Baština > Kajkavski
P Oltar - POrtal naš svagdašni PObôžni i vragolasti / Bogoslavija
Ljudevit Kaj:
ZVONA, Mesečni list čakovečke žup,
SUŠEC (GREGURJEVŠČAK, PROTULETNJAK, OŽUJEK) 2021.
NEKAJ ZA ČAS KRATITI
Cirkve so otprte i naš Božek nas čaka!
Kak vreme leti, makar ga je korona malo zabrenzala, ali sejeno prefletno ide. Nebodete veruvali, lani na početko korizme se je korona dotepla k nam na of naš Falaček zemle med dvemi vodami, a več je minulo vejč od pol ovoletošje korizme i korona je još navek tu. Nesam da je tu nek se i šepuri kak zagorski puran. Verjem da ste ne pozabili kaj nam je lani korona naprajla, za Vuzem nam je cirkve zaprla. Ne znati kak bode ovo leto za Vuzem, ali verjem da bodemo ovo leto na vuzmeno jutro nesli korpice i cekere z šunkom, jejcima, hrenom i drugim domačim oblizekima na posvečaje. Nebremo se pofaliti da smo sfondali korono, ali doktori so nas počeli pomalem cepiti protiv toga betega šteroga je nišči ne videl, a same nevole nam donaša., kak nam tak i našemo zdravičo. Kak bilo da bilo, ali naš dragi Božek je ne dopustil kaj bi mi jegovi verniki hitili puške v kuruzo, i kaj bi ostajli prazne cirkve, naheznuli smo si maske na gobce i vrnuli smo se nazaj v cirkve. Istina Božek, čuda nas je meje, ali saki šteri si oče biti z Božekom zdobra, saki šteri se oče žnjim pospominati more dojti jerbo so naše međimorske cirkve dosti velike tak da saki vernik ima polek sebe i svojega razmaka, a te razmaki so negda i vekši nek to iščejo naši tri mušketiri Beroš – Božinovič i Capak, jerbo je hajdi oni šteri so „odgovorni“, ostali so doma i ne delajo stisko v cirkvi i zato ga v cirkvi vejč razmaki nek ljudi.
Kak sam vam več rekel, v korizmi smo, a korizma je navek bila vreme pokore, molitve, posta i pripravljanje za naš nejvekši vjernički svetek Vuzem. Navek smo iskali čega se bodemo vu teh četrdeset – pedeset dni odrekli. Znuom da bi se ovo leto si nejrajši odrekli korone ili pak potresi. Deca, a i mi malo puneši se navek posle pepelnice odrečemo cukori, čokoladi ili pak pijače, a kak dugo zdržimo kaj to ne počnemo mehnatiti sam dragi Božek zna. Moj pajdaš i vtrni sosed Pišta je sako leto znova obečuval da v korizmi ne bode hodal v krčmo i morem vam reči da je ovo leto bil čovek od reči. No, moramo deti roko na srce i pošteno priznati, pred Božekom i ljudima, da ga ne bilo korone, štera je zaprla se krčme, ne bi bil zdržal. Ali kak je bilo bilo je, soseda Pištija moramo pofaliti jerbo je još od Badnjaka ne bil v krčmi, a kak nam je Vuzem več pred vratima verjem da bode i do Vuzma zdržal. Kak je rekel, on lefko zdrži, ali ga jegovo ženo, kak spužva, telo furt vabi, bar malo, v krčmo i to na šank. Tak je bar bilo sih ovih let dok smo još ne znali kaj je to korona. Nigdar je ne priznal, bar nam jegovim sosedima i pajdašima, a na spovedi je brzčas župniko pošepetnol, je li je hodal v krčmo zbogradi pijače ili pak ga je tua vlekla natakarica Štefica?
Verjem da smo se več privčili na maske i kaj nam roke pijejo vejč alkohola nek jetra, ali zato nesmemo zabiti da nas Božek još navek čeka v našim cirkvama, lefko ga bodete prepoznali, on jedini nema masko v cirkvi i ne išče kaj bodemo držali razmaka, očem reči, kaj bodemo čim dale od jega. Kak sam več rekel, cirkve so otprte saki den, župniki vas (nas) čakajo vu spovedalnicama tak da moremo i ovo leto srediti račune z dragim Božekom kak bi čiste duše i čista srca dočakali uskrsloga Isusa na Vuzmeno jutro tak da bodemo posle meše pripravleni za svetešji i blagoslovleni zajtrek.
Srečnoga Vam Vuzma želem i nek nam Uskrsli da snage kaj bodemo zdržali to korono i dočakali dneva da jo bodemo sfondali.
Ili kak je to rekel moj pajdaš i vrtni mejaš Tonča: - Ak imaš kakše probleme v živlenjo, moli se Božeko, ako pak te nikaj ne muoči, zafali Božeko!
Vaš Tonček!
--- Citat: --- Š a l a m a l a
Pripravnica
- Sestro, ste zeli krv betežniko v sobi broj 112?
- Jesam, gospon doktor, ali je mel jako malo.
- Kak to mislite, malo?
- Pak sam šest litrov!
Nastavek:
http://www.forumgorica.com/index.php?topic=123.msg57180#msg57180
--- Kraj citata ---
Zvir:
ZVONA, Mesečni list čakovečke žup,
Leto XXVII, br.3, ožujek 2021. l.
Nakladnik: ŽUPA SV. NIKOLE BISKUPA, ČAKOVEC,
http://www.ofm.hr/zupa_cakovec/ , http://www.ofm.hr/zupa_cakovec_jug/
Naklada 1200 primerkov
Navigacija
[0] Lista Poruka
Idi na punu verziju