HR.KAJ.NĚ? - Lépa naša kajkavska / pregled tisKAJna

[Ljudevit Kaj]

Međimurske novine, br. 948, 15.11.2013.
e-vundano 18.11.2013.

Piše: Jožek radnik

Premišlavanje Jožeka radnika

Kaj je to z našaj školaj???!

Več sam, zadnjipot napisal, kak nam deca jako fletno počnejo pušiti (ve sam zazvedil da ne pušijo sam po parkaj nek i v školskaj šekretaj i to ne sam dečki nek i puce), a pijača se rastače na vse strane, a na vse zadje je tu i droga. Moramo vsi skupa zasukati rukave jerbo sam tak moremo deco v red dotirati. Župan se nek pobriga za ravnatelje, tajnike i školske financ-ministre, a učitelji, nastavniki, profesori i vsi mi ostali se moramo pobrigati za deco, ak jif očemo postajti na zdrave noge i ljde žjif naprajti.


 Precednica Narodnjakov oliti HNS-a, Vesna Pusić je jasno i glasno rekla da se več ne kani kandiderati za precednico stranke. Neje rekla da ostavlja politiko na milost i nemilost mladim lavovima nek se ona bode obrnula evropskoj politiki, očem reči, brigala se bode kaj bo Lejpa naša čim nekaj značila v Evropi, a domačo politiko bo prepustila mlajšima, šteri imajo vejč volje i želje boriti se z domačim vjetrenjačama.. To je još ne vse, rekla je bi štela kaj bi te novi šef stranke mel okoli četrdeset let, malo vejč ili pak malo meje. Baš si nekaj gruntam da je velika šteta kaj te novi stranački izbori dohajajo tak fletno, pak naš nejmlajši župan, Matek Posavec, nema leta kaj bi bil i nejmlajši šef stranke, no, ali tu je naša zamjenica župana, Sandra Herman, štera ima vse kvalitete, a i brzčas bi i gospi Vesni pasalo kaj bi štafetna palica šefa stranke bila v ženskaj rokaj. Kuliko vidimo i tu konja za trko imamo. Ak sam dobro razmel gospo Vesna oni stareši od šezdeset let ne dohajajo u obzir. Gospa precednica je rekla svoje, a ve je na redo "narodno"biračko telo.

V zadje vreme vse so oči vuprte v Sisačko-Moslavačko županijo, očem reči, v jivo županico Marino Lovrić Merzel. Najme kaj, ona vu ova teška i recesijska vremena kupuvle novoga auta i to ne bilo kakšega nego Audija 6, šteri košta porezne obveznika prek štiristo jezer. Oni kesnijo za nami jerbo smo mi v Međimorskoj županiji, pred 6-7 let kupuvali (i kupili) črnoga auta (ne Audija nek BMW-a) kaj se je ondašnji župan (isto Posavec) mogel pelati z drugim autima u državnoj povorki, a kaj ne bode strčel kak bogečki. Mi smo na vreme rešili svojega auta, a ve imamo čistam druge probleme, štere nebremo tak fletno rešiti, ali se borimo.

Kaj je to z našaj školaj???! Nejpredi je, i to još lani, školski minister Željko Jovanović zmenil ravnateljico v Ekonomskoj školi, pred mesec dni je odišla ravnateljica Gospodarske škole, a ravnateljska fotelja v Graditeljskoj školi se ravnateljo Zorano Pazmano nuše po što zna šteripot. Nej znati je li sam mi v Međimorjo imamo probleme z školaj, očem reči, ravnateljaj ili smo pak nejmeje jeden korak naprej pred drugima. Dok smo v red tirali sredje škole gruntali smo gda je v pučkim školama vse v redo. Ve najempot je i pučkoškolski zmazani veš počel dohajati vum. Klopka se počela odmotavati v školi Strahoninec, a župan je mam naredil kaj mo na stol donesejo čiste račune i vse druge škole štere so pod jegovom komandom. Z jedne strane očemo dotirati v red one šteri gospodarijo z školaj, a z druge strane se moramo pobrigati i za one šteri delajo z decom. Več sam, zadnjipot napisal, kak nam deca jako fletno počnejo pušiti (ve sam zazvedil da ne pušijo sam po parkaj nek i v školskaj šekretaj i to ne sam dečki nek i puce), a pijača se rastače na vse strane, a na vse zadje je tu i droga. Moramo vsi skupa zasukati rukave jerbo sam tak moremo deco v red dotirati. Župan se nek pobriga za ravnatelje, tajnike i školske financ-ministre, a učitelji, nastavniki, profesori i vsi mi ostali se moramo pobrigati za deco, ak jif očemo postajti na zdrave noge i ljde žjif naprajti.

Moja žena vam je, pred par dni, preslavila četrdeset let kak se oženila, a ja dvajsti jerbo sam pol cajta ne bil doma. Za to veliko obljetnico je odišla deset dni na morje. Vidla je da sam zmočeni i nervozen, pak me ostajla doma kaj si malo počinem i k sebi dojdem. I vsima nam je bilo dobro, ona ima rada more (ili pak mornare), a meni pak je nejlepše doma ili pak tu negdi blizo goric. Nejsmo minulo vreme pofratili nek smo zazvedili komo kaj paše. No, rečite mi, prosim vas lejpo, neje nejlepše kaj vsaki ftič leti vu svoje jato?

 Sulejman Veličanstveni i dale vedri i oblači Lejpom našom. Kuliko sam mel za čuti, išče se novi Mikloš Zrinski, šteri bi to trebal sprečiti i šteri bi bil spreman dati celoga sebe za slobodo Lejpe naše. To je još ne vse. I Sulejman se odlučil za obnovo svojega harema, sprobal je več vse tak gda i on oče nekše nove i mlajše, makar je on vsaki den vse stareši i stareši. Kuliko sam uspel zazvediti pre čakoski gracki vuri, raspisal bode natječaja kaj se mo ne bi štera dosmickala v harem prek veze. Nejsam uspel zazvediti je li bodo puce z Burze dela prve na testeranjo?

Naš negdašnji labodoritaš, a ve magister kineziologije v prislaskoj školi,Željko Domjanič, se dosmickal do šporckoga inšpektora v Međimorskoj državnoj upravi. Došel je stiha i to unda dok ga se je ne nišči nadjal. Nej znati je li ima strica ili pak je igral z kviskijom? Gde ga je i pred kim zdigel kaj se tak visoko dosmickal - to te ja pitam?

VESTI IZ 2042. LETA:

- Gordan Vrbanec je, na vse zadje, ipak zebrani za čakoskoga gradonačelnika na ponovljenaj izboraj i to na listi "Za nejlepši i nejbolši Čakovec" i tak je ispravlena nepravda štera mo je napravlena pred nekaj meje od tridesti let gda ga je čakosko biračko telo štelo zebrati, ali je jegova ondašnja partija za to ne mela sluha.

- Dalmoš, Igor Štimac je znova zebrani za izbornika naših hrvaških labodoritašov. Na tom mesto je zamenil Čirija Blaževića, šteri je preslavil svoj 107. rođendan, skupa s zlatnom kolajnom osvojenom na Sveckomo prvenstvo na Islando i odišel v jezeropot zasluženo penzijo.Govora mo je održal prijatel Zdravko Mamič, šteri se ostavil labodoritanja i več pet let vodi zagrebečki karitas.

- Hajduk je osvojil prvenstvo Lejpe naše posle skorom četrdeset let. To mo je uspelo jerbo je Labodoritaški savez oduzel Dinami 12 bodi, štere je osvojil dok je igral Samir pod dopingom. Najme kaj, puhal je posle utakmice v Splito i našli so mo prek jeden promil međimurske graševine v krvi i celi sanduk pod posteljom v hotelo.


Zvir:
http://www.mnovine.hr/novo/index.php?option=com_content&view=article&id=23692:kaj-je-to-z-naaj-kolaj&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine948i       
i(l) str. 56. sim:
http://www.mnovine.hr/images/pdf/948/mnovine948i.pdf             

* * * * * * * * * * * * * * * * * * * * * * * * * * * * * *

Gusti Draksar i Skandal bend - Stopram sam se oženil - Lijepom Našom 2013. u Čakovcu,

Gusti Draksar i Skandal bend - Stopram sam se oženil - Lijepom Našom 2013. u Čakovcu

[Ljudevit Kaj]

Međimurske novine, br. 949, 22.11.2013.
e-vundano 25.11.2013.

Piše: Jožek radnik

Premišlavanje Jožeka radnika

I moški imajo svojega dneva

Ne bodete veruvali, ali i to postoji. studenščaka je Međunarodni den muškarcov, tak bar v kalendaro piše, ali ne v vsima, ali nišči ne fešta. Dobro je znati, da ne bo pak nešči rekel da se nikaj ne dela na ravnopravnosti spolova.


Vsaka rit jempot dojde, očem reči, predi ili potlik, na šekret. Tak je bilo i z ritjom Nadana Vidoševića. Verjem da se zmislite, neje to bilo tak zdavnja, da je gospon Vidoševič štel biti precednik Lejpe naše. I morem vam reči da so ga žene i zebrale. Vsa je sreča kaj smo mi moži nej vse svoje žene pustili glase davat jerbo bi on, na vse zadje, postal i precednik. Dok je ne prešel na izboraj, a bil je nejlepši od vsih kandidatov šteri so se nudili, jega je to tak strefilo kaj je počel umjetničke slike skupljati, očem reči, na kup metati v svojo repnico, štero je zazidal polek brežne vikendice. Dobro je govoril na sodo Ivo Sanaderov, nejlepši premijer od 1993. pak do denes, da ga jega i vekših i jakših igračov kaj se umjetničkih sliki dotikavle kak je on. Neje mo se, ruon, mogel za ime zmisliti, ali je sliko nosil v buksi, no sodec ga je za to ne nikaj pital. Isto tak je Ivo ne nikaj govoril za ručne vure. Kuliko vidimo Vidoševiča so vure ne gvintale, ali so mali polarni medeki bili jegova slabost. Kaj ne bi i vi mislili, kak i drugi v Hrvaškoj, šteri nemajo priliko čitati moja premišlavanja, da je Nadan muočil medeka, nej on ga je pravzapraf zel vum z vode kaj se je ne zmrzel. Vidim da me jako čudno gledite, pak vam moram sprepovedati kak je on došel do toga polarnoga medeka. Putuvali so mali polarni medek i jegov japa z Islanda v Ameriko. Jeno vreme oni plavajo, a unda mali medek zapita japo: - Japa kaj smo mi? - Mi smo polarni medeki. - lepo mo je japa otpovedal. Pak so oni jedno vreme plavali i mali medek je pital isto. Japa mo je isto odgovoril, sam malo glasneše. Posle dve vure mali medek znova pita japo: - Japa, a kak ti znaš da smo mi polarni medeki? - Gledi sinek, tvoj japica je bil polarni medek, tvoja mamica, ja, tvoj japa sam polarni medek, tvoja mamika isto tak i kaj ti je unda čudno da si i ti polarni medek! Razmeš? - Razmem, japa, razmem, ali zakaj pak mi je unda zima kak peso? Toga polarnoga medeka je naš Nadan dal k sebi dopelati kaj mo ne bode dale zima v morjo. -Dober čovek, kaj bi si žnjim rane vezal - rekel je medekov japa.

 Neje lefko biti političar, makar sam lokalni. Poglednite, gospon doktor, Tomica Novinščak je bil sam kandidat za gradonačelnika, pak mo je spokalo slepo črevo i vsa je sreča kaj se z slepim črevom nebre čakati i tak je bil na operaciji makar so doktori, jegovi pajdaši, štrajkali. V isto vreme nam je i zebrani gradonačelnik, Štef Kovač završil v bolnici i to z nekšim virusom. Neje to bil nekši jako jaki virus jerbo ga je dobil od dece, ali nam je gradonačelnik zgubil imuniteta otkak je zgubil županiske partijske izbore. Za politiko tre meti dobroga želoca, a i kajkakši virusi dohajajo dok se čovek nejmeje nadja.

 I ovo leto smo obilježili obljetnico kak je Mikloš Zrinski Čakoski nastradal od divje svije v Gornjemo Kuršanco. Vsi so bili tam: župan z svojimi zamjeniki, čakoska Matica Hrvacka, Brača Hrvaškoga Zmaja, Zrinska garda, nedelski opčinari, deca iz Zagreba z svojimi profesori, a došli so i Mađari, kak vsako leto. No, neje pak bilo nikoga od čakoske gracke vlasti, kak vsako leto, a Čakovec je Grad Zrinskih. Ne moram vam reči gda je nej bilo niti jednoga navučitela, a niti profesora povjesti, jerbo oni nemajo kaj delati v Kuršanco. Kak bodo deca došla da jivi navučiteli ne hodajo?

 Ne bodete veruvali, ali i to postoji. 19. studenščaka je Međunarodni den muškarcov, tak bar v kalendaro piše, ali ne v vsima, ali nišči ne fešta. Dobro je znati, da ne bo pak nešči rekel da se nikaj ne dela na ravnopravnosti spolova.

Doktori več ne štrajkajo, tak se bar pripoveda, jerbo jim je minister odredil radno obavezo, ali, kuliko sam mel za čuti, jemlejo sam one nejbole betežne. Došel sam vam na hitno, nekaj me je tlak muočil, ali nesam zgledal preveč maroden, pak so me poslali dimo. Vu vuhima mi je bobnjalo i zvonilo, črleni sam bil kak papriš (rekli so mi da najbrž pijem), a i momica mi se po glavi motala. Unda sam se zmislil: - Imam i dopunsko - rekel sam na šaltero, a z žepa sam zvlekel plavoga kuvertlina. - Pak kaj ste ne to mam rekli? - i otklenoli so mi vrata.

Zimnica se negda spravljala, pak se i denes spravlja. I denes se reže zelje i meče v kado kaj bodemo mogli jesti kiselo zelje z boncekom, suhaj rebrecaj, lokotaj ili pak čurkaj. Vse je to skorom isto kak je i negda bilo sam se denes zelje nabija, a negda se gazilo. Stareši se dobro zmislijo kak je to bilo, pak nam i denes, z veseljom, prepovedajo o temo. Negda so zelje gazile mlade snehe i bila je to jedina prilika kaj so se mogle videti bose i gole ženske noge. Istina Božek, negda so ne bile podbrite nek onak lejpo kosmate kak jif je dragi Božek dal i dok so tockale to zelje z haljam v rokaj, negda so jif zdigle malo više, pak so i gačke blesiknule. Ak so jif mele, a ako ne unda so se mustači malo vum naluknuli. Unda ga ne bilo interneta, kak denes, kaj se gole ženske noge ili pak gole ritice, kaj nam sliko obračal, morejo videti vsaki den.

 Na meši vu čakoskoj starešoj cirkvi za poginule branitele vu Vukovaro i Škabrnji, kak i za vse poginule branitele v Domovinskom rato je bilo nekaj vejč od 600 ljudi. Nekaj si gruntam: a gde so bili drugi kaj so ne došli molit i zafalit tem ljudima, pak so oni poginuli za vse nas, a ne sam za ovih 600 - 700 bogoboječih ljudi.

VESTI  IZ  2042. LETA:

Negdašjemo ministro prometa i zadarskomo grackomo načelniko, Božidaro Kalmeti, je sod, na vse zadje, ipak presudil za grehe štere je negda napravil. Najme kaj, v zadjoj kištici policijskoga stola našli so prijavo da je 2009. leta prekoračil brzino na autobano od Svetoga Roka do Zadra. Pelal se je prek 200 km na vuro, a kak se tak teški grehi nebrejo i nesmejo pozabiti, sod mo je odrezal kazno, zračunal kamate i zel vozačko dozvolo.

Penzioner Kalmeta je najavil žalbo zbog prevelike brzine i premale penzije.


Zvir:
http://www.mnovine.hr/novo/index.php?option=com_content&view=article&id=23845:i-moki-imajo-svojega-dneva&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine949i       
i(l) str. 56. sim:
http://www.mnovine.hr/images/pdf/949/mnovine949i.pdf             

* * * * * * * * * * * * * * * * * * * * * * * * * * * * * *

Muži(kaši)
Igrajte nam mužikaši, 11:10
FA Šiljakovina

Igrajte nam mužikaši

[Ljudevit Kaj]

Međimurske novine, br. 951, 06.12.2013.
e-vundano 09.12.2013.

Piše: Jožek radnik

Premišlavanje Jožeka radnika

Vse je teži teži denes biti političar


Več sam vam minuli tjeden, preštimani čitateli, pisal o temo kak je dovčerašji prvi partijac Međimorja, Ivek Perhočov, ostal brez vsih funkcija, tak da se more znova faliti kak je ve čistam sloboden čovek. Dok se je to pripetilo Ivek je zgledal čistam zadovolen, zbajal je svojim partijskim pajdašima kaj mo je bilo na srco i odišel je dimo. No, to je sam tak zgledal na videc, jerbo duh mo je bil čistam vredo, ali je telo ne zdržalo, tak daje i on, posle gradonačelnika Štefa, završil v bolnici i to na operaciji slepoga čreva. Kak zgledi slepo črevo je bila Ivekova nejslabeša karika i čistam je vredo kaj se toga rešil. Isto nevoljo je mel i mladi doktor Tomica Novinščak, hadezeov kandidat za čakoskoga gradonačelnika. Znate kak se veli: vse ono kaj te ne vništi te zjača, tak da bodo se ve Ivek i Tomica mogli ojačani znova baviti z politikom i to brez nejslabeše karike. Kaj se dotikavle betežnikov, esdepe protiv hadezea vodi 2:1, kaj znači da je ipak leži biti v opoziciji.

Z županiskaj partiskaj izboraj je ne zadovolen niti čakoski gradonačelnik Štef Kovačov, šteri se je isto kandideral i za županiskoga precednika partije. Na izborno sesijo so došli precednik stranke, Zoki Milanović, tajnik Igor Dragovan i minister Siniša Hajdaš Dončić. Kuliko sam mel za čuti, to so vse Štefovi  pajdaši, a posebno minister, ali dok so se brojili glasi Štef je dobil meje (Štefovi pajdaši so ne zdigli roke) i Mladen Novak je postal precednik. Kak vidimo ne vredi več niti ona starinska: Što ima kuma, vujca i strica do precednika se dosmica. Dobro veli soseda Franca da so ve nekša čistam drugačeša vremena, štera niti ona ne razme makar ima več 86 let.

V minulo nedelo smo mogli zbirati je li smo za ili protiv. I zebrali smo. Jedni so bili za, a drugi protiv. Glasi so prebrojeni i več jif je bilo za. A zakaj? Za to kaj se ženidba preseli iz Zakona v Ustav. Tak bi to trebalo biti. Ali mi Međimorci smo ostali vsaki na svojoj strani. Oni ZA so si skopali kanala i naprajli šanca na desnoj strani Trnave, a oni PROTIV na levoj. I ve se spominamo prek nišana. Jedni se drugih sramijo, a oni drugi ove prve zovejo pederima. I jedno i drugo je grdo i nikak nebrem razmeti zakaj je to tak. Jako sam najgerek gda nas bode Trnava znova spajala, a ne razdvajala. Otkak smo se 1919. leta otrgli od Mađarov nigdar smo se ne tak posvadili kak ovo nedelo!

 Kaj bode z Lejpe Naše? Jedni prepovedajo da se bodo županije vgasnule, drugi velijo gda bodo ostale, ali bodo zrivane v pet ili pak šest regiji. Naši županijski večniki nedajo našo županijo, ali kaj nam to vredi da se pomalem vse seli prek Drave vu Varaždin. Odišla nam je carina, sod, porezna uprava, pošta, a nekaj se šepetuji da bodemo ostali i brez policajov, cestarov, bolnice, a i brez vode. Vse to bodemo mi meli sam bodo znami gospodarili Zagorci. Jako sam najgerek je li, na vse zadje, nebodemo meli i VŽ tablice na našaj međimorskaj autaj?  Pred našaj novozebranaj političaraj je velika i teška zadača. Županijski večniki so svoje rekli, ali to je ne dosti, treba se za to boriti i izboriti, jerbo ak  bodemo kak mlačna voda brzčas bodemo odišli po riti k meši. I mi i naša županija.

Jako sam najgerek kak, itak, kanijo posložiti te regije vu Lepoj Našoj? Kuliko sam mel za čuti, trelo bi biti šest vekših regiji. Dok so to čuli naši pajdaši z Istre oni so mam zafremali svojo županijo kak posebno regijo. Čim je to došlo na stol našemo saborniko i laburisti, Drageco Lesaro, on je nej dal kaj bodemo mi hujši od Istrijanov, pak je zapisal naše Međimorje kak osmo regijo. Tri dni posle so se javili Baranjci da i oni očejo svojo regijo. To vam je več deveta. Ne moram vam govoriti da je gradonačelnik Bandić prijavil svojega grada Zagreba kak deseto i nejvekšo regijo. Naši južni sosedi Dalmoši malo duže to štoderajo, a prvi so se javili Dubrovčani, jerbo so oni još negda bili republika, tak da jim sikak morajo dati regijo. I več smo došli do dvanaest. No, verjem da je to još ne vse. I zato sam najgerek kaj bode, itak, zišlo z te naše regionalizacije? Što se vse još ne bode našel, tak gda bodemo, na vse zadje, pak završili na dvajsti.

 Familija Fabić z Kotoribe, japa Ivek i mama Mirjana imajo devet dece. To je za vsako pohvalo i jif, brzčas, ne moramo pitati kak so glasali v nedelo na referendumo. I to je još ne vse: hitili so televizijo vum z hiže jerbo kvari i deco i mlade, a i ljude. I zato najbrž i imajo devet dece kaj so ne gubili vreme pred televizorom nek so deco delali. Vsaka čast, tak se to dela. Malo je tak spametnih i tak kuražnih. Familiji Fabić skidam kapo do poda!

 Počel je Advent, vreme čakanja Božića. V obedvemaj čakoskaj cirkvaj so vsako jutro v šesti vuri rane meše, zornice, a vsako soboto ili pak nedelo se vužiže po jedna sveča na adventskomo venco. Čakoski turistički težaki so nam i za ove dneve preprajli dostik vsega toga. Of tjeden bode v Čakovec došel Deda Mraz i to z kočijom. Denes, v petek, navečer bode pred cirkvom počakal svetoga Mikloša dok of dojde od večernje meše i celo noč ga bode vozil kaj mo pomore podeliti dare za dobro deco i šibe za nas hmajugače. Deda Mraz bode hercuval vse dok se ne vužge štrta sveča na venco, a unda bo mo došel v pomoč Ded Božičnjak, tak da bodo oni skupa na kočiji dočakali maloga Isuseka. Jako sam najgerek kak bode to vse završilo i jeli ne bode prevelika stiska vu toj našoj čakoskoj varoši?

 Međimorska burza dela bode of petek, za Mikloševo, delila darove vsim svojim težakima, po spisko. Vekše šibe bodo dobili oni šteri duže štemplajo.

ZADNJA VEST: Zbogradi vsakodnevnoga šinfanja i delanja norca žnje, čirilica si nekaj grunta gda bode ostajla Lejpo Našo i odišla dimo. Brzčas smo pak pretirali!


Zvir:
http://www.mnovine.hr/novo/index.php?option=com_content&view=article&id=24173:vse-je-tei-tei-denes-biti-politiar&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine951i         
i(l) str. 56. sim:
http://www.mnovine.hr/images/pdf/951/mnovine951i.pdf               

* * * * * * * * * * * * * * * * * * * * * * * * * * * * * *
Ladarice - Malo Međimurje (live), 03:39

Ladarice - Malo Međimurje (live)

[Ljudevit Kaj]

Međimurske novine, br. 952, 13.12.2013.
e-vundano 16.12.2013.

Piše: Jožek radnik

Premišlavanje Jožeka radnika

Što je Čakovčancima fkral Božiča??!!

Vse je deto na program i Sveti Štefek je tu i Sveti Ivek, a Božiča nigdi. Nebrem veruvati da je Čakovčancima nešči fkral Božiča, a isto tak se toplo nadjam da je to nej napravil nešči z stranjke na vlasti. Kak bilo da bilo Čakovčanci bodo ovo leto brez Božiča i zato ga hodajo iskat v Beč, Graz ili pak Pešto.

 V  ovomo minulomo   tjedno, šteri je več skorom za nami, je svoj den mela korupcija, a na svoje so došla i ljucka prava. Najme kaj, nejpredi smo, v pondelek, 9. decembra obilježili Međunarodni den borbe protiv korupcije i to tak kaj smo se vsi složili vu jednomo da se borimo za takšo državo i takše društvo vu šteromo mito i korupcija ne bi meli svoje mesto, očem reči, vsi smo za to kaj bi se vse delalo onak kak nam to dragi Božek zapoveda, a ne onak kak bi mi ljudi šteli. A dok mi ljudi nekaj očemo, unda nejvečpot ne pitamo kak do toga dojti i kuliko to košta. Vsako leto znova se mi na tej den toga zmislimo i obečamo jeden drugomo da več tak ne bomo delali, ali nas navek nekši vrag odvleče z pravoga pota. Verjem, brzčas, da bode od ovoga leta čistam nekak drugač.

Mam posle pondelka, v tork, desetoga decembra smo se zmislili na ljucka prava i dali smo jim pravo glasa. I to celi den. Nejmeje so se bunili oni šteri imajo nejmeje prava, a nejglasneši so navek oni šterima nekaj malo fali. Pak smo znova rekli da so vsi ljudi jednaki, ali pred Božekom, jerbo gda smo mi ljudi v pitanjo unda vredijo nekša čistam druga pravila. A dok mi ljudi pišemo pravila unda nikak nebremo biti vsi jednaki.

Vreme je Adventa (to tak evropski zvuči), očem reči, Došašča i čekanja Božiča i rođendana maloga Isuseka. Čakoski turistički težaki so nam za ovoletni Advent preprajli kajkaj toga za našo deco, a za nas stareše so tu meše zornice v obedvemaj čakoskaj cirkvaj, vužiganja sveči na advenckom venco, koncertlini vsaki tjeden, a tu je i advencka spoved. Čakoski advent je brzčas jedini šteri se hapil prvoga decembra, a traje do Staroga leta i jedini Advent na sveto šteri nema Božiča. Vse je deto na program i Sveti Štefek je tu i Sveti Ivek, a Božiča nigdi. Nebrem veruvati da je Čakovčancima nešči fkral Božiča, a isto tak se toplo nadjam da je to nej napravil nešči z stranjke na vlasti. Kak bilo da bilo Čakovčanci bodo ovo leto brez Božiča i zato ga hodajo iskat v Beč, Graz ili pak Pešto.

Ne tak zdavnja sam pisal o temo kak je droga, pijača i pušenje več došlo i do dece v pučkoj školi. Najme kaj, kriza je još navek v Lepoj Našoj, a i vu našemo malomo Međimorjo, pak ga vse meje penez vu dečjim žepima, a ono kaj nemajo nebrejo niti potrošiti. A znate ka je to: vsi računajo na dečje žepe, očem reči, dečje peneze. Jendako se veselijo i oni v trafikaj šteri cigaretline prodavlejo, oni v štacunaj šteri pijačo prodavlejo i švercajo, a isto tak i oni kaj drogo dilajo. Dok so ovi dileri zazvedili kak ga dostik penez pre deci v pučkoj školi, došli so nutri i črez tua vrata. Ne sam gda so došli nek so i ostali nutri, a mi se ve trebamo muočiti kak jif bodemo nazaj vum natirali. A znate kak se jedna tak velika nevola kak je droga more vum natirati? Nikak!!??! No, to je još ne vse, pred nami i našom decom je još jedna nevola, a to so kockarnice i kockanje, očem reči, klađenje. Dok se jempot dojde v kockarnico, a stopram dok se jempot dobijo penezi, unda je deco nikak nej muoči vum stirati. A prosim vas lepo, rečite mi što se je da obogatil od kockanja? Znate što? Gazda od kockarnice! Ali to naši deci nej muoči dopovedati. Ili pak moramo probati to naprajti vsi skupa. Ali, poglednite kuliko je to nevoli pred našom decom: pušenje, pijača, droga, kokanje i klađenje, a mi smo vseposot sami. Ali ak bodemo sam mirno stali i gledali unda jim namo nikaj pomogli, tre fljučnuti v roke i na posel!

Naši Serjančari so kak samoposluživanje, k njim dohajajo tati, zemejo si kaj jim paše i odidejo. Najgerek sam je li je to bilo i predi ili pak je to počelo posle od kak smo došli v Evropo. Ak je počelo posle unda znamo otkod tua nevola dohaja, ali ak je to bilo i predi unda bodemo te tate malo teži našli. Rekli smo da so veliki tati oni šteri z kombijima i kamijončekima kradejo po našim poljima, a ovi so još hujši šteri premečejo hiže i iščejo sam peneze. Znuom gda tre nekaj naprajti kaj se tua nesnaga sfonda, ali ne bi znal kaj? Brzčas moramo vsi deti glave skupa, ak očemo kaj ne bodo te tati furt krali, i to predi nek nekomo poči film, a te nešči je lovec.

 Nejvekši i nejjakši županijski večnik, gospon Zdravko Holcinger z conom zvani Giga je dobro rekel: kaj se mi bojimo regionalizacije, ona bode predi ili pak potlik došla, ak so naši "Kukurikači" tak obečali v Briselo, ali bodo i županije ostale ovak kak so i denes je. Spremenilo se bode sam to kaj bodo se ovlasti i penezi delili nekak drugač. Vidim da me čistam dobro razmite: Kak mi imamo dobre i jake političare med "Kukurikačaj" v Zagrebo, pak bodemo brzčas ostali na repo dok se bodo penezi delili, očem reči, pak bodemo odišli po riti k meši.

Grad Čakovec,oliti jegovo Gracko veče je usvojilo Proračuna za Novo leto. Malo je skrčeni, veli koalicija na vlasti, a da je preveč napuhani, to so rekli ovi v opoziciji. Tak je to navek gda vsaki gledi z svoje strane. Gradonačelnik, Štef Kovač, je pojasnil da furt špara na Grackoj upravi, a tak bode i drugo leto. Zašparati kani i na ženskim težakima jerbo se nešterne žene ravnajo na porodiljni. Tak vam je to dok mladi prevzemejo vlast!

ZADJA VEST: Jožek, nejmlajši sin jednoga poznatoga međimorskoga političara, je diplomeral na fakulteto na šteri se zapisal pred tridesti let. Dok so ga pitali zakaj je tak dugo študeral, otpovedal je: Pak japa mi je navek govoril da se vsaki čovek vuči dok je živ, a japo tre posluhnuti!


Zvir:
http://www.mnovine.hr/novo/index.php?option=com_content&view=article&id=24335:to-je-akovancima-fkral-boia&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine952i         
i(l) str. 56. sim:
http://www.mnovine.hr/images/pdf/952/mnovine952i.pdf               

* * * * * * * * * * * * * * * * * * * * * * * * * * * * * *

Gusti Draksar - Fala Božek za Medjimurje, 07:15

Gusti Draksar - Fala Božek za Medjimurje

[Ljudevit Kaj]

Međimurske novine, br. 953, 20.12.2013.
e-vundano 23.12.2013.

Piše: Jožek radnik

Premišlavanje Jožeka radnika

Što je rekel da je Bosna obečana zemla???!

Dok smo još živeli vu onoj negdašjoj državi, šteroj se ime nesme spominjati brez velike nevole, pripovedalo se da je ona država štera Bosno nema ne bogzna kaj. Tak je i dale ostalo dok se je Juga restepla na sastavne djelove, očem reči, Bosna je i dale ostala obečana zemlja, kaj znači da se tam more vse delati, lenguzati, švercati, ali tak dugo dok te ne primejo. Tak vam je zišel i naš vodeči esdepeovac, precednik Županiske skupštine i slakovčar Mladen Novak. Kak smo zazvedili on je prek bosanske meje v Gradiški štel prenesti jeden pušlek euri, cirka 74 jezere, ali je ne dobil zeleno svetlo bosanskih oliti srpskih carinikov. Nej znati gde bodo itak završili te penezi.


Naš hrvacki vitez i heroj, general Ante Gotovina je minuli petek bil v Čakovco gde je primljen za počasnoga člana Zrinske garde i znova je med gardistima. Neje dugo bil prinas, ali vseposot gde se je pojavil dočekalo ga je čuda ljudi, od branitelja, dece, stareših i mlajših, vsi so šteli videti ili pak se slikati z generalom šteri je vodil naše hrvacke vojnike do pobjede v Oluji, a posle so ga, za nagrado, šest let zaprli v rešt v Hago. Generalo Gotovini je vokalna grupa Zrinski z Nedelišča otpopevala borbeno pismo Mikloša Zrinskoga U boj, u boj za dom i narod svoj, tak da se moremo nadjati kak bode Međunarodna labodoritaška federacija (FIFA) i jif kaznila čim se to zazvedi. Več otpredi je počani član čakoske Zrinske garde i general Mladen Markač, tak da so obedva haški reštanti ve v našoj Gardi.

Dok smo još živeli vu onoj negdašjoj državi, šteroj se ime nesme spominjati brez velike nevole, pripovedalo se da je ona država štera Bosno nema ne bogzna kaj. Tak je i dale ostalo dok se je Juga restepla na sastavne djelove, očem reči, Bosna je i dale ostala obečana zemlja, kaj znači da se tam more vse delati, lenguzati, švercati, ali tak dugo dok te ne primejo. Tak vam je zišel i naš vodeči esdepeovac, precednik Županiske skupštine i slakovčar Mladen Novak. Kak smo zazvedili on je prek bosanske meje v Gradiški štel prenesti jeden pušlek euri, cirka 74 jezere, ali je ne dobil zeleno svetlo bosanskih oliti srpskih carinikov. Nej znati gde bodo itak završili te penezi? Je li bodo sosedi cariniki priznali našemo Mladeno da je on to tam pošteno zaslužil ili pak da si jiv je posodil kaj zakrpa luknje v svojemo hižnomo proračuno, očem reči, v kasi fabrike, to sam dragi Božek zna. Vsi znamo da dok nekaj carinikaj dojde v roke oni to teško puščajo ili kak je sosed Tonča rekel, žilavi so kak vrag i nedajo peneze z rok kak niti pes meso z lampe. No, ne smeti gubiti nado, jerbo ona hmira zadja, a to je li bode hmrla ili pak se bode zvlekla to je ve v bosanskaj rokaj. Kuliko vidimo, Bosna je i dale obečana zemla, ali ne za vse!

Šef bande, očem reči, tatov šteri so krali po Gornjemo Međimorjo je nej z Evrope nek je naš domaći z Sitnic. Što bi rekel da so i naši domaći tati tak zaškolani i tak prefrigani? No, nesme nam to biti nikaj čudno jerbo vsi več imajo televizije, pak se tam morejo kajkaj toga navčiti. Kak bilo da bilo, Serjančari i jivi bližeši sosedi morejo mirneše spati, bar jeden cajt, dok nešči drugi pak ne prevzeme toga obrta (pet prsti i malo straha) od šteroga se dobro živi, a ne davlejo se fiskalni računi, a niti se ne plača porez Slaveko.

  Zoran Pazman, dugoletni ravnatelj Graditeljske škole je, na vse zadje, ipak moral sprazniti ravnateljsko foteljo. Čudapot so ga več mejali, ali on se je navek nekak dočekal na vse štiri (kak maček) i ostajal je v fotelji. Kak zgledi prelijala se kupica strpleja, a i hajdig falingi so mo našli.
Nejvekša mo je falinga kaj je trošil preveč penez i to one štere je ne mel. Z jedne strane so inšpektori našli da je gospon Pazman potrošil prek milijon kuni preveč, a z druge strane on terja župana za dva milijone. Što bi znal gde je pravica? Ve se je v Pazmanovo foteljo sel mlajši profesor, Zvonko Ladićov, pak nam bode mortik mogel on, črez par meseci, reči ili pokazati gde je istina, očem reči, gde so te penezi završili šteri falijio?

 Bolnica, bomo jo meli ili jo namo meli? To se vsi spituvlemo v zadje vreme, kak mi betežniki, šteri znamo da smo to je, tak i oni drugi, šteri mislijo da so još zdravi! Verjem da vam je poznato da je medicina tuliko napreduvala da je nišči od nas več ne zdrav. Probajte sam iti k doktoro, pak bodete vidli da vam bode nekaj našel. Vsi znamo kak je završil štrajk doktorov, bili so žilavi, pak je minister odredil radno obavezo, ali je štrajk ostavil traga, makar so nam oni šteri so štrajkali furt prepovedali kak bode vse vredo. Nešterni betežniki so ve na listama čekanja za preglede od 100 do 500 dni. Znate kak je to, najpredi smo srečni kaj opče dojdemo na liste, a posle se nešči fčaka pregleda, a nešči pak predi, i brez pregleda, odide k Božeko na račun. Tak je bilo i z štrajkom, mi nešterni smo se fčakali kaj so se doktori vrnuli na posel, a nešterni se več z angeli spominajo.

  Znanstveniki so zazvedili kak se v sveto, a i prinas, čuda vejč penez troši (kaj se medicine dotikavle) na ženske zizeke (kaj bodo čim vekši) i na moške luleke (kaj bodo čim trdeši), nek na altzeimer, tak da se bode, črez par let, pripetilo kaj bodo vse žene mele velike, a vsi moški trde, a nado se niti pod milim bogom mogli zmisliti kaj morej žjimi naprajti.

 V čakoskoj Elektri je pak došlo do smene v direktorskoj fotelji. Odišel je priločanec Davor Sokač, a došel je šenkovčar Mladen Hren. Makar vsi velijo da je direktorska fotelja v Elektri jako lepo i poželjno mesto, ali v zadje vreme se dostik gosto mejajo oni šteri hasnujejo direktorsko foteljo v čakoskoj Elektri. Kak bilo da bilo, gospono i magistro, Davoro Sokačo, želim nek se čuda duže zadrži v Zagrebo nek je to bil zadjipot gda ga je naš gorčanski zet Leo Begović poslal dimo čim je došel za glavnoga v Upravo državnoga HEP-a. Bil bi Leo i Dalmatince poslal dimo sam jiv je nigdar ne mogel najti na radni mesti.  Novomo direktoro, Mladeno Hreno, isto tak, želim da dobro kormani z našom međimorskom strujom, očem reči, nek pazi kaj bodemo furt meli strujo i kaj nas ne bode stepalo dok čeke dobimo!


VESTI IZ 2043. LETA:

Na vse zadje je gospon Mladen Novak ipak dobil vrjene peneze, onih 74 jezere euri, štere so mo bosanski, očem reči, srpski cariniki zeli v Gradiški pred tridesti let. Nejvišeši sod v Bosni je vrnul našemo Mladeno peneze, štere si je on posodil v Bosni, ali ne vse. Najme kaj, zaračunali so mo 3 procente stroškov na leto kaj so mo jiv pazili, a deset procentov si je sod zel za svoje stroške. Nek mi sam još jempot nešči reče kak je Bosna obečana zemla, očem reči, raj na zemli?!


Zvir:
http://www.mnovine.hr/novo/index.php?option=com_content&view=article&id=24483:to-je-rekel-da-je-bosna-obeana-zemla&catid=301:joek-radnik&Itemid=575
i(l) str. 64. sim:
http://issuu.com/mnovine/docs/mnovine953i           
i(l) str. 64. sim:
http://www.mnovine.hr/images/pdf/953/mnovine953i.pdf   
             
* * * * * * * * * * * * * * * * * * * * * * * * * * * * * *

Podvinčani – Penezi, 02:53

Podvinčani - Penezi

[Ljudevit Kaj]

Međimurske novine, br. 954, 27.12.2013.
e-vundano 30.12.2013.

Piše: Jožek radnik

Premišlavanje Jožeka radnika

Božič je došel

Makar so čakoski turistički težaki Čakovčancaj fkrali Božiča jerbo je, v Čakovco, mam posle Badnjaka Štefaje, makar je čakoski Advent sam pre gracki vuri, a neje došel do Fratarskoga trga i cirkve, ipak je mali Isusek došel. Jedni so ga vidli i dočakali, a drugi so još v Advento šteri traje do Staroga leta. Dosta smo se hecali,a ve vam moram reči kaj mi je na srco: Srečnoga vam Božiča želim, nek vam, i vsima onima štere imate radi, mali Isusek donese Božjega blagoslova , šteri vas bode pratil furt, kak denes, zak zutra i celo ovo leto kaj nas čaka. Samo ljubezen, zdravje i srečo vam želim!


Pred dvajsti let smo se spominali isto to kaj i denes: Je li bodemo dobili županijo? Neje to tak zdavnja bilo, pak verjem gda se dobro zmislite kak smo hrumeli prek Drave, prek Varaždina, vse do Zagreba da so šteli kaj bi se mi vozili z našaj autaj, ali z varaždinskaj tablicaj. Unda smo to nekak porihtali, nekaj milom, a nekaj pak silom i ve smo dvajsti let meli Županijo, a ve nam jo pak, znova, jemlejo. Kak se nam to kaže, brzčas bode vse kaj vredi odišlo prek Drave vu Varaždin. Odnod bodo hercuvali z nami, tam bode carina, sod, glavna policiska uprava za of kraj, porezna uprava, zdrastveno, socijalno, burza dela i kajkaj vsega drugoga. Najbrž nam ne bodo zeli čakoske tablice i dali varaždinske jerbo znajo da to ne bi prešlo. Nej znati kaj to treba našaj državnaj političaraj kaj nas očejo posvaditi z sosedaj? Pak bode došlo do toga kaj nas bode Drava razdvajala mesto kaj bi nas spajala. A nejlepše bi bilo kaj bi se med sobom dospomenuli tak kaj bi vsaki kraj vu nečemo bili glavni. Najme kaj, pošteno bi bilo da nekaj bode vu Čakovco, nekaj vu Varaždino, nekaj v Krapini, nekaj vu Koprivnici, Križevcima, a nekaj v Bjelovaro, a ne kaj očejo gda bode Varaždin glavni vu ovomo celomo hataro na šterom živi skorom 700 jezer ljudi. Nej znati z čem si je on to zaslužil? A vsi oni šteri očejo se bodo zmislili gda je Čakovec, pred 150 let, mel štreko i kolodvora dok je Varaždin bil glavni grad Hrvaške i Varaždincima je ne kruna z glave pala dok so se z kočijama vozili na cug v Čakovec. A ve nam vse ono očejo zeti zakaj smo se borili. Naši braniteli, heroji i vitezi so nej hodili v rat kaj nam bode Varaždin glavni grad Međimorja. Najbrž nekaj tu ne štima. Dvajsti let smo meli županijo i več jo bodemo potepli? Jako nam je dugo trajala! Kaj nam drugo preostaja nek da damo zadačo našaj političaraj: župano, zamjenici i zamjeniko, precedniko Skupštine kaj znova genejo u boj, u boj za Međimorje, za dom i  međimorski narod svoj!

Z jedne strane se borimo kaj nebodemo zgubili Čakovca kak centra Županije, kaj nam ga ne bodo Zagorci otpelali vu Varaždin, a z druge strane se pomalem resteple po Međimorjo. Vsi znamo da je, kaj se gospodarstva i gospodarstvenikov dotikavle, Prilok glavni vu Međimorjo. V Prilok na posel hodajo Međimorci z vsih krajov falačka zemle med dvemi vodami, a jemlejo i "stranjske" prek Drave. To je tak več par let i to Čakovčanci nebrejo zmeniti da se i na zadje noge postavijo. To je još ne vse: kuliko se to more videti prostim okom, drugi glavni međimorski grad bode opčina Nedelišče. Z Nedelišča  nam je novi precednik Županiske skupštine, novi precednik međimorskih esdepeovcov, v Nedeliščo je Mesap gde se održavlejo vsi glavneši međimorski semi i ne sam semi nek i plesnjaki. I to je još ne vse: v Nedeliščo delajo novoga labodoritaškoga stadiona i ne sam labodoritaškoga nego i atleckoga. Labodoritaši som jim takaj vo vrho i več na velikom pušejo v šijak Međimorcima. Verjem da vam ne moram nikaj pripovedati o gimnastiki, gimnastičaraj, državnom gimnastičkom centro Aton, šteri je, ne bodete, veruvali, isto v Nedeliščo. A tu je i Filip Ude, naš prvi olimpijac i osvajač srebrne medalje. Nedeliščanci imajo i svojega Božičnoga koncertlina za šteri se, več na leta, išče karta vejč. Brzčas vam ne moram nikaj vejč gvoriti i ovo kaj sam vam rekel je prek preveč. Na redo so Čakovčanci, nek se zamislijo kaj bode ostalo od Zrinskoga grada, ak Varaždinci odvlečejo svoje, a Nedeliščanci i Priločanci so več svoje odvlekli. Da je ne božično vreme rekel bi vam, ali ovak ostavljam vam kaj si sami zberete.

 Bil sam na Božičnomo koncertlino v Nedeliščo. Bilo je jako lejpo. Brankec Magdaleničov je vse to lejpo posložil, a bandisti i mužikaši so vse naprajli kaj je od jiv iskal. Na vse zadje, predi nek smo dimo išli, nam je nedelski načelnik, Darko Dania, lepo zafalil kaj smo došli i počestital nam je, kak se šika, nejpredi Božiča, a unda i novo leto. Na vse zadje je skupa z vsima v dvorani spopeval nejlepšo božično popevko Narodil nam se Kralj nebeski. Jako sam najgerek je li ga ne bodo hitili vum z esdepeja jerbo v zadje vreme su v partiji jako strogi prema onima šteri so ne na zacrtanoj
liniji.

  Najte me krivo razmeti, ali još sam ne bil niti na jenoj fešti, sesiji ili zestanko, prinas v Čakovco ili pak v Međimorjo, a kaj bi došli vsi naši saborniki. Nebrem razmeti, pak kaj oni ne delajo skupa i ne borijo se za to kaj nam bode vsima bole, kak vu Lepoj našoj i v Međimorjo. Ak se još dobro zmislim, pak smo jiv za to zebrali. Nekaj si gruntam, pak ga jiv ne tak čuda, sam šest, kaj jiv ne bi nešči mogel na kup dotirati i kaj bi jempot vsi puhali v isto trobento. Brzčas bi od toga i bil nekši hasen, a ovak dok so restepeni kak rakova deca od toga ga ne hasna.

 Več mi je žena parpot rekla kak sam ne za nikaj, kak sam nesposoben i da ga ne je nej znati je li bi ostal. Morem vam priznati da sam ne to vse, kaj mi je moja govorila, gori bral, ali fčera me je fpičila kak nigdar. Rekla je da bi ja na takmičenjo nesposobnjakovičov osvojil drugo mesto. To me je začudilo, pak sam pital: zakaj drugo? Odbrusila mi je: Zato kaj si nesposoben kaj bi osvojil prvo! Morete si misliti kak mi je bilo i da sam si po celomo, grunto ne mogel mesta najti. Odišel sam i k sosedi kaj me smiri, ali niti je ona to ne mogla naprajti. Vrnul sam se dimo, zel sam si dva-tri fraklece kuraža i pital sam jo kaj se je pripetilo. Mam mi je vse rekla, čekala je kak napeta pračka: Pogledni si vse ove sposobnjakoviče v Hrvaškoj i prinas v Međimorjo, meli so koraža (kaj nem rekel kak je ona rekel jerbo je Božič, a bil sam pre spovedi)[/b], zeli so zajme, a ve jif ne bodo morali vračati. Slavek jim bode šenkal! A kaj bode nam šenkal da si ti za nikaj i nikaj si ne zel, kaj - to te ja pitam? [/b]Nesam znal kaj reči, čkomel sam i pak sam toga dneva preživel sam na jezikovoj juhi.

Makar so čakoski turistički težaki Čakovčancaj fkrali Božiča jerbo je, v Čakovco, mam posle Badnjaka Štefaje, makar je čakoski Advent sam pre gracki vuri, a neje došel do Fratarskoga trga i cirkve, ipak je mali Isusek došel. Jedni so ga vidli i dočakali, a drugi so još v Advento šteri traje do Staroga leta. Dosta smo se hecali,a ve vam moram reči kaj mi je na srco: Srečnoga vam Božiča želim, nek vam, i vsima onima štere imate radi, mali Isusek donese Božjega blagoslova , šteri vas bode pratil furt, kak denes, zak zutra i celo ovo leto kaj nas čaka. Samo ljubezen, zdravje i srečo vam želim!


Zvir:
http://www.mnovine.hr/novo/index.php?option=com_content&view=article&id=24623:boi-je-doel&catid=301:joek-radnik&Itemid=575
i(l) str. 64. sim:
http://issuu.com/mnovine/docs/mnovine954i           
i(l) str. 64. sim:
http://www.mnovine.hr/images/pdf/954/mnovine954i.pdf                 

* * * * * * * * * * * * * * * * * * * * * * * * * * * * * *

FA "Šiljakovina" - Lubleni jezušek, 02:41

FA "Šiljakovina" - Lubleni jezušek

[Ljudevit Kaj]

Međimurske novine, br. 955, 03.01.2014.
e-vundano 07.01.2014.

Piše: Jožek radnik

Premišlavanje Jožeka radnika

Dej Božek kaj i kleto bodemo na sveto skup živeli

Na to mlado leto vam želim čuda zdravja, tak da nebodemo nucali doktore i kaj bodo mogli i dale štrajkati, posla vsima onima šteri ga nemajo, plače onima šteri delajo, velike penzije onima šteri so jiv zaslužili, a vsima čuda veselja, mira i Božjega blagoslova. I nek nam Božek da kaj bodemo i kleto skup na sveto živeli.


Novo leto je tu z nami, več pajdašimo žnjim. Došlo je pred dva dni, a več smo si žnjim tak zdobra kak da se odnavek znamo. Kaj vam to govori? Kaj? Da se je ne nikaj spremenilo, da je vse po staromo samo smo na datumo jedno brojko spremenili. A Tak čuda se obečuvalo. A obečuvali so vsi, kak moški, tak i žene, kaj je vekši političar vejč je obečuval. Lepo je to dok se bar obečuvale. Pak so nam nej „kukurikači“ isto tak obečuvali pred dve leti, predi nek smo hodili glase davat? Još dendenes jif za rukave navlačimo kaj več jempot (a minule so dve leti) genejo z reči na posel. No, nesmemo mam prve dneve vse tak črno gledati, još se ftegne hajdig toga spremeniti. Nejlepše je, ipak, dok se čovek nečemo nadja. Tak vam i meni soseda Barika več na leta obečuvle da bodem mogel svojo mrkvo saditi vu jenomo vrčako, pak se mortik bode to pripetilo ovo leto?

Minulo 2013. leto je poznato po tomo kaj je Lejpa naša dišla v Evropo i znova postala evropska zemla makar je to bila od navek. Isto tak smo, i to na prtuletje, hodali znova glase davat i zbirali (grado)načelnike i župana šteri bodo hercuvali z nami štiri leti. Zazvedili smo da je Lepi Cane (čitaj: Nadan Vidoševič) gospodaril z našom Gospodarskom komorom i to tak kaj je vse do čega je došel pozobačil vu svojo pelnico ili pak garažo. Jega smo spravili v Remetinec kaj si tam pajdaši z Ivekom Sanaderom, a Uskoki još navek delajo inventuro. Na vse zadje smo zbavili i referenduma: jedni so bili za , a drugi protiv kaj bi puca i dečko, dok postanejo mož i žena ušli v Ustav Lejpe naše. To je ne bilo teško pitanje, ali smo se zato i mi Međimorci (isto kak i ovi v Hrvaškoj) vsi poprek posvadili. Najme kaj, mi smo črez referendum rešavali probleme pederov i lezbijki, a ve nas je to malo pustilo, pak smo ostajli jim nek si to oni sami rešijo. Još je nišči ne priznal da je jedno ili pak drugo nek se i dale skrivečki parijo.

 Ipak smo, črez dve leti, uspeli zazvediti da v Lepoj Našoj živi več ženi nek moških, tak da so na minulaj izboraj žene odlučivale koga bodo zebrale. Prinas v Međimorjo so zebrale nejmlajšega ( i nejlepšega) župana v celoj državi, a Čakovčanke so zebrale nejlepšega gradonačelnika. Žene so štele promjene i tak so svoje glase davale. One so ne kak mi moški, ak negdi zahuzamo one nam to ne oprostijo i vse jempot dojde na svoje, očem reči, vsaka rit dojde na šekret. Što nam je kriv kaj smo jim to dopustili: žene se borijo za ravnopravnost, a mi nebremo do reči dojti i vse je kak one očejo. One si navek zberejo onoga što bode žnjimi gospodaril, a dok mi to zazvedimo največpot odide baba z kolači. Celo leto me več to gvinta i nikak sam ne mogel zmuoči kuraža kaj bi to pital: Zakaj se vsi tak grdo spominajo o politiki, očem reči, zakaj vsi velijo da je politika kurva? To je jedno kaj me gvinta, a isto tak nebrem razmeti, ak je to istina zakaj se vse vejč i vejč ženi rivle v politiko. Mortik je to po onoj negdašnjoj (to so mi još pokojni japica govorili) da dok moški nebrejo nekaj rešiti unda žene pošlejo. Brzčas je i v politiki tak!

Šteli mi to priznati ili ne, ipak je broj trinajst pehljivi broj, tak da smo vsi srečni kaj smo se ga rešili. Neje on sam po sebi tak hudi, ali ak dojde v petek unda se more kajkaj toga pripetiti. Poglednite, napriliko, kaj se je pripetilo precedniko naše županiske skupštine Mladeno Novako na meji z Bosnom. Čovek se je pelal prek meje, kak i navek, i najempot so ga cariniki, z čistoga mira zastajli, pretepli mo auta i zeli so mo peneze štere si je pre pajdašima v Bosni posodil. Siguren sam da mo se to ne bi pripetilo da je ne bil petek i trinajsti. Znam, rekli bodete da gospon Mladen ne verje v coprnice, ali se je pravica, očem reči, prasica skazala. Brzčas tej broj 13 ima nekšega vraga v sebi!

 Vsi još navek jafčemo kak je kriza, kak nebremo nikod nikam, kak jedva na jedvite jade vežemo kraj z krajom, a pred ove svetke, šteri so za nami, ga ne bilo mesta na parkingplacima pred štacunima. Nebodete me nagovorili kaj vam povem gde ga bilo nejveč autov, ali niti pred novim štacunom ga ne bilo mesta. Otkod našim ljudima tulikši penezi? Pak najte mi reči da se naši ljudi hodajo sam gret v štacune? Jako sam najgerek kaj se bode pripetilo dok minister Slavek zazvedi kuliko penez mi Međimorci još navek v strožokima skrivlemo, pak nam fčehne nove poreze ili pak nam pošle uskoke kaj jif pretepejo.  Kakši je on več je, na to nebo trelo dugo čakati.

Kak zgledi Serjančarima bode ovo novo leto srečneše nek je bilo staro. Najme kaj, zazvedilo se da jiv Grad leži na plino, kaj znači da bodo zbogradi tega hasnuvali nekše peneze. Nej znati otkod se je te plin dotepel k nam v Međimorje, najbrž z Dežele, ali je ve tu i naš je i mi ga bodemo prodavali, a čim se nekaj prodavle bode se i nekaj kaseralo.

 Vsi znamo da se Den ženi obslužavle osmi tretjega  a jako malo ljudi zna, to je ve v modi, da se den pederov obslužavle drugi prvoga. Ne bi se niti toga zmislil da je ne bilo svaji okoli referenduma, ali vam moram reči da je dragi Božek stvoril Adama i Evu, a ne Adama i Stevu, tak da znamo štere svetke mi obslužavlemo, a štere oni drugi. Vsaki svoje.

Na to mlado leto vam želim čuda zdravja, tak da nebodemo nucali doktore i kaj bodo mogli i dale štrajkati, posla vsima onima šteri ga nemajo, plače onima šteri delajo, velike penzije onima šteri so jiv zaslužili, a vsima čuda veselja, mira i Božjega blagoslova. I nek nam Božek da kaj bodemo i kleto skup na sveto živeli.


Zvir:
http://www.mnovine.hr/novo/index.php?option=com_content&view=article&id=24749:dej-boek-kaj-i-kleto-bodemo-na-sveto-skup-iveli&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine955i             
i(l) str. 56. sim:
http://www.mnovine.hr/images/pdf/955/mnovine955i.pdf   
               
* * * * * * * * * * * * * * * * * * * * * * * * * * * * * *

ŽIGA & Nova Nada - Lepo Je Na Svetu Živeti (live), 03:21

ŽIGA & Nova Nada - Lepo Je Na Svetu Živeti (live)

[Ljudevit Kaj]

Međimurske novine, br. 956, 10.01.2014.
e-vundano 13.01.2014.

Piše: Jožek radnik

Premišlavanje Jožeka radnika

In vino veritas!!!

Več na leta se naši i hrvaški ljubitelji dobre kapljice, očem reči, vina, štricajo okoli toga je li so naša međimorska vina bolša ili pak so to vina od grozdja štero raste na morjo ili pak bliže morjo. Naša so vina bolša jerbo mi Međimorci imamo bolšo zemlo, jerbo je Međimorje malo, falaček zemlje med dvemi vodami, nejbolši na sveto, šteroga je dragi Božek nam Međimorcaj dal i mi ga tak štimamo, a i tak ga hasnujemo i vse kaj prinas zraste je nejbolše na sveto. Vsi smo pomalem pozabili da je tu prinas negda završavalo Panonsko morje, pak je još v zrako ostala duha, tak da je i to jeden jezičec na vagi šteri je na našoj strani.


Javili so mi se oni šteri me čitajo nek dopunim novoletno čestitko, pak sam ne mogel zdržati kaj jim nej spunil željo. V nejlepšoj hrvaškoj božičnoj pesmi se popevle: Dej nam Božek zdravje, a k tomo i veselje, na to mlado leto vsega obilja. Dragi Božek se bode pobrigal za zdraviče jerbo doktori si još premišlavlejo kak bodo dugo štrajkali, a dok smo zdravi unda smo i veseli, a za to kaj bodemo meli vsega obilja bode se pobrigala naša vlada. Kak i navek do ve. Jedino sam najgerek da ak se bode i dale tak brigala kaj ne bodemo morali deti zobe na klin!

 Naši dragi političari so vse do kraja lanjskoga leta obečuvali da nam bode bole nek predi i to posebno oni šteri so v majušo, oliti junjušo zeli v roke cugle lokalne vlasti i zaseli vu fotelje župani ili pak (grado)načelnikov. To dobro, očem reči, bole je ne ftegnulo lani dojti na svetlo dneva jerbo je leto prevčasi minulo. No, čim je vura odtukla pol noći naši političari so se znova oglasili i počeli ponavlati ono isto lanjsko pričo sam so jo podebljali za cirka tridesti procentov. Kak je pesnik rekel: na istoko stare priče, a na zapado nikaj novo. Posebno se reskuražil čakoski gradonačelnik: Lani se je nikaj ne delalo, ali čim je baksuzno 13. leto v tretjemo jezeroletjo odišlo v ropotarnico povjesti, mam se bode vse genulo. I kanalizacija v Novi Seli, i smetlišče v Totovco, Sredja škola v Čakovco, steze za pecikline, a još nam je obečal celi pušelj dizalici po Čakovco. Leto dni je ve vse dremalo, nigdi nikaj, a ve najempot bode vse zaštrumfalo? Negdi so se našli penezi ili pak je dobil čarobno botico. Bil bi jako vesel ak bi se to pripetilo, ali najte me krivo razmeti, jako sam najgerek jerbo so "kukurikači" još 2011. leta mahali z 21 planom i čuda vsega drugoga so obečuvali, a sam so cene plina, struje, benzina, cigaretlinov, pijače, autov odišle gori i pedeve je zrasel, dok so naši težački žepi vse bole prazni i nikak nebremo zakrpati luknje kaj nam ne bode to malo penez kaj imamo curelo na vse spehe. No, to je još ne vse, još se navek redovito punijo Burze dela. Več ve je tam nekaj meje od 400 jezer težakov. Vsaki deseti težak je na burzi. A vsi znamo da se z te mele kruh nigdar ne jel.

 Stanorad je prvi na redo od grackih poduzeča kaj ga bode čakoski gradonačelnik v red dotiral.  Odnekod tre hapiti. Več hajdig dugo, v čakoskoj grackoj vječnici, oporbenjaki jamrajo protiv Gregorca i Stanorada. Brzčas i gradonačelnik Štef nebre zbogradi toga spati, pak oče videti je li ga vu tem dimo šteri se zdiguvle okoli Stanorada je i nekšega ogjeka ili pak mortik i celi ogenj gori? Štef bi štel kaj bi se on i Gregorec rezišli v miro Božjemo, očem reči, kaj bi Grga sam odišel tak kaj se ne bi moralo preveč zmazanoga veša vum zvlačiti. Ili pak bi trelo oporbenjake v Grackomo vječo zašpotati kaj ne bi preveč spituvali, pak bi unda bilo vse vredo kak je bilo i do ve?

Vinko Legin z Kotoribe je kak staro vino, kaj je stareši vse je bolši. Pred kraj minuloga leta, na samo Štefaje, je pobedil vse svoje protivnike i postal nejbolši pingpongaš v Kotoribi. A vsi znamo gda je več prešel v sedmo desetletje kaj se živleja dotikavle. Žilavi so te stareši športaši, kaj je Vinko znova dokazal, a i Čakovčanci imaju svoje "matuzaleme" v Putjanaj (Rino Megla, Tomica Koprivec) šteri so još negda, kak supiči, z Vinkijom igrali. Nekaj me, ipak, gvinta, je li je tua "stara garda" pravzaprav tak dobra ili pak jif ovi mlajši pre pomalem dostiguvlejo?

Več na leta se naši i hrvaški ljubitelji dobre kapljice, očem reči, vina, štricajo okoli toga je li so naša međimorska vina bolša ili pak so to vina od grozdja štero raste na morjo ili pak bliže morjo. Tak se to pripoveda, ali niti se naši vinari i vinogradati nedajo jerbo dragi Božek je jednako dal sunce za vse i vsi ga hasnuje, pak unda nebre morsko sunce biti bolše i vredneše. Nebremo reči da Dalmoši nemajo morje,  pak smo tak bedasti ne, ali so oni pozabili da so naša vina bolša jerbo mi Međimorci imamo bolšo zemlo, jerbo je Međimorje malo, falaček zemlje med dvemi vodami, nejbolši na sveto, šteroga je dragi Božek nam Međimorcaj dal i mi ga tak štimamo, a i tak ga hasnujemo i vse kaj prinas zraste je nejbolše na sveto. Još sam nekaj štel reči vsima šteri so to pozabili: V Međimorjo je nejbolša zemla, nejbolši zrak, a tu su i nejbolši ljudi, a vsi smo pomalem pozabili da je tu prinas negda završavalo Panonsko morje, pak je još v zrako ostala duha, tak da je i to jeden jezičec na vagi šteri je na našoj strani i zbogradi toga so naša vina nejbolša v Lepoj Našoj, a i vseposot gde se pijejo. Tak so bar velijo oni šteri se razmijo, a i oni šteri nejveč spijejo. Ak je tak, a tak je, unda nebremo kaj jim ne bi veruvali!

Gospa Željka z Macinca se malo zaigrala, pak je z svojom kilažom prešla dvesto kil. Dok se je to pripetilo, zazvonilo joj je zvonce za uzbuno i počela se je paziti i pomalem kalerati. Črez jen cajt je skalerala, očem reči, hitila doli 54 kile, a ve se ravna kaj još tuliko kil potepe i kaj dojde na ono kilažo štera joj se šika. Kaj se kilaže dotikavle niti ja vam tu nejbole ne stojim. Čim so nekši svetki mam cajnger na vagi kaže prek sto. Morem vam reči da je i meni nejleži hititi doli z sebe prvih 54 kile, a probleme imam z ostalaj kilaj. Najme kaj, žena mi ima 54 kile!

VESTI IZ 2044. LETA: Na vse glavneše hiže i zgrade vu Vukovaro so postavlene table z dvojezičnaj natpisaj, očem reči, i na čirilici. Na postavljanjo ploči so bili branitelji Vukovara z Domovinskoga rata i članovi udruge za obranu Vukovara. Tak je zakopana ratna sekirka i rešen problem, šteri se je pojavil pred tridesti let.


Zvir:
http://www.mnovine.hr/novo/index.php?option=com_content&view=article&id=24859:in-vino-veritas&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine956i             
i(l) str. 56. sim:
http://www.mnovine.hr/images/pdf/956/mnovine956i.pdf

Gusti Draksar - Fala Božek za Medjimurje, 07:15
http://www.youtube.com/watch?v=OtrBHAzIWeI

Od srca do srca - Vinska kaplja,  02:05

Od srca do srca - Vinska kaplja           

[Ljudevit Kaj]

Živeti kot pesnik?

* * * * * * * * * * * * * * * * * * * * * * * * * * * * * *

Varaždinske vesti, br. 3603, 21.01. 2014.

Piše Barica Pahič

KAJ je naše pitanje i naš odgovor

V iskanju nemerljivog teške je skovati rieči

Pesnik hoče dojti od sakdiešnjega do nemerljivoga, prebira i kuje rieči z šteri frčeju iskre da bi doteknule nečije serce, podragale boleču dušu ili se buni protiv nepravde.
A kaj ima s tega? Nebu promenil sviet, a za sebe ne dobil niš. Morti same pohvalu ili nekšnu nagradicu, ili mu se kakšne strukture moči smiliju pa mu privušče pomoč da si štampa zbirčicu popiefki.


Maker su pesniki “čuđenje u svijetu” ili bolj “ čuđenje administracije”, za zreči one kaj bi pesnik štel, nieje lehke “skovati rieči”. Pesniki sejene ne odustaju i javljaju se na pesničke natječaje kakev je naš varaždinski “Senje i meteori”. Oni se sečaju, senjaju, žaliju, tuguju, ali se i šale, zafrkavaju i z gdekoga se i norčiju. Pesnik hoče dojti od sakdiešnjega do nemerljivoga, prebira i kuje rieči z šteri frčeju iskre da bi doteknule nečije serce, podragale boleču dušu ili se buni protiv nepravde.

A kaj ima s tega? Nebu promenil sviet, a za sebe ne dobil niš. Morti same pohvalu ili nekšnu nagradicu, ili mu se kakšne strukture moči smiliju pa mu privušče pomoč da si štampa zbirčicu popiefki. A i tuo je retke, jer se (uverila sem se vu te) pomoč deli po poznanstvu ili pripadanju kakvem drmatorskem klanu. Pesnika usrečuje sako ohrabrenje, a takva se sreča ne mieri s penezi. Ne bi bil pesnik da je nie tak. Pisati na kajkafščine pak je još riskantnejši posel kulike god se pesniki trsili da nam dragi kaj, naša duša i naša popiefka, neju pozabljeni, neg oplemenjivani, a kajkafščina afirmierana kak književni jezik. Tiem potvrđujeju našu tradiciju i čuvaju diel jezika hrvatstva v šterom smo rođeni i za kaj se zalažemo. Veli se da je književnost hiža jezika.

Na naš 21. natječaj prispele je 89 kajkafskih popiefki na kojkakve teme, a med njimi i na one na varaždinske, za kaj je takaj prepisana nagrada.

Na zadnjem natječaju nagradu je dobila članica VKD-a, rođena Bartolofčanka, Ružica Marušić- Vasilić za popefku „I to je Varaždin“, šteru ovde predstavljam. Miesni govori v blizine gradov jakše se udaljavaju od izvorne kajkafščine, ali Ružica, profesorica hrvatskoga jezika, dobre poznaje kajkafščinu i dobre se z nju služi.


I to je Varaždin

Obleke zelene, plave, žote,
bele, črne i črlene,
robijaši, mornari, kuhari,
anđeli đavoli, copernice –
maturancka promenada
zacifrala je varaždinske vulice.
Fučka, truba, vika,
pesma i smieh
i što još zna ščiem je ozvučen tie dien.

 Z školskoga dvorišča
toče, krešči, brenči,
z decibeli vuha puni bend:
Rock me, babi, nije važno šta je,
Rock me, babi, samo neka traje
Rock me, babi, samo neka traje zap ples…
za oči pune neba, za novi pot do mesečine,
za življenje
pod ružičastom dugom.

A z Hallerove po vetru kak opomena
dohaja glas:
“ I poveli te anđeli...”
 i onda posmrtni marš.
Glas se zgubil vu halabuki,
mešali so se
smerti i života zvuki..


Zvir:
http://varazdinske-vijesti.hr/kaj-je-nase-pitanje-i-nas-odgovor/v-iskanju-nemerljivog-teske-je-skovati-rieci.html
i(l) str. 35 sim:
http://varazdinske-vijesti.hr/pdf/3603.pdf

* * * * * * * * * * * * * * * * * * * * * * * * * * * * * *

GRUPA TWIST-Varaždinu na placu.MP4, 02:09

GRUPA TWIST-Varaždinu na placu.MP4

[Ljudevit Kaj]

PSIHOLOŠKI RATKO

* * * * * * * * * * * * * * * * * * * * * * * * * * * * * *

Varaždinske vesti, br. 3604, 28.01. 2014.

Piše Barica Pahič

KAJ je naše pitanje i naš odgovor

Muoč fsredotočenja i psihološki rat

Gda sem več skrenula v kazališne asocijacije, na pameti mi je i drama apsurda štera se takaj odvija pred nami, pa i v našem liepem baroknem gradu gde ne raste same glazba i cvietje neg i afere. Pozornica pa je nie same vu Varaždinu, neg pune širše. Van je splivale pune bajkovitih dogajanj v šteremi se još ne zna kie su patuljki, kie pa Snjeguljica. Kie je zločesta mačeha se zna, ali se skriva kie ji derži zercale.
Med tiem psihološki rat traje, a njeni protagonisti i antagonisti (ne znaš kie je kie) su vu faze ščekavanja. A Godot jim je još v reštu.


Ovie dnevov sme se jake mučili s postpotročačkim božičnim sindromom (kaj ne kak to vučeno glasi). Peneznice su nam bile prazne i domišljali sme se kak do penez dojti. Jena suseda mi je rekla da je se v energije fsredotočenja, pa sme “los kintos” zate kaj premale mislime na peneze. Ne sme se ni na kaj druge misliti. I tuo dien i nuoč. Penezi buju sami od nekud došli. Ak nam koncentracija male popusti, pojuri negativna energija i mam sme hin.

Problem je zahvatila i širše. Veli da naše hrvatske nevolje proistieču uprav stega kaj premale na peneze mislime, pak sme si za te sami krivi. Ona je, veli, na peneze jake fsredotočena i onda ju lievi dlan zaserbi pa otpre šrajtoflina i nutre mam najde penez kulike ji treba. Pruobala sem se i ja tak koncentrierati, ali me dlan zaserbel same na dien da je isplata mirovine, tak da zasigurne nemrem znati je li teorija potvrđena ili nie. Tuo mi se duge po glave motale. Onda sem v novinama vidla onega šteri je “lep ko greh” kak čepi kre streljenoga slona i krokodila pa mi se rasvetlile da su dotičnjaku deli lisice na ruke zate kaj mu je popustila koncentracija na peneze a bila usmerena na lovinu. Kak bi človek v Afrike, med lavima i krokodilima mogel na peneze misliti?

I Šegon je, kak i još neki, v nevolje poradi oslapšane koncentracije.A suseda mi je onda rasvietlila i tuo da se z ovemi, štere več tri tedna naslikavaju po TV-u i po novinami, vodi psihološki rat. Postali su popularnejši neg Severina ili Nives Celzius če se glji jake trudila pisati guolu istinu. Njiheva je istina još golša kulike god da su ju zvuordali i zvuzlali. Ali nema brige. Za nje se furt najde one kaj su srednjovekovni svečeniki za cirkvenu dramu zmislili kak “deus ex machina” ili ti po našem “spas vu zadnji čas”. Ak nikak, onda v obliku kakvega pismenoga svedočenja. Misli se mam obrču na druge stvari. I tak se pred nami igra igra ze šteru se još ne zna je li komedija ili tragedija.

No, gda sem več skrenula v kazališne asocijacije, na pameti mi je i drama apsurda štera se takaj odvija pred nami, pa i v našem liepem baroknem gradu gde ne raste same glazba i cvietje neg i afere. Pozornica pa je nie same vu Varaždinu, neg pune širše. Van je splivale pune bajkovitih dogajanj v šteremi se još ne zna kie su patuljki, kie pa Snjeguljica. Kie je zločesta mačeha se zna, ali se skriva kie ji derži zercale.

Med tiem psihološki rat traje, a njeni protagonisti i antagonisti (ne znaš kie je kie) su vu faze ščekavanja. A Godot jim je još v reštu.


Zvir.
http://varazdinske-vijesti.hr/kaj-je-nase-pitanje-i-nas-odgovor/muoc-fsredotocenja-i-psiholoski-rat.html
i(l) str. XY sim:
http://varazdinske-vijesti.hr/pdf/3604.pdf   

* * * * * * * * * * * * * * * * * * * * * * * * * * * * * *

Ratko (Radek):
TI MAČE(VA)...

SINOVI ZAGORJA & Radek Brodarec Ti Maće Malo, 04:06

SINOVI ZAGORJA & Radek Brodarec Ti Maće Malo

[Ljudevit Kaj]

(Ž)VALENTINOVE

Zagorski list
e-vundano 13.02.2013.

IZ BAKINE PUČKE BILJEŽNICE
Z mamičine pučke (japo)teke

Valentinove

Bitne je da je dar od srca, a (ne?) da tulike i tulike hiljada kun ili dinarof košta. Ljubaf je, sinek dragi, najbitneša kak na Valentinove, tak i saki drugi dan, vu postelje, pri poslu, sigde

Piše: Zoran Gregurek

 
Gda vidiš veliki zbrku vu grmadi i gda se tičeki od veselja v zrak mečeju, znaš da je Valentinove. Jer se na Valentinove tiči ženiju. Prve, kak i pri nam, ljudem, tič za ženidbu z svoju družinu duojde k tičice i njene familije. Onda se veseliju i tancaju vu njezinomu grmlju se dok nije vrijime iti k tičjem matičaru, smijala bi se svakog Valentinova naša hraščinska baka Ivka.

Nastavek:
http://www.forumgorica.com/kajkavski/hr-kaj-ne-lepa-nasa-kajkavska-tiskajne/msg49905/#msg49905

* * * * * * * * * * * * * * * * * * * * * * * * * * * * * * * * * * * * *

 Leiner & Hrnjak - Ftiček veli, 05:57

Leiner & Hrnjak - Ftiček veli

[Ljudevit Kaj]

Varaždinske vesti, br. 3594, 19.11. 2013.

Piše prof. Barica Pahič

KAJ je naše pitanje i naš odgovor

Iza nas ostaje same naša priča
 
Zgotovljen je Mesec hrvatske knjige, a prinas vu Varaždinu dokončan je s Književnim Špancirfestom v Gradske knjižnice “Metel Ožegović”. K nam su se došpancierale štiri mlade i nekaj menj mlade hrvatske književnice, pojačane i z jenu mušku silu.
Publike jih je predstavil ravnatelj, gospon Mario Šoštarić. Nieje tuo bila uobičajena kniževna večer, neg nekaj kak spomenkovanje. Svoje društve je vodila i na spomenek napeljavala Darija Žilić.

Dr. prof. Julijana Matanović, književnica i književna znanstvenica govorila je o tem kakev je odnos zgovorene i zapisane rieči štera postaje književni tekst, na kakve probleme duejde gda svuoj tekst hoče rezgledeti kak znanstvenica i da ji je leže z nečijim tuđim tekstom. Onda je onak čist obične pripoviedala o svojim poticajima za pisanje, o tem kak je preživela svoje detinstve i osečanju podvojenesti med svojim bosanskim porieklom i življenjem pri posvojiteljski obitelji. Podvojenest je osečala i med življenjem v Osijeku i onem v Zagrebu, pa je se preživljavanje nekak muorala zvlieči z sebe i zapisati. Tak je postala i književnica. Pune je govorila i o tem kak se v Bosne pije kava, a kak v Zagrebu ili v Švedske, gde se pije kava z automata. Misli da način pijenja kave otkriva i način društvenega življenja.

S kavom je nastavila i Dorta Jagić, pesnikinja i pripovedačica. Veli da med temi njenimi književni iskazi razlike ima same v formalnem smislu jer su ji pripovetke pune poezije, a popefke pripoviedanja. Pripoveda i o biblijskimi ženami štere v književnesti baš niesu jake “eksponirane”. Publiku je nasmejala z dvemi svojimi popefki.

Lana Derkač je pripoviedala o svem putovanju po Nikaragve i čitanju poezije na vulici, “na sakem vuglu”. Veli da su tam ljudi pune bolj zainteresierani za poeziju neg prinas. I ona je publiku zabavila s pesmom o vodokotliču i rekla da baš se v življenju more biti poticaj za poeziju.

Davor Šalat, šteri nam se predstavil kak pesnik i knjižavni kritičar, govoril je o tem da se neprimetne v sakega človeka slažu osečaji i ozračja življenja šteri ispunjaju našu podsvest od detinstva na dalje i da oni prie ili kesneše nekak moraju zijti vun, a f kniževnem delu najbolj. Nemre se pisati s praznine, neg z naslaga preživljenega. I on je prečital dvie kratke popiefke da bi potvrdil svoje mišljenje.

Darija Žilić ni ništ čitala, ali je otpopevala jenu pesmu. J. Matanović je zaključila večer z mišlju da kniževnost živi “od ljudskih priča”. Treba jih spripovedati jer iza nas ostaje same naša priča.


Zvir:
http://varazdinske-vijesti.hr/kaj-je-nase-pitanje-i-nas-odgovor/iza-nas-ostaje-same-nasa-prica.html
i(l) str. 25. sim
http://varazdinske-vijesti.hr/pdf/3594.pdf 
Aktuelni broj VV:
http://varazdinske-vijesti.hr/online/Main.php?MagID=1&MagNo=1 

* * * * * * * * * * * * * * * * * * * * * * * * * * * * * *

Grupa San-Varaždinu na placu, 02:49

Grupa San-Varaždinu na placu

[Ljudevit Kaj]

Varaždinske vesti, br. 3595, 26.11. 2013.

Piše prof. Barica Pahič

KAJ je naše pitanje i naš odgovor

Izvori, zviranjki, zviri, zvirki i zviranjčeci

Ja se zmislim jenega nefigurativnega zvireka zguor mojega sela z svojega i žalosnega i srečnega detinjstva.V lietni vručini sme na zviranjčecu gasili žeju i kriepili se


Več put prečtejem v novinami gda novinar piše o kakvem škakljivem dogajanju, ali neće otkriti “izvor informacije”. Kak i bude, gda si stiem mam otpili buduču informaciju, pogotove ak je pehnul f kakavoga močnika. A “izvor” šteroga moremo imenovati z još najmenj štiri nestandardne rieči mora biti čisti i bistri kaj suza. Kaj je čišči, tu je opasneše za njega jer bu prie ili pokle dospel f šake, figurativne rečene – medveda.

Ja se zmislim jenega nefigurativnega zvireka zguor mojega sela z svojega i žalosnega i srečnega detinjstva.V lietni vručini sme na zviranjčecu gasili žeju i kriepili se. Tam sme se kak i po okolnimi šumami (hustami) kak deca potepali za blagem, brali divje jagode v lipnju, vrganje f srpnju, kupine f kolovozu, liešnjake f rujnu i kostanje v listopadu. Negdar sme se fpuščali v branje susedovih črešenj, jabuk ili bi ftrgli klas mlade kuruze na njivi i pri zviranjku pekli pecilnjake. Niesme dobre prešli če su nas vlovili. Bili sme osramočeni kak kradljifci.

F pohvalu tomu zvirku sem kak osnovnoškolka zmislila pesmicu šteru sem pune liet kesneše vnesla f svoju jedinu pesničku zbirku:


“Zvirek mi zvira
i kaplje prebira,
a one kak srebro zvone.
Dvie verbe su male
nad njim zestale
pa ga po dnevu sene.
A gda pa se miesec
v noči naverne,
nad njim špancieraju serne,
a mori su bile
i f šlajeri vile
kaj bi si ličeca fmile…”


O njemu mi i denes duša senja kak i o bistrice štera se z njega zvijala i fticala v male veči potočec pod bregom. Denes je zviranjčec presušil, a ledina zarasla v germlje i šikarje radi nemara ljudskega, a nema ni blaga štere bi se pasle i tak čistile šumu. I žal mi ga je. Ali one kaj me odvleklo od njega i rodnega kraja bila je žeja za znanjem, štera se ni do denes nie vgasila. Privlekel me tzv. buolji sviet, gde nebume tak željni sadja niti lačni da dielame štetu f kuruze. A gde sem se zatekla? F svietu gdi ti pohločni ljudi, nie jen klas, neg cielu njivu ili vočnjak obereju. A kulike peneze si nagrabiju? Nie da bi ftažili žeju ili glad, neg si privuščili još vekša bogatstva i nakaradne vžitke. A gda jih “izvori” otkriju, raščemere siromake šteri komaj vežu kraj s krajem. Onda se pričnu ponašati kak pirane. Oglodaju te do kosti i nič ih je nie sram.

A kaj poštenih nema? Ima, kak nie. Oni ne daju kaliti i muljiti zvirke čistuoče z šteru sme došli na sviet. Brane jih i gda zgledi da je zlo v semu prevladalo. Tak potvrđuju da zlo naviek ostane zlo i da nigdar nemre prevladati do kraja.


Zvir:
http://varazdinske-vijesti.hr/kaj-je-nase-pitanje-i-nas-odgovor/izvori-zviranjki-zviri-zvirki-i-zviranjceci.html
i(l) str. 25. sim
http://varazdinske-vijesti.hr/pdf/3595.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1   

* * * * * * * * * * * * * * * * * * * * * * * * * * * * * *

JOSIPA LISAC - Zvira voda, 06:18

JOSIPA LISAC - Zvira voda

[Ljudevit Kaj]

Dok je srca bu i krova(cije)

* * * * * * * * * * * * * * * * * * * * * * * * * * * * * *

Varaždinske vesti, br. 3605, 04.02. 2014.

Piše Barica Pahič

KAJ je naše pitanje i naš odgovor

Morti se nekaj more nafčiti i čitajuč knjige

Zakaj bi se čitajuč knjige zeznale da denešnje naše bogatstve; tvornice, ceste, željieznice za druobne peneze kupujeju stranjski bogataši. I domači sumnjivega podrijetla. Zakaj bi decu zanimale kaj je f “Pod starimi krovovi” pisal Đalski? Pak, tam su degenerierani plemiči govorili kajkafski, se su rasprodavali, a onda jafkali kak su bogečki, kak npr. gorke-smiešni Cintek, “presvietli i plemeniti”, za šteroga je poslužil zbilja istiniti lik. Živel je negdi blizu Klenovnika ili Ladanja.


Prešli su zimski prazniki i deca su se nazaj našla f školi. Kulike sem fpučena, perve dneve su si, srečna kaj su se nazaj našla skup, zmenjivala priče o tem kak jim je bile na feriju i kaj su dielala. Zajednički nazivnik je tuo da su se pune družila, tulumarila, išla na koncerte, veselila se. Same su rietki, oni bolj financijski potkoženi, v inozemstvu skijali zate kaj prinas sniega nie bile ni za liek.

Drugi su surfali po internetu, treći pune gledeli TV, dečki največ utakmice, a ženski diel populacije one, največ bedaste američke filme o maloljietnicami štere v koleđi osnivaju kojkakva sestrinstva na čelu šterih su obične kakve bogate, bahate i razmažene lepotice. One na zub zemeju kakvu drugu ljepoticu za šteru misliju da jim nie ravna i onda prične borba za najljiepšega dečka, a pobiedi ova druga. Napeto kaj ambrela. Pak tuo je i normalne. Mladi muoraju proživeti mladost. Je, neki su, opet največ ženske, i čitali. A kaj? Kojkakve magazine s trači o našim ili sveckim selebritiji ili krimiče i ljubiče. Z spomenka takvih “tinejđeric”, štere bi trebale čitati realističku literature, svecku i našu, čula sem da jim je tuo jake dosadne, pa same male “vudrene” štreberice (a biti štreber je sramota) čitaju “Zločin i kaznu” ili “Anu Karenjinu”

Vidi se, i takvih ipak ima. V “Madam Bovary” ne vidiju ništ skandaloznega, a čudiju se one frka radi “Theresse Raquen”. Normalne. Decu vu te duobe ne zanimaju knjige v šterimi bi mogli prepoznati denešnje Kičmanoviće, Laure, Mecene ili, kak i denes imame iste mrtve kapitale v slavonskimi ravnicami, Laure i Tene (denes se zoveju sponzoruše) kak i prie 150 liet, a fnuogim su baš te uzori. Pitanja seksa su “top teme”, kaj je čist normalne.

Zakaj bi se čitajuč knjige zeznale da denešnje naše bogatstve; tvornice, ceste, željieznice za druobne peneze kupujeju stranjski bogataši. I domači sumnjivega podrijetla. Zakaj bi decu zanimale kaj je f “Pod starimi krovovi” pisal Đalski? Pak, tam su degenerierani plemiči govorili kajkafski, se su rasprodavali, a onda jafkali kak su bogečki, kak npr. gorke-smiešni Cintek, “presvietli i plemeniti”, za šteroga je poslužil zbilja istiniti lik. Živel je negdi blizu Klenovnika ili Ladanja.

Buog da sme se riešili takvih ostatkov izrabljivačkega feudalizma. Nikaj zate kaj su se seljaki skorem v kmetstve našli. Pa još da iščeju nekakšne “dublje poruke”? Morti bi zeznala da se v naše socijalne povesti stvari ponavljaju. Ma hote spat! Jenoga dneva i tak jim tuo same bu došle v glavu.


Zvir:
http://varazdinske-vijesti.hr/kaj-je-nase-pitanje-i-nas-odgovor/morti-se-nekaj-more-nafciti-i-citajuc-knjige.html
i(l) str. 23 sim:
http://varazdinske-vijesti.hr/pdf/3605.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * * * * * * *

Pod starim krovovima - Kvartet Gubec, 03:04

Pod starim krovovima - Kvartet Gubec

[Ljudevit Kaj]

Varaždinske vesti, br. 3606, 11.02. 2014.

Piše Barica Pahič

KAJ je naše pitanje i naš odgovor

Nešterni su zdigli ruke na sebe, drugi su zdigli ruke od sega
 
Pri nami je zbilja preveč toga naopak; ateisti i agnostiki se naslikavaju f pervi redi f cirkvami, pred cirkvami, za crkvami i f prošencijami, političari i nuovi milijunaši, z bogatstvem stečenim v zadnjih dvajset liet, kritizieraju Cirkvu za bogatstva nakupčana 2000 liet. Oni šteri su rat videli same na TV-u zapiraju prave branitelje ili jim snižavaju mirovine ak su do njih došli. Buntovniki su vu velikem broju na slobode, nekoji i na vlasti, a branitelji vu velikem broju v reštu, na sudu, ili pak još buju v reštu i na sudu, veliki se porezi opraštaju, malim pak z par tisučakov se pleni imovina, vlasniki skupih stanov zabadav dobivenih od države određuju iseljavanje z stanov ljudem šteri su svoje kupili za skupe kredite. Mali ljudi su bez posla ili dielaju bez plače, ogorčeni, razočarani, v depresiji. Nešterni su zdigli ruke na sebe, drugi su zdigli ruke od sega, a treti deli put pod noge pa v sviet.

Ali f semu tomu ljudem se ipak vrne optimizem i vera da se nekaj more preobernuti i popraviti.

Na tuo me napeljavaju drukčeša dogajanja. V Muzeju anđela Željka Prsteca otprta je izložba Nikole Koprive, izvornega umetnika z Žumberka (gdi se govori štokavsko-kakavski-ikavski). Na otpiranju su se zbrali člani obitelji njegvih dveh kčeri, Marije i Verice i njihovi rođaki i prijatelji. Kustos koprivničkega Muzeja naivne umetnosti govoril je o vriednosti Koprivine umetnosti štera je, rekel je, iskaz potrebe izražavanja z neodoljivega stvaralačkega poriva, šteri imaju same rođeni umetniki. Zate je zbiegel umetničke utjecaje i svoje je cirkvice, ftičeke i druge figurice rezbaril nesvestan njieve umetničkih vriednosti.

Drugi događaj je bile predstavljanje knjige “Pričuljci” varaždinske književnice Mire Šincek, knjige za decu i se one šteri decu imaju radi. Predstavljena je v Studijske čitaonice Gradske knjižnice, a predstavljali su ju Božidar Prosenjak, urednik “Alfine” biblioteke za djecu i mladež i Ranka Javor, knjižničarska savjetnica, kak i autorica teksta i ilustratorica, prof. Vera Kuntner. Dramska umetnica Ljiljana Bogojević je z sjajnu interpretaciju predstavila tekst, a svečanemu ozračju doprinesel je i mladi, jake talentierani glazbenik Nikola Hrupek sviranjem na harmonike.

Ciela svečanost je imiela intimni, veseli štih prijateljstva i zajedništva publike i sieh predstavljačov i zračila zadovoljstvom i srečom nasmejane, zahvalne i radosne autorice. Takšni trenutki rastiravaju grde megle štere nas sakega dneva znovič obvijaju. Naj jih bu čim več.


Zvir:
http://varazdinske-vijesti.hr/kaj-je-nase-pitanje-i-nas-odgovor/nesterni-su-zdigli-ruke-na-sebe-drugi-su-zdigli-ruke-od-sega.html
i(l) str. XY sim
(oštečena (po)dat(k)oteka?):
http://varazdinske-vijesti.hr/pdf/3606.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * * * * * * *

I onda neš pil... text: Pajo Kanižaj, pročitao: Dražen Marek, glazba: Andrija Maronić (cimbal), 03:38

I onda neš pil... text: Pajo Kanižaj, pročitao: Dražen Marek, glazba: Andrija Maronić (cimbal)