POČAKAJ (PO-ČA-KAJ) - Lipa naša čakavska

[Ljudevit Kaj]

Nastavek (z) prethodnoga lista


 (3/5)

ČA NI ČA  -  SLIKOVNI RJEČNIK

To je bila moja nona
 
Spametin se da je nona čuda puti užala reć: »Ča ten juden rabi tuliko putovat kad se imaju na televizije?«. Stvarno? Sini su njoj navigali i to njoj se j' videlo ko neš ča se mora aš drugačje ni šoldi. Otac njoj je navigal po Veleh Jezerah va Merike i, kako se spametin da j' povedala, da j' bil va 40 let 3 put doma. Si su trebali poć ž njin kad se j' spravjal 2. sv. rat pa se j' njigova žena, moja pranona Karla zaprla va sobu i zijala: »Vi hote, ja ću tu ostat«! , tako da su na kraje si ostali ude.

Piše Marin ANIČIĆ
 
 
Kad san bil mići, vavek smo hodili pul none gledat televiziju. Mi smo imeli črno-belu a ona je prva va familije imela va kolore. Njiji sin a naš barba Milojko je navigal, pa njoj je z vijaja prnesal vavek neš novo. To van je omputa bilo kot da van neki sada doma pripeja hologramsku televiziju (z neken ćakulaš a da slučajno oteješ skočit na njega, proletiš skroze). Mi bimo tako se ča j' malo interesantneje šli gledat puli none. Najviše bimo gledali Taliju. To ni bila sapunica nego smo mi tako zvali taljansku televiziju ča je najveć bil RAI 1 i RAI 2. Mediaset bi se ćapevalo kad bi bilo jako lepo vreme ma se ni onda nisu ti programi baš najboje videli. Ni to none ni rabilo nego nan aš bimo radi gledali crtani filmi kakoveh pul nas ni bilo.
   

Vi hote, ja ću tu ostat...

Ja, zač van ja se to povedan? Spametin se da je nona čuda puti užala reć: »Ča ten juden rabi tuliko putovat kad se imaju na televizije?«. Stvarno? Sini su njoj navigali i to njoj se j' videlo ko neš ča se mora aš drugačje ni šoldi. Otac njoj je navigal po Veleh Jezerah va Merike i, kako se spametin da j' povedala, da j' bil va 40 let 3 put doma. Si su trebali poć ž njin kad se j' spravjal 2. sv. rat pa se j' njigova žena, moja pranona Karla zaprla va sobu i zijala: »Vi hote, ja ću tu ostat«! , tako da su na kraje si ostali ude. Putovanje omput stvarno ni bilo niš lepo. Povedala je jedanput da je z nonićun va Meriku šal i neki njigov kujin ili ne znan više ki rod ma da se ni vrnul aš je nastradal na neken brode. Vaveki njoj je neki bil na ten prokjeten moru a ona se j' pojidala. Televizija je za nju bila oslobođenje. Gledaš na Talije emisiju Quark va koj su vaveki bili lepi dokumentarci z celega sveta. Ni straha da će te ki pokrast, ki ale ča ujist, pojist, niti da ćeš kade past i glavu zgubit, a da ne govorin sav smrad, muhe i komarci keh se si oni snimatelji natrpe da bi nan cel svet zapakirali i dopejali va teplo.
   

Živela je va cyberspace-u

Z televizijun roniš uru vremena bez maski i letiš bez krili a da ti ni ni zima ni preteplo. Ovi ča troše šoldi da bi se prišli okupat v' Opatiju su valda morali aš doma nimaju mora. Nona Slavka se sejno ni nikad kupala aš da ni zdravo za ten. Ona je bila gospa. Bog njoj je dal da njoj ni nikad rabilo delat aš je bila z dobre famije. Sejno se j' gladi napatila aš je živela i va vreme kad su si bili lašni. Dva rata je pasala, do trećega ni arivala. Aš ni zdravo bit na ten jaken suncu. Spametin se da je pun stol bil taljanskeh žurnali i da je televiziju gledala od početka do kraja, saki dan. Povećalo je držala va levoj ruke tako da je z jenen okon čitala, a z drugen gledala televiziju. To je bila moja nona ka je već pred više od 30 let živela va cyberspace-u.


http://novine.novilist.hr/Default.asp?WCI=Rubrike&WCU=285928602863285C2863285A28582859285B2863288A288D28632863285E285D2861285C2861286128632863286328592863Y

* * * * * * * * * * * * * * * * * * * * * * * * * * * * * *

Kumpanija Tramuntana Kraljevica Vratija se barba iz Amerike _2010-12-19 lijepom nasom.flv, 03:39

Kumpanija Tramuntana Kraljevica Vratija se barba iz Amerike _2010-12-19 lijepom nasom.flv

Nastavek na sledečomu listu

[Ljudevit Kaj]

Nastavek (z) prethodnoga lista


 (4/5)

KANTUNIĆ OD OTROČIĆ

Pompjeri

    Ča to se delaju pompjeri, si bi rado znat oteli.
    Naslišaj ča se to čuje? To po gradu pompjeri preše
    i sirena se oglašuje.
    Da se ni ka mačka na stene zaglavila?
    Al' se kakov mladi tić zaplel va neki grmić?
    Na, ne, ni se to dogodilo,
    leh se neč zapalilo.
    Vredni pompjeri oganj gase
    i delaju se, da judi spase.

Ivan RUNDIĆ, 3. razred OŠ Trsat, Rijeka
Voditeljica: Nina Kamenski

http://novine.novilist.hr/Default.asp?WCI=Rubrike&WCU=285928602863285C2863285A28582859285B2863288A288D28632863285E285D2861285D2858285828632863286328592863H

* * * * * * * * * * * * * * * * * * * * * * * * * * * * * *

boris dvornik vatrogasac pumpjer malo misto 2, 07:47

boris dvornik vatrogasac pumpjer malo misto 2


 Nastavek na sledečomu listu

[Ljudevit Kaj]

Nastavek (z) prethodnoga lista


 (5/5)
BILO BI SMEŠNO DA NI ŽUHKO

Ka je kega videla

 
Tonka i Marija se znaju još od školi. Oba dve su volele muški, nekad ko divojki, a i sad ko oženjene ih to drži. Prve su susedi. Tonke muž već let naviga na strancu, a Marijin dela va Njemačkoj.
    Čera jutro Tonka sa vesela pjeva i trebi na balkonu posteljinu, kad se na svojen balkonu pojavi Marija, zeše i rasteže se.
    – Tonka, dobro je aš pjevaš.
    – Zač mi ne bi i bilo?
    – Ma jutro rano prije pete videla san ovoga novoga mladoga prečasnoga da gre od tebe, pa san se prestrašila, da ni ne daj Bože, ki umrl?
    – Ni, ni, hvala Bogu, nego vidiš, kad san ja pasanu šetemanu videla va stine uri, da ti gre z kući pulicaj Marko, ja nisan uopće pomislela ni na provalu ni na neč grdo, nego na neč lipo ča ti se dogodilo...

D. ŠIROLA


http://novine.novilist.hr/Default.asp?WCI=Rubrike&WCU=285928602863285C2863285A28582859285B2863288A288D28632863285E285D2861285D2858285928632863286328592863K

* * * * * * * * * * * * * * * * * * * * * * * * * * * * * *

Gustafi Vidija san tebe 11.11.2011, 03:38

Gustafi Vidija san tebe 11.11.2011

[Ljudevit Kaj]

Novi list, 2013-04-22

S kamika i mora

Zač volin Gimpl?
 
Piše: Slavica Mrkić-Modrić
 
Ne moran van ni reć kuliko mi j' žal ča Ravnogorci nisu pasali dalje va onoj sakramenskoj emisije Do zadnjega zbora. Ma, ča je tu je, mane j' Gimpl ostal najbolji, i sigurno ću jih, dočin čujen da imaju kakov koncert poć poslušat. I ni to leh zato ča su z Ravne Gori, ča su naši, leh zato ča već dugo nisan videla tuliko veselih ljudi na jednomu mestu. Ne moraš jih ni čut, dosti ti je gljedat jih pa da ti zajedno bude jedan sled bolje, aš tuliko zrače z pozitivun, da j' to čudo.


    Bilo mi j' lipo videt i si ti ljudi ki su čera došli na rečko tekilo, ale na manifestaciju »Homo si teć«. I ne mislin sad tu na političari, aš saka čast onemi ki i inače teku, ki paze na formu i ki se furaju na zdrav život, ma j' bilo tamo i oneh ki su huji leh san ja. A to van znači – da moren i na kondot bin šla z auton. Intanto j' bilo i oneh ki su došli od ljubavi, kod i oneh ki su tamo bili po službenoj dužnoste. Ma neka je, ča će nan sad to, nego otela san van reć da mi j' bilo gušt gljedat dečicu, materi z kolicimi, cele familje, pa oni ki su z pason došli teć i na pasa obukli službenu stomanju, aš to j' znak da j' Homo si teć, manifestacija s kun se j' ov grad saživel. A to njoj je i bil cilj. Čestitan i onomu Kenijcu ki j' polumaraton od Preluke do Korza otekal za uru vrimena. Kad san to čula prvo san mislela da j' spikerica na radiju krivo rekla, aš kad je gnjeta i za auton ti rabi već od uri, a onput san shvatila da j' čovik profesionalac, a va ti se rezultati apsolutno ne razumen.

   Još mi j' neš palo napamet kad san naslihala izvješće z Korza. Najme, dobro j' rekla novinarka z terena kad je spomenula još jednu fritaju od šparog. Najme, ona se j' zapitala je još ka šparoga ostala kade, aš da j' sako mesto ili ima fritaju ili ima Šparogijadu ili neš sličnoga. Zaspraven ženska ima pravo, ma mane ni to pojidalo, leh san se malo zapitala ča delaju ti naši inspektori za šparogi. Ča oni ne zihajaju na teren, ča oni ne broje i ne naplaćuju ti macići, ča smo sopeta shvatili da smo donesli još jedan zakon ki ne vredi ni kuliko se j' pas poblatil. A ne poslušat ljudi! Da su malo poćakulali z bazun ne bi trošili ni vrime, ni hartu. Ma, to smo mi. Takovi smo kakovi smo.

    A da nas je sakakoveh govori i on slučaj napada na ambasadu od Srb. Vranić me zel ako nisan mislela da j' to nedelo nekakovoga mulca, kad altroke mulac, to j' načinil čovik ki bi već mogal znat da mu glava služi za neč više od toga da se sako jutro gre uplest. A moren bit da j' čovik leh otel od Riki načinit Boston, kod i onaj ča j' bombu hitil va onu zagrebačku oštariju. Se to me strašno jadi, aš ča nan ni bilo dosti i rata, i smrti, i nevolji. Ča ne bismo mogli malo gljedat naprvo, a ne se leh obraćat i gljedat ča j' bilo? Očito ne, ili san morda ja bedasta pa niš ne razumen. Mane su super jedino one bombi ča jih Refko i Čombe hitaju va bosanskoj serije »Lud, zbunjen, normalan«, a neki drugi bi baš na njih hitil bombu. Mepar da se celi svit more podelit na ludi, zbunjeni, i temin dodat se manje normalnih. To j' još jedan razlog zač volin Gimpl.

http://novine.novilist.hr/Default.asp?WCI=Rubrike&WCU=285A285A2863285C2863285A28582859285B28632893289328632863285E285E285828582858285F28632863286328592863B

* * * * * * * * * * * * * * * * * * * * * * * *

KUD"Delnice"DELNICE: Pjesme i plesovi Gorskog kotara, 09:10

KUD"Delnice"DELNICE:Pjesme i plesovi Gorskog kotara

[Ljudevit Kaj]

Novi list, 2013-04-23

S kamika i mora

Va Opatije j' FENomenalno

Piše Kim Cuculić

Va Opatije j' uprav finil FEN, Festival neovisnih kazališta Republike Hrvacke ki j' održan po drugi put. Ovaj festival mogal bi bit primer sen drugen manifestacijami toga tipa.


Kot prvo, FEN je bil prisutan na sakon kantunu Opatije, a informacije o festivalu imeli smo i v Rike. Po Opatije su klali maštovite sveteće reklami, dok su sa mesta zbivanja lipo označena tako da se čovik ne more zgubit. Festival je imel i svoju službenu kavanu, a odlično j' osmišljen i vizualni identitet FEN-a – od borši i bracijoleti z USB-on za klat va kompjutor, do skulptura va obliku fena. Borši z natpison »FEN« Opatijci i njihovi gosti razgrabili su va trenu, tako da j' festival i z oven detaljen »hodil« po opatijskin ulicami.

    Za ne tako puno soldi FEN je gledateljimi ponudil predstave za mići i veli, brojne radionice, prezentacije libri i izložbu. Biljeti su bili po popularnin cenami, a predstavi su privukle veli broj oneh ki su oteli videt ča dela hrvacka nezavisna scena. Judi su uglavnon bili zadovoljni i dokončali da se va Opatije ćute FENomenalno. Organizatori festivala već sada dobivaju upiti za sudjelovanje na treten FEN-u, a zovu i neovisni z drugeh zemalj. Ovo j' bil leh drugi FEN, a već se profiliral va prepoznatljiv festival ki bi va budućnosti mogal dobit i međunarodni predznak.

    Pozabila san reć i da j' FEN ovoga leta imel i bilten i FEN-televiziju ki su saki dan parićali friške informacije o festivalu. Spomenut ću zadnji dan, kad je zadnja festivalska predstava finila na sedan i petnajst večer, a novi broj glasila »FENomen« već je na sedan i dvajset bil va rukami publike. Mića, ali složna festivalska ekipa brinula se da se štima i ni bilo nijednoga kiksa. Festival je imel i volonteri, ki su se prijavili da pomoru, ali i da gljedaju predstavi. Na ovogodišnjen FEN-u videli smo niz sjajnih glumcih, od glumačkog doajena Pere Kvrgića do mladeh glumačkeh snaga ke donose novi kazališni senzibilitet. Ča j' najvažneje, atmosfera j' bila ležerna, brez sukoba i skandala, a ni bilo ni nagrada ke znaju storit sakakove napetosti. FEN je bil za pet i uzor drugimi kako rabi delat.

http://novine.novilist.hr/Default.asp?WCI=Rubrike&WCU=285A285B2863285C2863285A28582859285B28632893289328632863285E285E28582859285D285E28632863286328592863Q

* * * * * * * * * * * * * * * * * * * * * * * *

Klapa Opatija, 02:27

Klapa Opatija

[Ljudevit Kaj]

NEVERA

Evo ga ovod posli triest godin,
evo ga na mul, uvik ga je snija.

Evo me ovod posli triest godin,
evo me na mul, uvik san ga snija.

Nima više Jere, stare šjore Kate,
ne vidin ni Tomu, Ive je još tot.

Ive, Ive, Ive, jema li još koga!?
Ive, Ive, Ive, živi li još iko!?

Nevera, Nevera, Nevera!... Ooooooo!...

Sićan se, bija san mlad,
tri dana moga san veslat, a ne spavat1
Uzalud kad je došla nevera!
Nevera, Nevera, Nevera!... Ooooooo!...

U Italiju me bacilo more,
ukrca san se za ne prosit, pa u Čile!
Puste godine rada u rudniku!
Nevera, Nevera, Nevera!... Ooooooo!...

Evo me ovod posli triest godin,
evo me na mul, uvik san ga snija.

Nima više Jere, stare šjore Kate,
ne vidin ni Tomu, Ive je još tot.

Ive, Ive, Ive, jema li još koga!?
Ive, Ive, Ive, živi li još iko!?

Čuješ li me, Iveee!?!


Toma Bebic: Nevera, 03:22

Toma Bebic: Nevera