Međimurske novine,
vundato: 22.02.2013.
Premišlavanje Jožeka radnika
Ftičeki so se oženili, a ve so na redo političari
Tak vam je to: dok politička sveča dogori tu nebre nišči nikaj pomoči, očem reči, trebajo i mlajši dobiti svojo šanso, jerbo odnavek je tak bilo da na mlajšima svet ostaja. Tak je i Mladen govoril dok je mladi bil, a ve se z nogaj i rokaj bori kaj te mladi nej došli na vlast. Da se Mladena pita, on bi još ostal, ali Zokijova je tu zadnja, a on je za mladost!
Piše: Jožek radnikŠto čeka te se načeka ili se dočeka. Čakoski gracki političari so se dočakali kaj je još navek važeči gradonačelnik odustal od kandidature za novi gracki mandat, tak da bodo se i vsi drugi političari magli ve nadjati kak bodo ruon oni meli priliko kaj se sednejo v Šalamovovo foteljo. Neje on privatizeral foteljo grackoga načelnika, ali je dvanajst let vu njoj sedel tak da bodo mo jo brzčas, dali kak dar dok pe v penzijo kaj se ne bode moral doma privučevati na novi stolec. Kaj ne bodete mislili da je bilo lefko odustati od nove kandidature? Znate kak je to da srce oče, želja je jaka, znanja i iskustva ima, a partija nema milosti i neda. Mortik i partija ima praf, pak nebre tulikša leta biti jeden čovek na vlasti, štiri leti kak precednik Grackoga veča i dvanajst let kak gradanačelnik, jerbo i drugi partijci bi šteli biti malo na vlasti. Dok je gospon Branko to govoril novinarima, a prek jiv i vsim ljudima dobre volje, šteri so mo na leta glase davali, neje mogel zdržati,a kej ne bi suzo pustil. Ali se je jako lejpo vidlo kak dugoletna vlast zmoči čoveka, spustil je sam dve- tri suze, več jiv je nej mel. Nekak se potrefilo kaj so obedva odustali v istom meseco, i Papa i Šalamon, Papa je odlučil, zbogradi betega sprazniti svojo Sveto stolico, a Šalamon je, zbogradi politike, moral sprazniti svojo gradanačelničko foteljo, makar so i jeden i drogi meli čistam drugačeše plane. V Rimo je bilo po onoj staroj pučkoj: Papa snuje, a Božek odlučuje, a v Čakovco je tua stara pučka izreka malo presložena: gradonačelnik snuje, a partija odlučuje.
Čim je Šalamon dal vum da se ne bode znova utrkival za čakoskoga gradonačelnika partijci so sa mam zišli kaj zberejo novoga čoveka za to trko. Kuliko sam mel za čuti pri gracki vuri, meli so dva kandidate, Štefeka Kovača i Gordana Vrbanca. Dok so glase davali so vgasnoli svetlo, a do se svetlo znova vužgalo Štefek je, za konjski novet, bil naprej pred Gordanom. Partijsko biračko telo je tak odlučilo: do ve je gradonačelnik bil Branko, senior i veteran, a ve v trko kreče Štefek, mladi lav i skojevac. Pobedil je Gordana, ali sam najjgerek je li ga gracko biračko tela bode prepoznalo? Vsi znamo da so žene več kak pol biračkoga tela i da one dohajajo glase davat vu vekšemo brojo, a žene navek rajši imajo malo stareše i iskusneše moške, tak je i Branko izbore dobavlal, a Štefek je to još, za ve, nej! Dok so esdapeovci zebirali skojevca Štefa kak kandidata za novoga čakoskoga gradonačelnika očekivalo se da bodo oporbenjaki poslali vu boj nekoga malo starašega, kaj nebom rekel iskusnešega političkoga lisca, ali so hadezeovci zebrali isto tak mladoga Tomico Novinščaka. Istina je da je on doktor, istina je da se razmi vu svoj posel,a kuliko se razmi vu politiko i v posel gradonačelnika to nišči ne zna. Vu istom je lonco kak i Štef, tak da bodo i jeden i drugi morali uveriti čakosko biračko telo da bodo mogli na svojim mladim hrptima nositi terha šteroga od jiv išče posel prvoga čoveka grada. Negdi sam prečital da je rat praveč ozbilni posel da bi ga poveril vojnikima, a iz toga vum shaja i ona druga misal da je politika preveč ozbilni posel da bi ga poveril skojevcima, očem reči mladima. Vreme donaša iskustvo i političko mudrost. Kaj god vi mislili o tomo!
V županiskom mozaika se još navek slažejo kockice. Partija je hitila povjerenika Iveka v boj za novi mandat, a on je sam stiha kak da se još navek preimišlavle, tak da se tu još nikaj ne zna. Jegov kalfa, Matek Posavcov, je našel zaprta vrata dok je štel kaj bi esdepeovci bili za jega, a isto tak je trupnul vrata pred nosom hadezeovcima šteri so šteli žnjim plesati kolo, tak da ve, Darko i pajdaši, morajo iskati druge plesače. Dragec Lesarov i jegovi laburisti so nejdale odišli, oni imajo svojega župana i svojega načelnika vu Čakovco, kaj god to značilo. Več sam vam zadnjipot povedal kak je partiski vrh v belom Zagreb grado otpisal Brankija Šalamona i nedelskoga Mladena Horvata za izvršno vlast. Šalamom je prijel odluko k srco i odustal je od daljnje trke, a ve vsi novinari čakajo da bode, itak, tua konferencija v Nedeliščo gde bode gospon Mladen postupil po naređenjo. To vse skupa v Nedeliščo malo duže traje jerbo se, brzčas, Mladen nadja da bi se to moglo spremeniti. Kuliko sam mel za čuti pre čakoski gracki vuri, Mladeno so dnevi odbrojeni i to nebre nišči spremeniti tak da je sam pitanje dneva gda bode to on moral deti vum na svetlo dneva. Tak vam je to: dok politička sveča dogori tu nebre nišči nikaj pomoči, očem reči, trebajo i mlajši dobiti svojo šanso, jerbo odnavek je tak bilo da na mlajšima svet ostaja. Tak je i Mladen govoril dok je mladi bil, a ve se z nogaj i rokaj bori kaj te mladi nej došli na vlast. Da se Mladena pita, on bi još ostal, ali Zokijova je tu zadnja, a on je za mladost!
Minuli tjeden sam vam štel kupiti banane na čakoskomo placo, ali so mi ženice rekle kak so došle navučitelice z čakoski pučki školi i kupile vse kaj so mele. Neje mi dugo trelo kaj mi se je lampica vužgala, pak to so one odnesle kaj deci, v tretjemo i četrtomo razredo, pokažejo kak se ris gumice navlačijo na venoga. Ve vidite da je denes nej lefko biti navučitelica v pučkoj školi, kaj vse od jiv išče minister Jovanovič vu tom Zdrastvenom odgojo. Najgerek sam, gde itak učitelice trenerajo to metanje gumici, doma ili pak negdi na stranjskomo tereno? Lefko je onima štere doma imajo svojega čoveka, a nej znati kak one štere morajo iti soseda prositi kaj jim pomore da se malo zvežbajo. Ili, pak mortik i doma na bananaj vežbajo. Vu semo tomo je premjer Zoki Milanovič poštejak i nagradil je navučitele i navučitelice za jivo zalaganje i neje jim zel tri procente od plače kak vsim drugim državnim službenikima. Brzčas so tu i ris gumice nekaj pomogle. Minulo je i Valentinovo, ftičeki so se oženili, spekli so i kolačeke štere so deca pobirala po snego. Lejpo je to kaj vsi zaljubljeni i majo svojega dneva. Malo se je meje cvetja i vse ga ostaloga nosilo onima vu štere smo zaljubljeni, ali kaj.se more da nam je minister Linič hajdig penez pobral z žepov, pak nemamo za ono kaj bi šteli. Nejlepše je, ipak, kaj se kušleci morejo deliti do mile vole i nigdar ne sfalijo. Još jedno mi je lepo, nejleži moči podeliti zagrljaja i tu ne morate biti strahom kaj ne bi komo pasal, jerbo jedna veličina paše vsima, kak moškima tak i ženama. A morate priznati gda je to jako retko kaj so vse žene zadovolne z jednom veličinom. Ali i to se pripeti!
Zvir:
str. 56 sim:
http://issuu.com/mnovine/docs/mnovine910i?mode=embed&layout=grey i(l) str.56 sim:
http://www.mnovine.biz/images/pdf/910/mnovine910i.pdf * * * * * * * * * * * * * * * * * * * * * * * * * * * *
Zemi mene, zemi mene, prepisanu fticu..
Leiner & Hrnjak - Ftiček veli, 02.59
Ftiček veli (tradicionalna međimurska pesma - arr. Josip Dodlek):
Boris Leiner - bubni i glas,
Mišo Hrnjak - bas gitara i prateči glas,
Miljan Bakič - električna gitara,
Josip Dodlek - saz,
Andrijana Ljutič
Leiner & Hrnjak - Ftiček veli 
