KostanjPrijatel moj stari, zakaj tak šumiš?
Kesno je i noč je, zakaj vre ne spiš?
"Gledim te zdavnja tak i prezmišlavam,
Kak teško je pametnem takvem glavam!"
Ti me špotavaš, ja to dobro znam.
Al vezda moreš; baš sem čisto sam.
"Ja ne špotam se, al gledim te dogo
i razmem tvoje misli se i togo."
Ja žalosten nesem, zakaj bi i bil?
I dobre sem vole, malko sem i pil.
"A kaj bo zutra, kaj bo potlam zatem,
Dok plakal se boš za tem krajem zlatem?"
Kaj? Zutrašnjica me neje na brige;
Plakati se ne znam, - eto, to je se!
"Al poveč mi, dok skupa smo tak sami,
Kaj tebe ova zemla niš ne mami?"
Ja nazaj već ne mrem, da bi baš i štel,
Drugi me je život odnesel i zel.
"Al ove život lepši je i slajši,
I da ga poznaš, tu bi ostal rajši!"
Vu tem kraju poznam samo svojo bol.
Zato sem zakopal ovde srdca pol.
"Da poznaš starce, koj so ovde bili,
Veselo kak so delali i pili!"
Vmrli so i oni, tam na grobju spe,
Mesto nji se vezda drugi vesele.
"Da poznaš ovo nebo, zvezde ove,
I ovo zemlo, kaj te k sebe zove!"
Preveč dobro poznam se kraj sebe to,
Zato nemrem pota najti vre domo.
"O, dojdi k nam, još neje se zgubleno,
Mladosti cvetje cvelo bo crleno!..."
Lako noč, moj stari! Zdavna spi vre se.
Mesečina ide samo kraj steze.
http://www.koprivnica.hr/gradska-uprava/17.-galoviceve-jeseni