Nâstevek prethodnoga lista:
Spelajne 3.
IŠTVANIČ, PLEBANUŠ, PETRICA, MIŠKEC
Petrica leži na podu (broj 7), pod glavom ima smotanu deku.
PLEBANUŠ: (stoji od početka slike na prosceniju s čašom u ruci.) Amice, amice, revera (37),
mi smo več starci!
IŠTVANIČ: Revera, starci!
PLEBANUŠ: Tempus fugit (38)! Leta se samo presmiču i vendar nam je več i Božić prešel!
PETRICA: (sedni na stolčeku v zapečku)
Badnjak za pečjum, vuzem na drvocepu,
Kuvamo sarmu, klobase i kiselu repu.
Stric-vujc, šic-mic, kraj pisane pečenke i devenic
Severec Silvestrov ze snežne Medvednice,
Jaglin (39) v čurki, đumber v devenice.
PLEBANUŠ: Tak je, Petrek, imaš praf! Kaj, ruka je več v redu?
PETRICA: Tak, tak!
PLEBANUŠ: Bu bolše, ak Bog da! Je, vreme se samo zmiče, leto osemsto šezdesetprvo je
došlo, a mi smo još leto dan starejši!
IŠTVANIĆ: Je, je, tempus fugit! Kak se je samo osemstošezdeseto leto brzo presmeknulo?
Hja, tak valda mora biti!
PLEBANUŠ: A ja se samo čudim kad vidim kak tvoja deca vse više rastu!
IŠTVANIČ: E, kaj češ, deca rastu, je!
PLEBANUŠ: Bome, tvoja Jelica je, - ja bi rekel, več zrela za iti zamuž!
IŠTVANIČ: Je, je!
PLEBANUŠ: A, slušaj, spectabilis amice, da vidiš mladoga Ferketiča, pravi dečko!
IŠTVANIČ: (oštro) Reverendissime, ostavi tu priču! Vendar, nek je!
PLEBANUŠ: Kakve su to reči? Nek je! Pak kaj ni Vlatko sin našega bivšega konškolarca?
IŠTVANIČ: Mega neprijatela, teri me je…
PLEBANUŠ: (prekine ga): Sat, spectabilis amice, de mortius nil nisi bene (40)! (popije si malo
odloži čašu na stol)
IŠTVANIČ: Imaš praf. Pusti to, prosim te, na stran. Reči ti rajši meni, kakve novosti imaš ze
Zagreba?
PLEBANUŠ: E, nekaj se kuva! (opet se vraća na proscenij)
IŠTVANIČ: Vraga se kuva, naj mi zameriti, kaj sem vraga spomenul! Daj si mira, ja niš ne
verujem!
PLEBANUŠ: Daj si ti mira! Ti neverujući Toma! (ode do obluka z rukami odzaj na riti i
gledi čez obluk) Daj si ti mira! Svet je okrugli, pak se vrti i zato se mora dojti na staro! Slepi budu videli, gluvi čuli. Bude nekaj, bude! Tirolec, naš becirksforštand (41), hip se nekak za vuvom češe a to onda nekaj znači. Imam ti ja fini nos!
IŠTVANIČ: Nek se češe, niš ja ne verujem! A ti stem svojem finem nosom ojdi z Bogom,
kajti se taj več stoput trdo i luto prevaril!
PLEBANUŠ: (nehoteč se primle za nos) Medtemtoga ovaj put verujem da nij! Car je več
najuril Aleksandra Bacha, ukinul apsolutizem i drugi nam veter puše z bečke strane. A, vele da se i stare pravice budu vrnule i da mi Horvati bumo sami svoju politiku vodili! Celi Zagreb bruji i čeka novoga bana i novi Sabor.
IŠTVANIČ: (zdigne kupicu, ustaje) Bog te poživi! (Plebanuš prilazi stolu, uzima svoju čašu
i kucnu se, a razgovor se nastavlja stojeći.) Samo nek bruji i nek bruji i nek čeka! Ja nigdar niš Beču ne verujem. Timeo Danaos et dona ferentes, boj se Danajcov i gda dare nose!
PLEBANUŠ: Ja vse štimam da vendar nekaj bu! Vse je to vezda drugač nek predi!
IŠTVANIČ: Niš ni drugač! Beč laže kad zehne. A Mađari, Mađari nas v sedemsto let, kaj smo
živeli ž njimi v iste države, nigdar nisu prevarili! I zato čuj reverendissime, dosta mi je Ilerije za sve veke vekova! Prekleto ime, kad god ga spomenem.
PLEBANUŠ: Ne greši dušu, amice!
IŠTVANIĆ: Grešil bum, dušu, grešil, kuliko me je volja, a tvoje je da mi daš absoluciju (42), to
ti je posel. Za koga me..da ne velim, znaš i sam kaj, vlečeš za jezik! Kad god je mogel, gda je godek imal priliku Beč nas je zmirom bil varal? Seti se samo Zrinskoga i Frankopana, pametni Hrvati, prvi su se protiv lažlivoga Beča pobunili, a onda su mu, slepci, na reč veruvali, a namesto oprosta Beč im je, cap-carap, brzo glave odsekel. A Jelačić, čak i jednomu Jelačiću, teri je Beč spašaval i Mađare okolo nagajnal, vse Beču na volju, i njemu je Beč, kad mu je to pasalo, za falu krila potsekel. I vezda kaj imaš pri nami, švapčarenje i nemškutarejne vsekud oko nas.
PETRICA: (pridigne se i nalakti na jednu ruku) Zerinski grof črez meglu
Kak slepec gre v Beč.
A nazaj ga ne bu, a nazaj ga ne bu, a nazaj ga ne bu
Nigdar več.
(klekne i sjedne na pete)
I Jelačiča bana i Gospona Gaja,
I Njih sem videl bloditi v Beč:
Tam buju svoju, tam budu svoju, tam buju svoju
Popluvali reč.
(kleči i pokazuje kao da slijepci hodaju s ispruženim rukama)
I videl sem v megli tristotin banov,
Tristotin banov, tristo galanov (43),
Kak zmirom črez meglu blodiju v Beč.
Tristotin banov črez meglu sem videl,
Kak ničemurnjaki (44) pleziju v Beč.
(Ištvanič i Plebanuš na to se okrenu k njemu, pozorno ga slušaju)
IŠTVANIČ: (nastavlja poluokrenut k Petrici i pokazujući prstom na Petricu, kao da
potvrđuje njegove prethodne riječi) Dragi moj amice, Beč nam je stal za vrat i više niti pisnuti nesmemo. I jedno ti velim! Taj si tvoj fini nos moreš samo obrisati, kajti mi svoje pravice nigdar više dobili ne bumo, pa makar se celi Zagreb na glavu postavil! Punctum (45)!
PLEBANUŠ: Punctum, punctum! Kaj ti vredi taj tvoj punctum! Vse je to istina, kaj si
povedal, ali nemreš z jednim „punctum“ zbrisati vse ono čega smo vsaki dan svedoki! Daj gledi jedno malo z otprtemi očmi oko sebe! Istina je da vu ovo naše bogečko Turovo pole kesno novice dolaze, medtemtoga sejeno nemreš reči da se nekaj ne punta! Em vidiš, Beč se zdobrovolil i turopolskoga komeša Josipoviča pomiluval pak su ga ze zatvora vu Kufštajnu domom pustili.
IŠTVANIČ: Čul sem to, čul! Ali Josipovič nebi bil Josipovič, da i tu ni Beču zapapril! Kad su
mu rekli da je pomiluvan, rekel im je da ga to ne zanima, da on od Beča nikakvu milošču neče, i da on z rešta nejde! Prav je bil napravil!
PLEBANUŠ: Kak nejde z rešta, per amorem dei?
IŠTVANIČ: E, kak? Tak! Kaj misliš da je to Beč napravil zato jer nas ima rada ili mot ima
najemput rada komeša Josipoviča? Beč više ne zna, kud ni kam, i sad, kad je i v Beču došel vrag po svoje, evo ti tekliča v Kufštajnu: Gospon Josipović, njegovomu veličanstvu je jako žal, najte se srditi kaj ste bili v reštu, njegovo veličanstvo Vas je pomiluvalo, ojte lepo z rešta van! A Janton ti Josipovič tekliča lepo za vuvo i van pak mu veli, nek cesaru pove da on njegovu milost niti je iskal niti mu treba i ni štel ziti ze zatvora van. Kakvu su paradu imali! Na rukah su ga morali v Kufštajnu van ze zatvora odnesti. A Josipovič je bil veliki čovek, pravi domorodec. Kaj je god pripovedal, čega se god bojal da bi nam se moglo trefiti, to se i trefilo.
PLEBANUŠ: Amice, prosim te, naj sada od njega već sveca ili proroka delati!
IŠTVANIČ: Kakvog sveca ili proroka? Je li ni komeš Josipovič tam jošče četrdesetčetrtoga
leta vu vugerskomu saboru lepo rekel, da Ilirci budu slavnu horvatsku kraljevinu razrušili i na nejnemu kamejnu stvorili ili austrijsku carevinu ili ne daj Bože nekakvu, kak je on onda rekel «nebuloznu srpsko-ilirsku državu». Ko da je bil prorok! I kak vidiš i sam, zaizres vezda imamo austrijsku carevinu, nigde nema mađarskog jezika, protiv kojega su se Ilerci tobože borili, medtemtoga zato sred Zagreba i sred Horvatske vučimo švapščiju, imamo Agramer Cajtung (46), švapski teater, «kisdihand gnediges frajlajn» (47), «ist gefelig majn her» (48) i to ti je to kaj su Ilerci stvorili! I nigdo se sada više ne punta, nigdo! Ne vufaju se! I poslušaj dobro, kaj ti ja velim! Ak Ilercem bilo gda pak negdo da vuzde v ruke i ono bi se drugo Josipovičovo prorokuvajne, ono, da bumo skončali vu nekakve nebulozne srpsko-ilerske države, jošče bi se i to moglo gda god i pripetiti. Pak kaj se ni več Lujo Gaj, a gde drugde nek v Beču, z onim Srbinom Vukom Karadžičem nekaj o tomu spominal? Srpski Vuk i ilerska Crvenkapa, moreš si misliti kak bi takva priča mogla završiti!
PLEBANUŠ: Slušam te, amice, i ne znam, kaj bi rekel. Gda te čovek ovak sluša, rekel bi da
imaš praf. Ali zdravi razum mi vendar govori, non est verum (49) , totuk nekaj ne štima. Nemrem si premisliti da bi Ilerci, a more čovek denes od njih misliti kaj hoče, delali nekaj protivu sebe, protiv svoje domovine!
(Cijeli su razgovor odvija stojeći. Na Ištvaničeve riječi "Protiv čije domovine?", Petrica sjedne i pozorno sluša)
IŠTVANIČ: Protiv čije domovine? Koju to domovinu oni imaju? Gdo su ti Ilerci? Sve sami
dotepenci: onaj Ludovik ili Luj Gaj, Slovak ili Francuz, bog bi ga znal, Krajnec Ignacijuš Fuks, mužikaš, koji se sam nazval Lisinski, onda Paulus Štoos, več po imenu vidiš kakov je Horvat, pak Grk Dimitriós Demeter, Srbin Đuro Daničić, Slovak Bohuslav Šulek, Štajerec Jakob Frass teri se prozval Stanko Vraz, pak onaj Wiesner zvani Livadić, Farkaš zvani Vukotinović, Adolf Weber pak i tvoj presvetli biskup Štrosmajer, to su ti sve Ilerci, to su ti vsi tobož Horvati! Svoja strajnska imena premejnili su na horvatski, i vezda misle da moru ovde Iliriju delati i vse po svojemu mejnati. Gde su ti totuk pravi domoroci, od starine Horvati? Med Ilercem nema ni jenoga od starine Horvata, tak ti je to!
PETRICA: ( Na zadnje Ištvaničeve riječi Petrica ljutito ustaje, prilazeći Ištvaniči i
plebanušu ljutito galami)
Ti frassi gladni, fuksi, demetri, vlaški gerci,
Kaj v kamarilu (50) bleje kak tepci (51)
To su sami gaji, carski oficeri,
Semi jeno oko pod bečki topferl (52) žmeri.
Denes su puntari, zutra buju žbiri (53),
Čarni su i žolti (54) ti ilerski špaliri.
PLEBANUŠ: Medtemtoga Ilerci pišu, amice, pišu zmirom nove ilerske knige, a kaj delaju
Horvati? Nema noveh spisatelov, nema mladeh! Gde su več takvi velikani kak je bil
Brezovački, Habdelič, Glavinič, Belostenec, Mulih, Vramec, Mikloušič je vmrl, Lovrenčić je nekaj pisal…
PETRICA: Je, «Petrica Kerempuh ili svetski potepuh»,
Pravi norc i neposluh
Vse je pisal, kak sem rekel
I velikog imetka stekel,
A ja nis dobil ni za kruh,
Pomagal mi je Sveti Duh.
PLEBANUŠ: …Fuček, Pergošić, a da ne velim Kristijanovič, kak je taj čovek pisal, pak
Briglevič, ali sve kaj su oni pisali je niš ili čistom malo, nekaj pobožnoga, nekaj hasnovitoga i tak…
PETRICA: Kajkavska reč Kaj vre jezer let klopoče.
Kak prekleti melin očivesto je
Do denes, bogme, zmlela ni jene knjige ne,
Kaj mele bogčije, strah i bedastoče.
PLEBANUŠ: Svi ovi drugi spisateli, kaj su nekaj vredeli, prešli su na ilersko pisajne. I nij od
tebe pošteno tak govoriti da se samo dotepenci zovu Ilerci. A Janko Drašković nemreš za plemenitoga Draškoviča reči da ni Horvat! Pa on je med glavnemi Ilerci!
PETRICA: Draškovič grof Janko, koji svoju mladost,
Leno je zarajtal nikomu na radost
Potepel je imetek, star poštenje zgubil.
Bog daj da se v peklu navek bude smudil.
(prezirno pljune i ode žurno s pozornice)
Nâstevek vu sledečomu listu.
