P Oltar - POrtal naš svagdašni PObôžni i vragolasti - Bogaslavi(m)ja
Lépa naša PObožna
* * * * * * * * * * * * * * * * * * * * * * * * * * * * * * * * * * * * * * * * * * * * * * * *
KAJKAVSKA VEČERNICA I MEŠA
ČTEJENJA
I
EVANGELIUMI
NA VSE NEDĚLJE I SVETKE CĚLOGA LĚTA
ZA POTREBUVANJE
NADBIŠKUPIJE ZAGREBEČKE,
s zavjetkom
obćinskeh molitvah, po kojeh sveta Cirkva nas vuči,
kaj navlastito od Boga prositi, i kaj činiti moramo,
skupa s pridavkom juternjih, mešneh, spovedneh i
ostaleh molitvah
[pobožna slika]
UZORITOGA I PREČASTNOGA GOSPODINA
KARDINALA
JURAJA HAULIKA,
SEDEMDESET I OSMOGA BIŠKUPA
a pervoga
NAD-BISKUPA ZAGREBEČKOGA.
Vu Zagrebu 1858.
Berzotiskom Dra. Ljudvita Gaja.
----------------------------------------------------- str. 1
----------------------------------------------------- str. 2
DR. ZVONIMIR KUREČIĆ
KAJKAVSKA
VEČERNICA
I MEŠA
VU SV. IVANU ZELINI, 2008.
----------------------------------------------------- str. 3
Mala biblioteka
»Dragutin Domjanić«
knjiga 51.
Nakladnik
Pučko otvoreno učilište Sv. Ivan Zelina
Za nakladnika
Ivica Kukovačec, dipl.ing.el.
Urednik
Dr. sc. Zvonimir Kurečić
Grafičko-tehnička priprema
POU Sv. Ivan Zelina
Tiskano u 350 primjeraka
Tisak i uvez: Tiskara Zelina d.d.
CIP zapis dostupan u računalnom katalogu Nacionalne i sveučilišne knjižnice u Zagrebu pod brojem 668627
ISBN 978-953-6540-38-9
----------------------------------------------------- str. 4
VEČERNICA I MEŠA
POLEG STARE NAVADE SLAVNE
NADBIŠKUPIJE ZAGREBEČKE
VU STAREM HORVATSKEM KAJKAVSKEM JEZIKU
ZNOVIČ SPRAVLJENA
PO MEŠNIKU DR. ZVONIMIRU KUREČIĆU
PREBENDARU PRVOSTOLNE CIRKVE ZAGREBEČKE
VU ZAGREBU 2008.
SVETEK PRESVETUGA SRCA JEZUŠEVUGA
Proštenjarska cirkva svetih Treh Kraljuv v Kominu
vu fari Veliki Bisag
Petek, 30. svibnja 2008. v 19.00 vur
Glavni mešnik:
dr. Zvonimir Kurečić
prebendar prvostolne cirkve zagrebečke
Sumešniki:
mons. Lovro Cindori, kanonikuš prvostolnoga kaptola v Zagrebu
preč. Mirko Totović, prebendar prvostolne cirkve zagrebečke
preč. Maksimilijan Herceg, plebanuš bisaški
Popevaju:
Časne sestre Družbe Kćeri Božje ljubavi z Zagreba:
s. Paula Boršćak
s. Marjana Koščak
s. Marija Beroš
s. Ivana Margarin
Jelena Križanić
----------------------------------------------------- str. 5
----------------------------------------------------- str. 6
VEČERNICA
ILI SVETLOSPEV
Vu ime Otca i Sina i Duha Svetoga.
- Amen.
Mešnik podižuči svieču popeva:
Svetlost Kristušuva.
- Bogu hvala.
Dok se vužižeju svieče na oltaru, popeva se: Psalm 42 (43), 3-5
Pošlji tvoju svetlost i istinu, da me peljaju, *
i dopeljaju na tvoju svetu goru, i vu tvoje prebivališče.
Stupil budem k Božjemu oltaru, *
pred Boga koji razveseljuje moju mladost.
Tebe o Bože, Bog moj, budem hvalil s citrami. *
zakaj jesi žalosna moja duša i zakaj mene mutiš?
Ufaj se vu Boga, ar ga jošče budem hvalil; *
moja pomoč, moj Bog je on.
Dika budi Bogu Otcu i Sinu *
i Duhu Svetomu.
Kak je bila na početku, tak i vezda i vsigdar,*
i na vieke viekov. Amen.
----------------------------------------------------- str. 7
Molimo!
Vzemi od nas, prosimo te, Gospone, vse naše krivičnosti,
da budemo vriedni stupiti s čistim srdcem pred tvoju nazočnost.
Zmožni i odičeni Bože, i Gospon naš Jezuš Kristuš!
Rasvieti, prosimo te, kmicu naše pameti,
podieli nam pravu veru, stalno ufanje i zveršenu ljubav;
včini da spoznamo Tebe Gospona,
tak da mi vsigdar vse poleg tvoje svete volje izvršimo.
Po Jezušu Kristušu našem Gosponu.
- Amen.
PSALMODIJA VEČERNICE:
Psalm 102 (103)
PRIPEV:
Hvali duša moja, hvali duša moja, Gospona, Gospona!
Hvali Gospona, moja duša,*
i vse kaj je vu meni njegvo sveto ime.
Hvali Gospona, moja duša,*
i ne spozabi vseh njegveh dobročinstvih! PRIPEV…
On tebi odpušča vse tvoje pregreške,*
on ozdravlja vse tvoje mlahavosti.
On tvoje želje napunjuje s dobrotami,*
da se tvoja mladost ponovi kakti orla. PRIPEV…
Milostiven i milosrden je Gospon:*
dugotrpljiv i velikoga smiluvanja.
On se ne srdi na vieke,*
niti se zmir nenagraža. PRIPEV…
----------------------------------------------------- str. 8
On nam ni včinil poleg našeh grehov:*
niti nam ni povrnul poleg našeh hudobnostih.
Kak se otec smiluje svojoj detci,*
tak se smiluje Gospon onem, koji se njega bojiju. PRIPEV…
Ar on zna, iz česa smo stvorjeni:*
on se spomenuje, da smo prah.
Človečji dani jesu kakti trava,*
kak poljski cviet, ravno tak i on povehne. PRIPEV…
Dika budi Bogu Otcu i Sinu*
i Duhu Svetomu.
Kak je bila na početku, tak i vezda i vsigdar,*
i na vieke viekov. Amen. PRIPEV…
Molimo!
Bože, koi se po griehu bantuješ,
a po pokori milostiven postaješ:
oglej se milostivno na prošnje tebe molečega puka
i bič tvoje srditosti,
kojega smo zaradi našeh griehov vriedni,
od nas odvrni.
Po Jezušu Kristušu našem Gosponu.
- Amen.
----------------------------------------------------- str. 9
UVODNI DIEL SVETE MEŠE
Mešnik zapopeva:
- SLAVA BOGU NA VISINI.
A mi vsi skup nastavimo popevati:
I na zemlji mir veselje, budi poleg Božje volje:
To sad nebo nazveščuje i glas s neba potvrđuje.
Dobre volje vsaka duša, grieha naj več ne spokuša,
Temveč fali, diči Boga, ar je poslal Sinka svoga.
Sinka svoga, Boga moga, z Ocem, Duhom jednakoga,
Duhom Svetim prijetoga, od Marije rođenoga.
-Gospon z vami.
- I s tvojim duhom.
Molimo!
Vsemogući Bože, denes slavimo Srce ljubljenoga Sina tvojega
i spominjamo se osobitih dobročinstav njegove ljubavi prema nam.
Daj, da z toga nebeskoga zviranjka primimo obilje milosti.
Po Gosponu našem Jezušu Kristušu, Sinu tvojemu,
ki s tobom živi i kraljuje v jedinstvu Duha Svetoga, Bog,
na vse vieke viekov.
-Amen.
----------------------------------------------------- str. 10
SLUŽBA RIEČI BOŽJE
1. ČTEJENJE: (1Iv 4, 7-16)
Čtejenje Prvoga pisma svetuga Januša apoštola.
Predragi!
Ljubimo jedni druge, ar je ljubav od Boga.
Vsaki, ki ljubi, od Boga je rođen i spoznava Boga.
A ki ne ljubi, ne pozna Boga; ar Bog je ljubav.
Vu tom se je skazala ljubav Božja k nam,
kaj je Bog svojega jedinorođenoga Sina poslal na sviet,
da živimo po njem.
U ovom se sastoji ljubav:
Nismo mi ljubili Boga, nek je on ljubil nas
i poslal je Sina svojega kak pomirenje za naše griehe.
Predragi!
Akoprem je Bog nas ovak ljubil,
i mi smo dužni ljubiti jeden drugoga.
Boga još nie nigdar nigdo videl.
Akoprem ljubimo jen drugoga,
Bog ostaje vu nami i ljubav njegva je zveršena vu nami.
Po tom znamo, da vu njem ostajamo i on z nami,
ar nam je dal od Duha svojega.
I mi smo vidli i svedočimo,
da je Otec poslal Sina za Spasitelja svieta.
Kigod prizna da je Jezuš Sin Božji,
Bog ostaje vu njem i on vu Bogu.
Mi smo spoznali ljubav,
ku Bog ima prema nam i poveruvali smo je.
Bog je ljubav,
ki ostaje vu ljubavi vu Bogu ostaje
i Bog ostaje vu njem.
-Rieč Gosponova.
- Bogu fala.
----------------------------------------------------- str. 11
OTPEVNI PSALM:
Psalm 144 (145)
PRIPEV: Blagoslivljal bum naveke ime tvoje!
Budem izvišaval tebe, o Bože, moj Kralj:*
i dičil tvoje ime viekom, i na vieke viekov.
Vsaki dan budem hvalil tebe*
i dičil tvoje ime viekom, i na vieke viekov. PRIPEV…
Velik je Gospon, i velike hvale vrieden:*
i njegva velikoča nema konca.
Vsa pokolenja budu hvalila tvoja dela:*
i tvoju mogučnost nazvieščala. PRIPEV…
Tvoje kraljevstvo je kraljevstvo vseh viekov:*
i tvoje gospodstvo od pokolenja do pokolenja.
Gospon podiže vse, koji opadaju:*
i osavlja vse prignjene. PRIPEV…
Gospon je blizu vsem, koji njega zazavaju;*
vsem koji njega vu istini zazavaju.
On spunjava želje vseh oneh, koji se njega bojiju,*
i posluša njihove prošnje. PRIPEV…
ALELUJA:
(Mt 11, 29ab)
Zemite na se jaram moj i vučite se od mene,*
ar sem krotek i poniznuga srca.
----------------------------------------------------- str. 12
EVANGELIUM:
(Mt 11, 25-30)
-Gospon z vami.
- I s duhom tvojim.
† Čtejenje svetoga evangeliuma od Mateja
- Slava tebi, Gospon.
Vu onem vremenu sprogovori Jezuš i reče:
„Dika ti budi, Oče, Gospodine neba i zemlje,
ki si vse ovo zakril pred mudrijaši i spametnimi
i očituval je malim.
Jè, Otec, ar tak je tebi po volje bilo!
Vse je meni moj Otec predal
i nigdo ne pozna Sina nek Otec,
i nigdo ne pozna Otca nek Sin
i on komu to hoče Sin očituvati.
Hod'te k meni vsi, ki ste zmučeni i opterečeni,
ja vas bum okriepil.
Zemite na se jarem moj i vučite se od mene,
ar sem krotek i ponizen vu srcu,
i našli budete mir dušam svojim.
Ar jarem je moj sladek i teret je moj lefki.“
- Rieč Gosponova.
- Slava tebi, Kristuš.
----------------------------------------------------- str. 13
PRODEČTVO
Po prodiki mešnik čita apoštolsku veru Božju:
VERUJEM VU BOGA, Otca vsamogućega,
Stvoritelja neba i zemlje.
Vsi potvrđuju popevajući:
Amen, amen, verujem! Amen, amen, Gospone! (2x)
I VU JEZUŠA KRISTUŠA, Sina njegvoga jedinoga,
Gospona našega.
Koji je prijet od Duha Svetoga,
rođen od Device Marije.
Mučen pod Ponciušem Pilatušem,
razpet, vumerl i pokopan.
Stupil je dole na pekle,
tretji dan je gorestal od mrtveh.
Zastupil je na nebesa,
sedi na desnici Otca Boga vsamugučega.
Odonut hoče dojti sudit žive i mrtve.
Vsi potvrđuju popevajući:
Amen, amen, verujem! Amen, amen, Gospone! (2x)
VERUJEM VU DUHA SVETUGA.
Svetu Cirkvu katoličansku.
Sveteh občinstvo.
Grehov odpuščanje.
Tiela gorestajanje,
I žitek vekiviečni. Amen.
Vsi potvrđuju popevajući:
Amen, amen, verujem! Amen, amen, Gospone! (2x)
----------------------------------------------------- str. 14
MOLITVA VIERNIKOV
Prosimo te, Gospone, vu ljubavi tvoga presvetuga Srca
preteci s tvojum miloščum vsa naša činjenja,
i daj vu njih po tvojoj pomoči napreduvati,
da se vsaka naša molitva i vsi čini od tebe vsigdar počmeju,
i po tebi započeti dobro dokončaju.
Vsi ponavljajmo: Presveto Srce Jezuševo, smiluj nam se!
1. Presveto Srce Jezuševo, povekšaj veru katoličansku, izkorieni pogane i obrni krivoviernike, molimo te:
2. Presveto Srce Jezuševo, blagoslovi papu našega Benedikta,
nadbiškupa našega kardinala Josipa, vse mešnike i vse ostale cirkvene službenike, molimo te:
3. Presveto Srce Jezuševo, blagoslovi nas, naše družine, hiže, blago, gospodarstvo i ves imetek naš. Občuvaj nas kuge, gladi, vojske, silneh betegov, nagle i nepripravljene smrti, molimo te:
4. Presveto Srce Jezuševo, prosimo te ponizno: oprosti nam griehe naše, podelji nam milošću pravične pokore, poboljšanje življenja našega i stalnost vu tvojoj svetoj službi, molimo te:
5. Presveto Srce Jezuševo, smiluj se vsem živem za koje mi moramo moliti, a vsem viernem mrtvem daj pokoj vekivečni, molimo te:
----------------------------------------------------- str. 15
Mešnik:
Gospon naš Jezuš Kristuš, z tvojega presvetuga Srca
svete želje, prava svetuvanja i pravični čini izhajaju,
daj tvojem slugam on mir, kojega sviet ne more dati,
da naša srdca budu tvojem zapoviedjam podložna,
i vezdašnja vremena po tvojoj pomoči
od straha neprijatelov sigurna i mirna.
Koji živiš i kraljuješ na vse vieke viekov.
- Amen.
Nâstavek na sledečomu e-listu