POČAKAJ (PO-ČA-KAJ) - Lipa naša čakavska

[Ljudevit Kaj]

Réčki "Nôvi list" / Kolumně, komentâri / Pogled

KVADRATURA DRUGA

03.10.2009.

đermano ćićo senjanović

ne idemo naprid

Ka ča je Srebrenica tragedija ovoga vrimena, tako je i Jasenovac tragedija onoga vrimena. To je tolika tragedija da je bilo dovoljno prošetat u tišini do Kamenog cvita, tamo se poklonit i u tišini se vratit nazad. Da je to učinija, Bozanić bi bija veći od Brandta, a ovako je ispa mali, jadni politikant. Ispa je čovik koji uznemirava, vriđa uspomenu na mrtve i sve relativizira

Slika:
http://novine.novilist.hr/images/clanci/2009/10/450781.jpg
 

nikad ništa

Ako se čovik malo bolje zagleda u televiziju, onda na ekran vidi upaljeno svitlo. To je odsjaj ove lampe koja mi svitli dok pišen. I obično nju vidin na ekran. Malo palin televiziju. Zato jer me muči, iritira i nervira. Ja bi želija da je ona pravedna, dobra, poštena i informativna, pa kad na to ne naiđen, onda mi bude grubo i beštiman. I jidin se ka pas. Takvo ponašanje još je jedan dokaz moje političke nezrelosti. Ja nikako da prihvatin činjenicu da je Televizija odraz naše političke stvarnosti. Ako državon vlada HDZ, a Televizija je državna, onda će i ona bit HDZ-ov eksponent. Samo mi je žaj ča in je Mesić iša dat ruku. Znan, on je žrtvova Televiziju da bi moga dobit nešto drugo. Recimo, put na Kubu za deset osoba...
    Zato malo gledan televiziju. Tu mislin na političke emisije, Dnevnik i Otvoreno, jer sve to doživljavan ka servis Vlade ili servis neke od frakcija HDZ-a. Sve je to prozirno, tužno, nekorektno, necivilizacijski.
    Zove me prijatelj i pita gledan li Otvoreno koje je posvećeno dolasku kardinala Bozanića u Jasenovac. Otvorin i počnen se smijat. Dva sudionika. Jedan je glasnogovornik Crkve, a drugi je novinar koji je vječni branitelj svih vlada. A Otvoreno vodi gospodin Togonal, rečeni Navijač. Učas su se dogovorili da je posjet kardinala Bozanića Jasenovcu nešto najlipše, najplemenitije, najbolje i najdemokratskije. Posjet bez mrlje i zamjerke.
    Naravno da san to ugasija, i onda san osta ležat. Zagleda san se u plafon, ali ga nisan vidija jer je bija mrak. I dok san tako gleda put gori, počeja san se analizirat. Ča se to s menon događa da san ja ti posjet Bozanića Jasenovcu doživija ka najveće licemjerje, ka demonstraciju političke moći i ka bahati i necivilizirani nastup? Samo san govorija: »Fuj, sram te bilo!«, a onda bi sasuja rafal beštimji. I nije mi bilo ništa lakše. Pita san se odakle mu potriba i želja da išporka to sveto misto.
    Kad san pri koji dan pročita da se kardinal Bozanić sprema ić u Jasenovac, to san javno komentira: »Hvalin te, Gospodine!« Baš san bija ponosan i sritan. Ma, bravo meštre! Evo je Katolička crkva odlučila pokazat pravi put ka smirivanju napetosti u društvu. Odlučila se poklonit nevinim žrtvama, osudit zločin i zločince. Zaklopit tu stranicu povijesti i – idemo naprid! Ka ča je Srebrenica tragedija ovoga vrimena, tako je i Jasenovac tragedija onoga vrimena. To je tolika tragedija da je bilo dovoljno prošetat u tišini do Kamenog cvita, tamo se poklonit i u tišini se vratit nazad. Da je to učinija, Bozanić bi bija veći od Brandta, a ovako je ispa mali, jadni politikant. Ispa je čovik koji uznemirava, vriđa uspomenu na mrtve i sve relativizira. Ka ča se na Dan antifašizma ne govori o Jazovki, na Božić o inkviziciji, na Dan domovinske zahvalnosti o pobivenoj srpskoj starčadi, tako se ni u Jasenovcu ne spominju zločini komunista i ne proziva se Tita.
    Ma, ča ću ja njega učit. On to sve zna. I baš zato ča zna, namjerno to čini. A namjerno činit zlo, e to se kosi sa svin onin ča Crkva propovida. Meni je lako, ja san ateista, ali kako se Bozanić ne boji Boga? Ko zna, more bit da on u Njega i ne viruje.
    A i Bog će mi dat adresu. Koga sve trpi.
   

živija kaj

Ovo okad Zvonimir Milčec ima kolumnu u Večernjaka, svaki prvidan trčen na kiosk i vičen: »Molin Vas, dat ćete mi jednoga Milčeca prelivenog kajem.« Kako san učinija 15 godin Zagreba, to uživan čut oni zagrebački govor koji me dočeka kad san se 1960. priselija u Zagreb. Žaj mi je ka pasu da se ti govor zagubija ili ga ja ne nalazin kad dođen u Zagreb. Zato guštan čitat Milčeca. Vrati me u mladost, vrati mi slike Trnja, njegovih prizemnica, pumpi za vodu koje su se smrzavale pa bi im furt stare veste i sakoe navlačili.
    I evo mi se moj Milčec užga. Do ruk mu je došla Slobodna u kojoj je Radimir Milišić, zagrebački Dalmatinac, dâ intervju pod naslovon »Mora li glavni grad bit baš Zagreb?«. I još Milčec citira ove Milišićeve riči: »Hoće li kajkavci posegnuti za stvaranjem vlastite republike, na koje granice pikiraju, teško je reći, ali agresija kojom nastupaju prema hrvatskom jugu, pogotovo prema Dalmaciji, daje to naslutiti... Eventualnim stvaranjem 'Republike Kajkavske' purgeri i kajkavci ostvarili bi nove geostrateške i geopolitičke mogućnosti. Njihova sveta riječ 'kaj' bila bi poveznica za povezivanje s drugim kajkavcima, u prvom redu sa Slovenijom. Ne znam jesu li Milčec i Židak kao najpoznatiji promotori isključivo kajkavskog Zagreba o tome razmišljali...«
    Umisto da se na ovo sta smijat, moj Milčec tuče iz svih kaluni. Spominje dr. Ivu koji nas je naglo ostavija, spominje HTV u koju se puno više čuje »di ideš« nego »kam ideš«, a sića se i dva stadiona: Maksimira, di su se navijači tukli s milicijon, i Poljuda, di se plakalo za Titon.
    Ma, lipi moj Milčec, ča će ti to?! Zašto si se dâ upregnit u međuregionalne sukobe? Ti si infišan u Zagreb, a čitan da voliš i Split, a, evo ja, infišan san u Split, a skoro toliko i u Zagreb, i na ča bi to sad sličilo da se ukopamo svak u svoj rov i da počnemo cipat po purgerima i mandrilima? Gospodin Milišić ima prav postavljat pitanja, ima prav stvarat kajkavske geopolitičke kombinacije, a na tebi i meni je da svojim pisanjem uspostavljamo kajkavstvo i čakavstvo između naše dvi regije i naša dva grada. Nekin lipin tekstovima, nekin sjećanjima, promocijon svoga govora, svoga dijalekta. U čast tvog dede s Bukovca i moga dide s Lučca. A politiku će ionako krojit neki drugi. Nadajmo se da će oni radit za sve dijelove Hrvatske podjednako. A onda, nima straja. Niko ne biži iz sritne kuće.
    A to jesu li crtići na televiziju sinkronizirani po splisku ili po zagrebačku, i to me se jebe. Evo, moja tri sina, nagledala su se tih crtići, a zagrebački ne znaju ni beknit. A ja ih nikad nisan gleda, a moga bi po zagrebačku mlit ka papagalo. I to smatran bogastvon. A ovo da će se Zagreb povezat sa Slovenijon i da će nas ostavit same ka Tomu na brodu?! Je li, da je bilo?! Ko me može, ko me smije odvojit od Slovenije?!
    Ma, lipi moj Milčec, pusti čovika nek mašta. A ti i ja se držimo svoga dvora. Čuvajmo zagrebački i spliski, i budimo ponosni na svoj govor. Važno da se razmemo. A Hrvatska će vječna bit!
    Dok je stranci ne raskomadaju.
   

Večernji list 29.09.2009.

FAKAT

Lipi vaš Zagreb fakat ne bi moga bit metropola!
Mora li glavni grad biti baš Zagreb?

autor: Zvonimir Milčec

U kavanu mi donose stranicu istrgnutu iz “Slobodne Dalmacije”. I svi mahom naređuju da se obavezno javim. Kak je naslov teksta više nego intrigantan – “Mora li glavni grad biti baš Zagreb?”, mamse zdrmam.

Nâstavek:
http://www.forumgorica.com/kajkavski/hr-kaj-ne-lepa-nasa-kajkavska-tiskajne/msg4488/#msg4488

knez igor

Samo uru su ga pustili na televiziju i svi su popadali u afan. Kod Stankovića je gostova Igor Mandić, a ja san se namistija isprid televizora 15 minuti pri početka. A prošlu nedilju, kad je bija Kerum, nisan tija gledat. Jer, ča to meni Kerum može reć? Da se zna izražavat, bija bi književnik ili novinar kulturne rubrike, a ne poslovođa. Birali smo ga da nan od grada učine malu, smišnu butigu, s lipin izlogon. Dosadašnje poslovođe su lipo govorili i lipo kreli, pa smo tili novoga poslovođu. Ovi ne govori baš lipo, a je li krede, to ćemo još vidit.
    A Igor je baš figura. Side vlasi, modra košuja i moderna jaketa. U otvaranju je odma ima jednu falingu kad je reka da ga Dalmacija asocira na brudet. Nikako da shvati da u nas nima brudet. Brujet, brujet, moj Igore! A posli se uputija. Neman pojma ča je sve govorija, samo znan da san ga gušta slušat. U pô emisije me zove Ognjen: »Najebat će Mandić! Raspiruje bratstvo i jedinstvo.« Ma, on to namjerno. Provocira demokraciju. Ide vidit dokle se može itnit. Da smo kojin slučajen u federaciji sa Srbijon, on bi na televiziju govorija o samostalnoj Hrvatskoj. Njegova glavna kvaliteta je pamet i obrazovanje. Plus elokvencija. I prčevitost. »Oću reć, i ko vas jebe!« Dok je govorija, na dno ekrana su išle poruke. Svak mu se klanja. A u tri poruke ljudi plaču za onon »Emisijom opće prakse« u kojoj smo uživali u razgovoru Mandića, Makovića i Zidića, pod mudrim vodstvom gospodina Pofuka.
    Televizija nije imala mira dok nije ukinila tu emisiju. To je i normalno. Kvarila in je prosjek. Evo su i Latina makli. Još Stankovića, pa su mirni. Nek zovu Pašalića za voditelja. I Luku Prcelu. Kad je Mandić reka da je on obični umirovljenik, punica me pita:
    – A šta je on po zanimanju?
    – Varilac, bako.
    – A di je radija?
    – U škver.
    – Srića da je iša u penziju sad kad se brodogradilišta gase.
    I tako, za našega Igora više nema posla. Škver mu se raspada, novine ga nećedu, neće ga ni Televizija. Možda bi ga i uzeli da on oće pisat mukte. A on, umišljena veličina, traži da ga platu. A to je kapitalistima trošak. Ol in nije boje, umisto njegove kolumne, raspizdit oglas priko cile stranice. Umisto troška, čista zarada!
    Triba samo zbrojit dva i dva.
   

brundaj ga, blaž

Nikidan čitan o studentici iz Litve ča je došla na praksu u Split i ona se fali da je postala prava Splićanka. Da cilo jutro sedi na Rivu i da žuga. Danas opet vidin u novine sliku di stoji plakat koji poziva na žuganje. Ona iz Litve žuga, ovi na Rivi žugaju, a ja cili život u Split i ne znan ča to oće reć. Pitan dicu ča je to žuganje, a oni mi govoru da je to kad se na nešto žališ. Kad ništo prigovaraš. A, to je grintanje. Pribotunavanje. Brontulavanje. Vidiš kako mi se razvija spliski govor: od grintanja do žuganja.
    Zoven Milčeca da mi to prevede na zagrebački. U njih bi ti čovik bija grintavec, cendravec ili, u blažoj formi – onaj kaj furt nekaj brunda.
    A ča ima brundat kad žive u metropolu?


http://novine.novilist.hr/Default.asp?WCI=Rubrike&WCU=285B2863285928582863285A285828582861286328982897288F286328782877286F2863285C285D2858285F2860285928632863286328592863F

[Ljudevit Kaj]

Réčki „Nôvi list“, 24.09.2009. / Kolumně
 
Beseda

7 člankov na čakavskomu:

* * * * * * * * * * * * * * * * * * * * * * * * * * * * * * * * * * * * * * * * * * * *
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 1/7


da se ne pozabi

Halubajske mažoretkinje proslavile dvajseti rojendan
 
Bile su i ostale prepoznatljive kako prve mažoretkinje registrirane va Hrvackoj, plavo-bele, a smiron su dobivale komplimenti »kako lepe nogi imate«

Piše Tatjana UDOVIĆ,
Slika Roni BRMALJ
 
Slika:
Zvali su ih i »najlepše hrvacke nogi« – evo i zaš...
http://novine.novilist.hr/images/clanci/2009/9/448878.jpg


Mažoretkinje, poznate Halubajke od Marinić za Matejnu su proslavile 20. rojendan! Kad se pomisli na kulturno-umjetnički život Viškova, zajno su va misleh i malice va svojeh prepoznatljiveh plavo-beleh uniformah. One su se prvi put okupile 1989. leta i od onda ne more pasat ni jena manifestacija ni blagdan va Viškove bez njih. Damjana Brancella ka je osnovala „Halubajke» nan je povedela kako je do sega prišlo – na inicijativu ženskeh i divojak Halubja udruženeh va kulturno-umjetničko društvo „Halubajke» z žejun da njihe divojke budu prepoznatljive va Hrvatskoj pa i šire. Zato je Damjana inzistirala da divojke imaju vavek istu uniformu, a koreografije su divojke spontano zmišjale same.
    Va to vreme Općina Viškovo još ni bila osnovana pak su divojke za svoje uniformi prezele plavu i belu boju Grada Reki (v Reke su se pred 20 let i registrirale), uz ku gre karakterističan visoki plavi klobuk. I bile su i ostale prepoznatljive kako prve mažoretkinje registrirane va Hrvackoj, plavo-bele, konstantno z komplimenti »kako lepe nogi imate! Halubajke su nastupale na državneh prvenstveh va Rovinje, Gline, Vukovare, Osijeke, Crikvenice i na Europsken prvenstve va Zagrebe. Posebe rabi reć kako su one kot prva registrirana Udruga mažoretkinj va našoj zemje svojen radon i djelovanjen dale značajan doprinos razvijanju mažoret plesa va celoj Hrvatskoj i jedne su od osnivačica Hrvatske udruge mažoretkinj HRSAMA i HMSA.
    Zato ni bilo teško subotu zapolne napunit jog pu Marinić kot ča ni bilo teško ni mažoretkinjan – prijateljican našeh Halubajki da pridu z seh stran Hrvatske i budu njihove gošće. Tako su šćapić vrtele na veloj obljetnice našeh Halubajki i Prve riječke mažoretkinje, Rovinjske, Umaške, Baljanske i Labinske mažoretkinje, a za njih su kantale Tamara Brusić i Ivana Marčelja. Skupile su se na joge i seniorke ke su pred davneh dvajset let bile prve Halubajke ke su šćapić zavrtele pak nan svojen nastupon pokazale da su još vavek del iste familije. Podelile su se zahvale i pokloni bivšen i sadašnjen voditeljican: Nikoline Marčelja, Kristine Mihelčić i Matee Knežević, kot i osnivačice Damjane Brancella kako i sadašnjoj predsjednice Marije Denić-Zoranović. Bilo je čuda tepleh zagrljaji ki su jih ganuli do suz, čak su i publike oči zasuzile, a onda su se zaprla svetla, veselo je zasopla Marinićeva pleh-muzika, a glas voditelja Nenota Pavinčića najavil je velo iznenađenje – velu tortu s kun su se si zasladili...
    Gošće našeh Halubajki bile su i Prve rečke mažoretkinje ke su nan povedele: – Mi smo Prve rečke mažoretkinje ke ćemo vaje slavit 15. rojendan. Rado smo prišle na poziv Halubajki s kemi smo dosti do sad surajevale, bile smo i na putovanjeh skupa. Ovde nan je super, uživamo družeć se. Nekoliko besed smo zapisali i od mažoretkinj z Labina.
    -Mi smo iz Labina. Postojimo od 1997. a većina cura trenira više od deset godina . Došle smo drugu godinu za redom za vrijeme Matejne. Rado se odazovemo na sve manifestacije i fešte. Zabavno nam je!


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C28602860285F286028632863286328592863G

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 2/7


obašli smo

Čuvaj se senjske ruke, bure i brkate cure
 
Kad smo četrdeset i petu paralelu minuli Senj nas je dočekal uprav onako kako rabi, po svoju, po našu z vetrun ki pred sobun se pometa, se raskuži, po buri. Po putu smo uz balkun Marije Terezije pasali

Piše Marina TIJAN HAJDINIĆ
 
Slika :
Ura je bila za poć va Senj i domislit se na ljude ki su Kraljevicu i Senj va pasanin vrimenu zavavik zauzlali
http://novine.novilist.hr/images/clanci/2009/9/448879.jpg

 
Na punti od lanterne fiče, tuli vapor ko da se preši, riva, more siče, dimi i kad bura puše, jugo nabija, daž zliva, lampa, strele pucaju dan ali noć, il opolnu, kad sunce žge, pali, peče. Si se preše, jedni već čekaju, drugi nose, teku, aš je poć! Ljudi, vapor gre! Koštiva! Ala! Ala! Zvoni, šija! Parćiva stari vapor.«
    (Želimir Mandekić)
    Se ako mu nismo rekli, va Kraljevici j' zvon Sv. Mikule zvonil. Spametil se j' un na »Uru od vapora«. V jutru, va neverinu va kin se ćuti da j' letu došal kraj ovako nan napovida: »Znemireno j' more, štanja bura puše. Umnije j', sigurnije, da vapor dobro uz mul koštate i va portu pušćate. Mesto š njin z busun se va Senj uputite.«
    Poslušali smo, na put se dali, janjčiće i ovce, ovčetine opake na moru se vrime abadali. Grad uskočki z duga nismo razaznali aš se j' va njemu bura semoguća rajala. Na njegovomu mestu gljedali smo kako se nebo z morun, z pinun, maglun od vala, bure i soli spaja.
    »Danas je ura za poć va Senj i domislit se na ljude ki su Kraljevicu i Senj va pasanin vrimenu zavavik zauzlali. Jedan od njih je i Marko Susanni bil. Va 18. viku nastavil je z onin z čin su se, davno nigda Frankopani i Zrinski bavili, z žitun trgovat, z Banata. Marko je va svoje vrime već imel Karolinu i plovni put Dunava, Save i Kupe do Karlovca. Nastoji da se čin prvo fini Jozefina. Želja mu j' da se uz ove, znova udela još kakova cesta va Hrvackomu primorju, z starimi poveže, pa uprav nikako ovako piše i moli cara Josipa II: Dragi care, vi znate da država ima samo jedan sigur i dobar porat ki j' zapušćen i prazan aš nima cest ke bi va njega trgovinu namaknule. Predlažin Van i va ime toga obraz svoj čist van v ruke davan, da ću o svomu trošku zgradit cestu od Plas, priko briga Seč i Krešišća do Novoga kaštela va Kraljevici. Jedno Vas molin, da mi obećate vrnut se solde ke ću okol toga potrošit i to onoga časa kad pod slavolukun budete stali, fijok rizali i prve kola z žitun po njoj pušćali. Car tomu ni mogal odolit.Va kratko vrime o semu se j' z Markun dogovorili i 1785. leta počeli su gradit novu cestu ka će spojit Kraljevicu z Karolinun. Ta veli posal, ki j' par let dural, povjerili su pravomu meštru od arta, mladomu Ivanu Evandjelistu Turkoviću.
    Marko se to vrime ni miroval. Umićan i provižijan kapital je svoj vrtel, brode j' va Veneciji gradil, na nje tope zaštanjal da se od gusari na moru brani, va zakup je kraljevički Novigrad zel i va njemu senar za silno žito uredil. Sprot je caru opet pisal, jako delikato ga j' molil da Kraljevici da status porta z koga te vapori priko veloga, sinjega mora žito po svitu razvažat. Car mu j' i to udovoljil, pa 1790. leta Kraljevica postaje najmoćniji, ma i najjeftiniji porat za trgovinu žitun. Više od šeždeset vapori na leto je sam Susanni va Marsiju i Genovu peljal. Najveć je trgoval z frmentunun, šenicun, ma i z tabakun koga j' z požeške doline va glavnu trafiku v Rimu peljal. Va svitu j' kupoval sol ku j' nalahko tržil va svojoj zemlji. Umrl je leto dan prvo leh će Lujzijana bit gotova, koda j' znal da će š njun Rika zavavik Kraljevici zet moć i sjaj.
    Drugi čovik ki j' dva dična grada zavavik vezal bil je kraljevički zet Sebald Cihlar, učitelj z Češke. Od dvajset let je va Kraljevicu došal. Na to ga j' August Šenoa, njegov pajdaš nagovoril. Uz mul nahaja svoju ljubav, ženu Ljudmilu, hćer umne, na dugo poštivane familje Martina Polića. Va njihov dom znali su dohajat mnogi znani ljudi, med njimi i češki poeta Jan Neruda. Sebald je i tajnik kraljevičke Narodne čitaonice, piše za list Primorac ki se štampa va Kraljevici, potle stare glagoljaške štamparije va Senjskoj dragi, prvoj Primorskoj štampariji, osnovanoj 1873. leta. Sudbina j' otela da se preseli va Senj na delo tajnika Trgovačko-obrtničke komore. Kad god je mogal, ča sam, ča z familjun vrnjival se j' va naš dragi grad ki j' siguro zel jedan kusić njegova srca.
    Treti čovik ki j' i jedan i drugi grad kod svoj držal je vnuk Martina Polića, sin Ljudmile i Sebalda, Milutin Cihlar Nehajev, ki j' va dobi od osavnajstak let već bil književnik od imena. Va nonićevoj kući kraj mora velo j' slavlje zad kuće, va hladu, uz šternu bilo, kad mu j' vnuk prvi put kod duhtor nauk z Beča došal. Kad se j', jedanput po letu, z barbun, profesorun Stjepanun Polićun šetal, fermali su se va šmričkoj oštariji. Zapisano j': »u hladovini i polumraku te »šterne«, dok je vani još sijalo sunce spuštajući se polagano prema Učki, dva su čovjeka zaljubljena u primorski kraj i pod krovom ovog domaćeg i intimnog ambijenta, u tom skrivenom kutku i zatišju raspleli razgovor, čudesan razgovor o primorskim ljudima i događajima o....«
    Mnogi j' kraljevički sin, kroz vrime njih četrdesetak va Senju bival i gimnazije finjival. I crkveni ljudi su za dobro našega grada puno put Oče naš zmolili. Skupa su se 1872. leta, pet put na šetemanu va parnomu vaporu »Hrvat« vozili, ki j' saobraćal na redovitoj prugi Senj – Rika...«, pripovidal je Želimir Mandekić voditelj projekta »Ure od vapora« va busu.
    Kad smo četrdeset i petu paralelu minuli Senj nas je dočekal uprav onako kako rabi, po svoju, po našu z vetrun ki pred sobun se pometa, se raskuži, po buri. Po putu smo uz balkun Marije Terezije pasali. Senjani ćakulaju da j' za lipoga vrimena na njemu ona sidela, z kapetanun Vukasovićun ćakulala, družila se, more i grad svoj ogljedala. Za jedan kočul smo zavrnuli, va palac familje Vukasović, danas va Gradski muzej došli. Tu smo veli del dične senjske prošlosti našli; Senjsku ploču i druge od kamika spomenike, na glagoljici pisane, ku j' i papa Inocent IV, kod i naš starohrvacki jezik va listu biskupu Filipu 1248. leta priznal, i dal njoj i nan božji blagoslov, aš je na umu imel »...da je govor podložan stvari, a ne stvar govoru...«, Doznali smo da j' kroz pasano vrime Senj imel 26 crikav, da su danas ustale četire, razgljedali smo amfore, upoznali se z delun glagoljske štamparije i njejimi libri, čuli za staklenu bočicu z ditetjun glavun ka j' putovala va Rim na izložbu rimskoga stakla va Hrvackoj. Čuli smo i videli del njihove slavne pomorske tradicije, i to da su i ono kod i mi kalafati bili i vapore delali. Prodavali su ih najveć Veneciji. Pročitali da leta 1762. » Senj ima 219 brodova, a kao najznačajniji brodovlasnik spominje se Marko Susanni«. Pozdravili smo i poklonili se Vitezoviću, Kranjčeviću, Novaku, M.C. Nehajevu, Ogrizoviću..., simi onimi ki su va besedi i libru proslavili Senj i našu Hrvacku. Od kud su došli i kako su Bunjevci živeli, o Domovinskomu ratu va Senju, o Velebitu... čuda toga smo videli i čuli od naših dragih Senjani.
    Bit va Senju, znat da j' od 12. vika sjedište biskupije a ne poć va njihovu katedralu, jednu od najvećih senjskih svetinj, bil bi veli grih. Do dana današnjega se nezna kad su ju gradili, ma da j' jako stara svedok je del uščuvane nigdanje facade delane od pikul. Mnogi časni ljudi, odličnici grada va njoj su zavavik svoj počinak našli...
    Produžili smo i do zbirke Sakralne senjske bogatije. Pasivajuć uz sliku nadbiskupa i metropolita duhtora bogoslovlja Viktora Burića, rojnomu doduše v Riki, od oca Petra i matere Jelke rojne Burić ki su z Kraljevice bili i va nju se živit preselili, pa ga Kraljevičani za svoga drže, čujin kako Mirjana Kovač rojna Grubišić z Šmrike ovako pripovida: »Bilo j' to ratno vrime. Nigdi 1942. leta. Da ni bilo mora ko nas je hranilo puno put bimo bili lačni. Barba Vitor Modričin i moj otac su šli na ribe. Ta put su na dinamit lovili. Ča ih nisu talijanski soldati čuli, videli, ulovili i va rešt va Crkvenicu zaprli. Žene njihove su se za pomoć obratile velečasnomu va Šmriki, Matu Buriću. Za nikuliko dan Vitor i moj otac su doma došli. Doznali smo da su pušćeni zato aš je za nje, svoje ljude, senjski biskup Burić talijansku komandu prosil i molil da ih pusti.«
    Tu smo našli i pravoga Kraljevčana, senjskoga i modruškoga biskupa Roka Vučića. Mat Paulina i otac Aleksandar, mornar, odgojili su svoga sina komu j' 1907. leta papa Pio X regalal zlatni križ. Zapisano j' da j' bil »sveta života, u svemu uzoran, blag i razborit, a prema siromasima poslovično skrban i darežljiv.«
    Polne j' va Senju zvonilo kad smo se va Nehaj uputili, kadi su skoro 80 let senjski uskoki živeli, bolje reć mučili se, hrabro borili, rate z Turci, Mlečani vojevali, sih nas branili. Poštivali su našu kršćansku veru, slobodu, svoj narod i familju, čuvajuć od starih bogatiju. I zato su va srcu sakoga Senjana, i sih nas na rojnoj grudi još vavik živi. Anci sleda se nismo bojali one stare: »Čuvaj se senjske ruke, bure i brkate cure«. Dobro se poznamo. Skoro pa smo svoji!
    Na putu za Krasno poslušali smo Dr. Furlana: »Potle rata, kad još ni bilo redovite pruge po cesti z Kraljevice za Riku ja san hodil va šušačku gimnaziju. Redovito san dohajal saki dan, se ako puno put nisan znal kako ni š čin ću va nju doć. Najveć san do Brajdice dohajal z brodun, ma puno put san do Bakra pješke hodil ali se na koli z furmanu vozil. Se su to znali moji profesori, pa su meni i još nikuliko nas z Kraljevice, Hreljina, Šmrike... predložili da četrti razred finimo va gimnaziji va Senju. Nisan rad na to pristal. Z štamacun i lancunun na hrbatu oprćenin san došal i kad san se z mojimi pajdaši spartal, žal mi j' bilo da nisan prvo došal. Senj je osebujan grad, osobito po zimi. Kad god va njega dojdin, pa i sad, srce mi j' puno spomeni na sih onih kih san dobro poznal, skoro celi žitak š njimi vezan ustal i danas kad ih većine više ni. Med sobun smo bili jako vezani, jedan drugomu va semu pomagali, veselili se žitku i mladosti. Saki od nas sanjal je svoj budući san. Pa kad prvi vikend sako leto va šestin misecu simo dojdin, na susret senjskih đaki, domislin se, pripovidan i smijin se semu onomu ča smo va Senju, jednomu dičnomu, staromu i dragomu gradu doživeli. I dokle god san na pameti Senju se vrnjivan, njega kod ni moju Kraljevicu ne pozabljivan.«
    Va Krasnu smo se va Šumarski muzej javili, Veloj Gospi pomolili i »Stolu«, kraljevičkoj udrugi va kulturi, ka j' i ovoletnju »Uru od vapora« uredila, zahvalili. Branku i Milanki, ka j' nogu pred put zvenula smo kartulinu poslali i si se potpisali. Radmilu, osobito Želimira držimo za besedu. I k letu će »Ura od vapora« doć. Vapor će pred Kraljevicun koštat. Va njega ćemo se ukrcat, š njin navigat i spametit se na ljude ki su Kraljevicu imeli rad, va njoj živeli, o njoj se pojidali, va tuji svit prohajali, nikad ju zabljali.
    Opet ćemo, sigura san si na kupu bit. Poćakulat, zabavit se, va društvu uživat, o Kraljevici pripovidat, Senja se domišljat onako kako Pavao Ritter Vitezović piva: »Ja sam Vam onaj Senj, što pobjede preslavne dobiv, Bogu i kralju sam svom vjernost sačuvao sveđ.«


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C28602860285F286128632863286328592863J

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 3/7


Va spomen maestru Ivanu Matetiću

Mantinjada pul Ronjgi za kanturi, tancuri i sopci
 
Ako j' pasanu nedeju bil negdere mej rajskemi oblaki i naslišal mlajariju kako po njigovu sope i kanta, onputa je sigurno lepo užival i kuntento se spod brka smel

Piše Cvjetana MILETIĆ,
Slika Boris SUŠANJ
 
Slika :
Ki je se prišal na 28. Mantinjadu pul Ronjgi
http://novine.novilist.hr/images/clanci/2009/9/448884.jpg


Ronjgi se probudili z nebesken klobukon od sunca. Od jutra se pul šterni pred maestrovun kućun skupja mlajarija. Neki prihajaju z Istri, neki z Bodulije. Pod bok stišću sopeli, roženice, mehi, mešnjice... Danaska je za njih parićana 28. mantinjada pul Ronjgi. Maestru Ivanu Matetiću va spomen. Na čast učitelu i čoveku od muziki, ki je so svojo živjenje potrošil za obahajat mesta, sela i vasi, naslišat i zapiševat domaći kanat i folklor. Taj naš trdi Kastavac na kraje je ziumel i muzike regalal danaska štimanu istarsku skalicu. Ako j' pasanu nedeju bil negdere mej rajskemi oblaki i naslišal mlajariju kako po njigovu sope i kanta, onputa je sigurno lepo užival i kuntento se spod brka smel. Šršur na Glavice storili su mladi sopci ovoletne Mantinjade. Pričinjalo mi se da velega maestra vidin kako z rukun na uhe pazi će ki ku notu pogrešit. A mladi su strpjivo čekali svoj red. Oteli su pokazat navajeno, ma i čut kako mladi z druge strani tarankaju. Soplo se i kantalo pol dana.
    Prej sopnjadi trebalo je sen regal pokazat. Storil mu ga još za stoti god rečki akademski kipar Zvonimir Kamenar. Trebalo je čuda let dokle se našlo pravo mesto na ken će zavavek stat ov lepi – od belega kamika sklesan – beli meh, mih, mieh al mišnjice, kako ga već kade zovu. Od sada će on stat pred Matetićevun kućun, jušto nekako na boke od šterni. Na belen visoken kamike sklesanen na meru meha i spod njega versi:

    Progutal si
    vas moj dih
    čuda ću te tako ćutit
    kako s manun
    puniš mih.
 
   Ovi versi – mehu na spomen, a Matetiću za regal – napisala je opatijska poetesa Marija Trinajstić. I oni su va kamike sklesani. Sad se lepo kunpanjaju skupa. A pred mehon od belega kamika, za more judi ki su prišli na Mantinjadu, na praveh su meheh zasopla tri mlada istrijanska sopca s Kršana. Razletali su se glasi meha se do vrh Glavice. Spustili va dušu i tu ostali. Nogi su i ne znajuć potancevale, a oče se obrnjale kot da išću barba Zvaneta na nebesken oblake. Sigurno mu j', tamo gore, »mlado meso raslo«, kako se užal škercat kad je naslišal i zapiševal dobar starinski kanat. Matetiću va čast po dvajset i osmi put pred bistun su se posložili si sopci i sopčice, kanturi i kanturice, tancuri i tancurice, si gosti i judi dobre voji da se litrataju za jeno novo, buduće vreme.
    Mantinjade je bilo za počet. Seh je pozdravil Darko Čargonja, ravnatelj Ustanovi Ivan Matetić Ronjgov, a daje je delo prezel Ivan Pavačić, voditelj Mantinjadi. Desna ruka bila mu je Gordana Gržetić, ka j' nastala da se teče kot po špažiće. Va komisije su bili judi od struki: Leo Ivančić, Ive Lesica i Marijan Orlić. Njiho delo je bilo dobro naslišat i mej najbojemi najbojeh zibrat za nagradit. Ovo leto na Mantinjadu je prišlo šezdesetak sopac i sopčic, kanturi i kanturic. A soplo se va četire grupi. Va prven kupe bili su kanturi i kanturice do 20 let. Glasi božanski a nagrad vavek premalo. Pa su tretu dobile Marinela Mrakovčić i Petrica Depikolozvane, a drugu Anamarija Mrakovčić i Petrica Depikolozvane. Prvu nagradu – 2.000 kun – dodelil je Grad Kastav. Nju je Valerije Jurasić i Mire Crnčić uručil gradonačelnik Grada Kastva Ivica Lukanović. Va drugen kupe su bili mladi sopci do 16 let. Tretu nagradu dobil je Dalen Načinović. Drugu Anton Milčetić i Nikola Milčetić. Prva nagrada bila je par noveh sopel graditelja Svetka Ušalja, a najbojen mladen sopcon regalala ih je Ustanova Ivan Matetić Ronjgov. Nju su dobili Vid Šamanić i Matej Justinić. Va tretoj grupe mladeh sopac od 17 do 20 let tretu su nagradu dobili Marinela Mrakovčić i Gabrijel Mrakovčić. Drugu Valerija Jurasić i Marko Župan. A prvu, ka j' bila 2.000 kun keh je dala Općina Viškovo, mladen i najbojen sopcon Vedranu Petroviću i Marku Županu uručila ju zamjenica načelnika Općine Viškovo Sanja Udović.
    Toliko od mladeh sopac i sopčic. Ma ti mladi imaju i svoji učiteli pa se ovo leto čula i Svirka generacij. Va njoj su sopli nonići i vnuki, materi i sini, a bilo je i oneh kade su se nasložili i četire generacije pa si skupa zasopli. Čulo se »kako svire roženice već miljari liet«, čuli su se i glasi sopel, a oglasile su se i dvojnice. Sakemu za gušt. Tu su tretu nagradu dobili mama Nives Matić i sin Patrik Matić. Drugu su zaslužili tata Ivan Pavačić i hćer Ilgen Pavačić i oni su svoju nagradu ustupili sopcon s Puli i Kršana. A prvu nagradu – Fotomonografiju Ustanove i suvenir sopeli Rajka Sroka – dobili su Zoran Karlić, Viliam Valjić i Dalen Načinović.
    Od kuda su prišli si ovi mladi sopci i kanturi? Najviše s Krka. Oni su pokazali kako se sope i kanta va Vrhe, va Malinskoj i Korniće, va Njivicah i Gabonjine, na Krase i po celoj Dobrinjštine. Malo drugačije, ma jenako lepo, sopu i kantaju na tanko i debelo mladi s Puli, Pazina, Kršana i Šijane. Si oni, seh teh šezdeset i neš dobreh sopac, zaslužilo je pohvalu pa smo njin od srca pjeskali. Da se zna i ki pomoru z delon al šoldon Mantinjade, Ustanova je sen dala zahvalnicu al priznanje.
    Dokle se komisija mučila i potila zibrat najbojeh mej najbojemi, publika je uživala va kante i tance Folklorne skupine KUD-a »Zvir« z Jelenja. Š njimi već čuda let, na radost oneh ki vole svoj kraj, dela njiha učitelica, Gromišćica, Alenka Juretić. Oni su ne samo kantali i tancali, nego i z nekoliko smešic seh lepo nasmeli. Tako će neki ovoletnu Mantinjadu pametit i po praven gromišken govore. Na kraje 28. mantinjadi ča još reć? Niš. Čekamo dvajset i devetu.


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C286028602860285C28632863286328592863D

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 4/7


ča je čaSLIKOVNI RJEČNIK

Trgadba
 
Piše i slika Branko Jani KUKURIN
 
Slika
http://novine.novilist.hr/images/clanci/2009/9/448880.jpg


Vreme je, ale po talijansku, štajon, Dalmatinci bi rekli stađun, od pobirana grozja, pak ni čudo da od teh stareh besed i navadbah si pišemo, kako i ča ćemo za ki dan uživat i va mladen. Iskusni novinarski mačak Cvijo je neš napisal nedeju od vrbničke trgadbi, i onako kako se je nekada grozje tamo trgalo. Nisu nan to neki tuji kraji, ki su jako dugo, pak je se nekako jenako, i pul nas, na oveh stranah, nan rabi koserić i brentača i čabar. A grozja je, ruže su ga pune. V oveh našeh krajeh, na sjevernen jadrane se reče trgadba ale pobirane grozja. Magari je trgadba čuda stareja beseda, a va našen domaćen se je fermala samo kot delo okol grozja. Va hrvasken trgati bi reć neš otkidat, raskidat, pak imamo još potrgati, rastrgati, a okole grozja se reče berba grožđa, beru se i kukuruzi ale frmenta, a i trešnje se beru, kot i vas drugi žir. Pul nas se samo grozje trga, a črešnje pobiraju. Slovenci reču isto kot i mi trgatva, Dalmatinci reču jematva i bendima. Trgat prihaja još z praslavenskega, koren te besedi se nahaja va još čuda drugeh besed.
    Va ova moderna vremena ni kada mislet jako od povijesti zajika, ako se potrefi lepo vreme, gušta j' poć grozje trgat, ma je se manje drveneh brentač ke su se pune slatkega grozja na hrbate va konobu nosile i va čabar hitale. Sad se brže boje z plastičneh lat va plastični čabar na prikolice zitrese grozje i pokla ga se doma peja. Va makine na struju se ga očisti od košćini i kožic i mošt lih zileje va kromiranu bačvu da bi vrenje bilo kontrolirano. Aš tako trebe bit, govore stručnjaki za vino. Se je to lepo, ma kako se je nekada prez te visoke tehnologije delalo dobro vino, ni baš da ga dosada naši judi nisu znali delat. Cela konoba je uževala dišet po dropah. Od teh stareh navadab jedino je nekako trgadba ostala takova užanca okole ke bacela cela familija i prijateli, pak je i dela i veselja ča su judi skupa. Još se najde i kakov koserić, aš se sada najviše z škarami grozdići režu. Kad bi te stare ruže mogle povedat, kuliko jih je ruk pazilo, kuliko jih je ruk obreževalo, veževalo, kropilo i na zadnjen grozje pobiralo!
    Puno puti san mislel zaš se ti naši judi okole teh ruž i grozja tuliko muče? Ča ni naredneje, kupit nekuliko boc dobrega vina va butige i bit na mire, prišparat i vreme i soldi? Pak mi se čini da san se domislel zač je tako. Odvaveki su judi va oveh krajeh i vino delali. Ki zna, morda i prej stareh Grki. Pak kako zapustit te lepe i korisne navadbi, ča je lepčega lego va kumpanije, va konobe, ku saki gospodar ki do sebe drži, mora imet, kakov žmuj dobrega i svojga vina popit. Me ne za napit se.
    Lane je nona Jardasova, kot divojčica po lehah potekovala, saki grozdić, kot mićo otroče posnažno va brentaču polagala, a za ovoletnu trgadbu već je ni. Ruže su još tamo i čuda let će bit! Morda te ruže i čuvamo za to aš pamete ruki i su muku našeh starejeh, ki su nan pustili velu jubav za svoj grunat, besedu, i zemju. Ako nas gjedaju tamo ozgora bit će sigurno zadovojni kako njiho delo nastojimo i kako nećemo stare nadvadbi zapustili.


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C286028602860285828632863286328592863W

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 5/7


 DIH TRAMONTANI

Tonetov politički pršut

Piše Dolores Juretić Biondić

Slika:
http://novine.novilist.hr/images/clanci/2009/9/448881.JPG


Ov put kolumna bi komodno mogla nosit naziv Dih pršuta, a ne tramontani. Da dih...a tek okus. Nisan nikad pisala neki tekst, a da mi je pri temu bilo slabo od tega ča san se - prejila pršuta. Vražja lakomija. Samo jilo nisan mogla s vami podelit, aš vas je čuda, al doživljaj moren...Ovako, va opatijsken dopisništve je jedan dan osvanul cel celast pršut. Na stalke. Skupa z nožon kraj njega. Lep dug duž. Baš onako...violina i gudalo. A dok gledaš slini cede va taktke najlepče muziki. Valcer.
    - Ki j' prnesal ti pršut... i zač, pitala san.
    - Tone Rudan. Bivši načelnik Općine Mošćenička Draga. Aš da se nakon šesnajst let oprašta od politiki i da s ten pršuton oteje počastiti seh ki su va opatijsken dopisništve sa ta leta pratli njegov rad, objektivno al subjektivno, ni važno.
    Ča da van rečen. Malo je takoveh dugovječneh ljubavi novinarstva i politke ke su uz to - sretno finile. Ovo je i na liburnije retkost. Iako je sen ki poznaju Antona Toneta Rudana ćaro da je š njin bilo lahko aš saki put je rekal ča je mislel pa kemu pravo al kemu krivo. Nikad ni govoril sto jeziki nego vavak samo jedan. Jezik iskrenosti. A na novinaru je bilo da njegove besedi prenese šćeto netto, al da ih malo ublaži i obradi... A ča se tiče pršuta moren samo reć samo to: lepa i šesna gesta čoveka kega politika ni zvegatila. Hvala Tone, u uime seh ki smo se častili.
    E, da je naš (bivši) Ivo S. samo malo kot Tone pa da je povodon svoje ostavki poslal se kakov pršut ili baren kus salama, sira i nekoliko pašteti sakoj redakcije novin ka ga je pratila va njegovoj karijere morda bi malo lepče gledali na njegov hrabri bijeg u nepoznato...Kerumu pak ne pomore ni sto pršuti, aš je z novinari otprl rat skoro do fonda skoro od prvega dana...
    Nego, ti Tonetov pršut...Jedan kus se dal mesaru rezat na mašinu, a ostalo na nož pa ki će koliko, feticu, dve, pet dok se ni prišlo do kosti. A vavek je boje kad se pršut reže na ruku nego na makinu, na ruku je nekako ukusneji. Za objest san na kraje jedno tri feti zarazala onako »po lički» malo debje...Kako je pršut ostal na brigu mladen opatijsken snagan ke sad drže dopisništvo ne znan je još živ al ni, ma ja san sporučila da mi očuvaju kost, aš bin za ki dan kuhala maneštru, a manešta bez kosti od pršuta nutre ni niš.
    A za Toneta se ne rabi sekirat. On si je osigural »odstupnicu«. Isto kako je volel politku tako voli i ribariju. Va to san se uvjerila jedne jugovne noći kad san provela sakramenski teške novinarsko ribarske ure i ure va Bigaje na sred Kvarnera...Kako i kormilo na čele Mošćeničke Dragi seh šesnaest let, tako je i na brode sigurno držal pravu rutu iako ni bilo lahko. A ča je najboje, šegavo je Tone mito za novinari prnesal na kraje, a ne na početke, pa to ni ni mito nego samo - pršut. A da j' bil dobar, je.


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C286028602860285928632863286328592863Z

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 6/7


Jena bodulska

Čuda soldi


Prišla j' Bodulka susedu pak ju on pita: – Kade ti j' otac?
    Dela – odgovara ona.
    Na to je sused povisil glas: – Ča, opet dela? Pa kamo ćete z temi silnemi soldi?
    Na ča je Bodulka leh odgovorila: -Tr je škabelini (ladice).

T.U.


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C286028602860285A28632863286328592863X

[Ljudevit Kaj]

Réčki „Nôvi list“, 24.09.2009. / Kolumně
Beseda
7 člankov na čakavskomu:
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 7/7


Nasmejte se, ovo j' život parićal

Kako se zoveš?


Slika
http://novine.novilist.hr/images/clanci/2009/9/448883.jpg


Prvo dvi šetemane poćakulal san se našin griško-selačkin slikaron Marijanon Mavrićen. Šnjin je bil i njegov sin, a kako mi stariji pozabimo dici imena, pital san fantinu kako mu je ime? Lipo mi je odgovoril da je on Maro, a na to će Marijan:
    – Vidiš, lipo si ga pital, šćeto po nigdanju, po domaću kako ti je ime, a jedanput jedni pitaju moga suseda: – Dečko, kako se zoveš?
    – Otac i mat me zovu – veli on. Oni pak uporni ponove pitanje, a on jin jopet odgovori da ga mat i otac zovu.
    – Pa dobro, kako te zovu?
    – Hodi simo! – odgovori mali.

M. BARAC


http://novine.novilist.hr/Default.asp?WCI=Rubrike&WCU=285A285C286328612863285A2858285828612863288A288D28632863285C285C286028602860285B28632863286328592863A

[Ljudevit Kaj]

Réčki „Nôvi list“, 06.10.2009. / Kolumně, komentâri

S KAMIKA I MORA

Niš ni besplatno


Piše Kim CUCULIĆ
 
Ma ima i oneh ki van svoji proizvodi nude besplatno. Rastumače ti da si slučajnin odabiron baš ti dobil besplatni dar, a moreš ga preuzet ako dojdeš na prezentaciju. I to ne sam, aš moraš dopeljat baren još jednu osobu. Ma to nije se – na prezentacije će bit poslužena i večera. Kako j' mojoj matere puna kapa teh ki neč nude besplatno, rekla j' ženskice z telefona da će doć po svoju magnetnu kolajnicu leh ako j' zaspraven besplatna. Ženski glas z druge strane žici uvjeraval ju je da j' to jušto tako.
 
Komać ča mat i otac zapolne potle obeda legnu da počinu, zazvoni telefon. Mat skoči z postelje aš pensa da ju zove kakova prijateljica, a kad digne slušalicu ono nekakova ženskica ka j' ljubazna da ne more bit ljubaznija. Pita čovika za zdravje i decu, a onput shvatimo da nan leh pokušava uvalit nekakov masažer, sredstva za snažit, mobilju, libri i ča ti ja znan ča. Se j' to ceneje i more se platit na nekuliko rati. Ma ima i oneh ki van svoji proizvodi nude besplatno. Rastumače ti da si slučajnin odabiron baš ti dobil besplatni dar, a moreš ga preuzet ako dojdeš na prezentaciju. I to ne sam, aš moraš dopeljat baren još jednu osobu. Ma to nije se – na prezentacije će bit poslužena i večera. Kako j' mojoj matere puna kapa teh ki neč nude besplatno, rekla j' ženskice z telefona da će doć po svoju magnetnu kolajnicu leh ako j' zaspraven besplatna. Ženski glas z druge strane žici uvjeraval ju je da j' to jušto tako. Kad je čula da na prezentaciju mora dovuć još nekoga, mat se sa smutila i počela nazivat prijateljice. Finalmente j' jednu našla i šle su vesele po sakramensku kolajnicu. Potle dve uri mat se vrnula doma sa znervirana, aš da ju je prezenter noveh kućanskeh aparati napal da ča ona misli, da ki još ča komu daje besplatno? Rekal joj je da će svoj »besplatni« dar dobit leh ako kupi jedan od teh aparati ki guštaju od 2.500 do 7.000 kun, plativo va nekuliko rati. Mat se pozvala na telefonski razgovor i garanciju da ne mora niš kupit, leh zet svoj besplatni poklon. Ma onaj prezenter i dalje j' bil bezobrazan i nastavil vređat mater. Ona se digla da će poć ća, a va ten momentu druga prezenterica naredila j' onon tipu da matere da kolajnicu. Sad je ona va škabelinu, a matere j' to bila dobra pouka i zaklela se da više nigdar va životu neće poć ni na jednu prezentaciju, naročito ove ke nude besplatni dari. Još je naredila ocu i mene da na se slične telefonske ponude odgovaramo da nismo zainteresirani. Mislin i da bi se finalmente neki ozbiljno trebal pozabavit sa sen oven ki na ovaj način judi vabe preko telefona, hitaju bez pitanja sakakove reklami va poštu, zvone po vratimi i povlače za rukav na ceste. Ćaro mi j' da i takovi judi moraju zaradit za život, ma pitanje j' kuliko j' se to pošteno. A našen naivnon pučanstvu treba poručit da ne nasjeda da j' va našoj zemje bilo ča besplatno.


http://novine.novilist.hr/Default.asp?WCI=Rubrike&WCU=285E2863285928582863285A28582858286128632893289328632863285C285D2859285D285A285A28632863286328592863U

[Ljudevit Kaj]

Réčki "Nôvi list" / Kolumně, komentâri

09.10.2009.

Ćićo Senjanović
javascript:openWindow('aspx/showimage.aspx?id=446527',158,320,'');

AJME MENI


Policija u Širokom Brijegu pustila ubojicu.
     Ko je to vidija zatvorit našega čovika.


http://novine.novilist.hr/Default.asp?WCI=Rubrike&WCU=28612863285928582863285A28582858286128632893289328632863285C285D28592861285D285E28632863286328592863W

[Ljudevit Kaj]

Glas Istre, 10.10.2009.

Savičenta in the morning

Nadan i bičiklete

Danas me parona pok san posrka kafele vrgla pred gotov čin. Da bi rad poj do mora, ma da bi rad da uzmemo bičiklete pak da se peljemo ud Fažane pak deboto do Pule zuz more. Da je lipo činjeno za bičiklište, pak da tri bičiklete vržen u tvingo, a ona z dicon z note i da si činimo lipu nedilju. Za pešku je rekla da će platiti užinu u Fažani. Ni bilo ča ku ne kuntentati nju i dicu i via mi u desetoj uri zdolu.

Piše: Darko PEKICA


Joped me trefilo srkati kafe u Puli, ma da mi grad ne bude samo za poj ponesti harte na poreznu i platiti režije u esdeka, san zva Nadana. Deboto mi je svejeno kadi pijen kafe u Puli, ma stešo mi je draže da to bude nika normalnija oštarija, a to Fiorin je, almeno po Nadanu, a da ne govorin po Franciju ki pok se z Cardusa prehitija u vamo je činija pedeset albumi. Bi reći da ta oštarija riva na ludilo, pak je to u redu.

- Ej, Peko, doša san na ferije i ne šekaj me, bile su prve Nadanove beside kad je prija petnajst dan doša. Stešo smo se našli u Fiorinu i srknuli kafele dan prija nego je partija nazad za Ženevu. Svaki put kad dojde počme me šekati da se movin ča delati, a vega lita njente! Z jenin sakramenskin američko-francuskin bendon je već dva miseca na turneji kako ton maher, pak je štuf svega i poša se par dan rikuperati na Krk, pak na Unije. Vero je čudo da niš ni dela, aš ga mi vode čekamo kako lovski breki večeru: i Franci i debeli Orlić i Dejo Gotalović i ja. Svin nan ništo rabi nacrtati, udsviriti, kakov plakat eli štracu činiti, eli moviti nas da ča činimo.

Stešo mi je to jutro reka da kad dojde, eli sad za novo lito, eli pokle na proliće, da ima par projekti, pak ko me intereša da se čujemo. A kako neš z takovin likon delati, kad mi svako lito kad dojde da kuraja za naprid, magari pokle svake stvari ke smo činili pade u niki bed, da eli mu se kompjutor pokvarija pak ni finija sejvati svu mužiku, eli mu je falilo uvo, eli uno, ma lo stešo čini delo za deset. Biondo – čudo prirode ki je maher za strip, mužiku, a to ča ga najveć piježa – kako narihtati da zvuče maksimum ud instrumenta – je deboto doktorira.

Nismo imali čuda vrimena za kafelirati, pak mi je još samo riva povidati da je na Krku na srid česte ušerva niku čudnu beštiju, ništo kako pauka, ma z dlakami. Da to još ni nikad vidija, da mora da je niki mutant istrijanskega pauka z nikon dlakavon beštijon. Da mu je parona rekla koji mu je klinac aš da ga je proučava po ure na srid česte.

Danas me parona pok san posrka kafele vrgla pred gotov čin. Da bi rad poj do mora, ma da bi rad da uzmemo bičiklete pak da se peljemo ud Fažane pak deboto do Pule zuz more. Da je lipo činjeno za bičiklište, pak da tri bičiklete vržen u tvingo, a ona z dicon z note i da si činimo lipu nedilju. Za pešku je rekla da će platiti užinu u Fažani. Ni bilo ča ku ne kuntentati nju i dicu i via mi u desetoj uri zdolu. Filice kad je vidija da raskusivan bičiklete i slažen he u vituru se počeja križati i prija nego je poša h maši, a bija je pronat za poj aš je danas Frančiškova, pak je pop mašu vrga ranije ki je glavna maša u Juršići kadi feštiđaju tega sveca.

Nikako san te bičiklete pohita u malega tvinga u kega bi stale još dvi, pak smo u hipu bili na bičikletah poli more. Parona i Frane prekuntenti, Bartol i ja ništo manje, ma smo se prilagodili. Na Puntiželi sva kako tuka, uni čovik z žutin fićon vajk na svojen mistu, pliva, dela fiskulturu, teče. Blizu sedandeset lit, a na unih spravah za se vrtiti na rukah se ubraće kako da je u dvajsetin litima!

Pomalo smo se peljali poli more pak na ljuljačke i ve druge dičje radosti ke bi rabila poj viti naša teta Fides, pak da namura komun da čine takove. Užinali smo u konobi Fera, i to lipo, pak joped nazad na bičiklete, i kad ćeš su bile tri ure. Rabi poj za nazad ki se Bartolu jako spi, a i štala je vred. Bija san hitija besidu paroni da se frmamo u Juršići kadi su imali smotru tovari, ma mi ni dala bado, aš je imala reći, najbolje da se još namuran na tovare pak da namistu krav doma imamo tovare. Tako niš ud Frančiškove i ud tovari, a povidaju da je bilo jako lipo.


http://www.glasistre.hr/kolumna/n/118136


Glas Istre 2009-10-10
http://files.glasistre.hr/GlasIstre.pdf
http://www.glasistre.hr/

[Ljudevit Kaj]

Glas Istre / Pula, 07.10.2009.

Šjora Špia

- Sam čiulaaa, sam vidilaaa...

Boli glava od demokrackih prava

Onaj drugi sa glasom alla Luis Armstrong govori da se nije obogatija sa kunama iz privatizacie. Sve sta ima je od njegovih šoldi i nasledstvo roditelji. He, he, žnači da
nije u mraku bilo baš toliko škuro kad su ljudi imali sva ta bogatstva za puštiti švoja dizza. Njegov ex stranački amico Hebrang kaže da Vidošević laže. Pa šigurno, kad je bio bog i batina u Gospodarska komora. Sve je vidio, ali se dela ćorav.


Šam čiulaaa… da ex miništro prosvjete Primorac misli postati naš novi kapo. Dela kampanju, ma ne onu po kojoj se kopa i ore, nego presedničku, i to istu caco Obama! Želi biti hrvacki Obama. Orco toćo, šam rekla, a ja bin htiela biti caco svekrva od Obame!

Sve je vishe candidati, a chi će njima plaćati kerefeke, putovanja, reklamni material, nastupe na televiziji koi kostaju caco fritaja od šveti Petar? To su milioni, dragi moi. Nissam materiališta, ali u ova strasna šituazia, svaka kuna se gleda. Oni muljaju docle traje izbor, a posle nama dolaze računi.

Mesiću će brzo škaditi rok trajanja. Sve više klati po Istri i jako mu se švida poli nas.

“Nego kaj, zna on gdje su mu u Hrvatskoj najbolji drugovi i drugarice!” kaze Barizza. “Šta se čudiš bre, ne igra mečka! Meski je svaka na mestu”.

“Daj prosim te, furt pljuje po crkvi, braniteljima, tupi ga s antifašizmom i vidi se da je bil komunjara! Fala dragom Bogu, još malo i bumo ga skinuli s one stvari!”. “Hebote, Barice, što si navrla? Pa kritizira lopove, nesposobne, lažne branitelje i primitivu. Svaki put kad on zucne, bre, ja se uverim da nisam totalno ishlapela. Zato ga volim”. “Ajde, bilo bi mu bolje da malo obrije one čekinje, izgleda kak nakostriješeni mačak!”. “To mu boona služi da bolje ubada!”, kaze Fadila i pojede rahatlokum.

Za kega glasati? Primorac je bio pićo od Sanadera. Kad je otiša šef, partija je i šegrt. Nije pobolša skolstvo. Infatti, kad je puštio fotelja, nismo čiuli da je neko za njim plaka.
Nije se sjetio dignuti materialno stanje profešori. Za njegovo vreme su iskočili van veliki škandali po facultetima, mito i corrupzia, plus mutni biznis sa librima. Lipo je zahebao dizzu
i roditelje. Daleko je Hrvacka od njegove Amerike!

Onaj drugi sa glasom alla Luis Armstrong govori da se nije obogatija sa kunama iz privatizacie. Sve sta ima je od njegovih šoldi i nasledstvo roditelji. He, he, žnači da
nije u mraku bilo baš toliko škuro kad su ljudi imali sva ta bogatstva za puštiti švoja dizza. Njegov ex stranački amico Hebrang kaže da Vidošević laže. Pa šigurno, kad je bio bog
i batina u Gospodarska komora. Sve je vidio, ali se dela ćorav. Anche ja se siećan tega pa se pitam zasto mu to Hebrang nije prigovorio kad je trebalo? A Vidošević, zasto nije onda reagira kad se čerupalo po mirovinskim fondovima i produzećima? Sada, posle 20 lit, svi su pošteni. U ono vreme kad se kralo tutta forza, Hebrang je bio miništro od zdravstva, ali je sta kuco i dela svoj biznis. Che lipi elementi!

La Pusić nije nista dipila, ali je dugo u Saboru i mogla je vishe reagirati na kriminal. Moram lipo o njoj pisati jer je anche ona postala Ištriana. Kupila si je tu kuću i neka je. Pametna je zenska i šam čiulaaa da na fakultet dela za samo 1.500 kuna mesečno. To je za pohvaliti jer nije ingorda i pohlepna. Se žadovoli sa svoja zastupnička plaća. Meno mal, jedna koja ne grabi di stigne.

 “Jezušimarija, pogle onu Pusičku kak viri Mesiću iza vuha! Furt mu se nameštava pred kamere!”, kaze Barizza (Candidato ben accompagnato, mezzo votato!)

Chi mi je još osta? Aha, Josipović. Nežnam, samo sam čiulaaa... da je kulturan čovik, kompozitor, profešor na dva fakulteta. Imovinsko stanje super, nasledstvo nije u pitanju.
A Kajin? Za njega štručnjaki govoru da se previshe zapali i iskreno nastupa, a pensajte, većina birači to ne voli i ne glasa za takove. Će biti da vishe volu kad ih političar gleda u oči i kaka. A ekonomski, caco ćemo naprid? Šta će mi lipi i dragi prešidente ako nemam za maneštru!

Šam čiula da će premierka srediti štuar. Šručnjaki su je konšiljali da bude caco Tačerizza, zelezna ledi. Detto-fatto! Uzela je zajno telefon: “Halo! Ste to vi, gospoda Milka Planinc?”.
“Drugarica Milka, molim lijepo! Šta me trebate?”. “U gabuli sam. Vi ste znala gurati u stabilizaciji, pomognite kako da ja izguram recesiju!”. “Hm, teško će biti. Mi smo imali puuuno manje duga, vani su nas čekali sa naplatama kredita, Tito je bio garancija, proizvodnja nije padala, imali smo naše banke, hotele, poduzeća, brodogradnju treću u svijetu, pune mirovinske fondove. Htjeli smo samo tude kredite, a inače je bilo “Svoje ne damo - tuđe nećemo!”. “Da, ali onda niste imali demokraciju!”.

Da, Jadranka, to je istina. Skupo smo je platili, a nazad dobili mižeriju.


Vasha Spia spija@hi.t-com.hr


Glas Istre 2009-09-30
http://files.glasistre.hr/GlasIstre.pdf
http://www.glasistre.hr/

[Ljudevit Kaj]

Réčki „Nôvi list“, 09.10.2009. / Kolumně, komentâri

S KAMIKA I MORA

Pomozi sam sebe, pa će ti i Bog pomoć


Piše Vladimir JUGO
 
Va Kastve pokle Bele nedeji ne rabi spominjat one muki delavci »3. maja«. Ako sami sebe ne pomoru, ni ti Bog na nebe njin neće ruku dat. Neka se malo zdignu na zadnje nogi, morda će oživet i ona pokojna solidarnost. Aš Bog voli si judi, ma jih na kraje kaštiga za se: red je selit, zemja zove! Ako morete platit prevoz, morete prit i na nebo!
 

Već let i let ne gren na Belu nedeju i »čarobni« kastavski breg. Najme, to za njega more reć samo oni ki ga ni prohodil milijar puti kot brižan kebar va rebar. Najme, zač se na Belu nedeju morat opet napit kot so drugo silno »pučanstvo«, a to su za me samo dragi judi, niš više i niš manje. Dosti! Pa san prošećal po Kastve pasani utorak med judi ki su imeli drugu posajmicu. Nosili su ća su ambalažu, stoli, kantridi i se drugo. A smet je ostalo koliko ti srce želi za oni najnoveji deponij va Marišćine ki će bit gotov morda za naši vnuki kad budu šli va penziju. I ja bin bil nosil doma onu maketu kastavskega turna al velu bačvinu, punu al praznu, ki zna, ma mi je to preteško bilo. A zna se, ča je doma – doma je! Ta je filozofija pul nas jako popularna. Tko je jamio, storil je to pošteno kot hrabro cro-srce – od vrha do dna. Služili su narodu i jako nas zadužili zna se kako i zač. Valda van je ćaro!
    Pred Ložun me velečasni Franjo Jurčević pozval da seden za stol, pa san popil ne kafe leh kapučino. On me je navadil da nisan ateist ako verujen da je ruža, šipak, lepa. Kad vidin da je tako, verujen. More bit! A msgr. Franjo mi je drag kot oni narodni biškupi Juraj Dobrila i Božo Milanović, za drugeh ne bacilan.
    Bila je, za razliku od sakidajnice, oprta i Zavičajna zbirka Kastav(f)štine i neki razred šesti al sedmi je gjedal spomen-kamaru kastavskeh partizani. Po starinski san pital kade njin je drugarica učiteljica, a ti vražji fakini, vnuki i bičvnuki braće Cetina i drugeh su me pozdravjali z stisnutun pestun na desnen uhe. Ofriškali su mi dan. To ti je tradicija z kolena na koleno. Magari ni baš puno grajani Kastva baš bilo va šume, nju su popunili va svoje vreme hmeti i seljaki z okolneh sel. Kako i zvončari, sejeno Halubajski UNESCO-ti, al oni zapadni.
    Va Kastve pokle Bele nedeji ne rabi spominjat one muki delavci »3. maja«. Ako sami sebe ne pomoru, ni ti Bog na nebe njin neće ruku dat. Neka se malo zdignu na zadnje nogi, morda će oživet i ona pokojna solidarnost. Aš Bog voli si judi, ma jih na kraje kaštiga za se: red je selit, zemja zove! Ako morete platit prevoz, morete prit i na nebo!
    Ča će pul belice ti smešni Salonit, obećanja za ludi, ta Vegeta juha al više supa, ča će nan cepi za prašću gripu i ti dr. Srećko Sladoljev (dobil je vritnjak v rit, pul nas tako mora bit), a neki su jamili soldići i smeju se poštenen i jebenen. Sakega slugu kapitala, pa bil odgojen i va soc-duhe, moreš kupit za pravu cenu. Ča bi se reklo, saki je lud na svoj način, a neki i više. Oni ušićare neč i za stari dani, samo ča jih malo ki dočeka.
    Šparaš, pa krepaš, a drugi kašneje uživaju. Ča ti je čovek!


http://novine.novilist.hr/Default.asp?WCI=Rubrike&WCU=28612863285928582863285A28582858286128632893289328632863285C285D285A28582859285C28632863286328592863E

[Ljudevit Kaj]

Réčki "Nôvi list" / Kolumně, komentâri / Pogled

KVADRATURA DRUGA

10.10.2009.

đermano ćićo senjanović

život bez zvijezde

Osin ča su se išli tuć protiv okupatora, oni su se borili za jedan bolji, pravedniji svit. I njihov je simbol bila zvizda petokraka. Sa zvizdon su poginuli i sa zvizdon ih triba pokopat! To se znalo i to se poštovalo. Pa in je na spomenik stavljena crvena zvizda petokraka. I tu petokraku triba na spomenik vratit. To ča su se pod ton zvizdon posli događale nike grube stvari, a ča ga ta poginula mladost jema s tin?

Slika:
http://novine.novilist.hr/images/clanci/2009/10/450781.jpg
 

cirka oko

Baš je pametan oni ko je izmislija emajliranu poštu. Upreš u botun i odma vidiš ko te se sve sitija. Nije ono ka pri kad bi šeta gradon pa te sretne nika prijateljica i reče: »Je li ti se nikidan štucalo? Spominjala san te, tila san te zvat, ali...« Sad više toga »ali« nema. Danas ti se svak more javit i saopćit svoje najintimnije misli. Ča se mene tiče, kompjuter mi je zakasnija jednu 30 godin. Umisto nježnih misli, romantičnih izjava i titraja srca, sad mi dolazu poruke političko-ideološkog tipa.
    Javija mi se emajliranon pošton Jovan Grkinić i govori da je Grad obnovija spomenik Prvom splitskom partizanskom odredu, i da ga izuzetno smeta činjenica da ovi spomenik nije obnovljen u potpunosti jer nije ponovno postavljena zvizda petokraka. Umisto zvizde sad tu zjapi rupa. Na ti način se želi zatajit da su borci krenuli u borbu ne samo radi oslobađanja domovine već i za ostvarenje svojih ideala.
    Čin je Kerum doša na vlast, odma je primija predstavnike SAB-a i obeća da će obnovit partizanske spomenike. I evo je obnovija ovoga u Vinkovačku ulicu. Ajde, dobra voja je najboja! Ali, ako nešto obnavljaš, pristojno je to vratit u prvobitno stanje. A prvobitno stanje je spomenik sa zvizdon petokrakon! Gotovo! Nema više! A opet, ima još. Ima dosta nas u Split koji bismo volili da se obnovi Funtana na Rivu. Posli rata su je srušili komunisti. Zato jer je oni lik na vrj Funtane pokaziva prston prema Bosni. Sad mi govorimo: »Obnovite Funtanu, a oni gori neka pokažije di god oće. A morete mu i okidat prst.« E sad, zvizdu mi na spomenik vratite, a ovome na Funtanu okinite prst?! Bome, jer di će se oni šporki prst poć stavit sa našon čiston zvizdon petokrakon?!
    Ili ono po Kremlju. Najpri krst, pa zvizda, pa sad opet krst. Vraćanje u prvobitno stanje. A ko zna kakvo je bilo prvobitno stanje onin borcima Splitskog odreda? Jesu li oni u rat išli ka komunisti ili in je primarno bilo oslobođenje od okupatora? I ako je među tin borcima bilo i nešto nekomunista, jesu li oni koji su podigli spomenik, učinili nasilje kad su in na spomenik stavili zvizdu petokraku? Reć ćete: Komunisti su bili u većini! Pa ča onda?! Nekima je ta zvizda bila nametnuta. A ča in se rodbina nije bunila kad je stavljen spomenik sa zvizdon? Je li, pa da ih stavu na Goli otok. A zašto se sad rodbina ne buni ča in je spomenik bez zvizde? Je li, pa da ih stavu na crnu listu?
    Našemu svitu nikako ugodit.
   
svakome svoje

Gledan ovo gori ča san napisa, pa san se pripa kako san sve izrelativizira. Odma zoven barbu partizana da mi reče koliko je boraca Splitskoga odreda bilo organizirano, jesu li sve to bili skojevci, kako su disali, a barba mi govori: »Majko moja, da jesu li bili organizirani?! To ti je bila najnaprednija splitska mladost. I najhrabrija. Puno se našega svita sakrivalo ispod stola dok su se veliki tukli, a ti naši momci su znali ča in je činit. Osin ča su se išli tuć protiv okupatora, oni su se borili za jedan bolji, pravedniji svit. I njihov je simbol bila zvizda petokraka. Sa zvizdon su poginuli i sa zvizdon ih triba pokopat! To se znalo i to se poštovalo. Pa in je na spomenik stavljena crvena zvizda petokraka. I tu petokraku triba na spomenik vratit. To ča su se pod ton zvizdon posli događale nike grube stvari, a ča ga ta poginula mladost jema s tin? Njihovi su ideali bili najsvitliji i najpošteniji. Zato poštujmo uspomenu na njih i pamtimo ih onakve kakvi su bili. Oduzmi in zvizdu, oduzeja si in sve!«
    Živija barba! Evo me su dvi beside vratija na pravi put.
   
petar veliki

Nikad se manje nisan zadrža u Zagreb. Izaša san iz autobusa, iša na premijeru, ukrca se u autobus i vratija u Split. Nikad se ja na ti štrapac ne bi bija odlučija da mi se nije javija Dejan Aćimović. Reka mi je da bi volija da mu dođen na premijeru dokumentarnoga filma o slipome sportašu Petru Bešliću koji nas je proslavija na Paraolimpijskim igrama u Peking.
    Film je i težak i dirljiv, i bolan, i optimističan. Gura nas u neki svit s kojin se ne želimo susrest. Izgubit vid, to normalni mozak ne može prihvatit. Sve ča si dosad činija, u čemu si uživa, to se na jedan put gasi. Nema više! I s tin – nema više – susreja se Petar Bešlić. Nije klonija, nego se cili dâ u sport, u atletiku, u trčanje. A trče tako da uz njega trče neko ko vidi. I ti njegov partner u trčanju, Šime Sušić, to je čovik koji je zaslužija sve ljudske nagrade. Cili svoj sportski život podredija je Petru i njegovon uspjehu. A tu je i Petrov atletski trener Srećko Opašić. Čovik koji je zaslužija zlatnu medalju za altruizam. Ma, miljun mi je misli i asocijacija tuklo po glavi dok san gleda ti film.
    A puno san mislija i o Dejanu Aćimoviću. Osin te umjetničke i ljudske komponente, on mora imat i žicu od pravoga menadžera. Ovo menadžer se može prevest i ka prosjak. Mora se iljadu puti stavit u poziciju onoga koji moli, objašnjava i traži. Nikad za se, samo za film. Jer za snimit ovi dokumentarni film, tribalo je brdo pinez. Za putovanje po Rogli, Posušju, okolici Zagreba, pa sve tamo do Pekinga i Kineskoga zida. I tako je moj Aćimović naša stotinjak sponzora. I svi su ti sponzori došli na premijeru u CineStar u Branimirovu. Bili su tu i Jadranka Kosor, i Bandić, i Vidošević, bilo je krcato tajnika, direktora i pomoćnika. Za njih su bila rezervirana dva centralna reda, pa su fotoreporteri imali sve njih na okup, i aparati su škljocali ka ludi. A kad je projekcija bila gotova, onda smo deset minuti čekali da se vrhuška povuče, da bismo i mi pomalo krenili za njima.
    Sve skupa mi je učinilo jednu veliku muku. Opet je politika ukrala događaj. Opet su neki krivi ljudi zasjenili neke prave ljude. I bilo mi je žaj Petra Bešlića i svih slipih osoba. Bilo mi je žaj Dejana Aćimovića i svih pravih umjetnika. Zašto se dobri režiseri moraju prostirat prid političarima? Zašto se pinezi za dobre projekte ne mogu dobivat nekim automatizmom, a ne dobrom voljom tipova koje ne bi volija srest ni u liftu?
    Iša san na premijeru široka srca, a vratija san se tako da san cili uša u se.
   
on meni

Posli premijere smo se spustili na prvi kat, na mali domjenak na bazi prijema, di se uz mene zalipija jedan, ovako mojih godin, govori da on mene zna, a onda mu je proradila mašta, i baš san se lipo raspoložija. Govori po zagrebačku, tako da su mi te njegove bajke bile još šugastije. Nikad ga u životu nisan vidija, a on meni tumači:
    – Znaš, ja ti imam pucu kaj je 15 let mlajša od mene, i kak njoj nikad dost, ja ti sat vremena prije čvenka uzmem pola viagrice. I mogu ti reći da me fest drži. Štepam kak singerica. A tu sam došel, onak, prek veze. Javil mi je kolega da bu danas tu domjenak, i to se ne sme propustiti. Ne znam povodom čega smo tu, al to mi nije ni važno. Znaš, bil sam učitelj, mirovina mala, i ovi domjenci me baš lepo podignu. Sreća da je Zagreb kulturan grad pa se navek nekaj događa. A sad idu i hladniji dani, pa se uvek lepo zgrijem, a nekaj se i pojede. Čuj, ja sam ti imal tetka kaj je bil u logoru. Tri leta je tamo bil i svaki dan je čekal kad ga buju prozvali i poslali u smrt. No, nekak je dočekal kraj rata, ostal je živ, al je otišel sa živcima. Na kraju se ubil. Ja ga skroz razmem. On je čekal da ga ubiju, oni to nisu napravili, i on je ispravil njihovu grešku. Ja često razmišljam da se ubijem...
    – I ča te sprječava?
    - Čuj, to mi je nekak amoralno. Kak bi mi puca gledala na to?! Ona bi mislila da sam se ja ubil zbog ove situacije u Afganistanu. Znaš, mi ti često o tome diskutiramo. A kaj se tebi čini, jel bu Češka potpisala Lisabonski sporazum?
    – Ovisi o dijafragmi.
    – Vrag te jebal, kaj si ti bedast. [/b][/i]
   
harač, rajo

Baš je lipo da smo mi pravna država. I sad je Ustavni sud zatrpan zahtjevima. Kad je na televiziju reklo da će eventualni povrat harača dobit samo oni ko se bude žalija Ustavnome sudu, svit je navalija pisat žalbe. U par dan je u Ustavni sud došlo 30 iljad zahtjevi za povrat. A brzo će ti broj skočit na sto iljad. I sad je Ustavni sud zagušen. Ne otprema se pošta, protokol je kolabira, suci se vataju za glavu. To su sve veliki pravnici i oni su došli do zaključka da nema kolektivnog oprosta. Harač može bit kolektivno nametnut, ali nema kolektivnog vraćanja. Svak za se travu pase. Pitan ja punicu je li ona poslala zahtjev Ustavnome sudu, a ona mi govori:
    – Ne znan ti ja to formulirat.
    – Ja ću Van pomoć. Kolika Van je penzija?
    – Šta te se tiče! Je li ja tebe pitan za plaću?!
    – Ne mogu in pisat ako ne stavin cifru.
    – Stavi, tako nešto, između dvi i četri iljade.


http://split-online.info/vijesti/hrvatska/zivot-bez-zvijezde/

[Ljudevit Kaj]

Réčki „Nôvi list“, 01.10.2009. / Kolumně
 
Beseda

7 člankov na čakavskomu

Pregled:
http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D2863286328632863286328592863X

* * * * * * * * * * * * * * * * * * * * * * * * * * * * * * * * * * * * * * * * * * * *
* * * * * * * * * * * * * * * * * * * * * * * * * * * * * * * * * * * * * * * * * * * *


Članek 1/7


pročitali smo za vas

»Cesta« z sinjanemi tragi čovečje »(hi)štorije«
 
Ako se Miloševa »Cesta« po svojemu mešanju autorske »anonimnosti« i elementi autobiografije z jene strani more usporedit s Kafkun, z druge strani njeja »bizarna logika« jako je slična filmi Davida Lyncha, od keh se jedan i zove »Zgubljena cesta« (»Lost Highway«)

Napisal Marino MALJAVAC
Slikali Sandro RUBINIĆ i Marin ANIČIĆ
 
Slika
Za mesto fabule Damir Miloš zibral je opatijski park
javascript:openWindow('aspx/showimage.aspx?id=450326',400,520,'');

 
»Moja sudbina nije ostajanje. Moram krenuti dalje cestom.«
    Prašina i samina na ceste van sakega vremena i sakega poznatega mesta. Ča nan vredi putovat ko se nećemo vrnut nazad, pita se Damir Miloš va svojoj zadnjoj knjige »Cesta (ostajanje)«. Kot va štorijah Franza Kafke, kade su glavne peršone va knjige leh sinjane z inicijali (Jozef K.), tako i vagabundi ki se skiću po Miloševoj »ceste« nimaju ni imena, anke znamo ki su jin mat i otac, kot ča anke znamo jedan kušćić historije od sveta va ken živu. Va so vreme dok čitamo knjigu, moremo videt kako se pred nami vrte sakakovi »fragmenti« ki se spajaju skupa va jenu štoriju. Z jene strane tako pratimo jenega vagabunda ki cel život putuje se daje i daje po toj »mističnoj« ceste, a va isto vreme nan Miloš poveda štoriju o dva čoveka – kanibala, ča sami živu na pusten otoke. Kot ča i mirovanje na jenen meste (otoke) gre sprotu stalnemu kretanju po ceste bez kraja i konca, tako je ovisti roman pun takoveh »suprotnosti«. Simetrija dobrega i zlega, prošlega i sadajnega, stvarnega i sanj stalno je »va đire« celu knjigu, a dve štorije ke sprva zgjedaju skroz nepovezane i razbijene, na kraje se va romane lepo »matematički« zafašaju. Ako se Miloševa »Cesta« po svojemu mešanju autorske »anonimnosti« i elementi autobiografije z jene strani more usporedit s Kafkun, z druge strani njeja »bizarna logika« jako je slična filmi Davida Lyncha, od keh se jedan i zove »Zgubljena cesta« (»Lost Highway«).
    Teško će Miloševu »Cestu« razumet onisti ki ni nikada čital njegove prve knjige. Kot jedan od »poštari lahkega sna«, kako ih je krstil Krešimir Bagić, Damir Miloš krajen osandesetih i početkon devedesetih let bil je jedan od najplodnejeh pisci generacije skupljene okol časopisa »Quorum«. Sprva asistent teorije zajika na zagrebačken Filozofsken fakultete, odjedanput je partil navigat i postal va to vreme jedan od najvećih promotori jedrenja va Hrvackoj. Morda je baš i taj njegov životni put interesantan kot i knjige ke je napisal zaradi tega ča se va njegovemi romani teorija zajika kreira kroz pisanje. Va »dečjoj« knjige »Bijeli klaun« otrok ki je daltonist vadi raspoznavat kolore od starega čoveka ki je slep, ča bi reć da preko mentalnega navadi kako povrnut svoju fizičku falingu. Morda i najvažneji roman za razumet Miloša kot pisca je »Smrt u Opatiji«. Kot Opatijac, Miloš va oven, kako će sam reć – »projekte«, za mesto fabule zibire poznati opatijski park. Mada park kot takov ima neko svoje (»objektivno«) značenje i van samega romana, knjiga ga nanovo definira i »vuče« va svoju stalnu igru besed i dogajanji. Od prve rečenice ku ćete videt kada ju zamete v ruki (»posveta: dragom meni od sebe«) celi roman dela kontekst va ken će bit smisleno reć »Gledali sam se«. Na ovaj način sam tekst knjige postaje konceptualiziran, a si njegovi elementi svoju vrednost dobivaju samo va kontekste celega romana. Evo ča Miloš poveda o toj svojoj »gramatičkoj konstruiranosti«:
    »Dinamikom se potvrđuje i jedno moguće gledanje na odnos među riječima, tj. na odgovor što jest imenica, što glagol, glasi: glagol to je imenica u kretanju. Kretanje, u krajnjem smislu djelatnost, uvijek je čovjekova djelatnost, a on je u ovom romanu okarakteriziran kao – onaj koji traži. Što? Kad bi znali bilo bi dosadno.«
    Ove besede morda i najboje povedaju ča Miloš oteje postić z svojin pisanjen. Pisanjen ko neki put zgjeda i kot »samo sebi svrha«, ali i pisanje ko vavek zna unapred svoju strategiju oblikovanja sveta ki je fikcija, ali sejno niš manje interesantan ni manje istinit od onega »pravega«. Struktura našega zajika samo je zrcalo strukture celega našega stvarnega sveta, rekal je filozof Ludwig Wittgenstein. On se je va svoje vreme spametil jene »novitade« ka bi se mogla nazvat »filozofska terapija«, ča bi značilo da je filozofija »bol« za ku je jedini lek ona sama. Kako sam ni volel preveć govorit, Wittgenstein je rekal kako filozofi (i judi općenito) ne bi smeli niš reć ako nisu sto posto sigurni da je to tako. Samo ča zajik ne pozna »istinu«, nego samo konvencije, »pravila igre«. Pa zač se onda ne bimo igrali, namesto da smiron mučimo i ne delamo niš? Zač ne bimo mogli »mi sami sebe gjedat« ko nan zajik to ne pusti? Pa morda bolje da onda promenimo zajik, namesto da on menja nas.
    Kot i va morda Miloševen najbojen romane – »Nabukodonozore«, va »Ceste« se opet ponavlja štorija o »trage«. Va romane »Nabukodonozor« pušćanje traga (va peske ali va snege) znači »tragediju«, aš jedino njihovin brisanjen babilonski kralj Nabukodonozor more bit siguran da ga nikad neće ćapat. Trag ki je ostal na ceste (ili na harte na koj je roman tiskan) jedini je način da »pročitamo« svoj put nanazad, razumemo pasano vreme i, konačno, smisal cele ljudske »(hi)štorije«:
    »... što dalje hodam cestom, to više saznajem o onome što je bilo prije, unatoč nemogućnosti povratka.«

Ona se u trku svlači
   
    Miloševa ideja o konvencionaliziranosti našega govora more se videt na čuda mesti va njegovemi romani. Kako bi pokazal na te aspekte njegove »lažnosti«, Miloš dela razlomljene kombinirane situacije kade se to najboje more vidit, pogotovo kroz dijaloge, a va isto vreme van prihaja pravi smisal onega ča je bilo rečeno. Jena takova »smešnica« dogaja se recimo i va romane »SE«:
    – DOBRO VEČE. – kao da je tim riječima sebe prenijela na, od ljudi udaljenu livadu, na osami u polumraku.
    – DOBRO VEČE. – nađe se i on u šumarku uz rub livade. Vidi je u laganoj proljetnoj haljini. Vjetrić.
    – DIVNO IZGLEDATE. – potrči ona livadom šireći ruke. A ruke bijele.
    – HVALA. – podigne glavu iz šumarka ne vjerujući svojim očima, jer ona se u trku svlači.
    – ŠTO ŽELITE POPITI, ILI NE, DA SJEDNEMO ODMAH ZA STOL I NARUČIMO APERITIV? – kad odjednom iz obližnjeg šumarka, prema njoj trči jedan muškarac?!...


http://novine.novilist.hr/Default.asp?WCI=Rubrike&WCU=28592863285928582863285A2858285828612863288A288D28632863285C285D2858285B285A285E28632863286328592863K