikak da genejo. Penezi v banki čakajo, a gracki oci so još ne kupili niti štila za lopato z šterom bi trebali početi delati kanalizacijo, a Čakovčanci več skorom leto i pol plačajo po jedno kuno za otplato zajma (Grad mora vrnuti svojih 1o posto, a ostalo Hrvaške vode). Plačajo, čakajo i magadijo. I kaj se unda čudijo kaj več imajo vuha kak osleki.

Čakoski hadezeovci se pak nekaj svadijo med sobom. Kak zgledi med jimi nutri nekaj ne štima. Oni se pravzaprav morajo boriti protiv esdepeja, haenesa i drugih svojih političkih protivnikov, a ne kaj furt ratujejo med sobom i unda se tu potrošijo, tak da preslabi dojdejo na izbore i unda zidejo onak kak zidejo. Če si duže premišlavlem, če si duže gruntam vse dohaja na to ak tak nastavijo da se niti z te nove, očem reči, friške mele kruh ne bode jel.

Mi Međimorci smo spametni kak vrag, za vse kaj se primemo pretvorimo v zlato. Tak nam je ve palo na pamet da mi prinas, na tem falačko zemlice med dvemi vodami, šteroga nam je Božek dal kaj ga bodemo hasnuvali i na jemo hercuvali, počnemo delati pršuta i prevzememo Dalmošima jivoga brenda ( kak to naši turistički težaki velijo). Ve poglednite dok to prinas jempot gene kak bode zgledal naš međimorski stol: Nejpredi si pojemo meso z tiblice i doštukamo si ga z sirom i vrhjom, unda prejdemo na naš domaći pršut i kcoj turoše dovlečemo, štere polejemo z tikvinim, očem reči, kuščičnim oljom, a još si vrežemo, šnito, dve, kuruznoga kruha kakšega so još negda pekli moja mamica. A to je još ne vse, jerbo si vse to, na vse zadje, zalejemo z pušipelom. Brend do brenda, a nabonjkamo se kak breji vuki. I ne sam mi nek i vsi oni šteri k nam na fruštuk dohajajo.

Još negda so naši turistički težaki otpirali hotele, a unda so došli drugi, pak so jiv zapirali, tak da je ve ne znati kuliko jiv dela, a kuliko jiv je na čekanjo. A ve pak se otpira hotel za koje v Grabrovniko. Jako sam najgerek kak bode išel te konjski hotel jerbo ga kojov ne ruon preveč prinas vu Međimorjo. Mortik Barika i Valči računajo na stranjske koje, šteri bi k nam na vikende dohajali. Nekaj si gruntam da bi Vnukovi morali preširiti hotela tak kaj bi bil za koje i kobile i kaj bi se oni tam parili, a unda bi kcoj dodelali aprtmane za gazde kobili i gazdarice koji, tak da bi se i oni mogli družiti oliti počivati dok se jivi konjski ljubimci igrajo. Tre na vse misliti.

Profesor, magister i trener v čakoskomo labodoritaškomo klubo, Jožek Zbiljski, je prikelil jedno (??) odgojno-obrazovno pljusko svojemo labodoritašo. Brzčas je dečec negdi nekaj zahuzal i neje napravil vse ono kaj mo je i kak gospon trener rekel. Profesore, profesore, pak se to ne dela v ganjko gde vsi vidijo, a i sodec, pak si popušil črlenoga kartona i moral si oditi na tribine, a dečece si same ostavil na igrališčo kak kvočka piceke. Vsi znamo da je bota zišla vum z raja, ali je ne došla na svetlo dneva. Ostala je v zbornici, kabineto ili pak v slačionici, očem reči, ona se nuca sam za zebrane i tak se tre prema njoj ponašati. Vsi mi, a i ti profesore, bi moral znati da soci, delegati i novinari ne spadajo med te zebrane.

Minuli tork so se mali cigančeki (tak mi je teca Franca rekla) pelali z peciklinaj po glavnoj čakoskoj vulici, makar je tam več zabrana, ali so jiv komunalci ne pehali, zvonili so s zvoncima i kričali: Denes je Den Roma. Tak mali, a več znajo za svecki den Roma. Nekaj si gruntam da je to jim nešči moral reči. A kaj si vi gruntate?

ZADNJA VEST: Željko Sabo i Marina Lovrič Merzel so podnesli ostavke na vse dužnosti v partiji kaj ne bodo sramotili partijo. A kak se osječa biračko telo, sisačko i vukovarsko, to nišči ne pita i nikoga je ne brige. Kak i navek, parija se ipak nejpredi za sebe pobriga!


Zvir:
http://www.mnovine.hr/kolumne/Jožek%20radnik/1/Osleki%20i%20pršut%20v%20Međimorjo
i(l) str. 64. sim:
http://issuu.com/mnovine/docs/mnovine969i                   
i(l) str. 64. sim (?):
http://www.mnovine.hr/images/pdf/969/mnovine969i.pdf  (?)           

* * * * * * * * * * * * * * * * * * * * * * * * * * * * * * * * * * *   

Kajkavci Dalmaciji – Cesarica, 02:55

Kajkavci Dalmaciji - Cesarica

[Ljudevit Kaj]

Varaždinske vesti, br. 3615, 15.04. 2014.

Piše Barica Pahič

KAJ je naše pitanje i naš odgovor

Pametnejše je zgrešiti Bogu neg zemaljskem bogem?

Tak da zname: i želje moreju biti genocidne pak zate pazite kaj želite, a svoje želje najte nikemu reči. Ni na spuovedi na šteru bute valjda išli pred Vuzem. Pametnejše je zgrešiti Bogu i odgoditi kaznu, neg zemaljskim bogem. Ak nema nikaj druge dost je da se “znaju” nečije želje.
 
 
Do pervoga travnja (dneva na šteri se more i sme nekažnjene lagati), trebala je v Haagu zgotoviti rasprava o hrvatske tužbe i serbijanske protutužbe za genocid. Bile je liepe vrieme i niesem pune sediela pred TV-om, ali sem tu i tam nekaj načuhnula kak se tie sudski proces pred predstavniki međunarodne pravde razvija.

Jemput sem poslušala i izlaganje serpske strani, a posebne me se dojmile izlaganje serpskega pravnika i njegvega engleskega pomočnika. Se te serpske argumente o temu da je ona f pitanju genocida nevina več znam.i stuoput sem jih čula, pogotove one o hervatskem “progonu” 250 000 Serbov s Krajine za vrieme Oluje i uloge predsednika Tuđmana kakti glavnega krivca zate kaj je željel hrvatsku deržavu, pa onda i rat i progon. (Zgodne je i tuo kak broj tie prognanikov raste. Serbi obožavaju velike broje.)

A središnja točka, vidi mi se, bile je naglašene serpske mišljenje da je več i sama želja za samostalnom Hrvatskom zločin šteri sviet muora kazniti. (Pritem sem se zmislila jene popiefke štera, ak se dobre zmislim, ide ovak:

Da niesme imeli Franca
kie bi bil Hervate pustil z lanca
kie bi bil Bosnu delil
i Serbe z Hrvatske selil,
kie bi bil Veliku Hrvatsku risal
i tuo po salveti napisal?
I tak ostavil dokument
kak jaki i sigurni argument?

Šalna pesmica za ozbiljne stvari!) Tak da zname: i želje moreju biti genocidne pak zate pazite kaj želite, a svoje želje najte nikemu reči. Ni na spuovedi na šteru bute valjda išli pred Vuzem. Pametnejše je zgrešiti Bogu i odgoditi kaznu, neg zemaljskim bogem. Ak nema nikaj druge dost je da se “znaju” nečije želje.


V nedelu pokle tega bila sem na meši. Zgovarjala se molitva pokajanja (“…sagriješih vrlo mnogo riječju, djelom i propustom…”) i mam sem se zgubila f premišljanju je li nečija želja pitanje savjesti ili zločin i pitala se kaj bi ja napravila da me kie optuži za želju štera more komu naštetiti. Npr.željiela sem da se jen človek požuri priek semafora da bi i ja prek njega prie prešla? Dotični je krenul, z auta mu je nieki zatrubil i zlecal ga pa je opal i natukel si koljeno. Je li moja želja bila zločin zbubientanega kolena? Vište, kaj god premišljam!

 Zaprav; kak onda iti na izbore? Za koga se odlučiti, ak jeni drugemi same kriče da su lopovi, a si su, zgledi, jednaki? Kie bi onda koga mogel tužiti za želje da zebrani dielaju dobre? A si bume kažnjeni. Sreča je kaj su izbori tajni pa si krivu odluku moreme obesiti mačku za rep. I trpeti. Ostal bu nam same prigovor savesti. Srečen nam Vuzem!


Zvir:
http://varazdinske-vijesti.hr/kaj-je-nase-pitanje-i-nas-odgovor/pametnejse-je-zgresiti-bogu-neg-zemaljskem-bogem.html
i(l) str. 27 sim:
http://varazdinske-vijesti.hr/pdf/3615.pdf 
Aktuelni broj VV:
http://varazdinske-vijesti.hr/online/Main.php?MagID=1&MagNo=1     

Da niesme imeli Franca
kie bi bil Hervate pustil z lanca…
… kie bi bil Veliku Hrvatsku risal…

Lančni, lačni Franc riše…

LAČNI FRANZ - Naj ti poljub nariše ustnice (1986) , 04:05
https://www.youtube.com/watch?v=4ZizddICr2A

http://www.forumgorica.com/kajkavski/popevke-sem-slagal-i-recice-bral-kaj-danke-i-kaj-nocke/msg54410/#msg54410

KVARTET GUBEC Molitva - KRAPINAFEST 2013., 03:41

KVARTET GUBEC Molitva - KRAPINAFEST 2013.

[Ljudevit Kaj]

Međimurske novine, br. 970, 18.04.2014.
e-vundano 15.04.2014.

Piše: Jožek radnik

Premišlavanje Jožeka radnika

Podražila voda, podražilo vino!!!?

Nebode podražila sam voda nek i vino. Najme kaj, prepravlja se novi svetek vina i vsega kaj je z vinom povezano Urbanovo 2014. i več ve so nam rekli kak bode kupica za festival vina, očem reči, sprobavanje vina v štrigovskoj dvorani koštala 70 kuni, kaj je nekaj meje od deset oerov. Podražila je 40 procentov od lani. Pitam vas i sebe je li bodemo mi, Liničovi bokci z praznaj žepaj, mogli to platiti gda znamo da predi moramo i vodo platiti i kuliko to čovek mora spiti kaj potroši te kune?


Odnegda se je pripovedalo da je Nedelišće poznato po tomo kaj se črez jega ide v Čakovec, oliti vu Varaždin, otkod več dojdeš. I melo je, a brzčas ima i denes, nejveč krčmi v Međimorjo. Tak je to bilo, tak se je pripovedalo, a kaj se krčmi dotikavle tak je i denes je. No, to je bilo zdavnja, a denes je Nedelišče nekaj drugo, Nedelišče je jedno jakše (po penezi) ako ne i nejjakše mesto vu našemo malomo cvetnjako med dvemi vodami. Tu ga hajdi gospodarstvenikov, težakov, imajo Atona i gimnastičare, Mesapa za seme i plesnjake, imajo novo labodoritaško igrališče i dobre labodoritaše, imajo svoje (i naše) Međimorske popevke, pleh bandiste, a meli so i prvo tiskaro vu ovim našim krajima. Istina je da črez Nedelišče ide cesta od Čakovca prema Varaždino, i nazaj i da si morate dopusta zeti ako očete, pešice prejti prek te nedelske ceste. Pozabil sam vam reči da imajo i semafora jerbo brez jega nebi nikak bilo muoči dojti z jedne strane ceste na drugo. Najbrž je i negda tak bilo dok so ne meli semafora, pak so zato i otpirali krčme na jednoj i drugoj strani vulice i to zato kaj ne bi što bil hmrl od žeje dok bi čakal kaj pe v krčmo prek ceste. Navelikom se spominajo, a de ga jega dima tu bode, črez kratek čas, i ogej, da bodo delali novo cesto po šteroj bo moči dojti z Čakovca vu Varaždin, a kaj se Nedelišče niti nebo vidlo. To bode jako dobro za pešake, šteri bodo mogli prek ceste da bodo šteli, ali ne bode dobro za turistički težake, jer stranjski ne bodo niti vidli Nedelišče i ne bodo postajali v nedelskaj krčmaj. Vse je to lejpo i dobro kak se Nedelišče i Nedeliščanci lepo razvijajo i kak mesto i opčina raste, ali kak i vsi tak i Nedelišče ima svojo kmično strano, a ona jim dohaja od slovenske strane i to v dva primjerke: Parag 1 i Parag 2. Vsi smo mi najgerek kak bodo rešili toga problema, ali verjemo da se bode i to rešilo. To nebrejo sami, tu jim i Lejpa naša mora pomoči. Kuliko poznamo Nedeliščanke i Nedeliščance oni ne bodo mirni dok se i to ne reši.

Nebode podražila sam voda nek i vino. Najme kaj, prepravlja se novi svetek vina i vsega kaj je z vinom povezano Urbanovo 2014. i več ve so nam rekli kak bode kupica za festival vina, očem reči, sprobavanje vina v štrigovskoj dvorani koštala 70 kuni, kaj je nekaj meje od deset oerov. Podražila je 40 procentov od lani. Pitam vas i sebe je li bodemo mi, Liničovi bokci z praznaj žepaj, mogli to platiti gda znamo da predi moramo i vodo platiti i kuliko to čovek mora spiti kaj potroši te kune? Nekak razmem nas moške, mi si to bodemo zeli pod muko, ali kak bodo zgledale naše fajne žene dok zapijejo teh sedemdeset kuni? Nesam štel reči da so naša međimorska vina ne tak dobra i kaj tuliko ne vredijo, ali i teca Franca so rekli da je to prekpreveč drago, a kaj je preveč to je niti z kruhom ne dobro. A teca so navek znali kaj govorijo. Bar do ve.

Zdavnja, još dok smo v školo hodali, smo čitali da je trdi oreh sadovje čudnovato i što ga oče spotrti mora paziti na zobe. Brzčas je za to zazvedila i Mirela Holy, pak je po tomo i dala ime svojoj novoj stranki. Za Mirelo smo zazvedili prek smetja, očem reči, ona je bila ministrica za smetje i čisti okoliš dok so jo ne zmenili. Bila je čistam vredo jerbo je falila nas Međimorce, ali je nekomo ne pasala ili pak na žulj stala i morala je sprazniti ministarsko foteljo. Neje si preveč dugo gruntala i premišlavala, smetje je ostajla, a politiko ne, makar se jo je ona odrekla, i dela novo stranjko Oreh. Vse je to vredo sam si nekaj gruntam je li ga bode dosti mesta na našoj hrvaškoj političkoj sceni za vse te nove stranke? Za Mirelin Oreh smo več zazvedili, novo stranjko je najavil Nikica Gabrič, tu je i profesor Ljubo Jurčič. Skorom sam pozabil, pak tre ostajti mesta za Čačića ( i našo Sandro) dok se vrne z rešta. Kuliko vidimo ne bode nam dosadno kaj se politike i političarov dotikavle. Kuliko vidimo vsi so zazvedili kak je politika kruh brez motike i to beli.

Nej znati kaj naše političare vleče na more? Pak je bar ova zima ne bila preveč mrzla, ak ne bomo plinače pitali, a čakoski gracki oci so se odišli spominat v Pulu, dok je naš župan skočil malo do Dubrovnika. Nekaj si gruntam da se naši političari morajo malo vejč med sobom spominati i dogovarjati z onim gradima šteri so nam bliže. Nesam uspel zazvediti kaj Čakovčanci imajo zajedničko z Pulom? Mortik bodemo i mi počeli brode delati?A tu polek Čakovca je Prilok, a tu so i Priločanci od šterih se imajo kaj navčiti. A Dubrovnik? Brzčas oni imajo svojega Straoga grada, šteroga so vredili i zlišpali i na jemo služijo, a mi z našim nebremo nikak dojti na zeleno kito. Mortik vu tom grmo leži županov zajec? Mortik?

Minuli tjeden je na nedelskom Mesapo bil sejem knigi. Morem vam reči da je tu bilo vsega za videti i kupiti. Furt sam si gruntal, a na vse zadje sam i kupil par knigi, več znate da so to bile one nejfaleše, ali ve još moram najti što bo jiv čital. Znate več da ga cajta vse meje i meje i da knige jako teško dojdejo na red. To mi je jako žal jerbo v sakoj knigi čovek nekaj spametnoga zazvedi, ali teško dojdejo na red. Štel sam vam pravzaprav reči da so na Mesapo bili, i to jeden polek drugoga Tuđman. Tito i Hitler. Vse tri ste si mogli dimo odnesti za 85 kuni, Tuđman i Tito so bili po 30 kuni, a Dolfi je skaleral i koštal je sam 25 kuni.

Španceram se po pijaco, odišel sam i na čakoski sejam i vseposot mi nudijo bučino olje.  Nikak mi je ne moglo dojti v pamet kaj so to buče i gde rastejo, pak sam odišel k teci Franci pitat. Več sam vam rekel da je teca kak Guglin, ona vse zna, i još vejč od toga. Pital sam jo za buče, pak mi je otpovedala: Ti bedak jen, pak ti nikaj ne znaš. To so ti tikve i to ti je kuščično olje. Mam mi se je nekaj presvetilo i vse sam razmel. Moral sam si tecom spiti fraklec žganičke, pak si je ona to zaslužila.

Pred nami je Vuzem, nejvekši svetek nas krščanov i katolikov. Želem vam srečnoga Vuzma, nek nam uskrsli Božek da zdravja i pomore da i de nam nejbole tre. Neje Vuzem sam šunka, hren, jejci, bidra i do vuzmeno stola, do vuzmenoga zajtreka se ide črez cirkvo. Vsako dobro vam želim!


Zvir:
http://www.mnovine.hr/kolumne/Jožek%20radnik/1/Podražila%20voda,%20podražilo%20vino!!!? 
i(l) str. 64. sim:
http://issuu.com/mnovine/docs/mnovine970i                   
i(l) str. 64. sim (?):
http://www.mnovine.hr/images/pdf/970/mnovine970i.pdf    (?)   
       
* * * * * * * * * * * * * * * * * * * * * * * * * * * * * * * * * * *   

ŽTS Zvončice- Zvira voda, 04:53

ŽTS Zvončice- Zvira voda 

[Ljudevit Kaj]

Varaždinske vesti, br. 3616, 22.04. 2014.

Piše Barica Pahič

KAJ je naše pitanje i naš odgovor

Varaždinske književne društve na Literarnem maratonu v Ptuju

Nieje bile ni teškuoč da se razmeme jer je slovenski standardni jezik kajkafski, ali čist drukčeši od hrvatske kajkafščine. Vnuogi starejši ljudi (v Slovenije) znaju hrvatski (šteri jim vleče bolj na serpski). Nafčili su ga još v duoba Juge priek zajedničke vojske i televizije. Mladi pak ga vuče tek gda duojdu na naše morje.
 
 
Prešla je i zima i korizma i Veliki petek i Vuzem, a post nas tek čaka. Prestale su vuletnje poplave, ali dohajaju poplave zmenjšanja prihoda i povečanja rashoda. Stalne nas zasipavljeju grde viesti pak nam ostaje same boriti se za življenje i nastavljati posel šteri je pred njimi.

I Varaždinske književne društve nastavlja svoje delovanje. Pokle godišnje skupščine i proslave dvadesete oblietnice svojega osnivanja, ove je subote, 12. travnja njegvih dvanajst predstavnikov bile na Literarnem maratonu v susedne Slovenije. Tak je nastavljena suradnja s Literarnim društvem z Ptuja štera je pričela prie šest liet, a suradnju je dogovorila negdašnja predsednica VKD-a Ružica Marušić-Vasilić. Ona je i denes vu VKD-u zadužena za mednarodne literarne veze i organizaciju naših književnih”srečanj”.

Domačini na čelu s Natašom Ban, predsednicom ptujske literarne udruge, baš su nas liepe dočakali vu velike i prostrane dvorane Narodnega doma gdi oni imaju svoje prostorije za sastanke i delovanje.(Mi sme male zavidne gledeli kak zglede prostori štere oni imaju na raspolaganju, ak se zna da VKD nema nikakvega vlastitega mesta za okupljanje kam pa za priređivanje književnih susretov ili bar za svoje sastanke.) Na začetku samega Maratona ni bile pune govorancij, ali nas je z liepimi rečmi pozdravil župan, dr. Štefan Čelar, šteri nam je zaželel srdačnu dobrodošlicu i v EU i v Ptuj, pa govoril i o značenju i negovanju dobresusedskih “pogojev” i povezivaju kultura med narodi. Ptujski muški pevečki kvartet nam je, takaj v znak dobrodošlice, otpopeval tri slovenske pučke popiefke s čim je Literarni maraton, šteri je trajal se skup tri vure, dobil značenje svečanega i ozbiljnega kulturnega dogajanja. Pokle tega sme si čteli svoje popiefke i kratke priče, pa i naše nuove članice štere su f Ptuju pervi put zešle pred književnu publiku.

Vu tem se potrdile da publika največ ima rada duhovite i šalne, satirične popiefke. (Kakev god odušek ogorčenju i znak neslaganja z postoječim stanjem satira bila, i denes kak i naviek, same je lajanje na miesec.) Nieje bile ni teškuoč da se razmeme jer je slovenski standardni jezik kajkafski, ali čist drukčeši od hrvatske kajkafščine. Vnuogi starejši ljudi znaju hrvatski (šteri jim vleče bolj na serpski). Nafčili su ga još v duoba Juge priek zajedničke vojske i televizije. Mladi pak ga vuče tek gda duojdu na naše morje.

Na kraju su zmenjeni dari, a pri obedu i neformalnemu druženju dogovorjen je uzvratni susret vu Varaždinu.


Zvir:
http://varazdinske-vijesti.hr/kaj-je-nase-pitanje-i-nas-odgovor/varazdinske-knjizevne-drustve-na-literarnem-maratonu-v-ptuju.html
i(l) str. 35 sim:
http://varazdinske-vijesti.hr/pdf/3616.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1       

* * * * * * * * * * * * * * * * * * * * * * * * * * * * * * * * * * * * * * * *

Žmigavke (škilke, namiguše)
Navihanke / Zagorski sam veseljak. / ( www.trekzakenzo.nl ), 03:11

Navihanke / Zagorski sam veseljak. / ( [url=http://www.trekzakenzo.nl]www.trekzakenzo.nl )[/url]

[Ljudevit Kaj]

Međimurske novine, br. 971, 25.04.2014.
e-vundano 28.04.2014.

Piše: Jožek radnik

Premišlavanje Jožeka radnika

Ve bodo i ovi v Hrvaškoj vidli kak je to da Međimurka drži cugle vlast

      Naša Tamara Laptoš je postavlena za glavno šefico Uskoka. Vsi znamo da je ona pred tri leti bila zebrana za nejbolšo tužibabo na sveto, a ve pak se bode se borila protiv korupcije i organizeranoga kriminala. Več ve ne bode nišči mogel reči da i mi Međimorci nemamo nikoga v Zagrebo i to na nejvekšemo položajo. Tamara je postala nejjakša žena v Lepoj našoj, naša "čelična Lady" i nek si nišči ne misli kak bode žnjom lefko došel na kraj.
      Oni štere je mela na dnevnomo redo znajo kak je to dok jiv ona pretepe. Ak ne verjete meni pitajte Polančeca, Sanadera i profesore šteri so trgovali z ocjenama na fakso. Bole oštro zgledi i od vujne Agne, štera je strah i trepet celoga Vanovca, rekla je teca Franca. No, šalo na strano, neje to lefki posel šteroga je Lejpa naša dela pred našo Tamaro. Tre čuda znati, čuda živci i vupeša meti jerbo je čovek z vsima na sodo, a i vsi lažejo, očem reči, ne govorijo istino i z takšima je navek bilo teško na kraj dojti. Tamari želim čuda sreče, čuda uspeha na novomo poslo i čuda kriminalcov v rešto.

Naša Vlada, očem reči, jeni financ minister Slavek Liničov furt rivle roke v naše prazne žepe i nigdar mo je ne dosti. I niti ne počrleni dok ga primete z rokom vu našemo žepo. To se vam lepo po naški veli da jempot zdiguvle cene, a drugipot trošarine tam gde si nebremo pomoči. Ne znati kak dugo bode to trajalo, kak dugo bodemo mi zdržali? A to niti dragi Božek ne zna jerbo niti on se nebre restrgati, niti pak on more razmeti te naše "kukurikače". Vsi smo mi hodali v školo, vsi smo mi čuli za Franca Tahija, šteri je svoje kmete i seljake štel vništil do kraja(vsaka sličnost z Slavekom je čistam slučajna) i bil bi uspel v temo da se je ne pobunil i buno zdigel Matija Gubec. Jako sam najgerek što bode, itak, naš Matija Gubec, šteri bo nam pomogel kaj stanemo na rep našemo Slaveko i jegovomo šefo Zokijo?

Nebrem nikak razmeti kaj se čakoski gracki načelnik, Štef Kovačov, furt svadi z našom međimorskom šeficom za ceste gospom Ljerkom? Ne znati je li je prava božja istina da mo ona davle meje penez nek bi mo morala ili pak meje nek bi on nucal? Vsi znamo da ga penez ne nigdi dosti (jedino pre Liničo ga navek je kuliko on nuca), ali zato se ne tre sfaditi. Na vse zadje mi to zide na to da joj je Štef jalen kaj je ona lepša od jega. Ak ona vse dela po zakono brzčas unda nikaj drugo nebre biti v pitanjo!

Kaj ne bodemo mi Čakovčanci i Međimorci furt gombali da nišči od vlade ili pak glavneših političarov ne dohaja k nam, čakoski gracki oci so dopelali Svena Milera direktora Fonda za smetje i zaštito okoliša. Verjem da ste ne pozabili kak nam on kak glavni šrajf več dve leti obečuvle da nam bode zlišpal našega smeščaka v Totovco kaj bode zgledal kak oni nejlepši v Evropi. Ali kuliko sam mel za čuti gospon Miler je ve nikaj ne o temo govoril sam nam je obečal da nam bode kupil skorom pol kamiona za smetje voziti. Oporabilište nam je odišlo po riti k meši, ali kak so nam rekli ovi vu Fondo to oporabilište so, još lani, zahuzali naši "mladi lavovi" vu nejvišešaj grackaj foteljaj. No, pak je pol kamiona ne tak malo, a brzčas je to ona prva polovica z šterom se kormani.

Naši međimorski policaji se falijo kak so čuda penez zeli nam Međimorcaj na cesti i to sam zato kaj smo nekaj malo zahuzali. Dok to čujem furt si nekaj gruntam da smo mi Međimorci nejvekši grešniki vu Lepoj našoj jeerbo se niti jedni drugi policaji nikaj ne falijo z takšom penežlivom žetvom. Velijo vsi da smo mi šparavni i zato se mam lovimo za žepe čim nekaj zahuzemo jerbo nam je to na pol faleše. Pak je faleše i drugima, i Zagrepčancima i Slavoncima i Dalmošaj i onima v Istri, pak i oni dosti toga zahuzaju, ali se to nika ne vidi vu državnoj kasi. Kaj ne bi vi mislili da se oni vozijo kak nam dragi Božek zapoveda, da so zvezani ili da se ne spominajo z mobitelaj, ne, oni so se navek do ve dogovarjali z svojim policajima. Ali ve bodemo i mi to delali jerbo nam je šef policije, gospon Srpak, lejpo rekel nek se ne lovimo mam za žep nego predi dojdemo na spominek. To je zato kaj bodemo poznali naše policajske šefe, a i čuda nam bode faleše. Ste vidli kuliko kazni smo do ve platili i to sam zato kaj smo ne znali da se moremo dospomenuti vse z policajima. Još jempot se pokazalo da neznanje košta. I to čuda!

Dok čakoski gracki oci iščejo investitore po Istri i Puli oni pravi investitori, šteri imajo voljo i peneze za investerati v Međimorje so odišli v Prilok, grackomo načelniko Ljubeko Kolareko. Nebrem nikak zazvediti pak kud se itak more dojti v Prilok kaj se ne prejde črez Čakovec? Ili pak te investitori gledijo da so čakoski gracki oci ne doma, pak unda dojdejo, a kak jiv ne najdejo odidejo dale? A kam bo suza nek na oko, a investitori v Prilok, tam de so jim i drugi pajdaši.

Več dugo gombamo kaj k nam v Međimorje nikaj ne dohajajo esdepeovi ministri nek sam oni z haenesa. Ve smo zazvedili da jiv naši političari ne zovejo jerbo nam nebrejo nikaj dobroga donesti, a zabadav jiv nečejo zvati. Kaj nam ne bodo sam na stroško. Kak smo zazvedili esdepeovi ministri dohajajo sam z rešenaj problemaj. Ve nam je došel minister za zdraviče, Ranko Ostojič, donesel je jen pušlek kuni i rešil nas je bolnice. Ve več nebomo meli probleme z bolnicom i naši betežniki bodo lepo odhajali vu Varaždin tak da naša bolnica več ne bode delala gubičke. Na vse zadje smo zazvedili da je naša bolnica navek delala nejmenše gubiče, mela je nejmenše stroške po betežniko, a i naši doktori so bili jako šparavni. No, to kaj smo si mi Međimorci sami zazidali naše tri zadje bolnice za to je ne suha došla na ministrovo oko. A što nam je kriv kaj smo takši norci, pak si nikak ne znamo povrnuti ono kaj smo dali. Dej namBožek zdraviče i vse bode vredo, ali bolnico bode ostala tu de smo jo zazidali.

KUKURIKAČI KUKURIČEJO: Kaj smo vam obečali predi izborov to smo i ispunili: obečali smo vam promjene, a to smo i napravili, so hadezeovo rodbino v javnomo sektoro smo zamenili z svojom!


Zvir:
http://www.mnovine.hr/kolumne/Jožek%20radnik/1/Ve%20bodo%20i%20ovi%20v%20Hrvaškoj%20vidli%20kak%20je%20to%20da%20Međimurka%20drži%20cugle%20vlast
i(l) str. 64. sim:
http://issuu.com/mnovine/docs/mnovine971i                   
i(l) str. 64. sim (?):
http://www.mnovine.hr/images/pdf/971/mnovine971i.pdf   
       
* * * * * * * * * * * * * * * * * * * * * * * * * * * * * * * * * * *     

Drele i Vid Balog-Remetinec, 02:46

Drele i Vid Balog-Remetinec

[Ljudevit Kaj]

Varaždinske vesti, br. 3617, 29.04. 2014.

Piše Barica Pahič

KAJ je naše pitanje i naš odgovor

Imeti ili biti? – čist bedaste pitanje je sad

Kaj ti je filozofski relativizem! Jen mudrac je zgodne rekel za jenu denešnju facu. ”Negdar pervi akcijaš, denes pervi akcionar.” Tie je fljetne zarazmel f čemu je štos. Z diplomu (more i kupljenu) ili bez nje, nieje bitne. Ne spreoberneju ljudi same formu, neg i saderžaj; dušu če su ju gda i imeli. Na tu temu je besmertni Poljak Jirži Lec poručil ljudem naj ne ruše i postolja ak ruše spomenike (došle buju nueve veličine) i da se ropski lanci dielaju od samih nula (karakternih). Je li bolše imeti (karaktera i dostojanstva) maker nigdar ne doživeli remetinečku slavu? To naj sam Buog sudi.

 
Več put me kojkakve življenske zgode natiraju na čudne misli. Jena od tieh me napeljala na pitanje, aktualizierane ovih vuzemskih dnevov: Imeti li biti?

Nieje to hamletofske pitanje (Biti ili ne biti?) nad šterim i najvekši glumci svieta zestaju i fsredotočuju se da bi mu vdehnuli dušu i dali značenje velikega i sudbonosnega pitanja. Same najvekši majstori glume tuo moreju. Imeti ili biti pak je pitanje čist drugega ranga. Oni šteri su me negdar vučili filozofiju i teoretizierali o tem pitanju, spominjuči se mudresti od Biblije i se filozofe priek Platona do “svetega trojstva” Marxa, Engelsa i Lenjina, navlačili su, nie same mene, na čist krivi odgovor. Da je dvuojba teška, je! I jene i druge pitanje je uvjerljive zgovarjal i proslavljeni Rade, ali se f stvarnesti ipak opredeljil za imeti (Brijune), a nie biti (na prave strani v ratu). Mustače si je pustil, a z bradu još kalkuliera. Sad ju ima, sad ju nema. Ali dvuojba ga još muči i ciepa mu dušu. Da je važne imeti, nemre ni on v svoje veličine poreči. Zakaj bi inače ljudi šteli imeti stan, posel,  plaču “dostojnu čovjeka”, slobodu… Kaj se more biti, bez krova nad glavom, bez kruha, bez obleke?

Istina, nemre se biti ni bez pravde i ponosa,  ali tuo je več višeša štienga postojanja. Zate je pitanje imeti ili biti čist bedaste – veli mi jena napredna osoba. A da se biti more čez imeti, misliju i oni šteri duojdu na vlast. Zaneseju se i  počneju grabiti se kaj znači imeti pa vu tem zanosu nekak zgube orentaciju. Rietki se najdeju “onkraj brave”, a tuo ovisi opet o tem kie ima, a kie nema. Tam počneju znovič razmotavati dvuojbu o imeti (veliku plaču, položaj, muoč, bormeš i kakšnu diplomu), i biti male v reštu, ili ništ od tega ne imeti i biti siromak. Biti f kakvem  lokalnem reštu, a nie v Remetincu, fnuegem je ispod časti. Kie tam dospe, postane velika faca. Gda zide vun, pozdravlja dobre ljude šteri su ostali nutri.

Kaj ti je filozofski relativizem! Jen mudrac je zgodne rekel za jenu denešnju facu. ”Negdar pervi akcijaš, denes pervi akcionar.” Tie je fljetne zarazmel f čemu je štos. Z diplomu (more i kupljenu) ili bez nje, nieje bitne. Ne spreoberneju ljudi same formu, neg i saderžaj; dušu če su ju gda i imeli. Na tu temu je besmertni Poljak Jirži Lec poručil ljudem naj ne ruše i postolja ak ruše spomenike (došle buju nueve veličine) i da se ropski lanci dielaju od samih nula (karakternih). Je li bolše imeti (karaktera i dostojanstva) maker nigdar ne doživeli remetinečku slavu? To naj sam Buog sudi.


Zvir:
http://varazdinske-vijesti.hr/kaj-je-nase-pitanje-i-nas-odgovor/imeti-ili-biti-–-cist-bedaste-pitanje-je-sad.html
i(l) str. 35 sim:
http://varazdinske-vijesti.hr/pdf/3617.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1         

Remetinec (Novi Marof)
http://hr.wikipedia.org/wiki/Remetinec_(Novi_Marof)

Oj lepi Remetinec moj, 02:49

Oj lepi Remetinec moj

[Ljudevit Kaj]

Međimurske novine, br. 972, 02.05.2014.
e-vundano 05.05.2014.

Piše: Jožek radnik

Premišlavanje Jožeka radnika

Vsi nas falijo i to nam je dosti

Minister za zdraviče došel je vu Međimorje naše malo i jako je falil naše doktore i sestrice. Ne sam da so dobri nek so sjajni, kaj god to značilo. Pak mi znamo kakši so sam jif je premalo tak da preveč delajo, furt lečejo po bolnici i močijo se kak Kristoš. Tak so teca Franca rekli.


Minulih tjeden dni smo slavili Den županije i spomenden na Petra Zrinskoga i Frana Krstu Frankopana, štere so Habsburgovci skratili za glave sam zato kaj so šteli malo več pravice na ovomo našemo hataro. V soboto je bila v čakoskoj starešoj cirkvi, onoj štero je zafremal Mikloš Zrinski pred 355. let meša za pokojne.Županiji je pomagala to fešto naprajti i naša čakoska Zrinska garda tak da so došli vsakefele gardisti z vsih krajov Lejpe naše, od plavoga morja do zelene Slavonije. Dok so vse te postrojbe došle v cirkvo i dok so još došli političari brez šterih je to nikak ne smelo minuti, jako ga malo mesta ostalo za obične smrtnike, a oni kak da so znali da se to bode tak pripetilo, pak so ne niti došli. Morem vam reči da se niti vuni na glavnomo čakoskomo trgo ne preveč ljudi zišlo kaj bi feštalo za Den županije, ali so se najempot ljudi odnekod zmogli čim so lovci počeli deliti gulaša. Nesam ve siguren je li je to bilo zato kaj je gulaš bil jako dober ili pak zato kaj je to bilo vreme obeda? Vsaka čast onomo što je delal programa županiske fešte i kaj je gulaša del v program jerbo da je ne toga bilo vsi naši stranjski bili sigurni kak smo se mi Međimorci zdošli.

Na svetešjoj sesiji Županiske skupštine je govoril župan, Matek Posavec, i to frtalj vure o temo kakša smo mi županija, kaj nas muoči, kaj delamo, kaj bi šteli delati, a falijo nam penezi. Vse je to zgovoril, a mel je sam jednoga čistam maloga šalabahtera. Da bi mi tak fletno i tak tečno išli napre kak je župan govoril što zna de bi nam bil kraj?

Na županijski fešti so bili sam haenesovi ministri,. a niti jeden esdepeov je ne došel tak da se nebremo nikaj preveč penez nadjati z državne kase jerbo esdepeovci držijo v rokaj državno kaso. Najbrž so se naši saborniki i naši vodeči esdepeovi političari trebali založiti kaj bi Slaveka dopelali jerbo znamo da on nigdar ne dohaja z praznom rokom. Ili dojde z penezi ili z novim čekima!

Minul je i Prvi maj, težački svetek oliti osvetek. To je jedini den da težaki ne delajo nek svetkujejo. Tak bar v kalendaro piše. Verjem da ste i vi primetili da ga bažola bilo čuda meje jerbo so ga državni inšpektori zabranili. Rekli so da je preglasen i da zdiguvle temperaturu (makar i dežđ curi) i mogel bi pofuriti gorice, povrtele i sadovjake, a smeli so ga kuhati sam esdepeovci. Oni so na vlasti i imajo papere, očem reči, viziperte da jiv bažol nikomo i ničemo ne škodi, jer je to partiski bažol. Bažol na vlasti se smel jesti kuliko je što dobil (znate i vi da je vlast ne za se i da ga ne nigdar dosti), a prdeci so bili narihtani na 49 decibela (kaj je ne preglasno, a i neso ga mogli čuti oni šteri imajo slabeše slušne aparate), a mogel se prepoznati po specijalnoj duhi. Najme kaj, v lonec z bažolom se vleval pušipel, ali sam on z markicom, tak da se za bažolom ne prašilo. No i z vinom se je ne smelo pretjerivati jerbo se unda za bažolom ne niti prašilo, očem reči, slabo se čuje. A vsi znamo da se dober bažol dauko čuje, a mortik još i dale čim so ga kuhali "kukurikači" i to ona vekša i jakša polovica. Isto tak vsi znamo da ga ne pravoga bažola brez naših "seljakov". Mortik ste i vi negdi nabasali na kakši bažol šteri je ne bil z esdepeovoga lonca, ali znate kakši smo mi Međimorci, malo na svojoj roko, z malo vejč vupeša, pak se negdi i na črno kuhalo sam kaj se težački svetek preslavi z poslom: z žlicom v jenoj i kupicoj v drugoj roki.

Neje minister za zdraviče došel vu Međimorje naše malo baš z praznom rokom. Obečal nam je da bodemo mi glavni vu regiji za betege srca. Dobili bodemo aparata za srce, kakše več vsi drugi imajo, a i CT-a, šteroga nam je več tretjipot obečal. Znate kakši smo mi več je, dok nam nekaj davlejo mam smo pitali kaj nam bodo zeli. A zeli nam bodo frtalj postelji (ak ne i vejč), to se za ve zna, a za vse drugo nam bode depešo poslal. Minister je jako falil naše doktore i sestrice. Ne sam da so dobri nek so sjajni, kaj god to značilo. Pak mi znamo kakši so sam jif je premalo tak da preveč delajo, furt lečejo po bolnici i močijo se kak Kristoš. Tak so teca Franca rekli. Isto tak znamo da mi Međimorci ne bolujemo sam od srca, makar ga toga vsaki den vse vejč i vejč, i zato sam jako najgerek kam bodemo morali hodati z drugaj betegaj?

Kaj nek vam rečem za Jožeka (mojega imejaka) Zorčeca šteri se razišel z svojaj pajdašaj v hadezejo. Nebrem vam ja to nikak razmeti da Jožek šteri je bil precednik hadezea pre Roko, potprecednik v grado Čakovco i član precedništva v Županiji je ve najempot, kaj bi rekli, onak prek noči nekaj ne razmel i neje se znašel v novom koncepto stranke. Tak so bar rekli oni višeši od jega. Nebrem razmeti kak se ne znašel, a on ga je delal. Brzčas je ne ostavil mesto za sebe, vu tomo novom koncepto, pak so ga več ne nucali? Esdepeovci so ga natirali z posla, a hadezeovci z politike. Vsi znamo kak esdepeovcima ide posel brez jega, a jako sam najgerek kak pak bode hadezeovcima išla politika brez onih šteri so duže od 20 let nekaj delali i stvarjali. Kuliko vidimo nešči dugo dela i vse mo, prek noči, pozabimo, a nešči drugi, isto tak dugo, nikaj ne dela i to mo zanavek zapamtimo. Nebrem nikak razmeti zakaj mi je ruom ru na pamet pala ona stara pučka izreka: Ćudapot v živlejo zidemo čoveka šteri nam je nekaj dužen i navek se toga zmislimo, a još večpot zidemo nekoga komo smo mi dužni i nigdar se toga ne zmislimo?

Denes imamo Veleučilište i školamo menađere turizma i športa, imamo čuda šporcki profesori, a šport nam je vse niže i niže. Negda smo ne meli profesore, a niti menađere, a bili so nam labodoritaši i rokometaši v Prvoj ligi, a denes smo niti ne blizo. Istina bog, naše čakoske, očem reči, međimorske puce so došle na pocek Prve lige, več drugo leto za redom, a nega nikoga što bi jif prenesel (kak mladenko) prek poceka. V ženskomo rokometnomo klubo ga ne niti mladih školanih menađerov, niti profesorov, nek delajo i kluba vodijo stareši prekaljeni zaljubljeniki v šport i igro z labodom. No, oni so svoje naprajli, prvi so v Drugoj ligi, a ve je ostal posel za menađere, političare i vse one šteri imajo peneze kaj bi tem mladim, dobrim i lepim pucama zrihtali kaj bodo igrale v Prvoj ligi, a ne kaj bodo furt sam nejbolše v Drugoj ligi.

Pak je Zoki zmenšal plače državnim činovnikima. Najgerek sam, jako sam najgerek, kaj bode napravil ak mo dojdo na vulice kaj bodo ljudi vidli kuliko jif je kaj nikaj ne delajo? Unda se bode vidlo kuliko jif je od predi, a kuliko je esdepe svoji uhljebil!


Zvir:
http://www.mnovine.hr/kolumne/Jožek%20radnik/1/Vsi%20nas%20falijo%20i%20to%20nam%20je%20dosti
i(l) str. 56. sim:
http://issuu.com/mnovine/docs/mnovine972i                     
i(l) str. 56. sim (?):
http://www.mnovine.hr/images/pdf/972/mnovine972i.pdf     (?)   
       
* * * * * * * * * * * * * * * * * * * * * * * * * * * * * * * * * * *   

Ivana Kindl - Fala (Krapina 2009) Popevke zanavek HQ, 02:26

Ivana Kindl - Fala (Krapina 2009) Popevke zanavek HQ

[Ljudevit Kaj]

Varaždinske vesti, br. 3618, 06.05. 2014.

Piše prof. Barica Pahič

KAJ je naše pitanje i naš odgovor

Kie muora govoriti, a kie premučati istinu?

Povesni dogodek pretekloga tedna pak se zbil v Rimu gde su dva pape proglašeni svetimi. Zbile se i još jene čude pape Ivana Pavla II. V Rim je privlekel i hrvatskega predsednika, šteri ne veruje v njegvih deset čuda. Morti se svecem išel potajne zagovarjati za nuovi mandat. Ili je išel ftruc premijeru, šteri je izjavil da on muora govoriti istinu, a predsednik nie i sme ju premučati. Tak je nametnul dvojbu; govoriti istinu ili nie.


Baš gda sem pričela pisati svoju stotu kolumnu, na pamet mi je došel naslov jake popularneg romana “Sto godina samoće”. Zmislila sem se kak sem negdar “gutala” priču o fantastičnem Macondu i v sečanju redala likove obitelji Buendia. Tie čas su na radiju prečteli viest da je vumrl Gabriel Garcia Marquez, autor tega romana i nobelovec za književnest. Ne muorate verovati, ali bile je tak. Za mene čudesna slučajnest, dogodek za pamčenje!

Tega tedna je bila i Noć knjige pa je viest došla kak naručena za pretakanje z šupljeg f prazne. Javnesti je rečene da mi Hervati slabe deržime do knjige. Kak i nebi? Poglečte same izdvajanje za kulturu! I školski programi tomu ideju na ruku. Lektira je postala formalnest. Kaj bi deca trošila vrieme na čitanje! Se liepe sprepišeju z interneta. Jene nuoči se čitale. I vu Varaždinu. Bila mi je betežna noga pak sem čitala doma i s tri prečitane knjige male popravila prosjek. Povesni dogodek pretekloga tedna pak se zbil v Rimu gde su dva pape proglašeni svetimi. Zbile se i još jene čude pape Ivana Pavla II. V Rim je privlekel i hrvatskega predsednika, šteri ne veruje v njegvih deset čuda. Morti se svecem išel potajne zagovarjati za nuovi mandat. Ili je išel ftruc premijeru, šteri je izjavil da on muora govoriti istinu, a predsednik nie i sme ju premučati. Tak je nametnul dvojbu; govoriti istinu ili nie.

Več je bile takšnih dvuojbi. Jen je negdašnji jake eksponierani političar navodne rekel da on ne laže, neg sam tu i tam ne govori istinu. Na njega se obrušila sa javnest; si mediji, komentari, političke rasprave… Si su mu se smejali. Trajale je tuo nekaj časa, ali bile i pozabljene kak i tie političar. Ovie put je premijer rekel i tuo da on ni predsjednik države, a i nebu, kaj mu verujeme, govori istinu pa nie simpatičan. S tiem je zategnul špagu šteru je drugi mam još napel, kak god Vlada poduzimala mere štere su “smrtna presuda” populistem zate kaj govoriju kaj jim ”na pamet padne”. To me praf zdrmale.

Je li tuo premijer zgovoril kaj mu je na pamet opale ili mu je došle zvun pameti? Pokle je tuo ponavljene na TV-u, ali su redaktorske škarje obavile svuoj posel pak je i nestale. Ali da je rekel, rekel je. Da je zapamčene, zapamčene je kak i obečanja pred izbore i izjava da nie ništ obečal! Če se tuo deneme na kup, moreme biti mirni, kak i radi izjava varaždinskih gospodarov smetja da njieve zmešarije mi nebumo platili. – I kaj sme ve čineči ? – zavapil bi Dudek da nie vumrl. Tak zvuzlanu priču nebi sfantazieral ni Marquez!


Zvir:
http://varazdinske-vijesti.hr/kaj-je-nase-pitanje-i-nas-odgovor/kie-muora-govoriti-a-kie-premucati-istinu.html
i(l) str. 35.  sim
http://varazdinske-vijesti.hr/pdf/3618.pdf         
Aktuelni broj VV:
http://varazdinske-vijesti.hr/online/Main.php?MagID=1&MagNo=1       

* * * * * * * * * * * * * * * * * * * * * * * * * * * * * * * *

ŠTAndardni palindrom:
U RIMU UMIRU.

* * * * * * * * * * * * * * * * * * * * * * * * * * * * * * * *

Oprosti im, papa
(il nekak slično)
Oliver Dragojevic-Oprosti Mi Pape, 03:56
https://www.youtube.com/watch?v=Q9iL798jEto

* * * * * * * * * * * * * * * * * * * * * * * * * * * * * *

LOJTRICE I LESTVICE ZVUKOV
Vice Vukov Igrajte nam japa (Hrvatska narodna), 01:42

Vice Vukov Igrajte nam japa (Hrvatska narodna)