Autor Tema: HR.KAJ.NĚ? - Lépa naša kajkavska / pregled tisKAJna  (Posjeta: 210983 )

0 Članova i 1 Gost pregledava ovu temu.

Offline Ljudevit Kaj

  • Jezerača
  • ******
  • Postova: 3935
Odg: Primem pero v svojo desno roko / HR.KAJ.NĚ? - Lépa naša kajkavska
« Odgovori #720 : Lipanj 07, 2015, 11:52:26 prijepodne »
Međimurske novine, br. 1028, 29.05.2015.
e-vundano 01.06.2015.

Piše: Jožek radnik

Premišlavanje Jožeka radnika

Primem pero v svojo desno roko

Prijel Tomek pero v svojo desno roko i napisal svojemo sosedo Zokijo kaj mo je na srco, ali, kuliko smo čuli nikšega hasna ga ne bilo od toga pisma. Nekaj si gruntam da bi vse bilo čistam drugač da je pero prijel i pisal z levom rokom. Pak navek je leva roka bila čuda bliže srco.
Jožek (Tituš) se je navek boril za Jugo, a ne za Lepo našo jerbo mo je Lepa naša bila premala, a isto tak znamo da je još 1972. leta rekel kak bode predi Sava tekla v rikverc neg bodo Hrvati meli svojo državo.



Preveč vam se ne razmem v to visoko politiko i zato nikak nebrem razmeti zakaj je vodeči hadezeovec Tomek Karamarko pisal pismo prvomo esdepeovco i precedniko Vlade Zokijo Milanovičo? Najme kaj, pak so obedva v Zagrebo, tam delajo, tam živijo i bilo bi čistam normalno da se tam zidejo na kavici, gemišto ili pak fruštuko i pospominajo, rečejo jeden drugomo kaj imajo, dospomenejo se kak bi vsima, a i nam, bilo bole. Ali ne, nebrejo se ziti, nebrejo se ili nečejo videti i zato nam vse skupa ide tak kak nam ide. A bilo je to tak, bar so mi tak rekli Tomekovi pajdaši: Prijel Tomek pero v svojo desno roko i napisal svojemo sosedo Zokijo kaj mo je na srco, ali, kuliko smo čuli nikšega hasna ga ne bilo od toga pisma. Nekaj si gruntam da bi vse bilo čistam drugač da je pero prijel i pisal z levom rokom. Pak navek je leva roka bila čuda bliže srco.

 Mi Međimorci nikak nebremo pozabiti Titija. Tak so naši ljudi na početko majuša, po tridestipetipot, išli v Beograd na sprevod, a oni drugi so išli v Kumrovce na rođendan. Vsaki štima koga oče, ali nebrem nikak zazvediti kaj oni očekuvlejo od Jožeka. Dok je on bil je bilo čistam nekak drugač nek je denes i ono kak je bilo več nigdar nebo. Moremo mi reči kaj očemo, ali Jožek se je navek boril za Jugo, a ne za Lepo našo jerbo mo je Lepa naša bila premala, a isto tak znamo da je još 1972. leta rekel kak bode predi Sava tekla v rikverc neg bodo Hrvati meli svojo državo. To je jedno, a drugo je to kaj se je vse v Evropi, a i v sveto, spremenilo dok je negdašji ruski precednik Gorbačov prodal socijalizma i dal je zrušiti Berlinskoga zida. Dok je zid zginul kapitalizam i kapitalisti so pokupuvali i prek zeli sve kaj je socijalizam, tulikša leta, napravil, tak da ve socijalizma moči v sveto sam z svečom najti.

 Minuli tjeden smo meli priliko čuti negdašjega i več pozabljenoga precednika Lejpe naše Ivija Jusupoviča. O je bil lepi, velijo žene, ali nam je Kolinda čuda lepša.Ivo je lepo rekel, i to na televiziji, kak on prizna sam jedno hrvacko vojsko, a to so partizani. Nebrem veruvati kak se zmisli partizanov, šteri so svojega rata završili pred sedemdeset let i štere je ne videl, a niti poznal, a pozabil je i ne prizna branitelje, šteri so se borili i šteri so izborili Lejpo našo pred dvajsti let. Kak se to fletno pozabi. A vsi znamo da so o Lepoj našoj v šteroj ve mi živimo, senjali naši prapradedeki i prapramamice od stoletja sedmoga!

 Pisal sam o čakoskaj vranaj, štere hercujejo v čakoskomo parko i smradijo vsakoga što jim pod rit dojde. Ne sam da smradijo nek se i derejo i to tak kaj jif nejvečpot ne muoči poslušati, pak je i Slavenski v parko ogljuhel. Javil mi se prijatel Zagreba, jeden preštimani gospon šteri je vu svojemo vrto i vrčako mel ftiče vsake fele, a unda je del vu vrčak bisto svoje žene i ve je božji mir, pak mi je dal navuka nek i mi v čakoskomo parko probamo nekaj takšega. Ne verjem da si je on to sam pregruntal, najbrž mo je to profesor Baltazar pošepetnul. Kak bilo da bilo, z jegovih zobov vu vuha grackih ocov, pak si nek oni pregruntajo je li mortik vu tem grmo leži zajec šteri bi mogel zmiriti vrane.

 Da je to ne brez hodiča kaj mi je preštimani pajdaš predložil nam govori i to da smo negdašjega gazdo Čakovca i čakoskoga Staroga grada, Mikloša Zrinskoga Sigeckoga deli na vrčak, dauko od dvorca i čistam na stran kaj ga ne bi što videl i zgledi vu tomo našemo parko kak vrtni patuljak, ali vam morem reči da ga okoli jega nega vrani. Mortik je to zbogradi toga kaj je Mikloš na kojo i kaj v roki drži mača, a i jako grado gledi. Kuliko vidimo ipak nešči postoji koga se vrane bojijo.

 V ove dneve da glavni i nejvekši grad v Međimorjo našem malom, Čakovec, fešta i slavi svoje dneve, je nejpredi i to v pondelek otprti prvi rotor na čakoskomo Jugo, pre cirkvi Svetoga Tončeka. Još je ne do kraja gotov, ali čistam kredno zgledi. Vse je to vredo, ali so gracki oci na otvoreje ne zvali prve sosede. A vsi znamo kakša je šega prinas v Međimorjo, a unda i v Čakovco, da se prvi sosedi i na gostuvaje zovejo, jerbo soseda na gostuvaje zoveš, a na verestovaje sam dojde. Dok ga zoveš dojde kaj ti poveča veselje, a dok sam dojde kaj ti zmenša nevolo. Ali kak so sosedi ne zvani unda je ne mel što niti blagosloviti toga novoga rotora, tak da ve rotor dela brez Božjega blagoslova. Što bode unda kriv ak, nedaj Božek, dojde do kakšega unfala. Pak na Jugo ne živijo sami nezerenoši jerbo je Tončekova cirkva vsako nedelo puna i to štiripot.

 Kak sam več rekel, zadji tjeden v majušo, Grad Čakovec svetkuje svoj Den, šteri traje celi tjeden. Morem vam reči da je čuda toga prepravleno za te dneve i čistam se čudim grackim ocima kak to vse ftegnejo. Najbrž so si nabavili rolšuhe jerbo je drugač teško na vse to stiči. Čakoski gradonačelnik je nastradal več prvoga dneva dok je rotora otpiral. Znate da čakoski gradonačelnik mora biti navek fajni, a posebno dok ga slikajo i snimajo za televizijo, pak se je na rotoro malo preslabo oblekel i propuh je napravil svoje, pak so križi popustili. Sreča je kaj je on još mladi, pak bode, črez kratek čas, to nevolo del pod kontrolo. No, siguren sam da je ne istina ono kaj so se spominali pre čakoski gracki vuri, da ga je vrezalo jerbo je fratre ne pozval na otvoreje i blagoslov rotora. Brzčas ga je čuda vekših grešnikov i v grado, a i v županiji nek je Štef!

 A naši pak županijski oci, očem reči, župan i jegovi zamjeniki so bili v Kini.  Skočili so malo pogledati kaj Kinezi morejo, osim vina štero je več tam, nucati od nas, a kaj bi mi se mi mogli navčiti od jif. Kuliko sam mel za čuti, bode nekaj od toga, očem reči, mogli bi i mi v Međimorjo jesti kruha od rižine mele. Vesel sam kaj je vse to tak zišlo i da je ne istina kaj so zlobniki, pre čakoski gracki vuri, prepovedali kak so županijski čelniki odišli v Kino kaj bi posle nam pokazali kak moči preživeti z šakom riže.

 Navelikom se pripoveda, posle zadje Županiske skupštine, kak bodemo mi v Međimorjo meli holdinga kak bi se vsi penezi našli na jenomo kupo i z toga kupa bi se trošili i to sam zato kaj bi jif mi furt meli na oko. Znate kaj, ne razmim vam se ja preveč v te holdinge sam znam da je zagrebečki holding odišel po riti k meši, a jegov gazda je vsako malo v Remetinco. No, verjem da smo mi Međimorci spametneši od Zagebčancov, ali ne bi nam preškodilo kaj se malo zaškolamo v Zagrebo.

Čakoski i međimorski hadezeovci so počeli med sobom reda delati. Tre nejpredi pomesti pre svojimi vrati tak kaj bode unda muoči i druge na red pobirati. Sam dragi Božek zna, ali kuliko sam mel za čuti on se prestal baviti z politikom, kak to bode završilo jerbo se kotač sreče furt obrče i još se nišči ne zdržal kaj bi furt bil gori. Furt so gori sam tam gde nemajo okrogla kotača nek onoga na vogle. A takši so ve v muzejo.


Zvir:
http://www.mnovine.hr/kolumne/Jožek%20radnik/1/Primem%20pero%20v%20svojo%20desno%20roko.
i(l) str. 80. sim:
http://issuu.com/mnovine/docs/mnovine1028is     
Aktuelni broj i rajneši su (i) sim:
http://www.mnovine.hr/informacije/2/issuu.com/mnovine 

* * * * * * * * * * * * * *

Listek mi je došel, 01:35
Narodna Družina RT Zagreb cca 1963 Popevke Prigorja i Zagorja

Listek mi je došel
Švicarsko-nemački TV i radijski modél za spâs nestandardizéranoga kajkavskoga (čakavskoga)
(kajkavska, čakavska i štokavska inačica članka):
http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg23549/#msg23549

Offline Ljudevit Kaj

  • Jezerača
  • ******
  • Postova: 3935
Odg: Vsaki lanec ima svojo nejslabešo kariko / HR.KAJ.NĚ? - Lépa naša kajkavska
« Odgovori #721 : Lipanj 09, 2015, 08:59:28 poslijepodne »
Međimurske novine, br. 1029, 05.06.2015.
e-vundano 08.06.2015.

Piše: Jožek radnik

Premišlavanje Jožeka radnika

Vsaki lanec ima svojo nejslabešo kariko

Na velikom se pripoveda... kaj se je minuloga tjedna pripetilo v čakoski županijski bolnici i to na psihijatriji. Znate več kak pomalem ido cajti, a i vure dok je čovek dežuren i da dela nočno šihto. Tak so se v čakoski bolnici našli mladi doktor i sestrica z iskustvom pak so ne mogli spati jerbo je bil pun mesec i kak se to več pripeti vu živlejo, reč po reč, i oni so, jeden z drugim, počeli kratiti vreme. Dok jim je nejlepše bilo, najbrž je več posel išel k svojemo krajo, nešči je poranjkal po vrati dežurne sestrice. Doktor je nejpredi došel k sebi, hlače je vrnul na svoje mesto i skočil črez oblok. Nikaj se je hudoga ne pripetilo jerbo so bili čistam pre zemli, ali dok je stal dva tri korake v kmico za pleče ga je zgrabil zaštitar. Doktor je več bil pri sebi i smiril je zaštitara: Gospon sve je vredo, nikaj se ne morate sekerati, ja sam doktor! Ali niti je zaštitar ne bil od fčera, prijel je doktora za roko i rekel: Tak vsi velijo šteri z te hiže skačejo vum. Ovi pre gracki vuri ne znajo kak je ve to, na vse zadje završilo. Ne znati je li je doktor mel sobom svojo doktorsko kartico i je li je uspel zaštitaro dokazati da je on pravzaprav doktor? No, kak navek lanec poči na nejslabešoj kariki tak bi se moglo i tu pripetiti da bode zaštitar ostal brez posla kak i ona čistačica, štera je navečer našla šefa na poslo, očem reči, na goli tajnici dok mo je štela počistiti kancelarijo. Vsi znamo da vsaki lanec mora meti svojo nejslabešo kariko jerbo da bi vse karike bile jednake onda bi to bil lanec jaki kak vrag ili kak naši Doljanci velijo, prekprokleto jaki
.


Ve vidite kaj to naše vražje morje, tua debela modra voda, napravi? Verjem da ste čuli kak je blagajnica na Kraljeskomo kolodvoro šparala peneze kaj bode mogla iti na morje? Prodavala je karte za cug i to po brežnomo recepto pol - pol, očem reči, pol penez od prodani karti je metala v kaso, a drugo polovico v svoj žep. Ona je mlada , fajna i željna živleja i vsega onoga lepoga kaj živleje nosi, pak je tak i štela iti na more. Dobila je za svoj rojsni den zelenoga bikinija, a neje ga mela de pokazati, pak jo je obletela huda misel kaj porine roko v železničarsko kaso. Nekaj mi tu ipak nejde v glavo: vsi velijo da se jako malo ljudi vozi z cugom, a naša Žaklina je za pet meseci nazobačila cirka okoli stodeset jezer kuni. Pak je to ne tak mali penez, ali kak je bila pošlokjena brzčas ne bode niti ovo leto vidla more, a i te novi bikini bode odišel z mode brez je i ne bo ponucani.

Za vreme letnoga računanja vremena (od aprila do septembra) ne se smeti voziti z peciklinom po centro Čakovca. Tak so to rekli čakoski gracki večniki. Negda se je črez celo leto ne smelo voziti po Čakovco, ali se je to zmenilo dok so mladi gracki oci prijeli cugle vlasti v svoje mlade roke. Vsi znamo, a i doktori tak velijo, da se je jako zdravo voziti z peciklinom, ali ne po temaj kratkaj čakoskaj vulicaj, a te isti doktori velijo da je još zdraveše hodati peške. To je kaj se zdravja dotikavle, a ve još nekaj kaj se dotikavle čakoske varoši. Glavna čakoska vulica, Kralja Tomislava, a i ove tri štere se naslajajo na jo, so premale, očem reči, prevoske da bi vse ono zišlo kaj bi mi po vulicaj šteli meti. Najme kaj, mi imamo pune vulice stolov i stolcov pred kafičima i slastičarnaj tak da se čovek jako teško vugible dok ide mimo, a kaj nam rekel kak je to mladoj mamiki, štera pela kolca z detetom, pak bi vas prosil kaj bi mi pokazali kam tu još zidejo peciklini. I ne sam to, mladi dečki na peciklinaj lečejo po tom placo šteri je ostal tak kak da so sami, pak je pravo čudo kaj se je nikaj hudoga do ve ne pripetilo. Ak se pol leta, po mrzlešim mesecima, mi šteri hodamo pešice moramo vugibati peciklinima unda nek se i oni vugiblejo nam po leti, a te falaček vulice je brzčas jako kratki tak da nikomo ne bodo otpale noge ili pak kruna z glave, ak bode išel peške teh, nejveč, dvjesto metri. Nesam ftegnul pitati, a na znakima nikaj ne piše, je li tua zabrana vredi i za ove nove gradonačelnikove I Zmajlovičove pecikline z conom zvane Štromčeki?

Na velikom se pripoveda, pre čakoski gracki vuri, kaj se je minuloga tjedna pripetilo v čakoski županijski bolnici i to na psihijatriji. Znate več kak pomalem ido cajti, a i vure dok je čovek dežuren i da dela nočno šihto. Tak so se v čakoski bolnici našli mladi doktor i sestrica z iskustvom pak so ne mogli spati jerbo je bil pun mesec i kak se to več pripeti vu živlejo, reč po reč, i oni so, jeden z drugim, počeli kratiti vreme. Dok jim je nejlepše bilo, najbrž je več posel išel k svojemo krajo, nešči je poranjkal po vrati dežurne sestrice. Doktor je nejpredi došel k sebi, hlače je vrnul na svoje mesto i skočil črez oblok. Nikaj se je hudoga ne pripetilo jerbo so bili čistam pre zemli, ali dok je stal dva tri korake v kmico za pleče ga je zgrabil zaštitar. Doktor je več bil pri sebi i smiril je zaštitara: Gospon sve je vredo, nikaj se ne morate sekerati, ja sam doktor! Ali niti je zaštitar ne bil od fčera, prijel je doktora za roko i rekel: Tak vsi velijo šteri z te hiže skačejo vum. Ovi pre gracki vuri ne znajo kak je ve to, na vse zadje završilo. Ne znati je li je doktor mel sobom svojo doktorsko kartico i je li je uspel zaštitaro dokazati da je on pravzaprav doktor? No, kak navek lanec poči na nejslabešoj kariki tak bi se moglo i tu pripetiti da bode zaštitar ostal brez posla kak i ona čistačica, štera je navečer našla šefa na poslo, očem reči, na goli tajnici dok mo je štela počistiti kancelarijo. Vsi znamo da vsaki lanec mora meti svojo nejslabešo kariko jerbo da bi vse karike bile jednake onda bi to bil lanec jaki kak vrag ili kak naši Doljanci velijo, prekprokleto jaki.

Neje lefko biti prvi sosed Janezima. Ak ne verjete meni pitajte bar Serjančare. Malo, malo pak dojde do nekše svaje. Nejpredi se nikak nebrejo dospomenuti gde je pravzaprav meja, očem reči, dokot seže Dežela, a de počne Međimorje naše malo, oliti Lejpa naša. Vsi znamo da se vse reke vlečejo fkrej od sevra, pak tak i Mura, i tečejo vse bliže jugo. Mortik jim je na jugo čuda topleše. Tak je naprajla i Mura, pak se je meja med Međimorjem i Deželom preselila jedno pet -šest kilometrof na našo stran. Čuda je vode preteklo pod Serjanskim mostom dok smo mi ne vpamet zeli da je Janezova Dežela vse vekša na našemo hataro, a Međimorje naše malo vse menše i menše. Ali dok smo to rekli, Janezi so skočili v zrak kak da smo jif z iglom vrit fpičili i posle se teško moremo žnjimi kaj dospomenuti. Ne moram vas niti zmišljuvati kak so nam "fkrali" Raskrižje sam zato kaj so preselili potoka of kraj sela, a predi je tekel onkraj. Neso oni takši poštejaki kak si mi to gruntamo. Zmislite se dok so oni šteli kaj bi meja bila po sredini Mure i vsa je sreča kaj smo se ne dali na to mejo, štera plava, navleči. Ali Janeze vam furt nekši kršelji v riti zajedajo, nebrejo biti na miro niti jeden den, furt jim diši naš hatar, naše Međimorje malo. Ovi naši Međimorci šteri so mam polek meje se ne bi šteli posvaditi z sosedima jerbo so sosede čistam vredo, zmislite se sam Špele i Mojce i kak so se Štef i Tonča žnjimi lepo parili. I to na leta. Pak se to nebre sam tak pozabiti. No, ono nejlepše se i med sosedima navek pripeti po noči, pak se je tak po noči pripetilo i Iveko Goričanco, serjanskomo grackomo večniko, šteroga so policaji zvali na spominek v nočnoj šihti. Ivek furt drži na oko sosede Janeze i verje kak oni puščajo v Muro i na naš hatar nekaj kaj ne bi smeli, nekšega smrada šteroga se Janezi očejo rešiti i to prek noči. Najbrž Ivek ima praf, nebrejo Janezi zdržati kaj ne bi nekaj puščali prek meje kaj jim tam smrada dela. O sosedima vse najlepše, ali kaj je je je je. Znuom, Ivek se srdi kaj so ga zvali po noči, a on je štel kaj bi istina došla na svetlo dneva. Treba to videti kaj nam to Janezi puščajo jerbo kaj ne bodo pak delali norce z nas. Vsak čast Mojci i Špeli, ali još me denes srce zaboli dok se zmislim Raskrižja i Svete Gere, a nesam pozabil kaj so nam šteli pohalositi i Štrigovo.

Morem vam reči da se mi to nikaj ne vidi kaj so se počeli spominati braniteli z Savske, ministri i precednik Zoki jerbo o čemo se bodemo mi spominali ak se oni, ne daj Božek, črez kratek cajt dospomenejo. V minulih sedem meseci je navek došlo do svaje i v našoj krčmi pre Juliki jerbo so jedni bili za branitele, drugi za Zokija, a nejsrečneša je bila Julika. Najme kaj, gemišti so se trosili kak da smo oslobodili Knina, a i Julika nam je bila vse lepša.

V kakšo ili štero sredjo školo zapisati dete? To je nočna mora vsih onih roditelov čija deca, ove dneve, završavlejo pučko školo. Neje tu teško biti spameten: tre jif poslati v ono školo posle štere bodo meli posla! Tu ve počne problem: Što itak v toj Lepoj našoj zna kak zaškolano deco bodemo mi nucali za štiri, osem, devet ili pak deset let? To nebre nišči znati jerbo vsake štiri leti dohajajo na vlast novi političari i unda živleje gene znova. Vidite, v drugim zemljama novi političari nastavljajo tam de so ovi ponucani postali, a prinas se navek počne znova jerbo so ovi predi vse zahuzali. Makar se, črez kratek čas, zazvedi da vu vsakom žito, kak gud ono lepo zgledalo, jega vejč kukolja nek se vidi prostim okom.


Zvir:
http://www.mnovine.hr/kolumne/Jožek%20radnik/1/Vsaki%20lanec%20ima%20svojo%20nejslabešo%20kariko
i(l) str. 64. sim:
http://issuu.com/mnovine/docs/mnovine1029is     
Aktuelni broj i rajneši su (i) sim:
http://www.mnovine.hr/informacije/2/issuu.com/mnovine   

* * * * * * * * * * * * * *

(snimleno (i) pred Vrabčem)
Cinkusi - Pet je kumi (1998) , 02:36

Cinkusi - Pet je kumi (1998)
« Zadnja izmjena: Lipanj 09, 2015, 09:04:16 poslijepodne Ljudevit Kaj »
Švicarsko-nemački TV i radijski modél za spâs nestandardizéranoga kajkavskoga (čakavskoga)
(kajkavska, čakavska i štokavska inačica članka):
http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg23549/#msg23549

Offline Ljudevit Kaj

  • Jezerača
  • ******
  • Postova: 3935
Odg: Kasarna je naša, a ve je bolnica na redo / HR.KAJ.NĚ? - Lépa naša kajkavska
« Odgovori #722 : Lipanj 25, 2015, 02:14:23 poslijepodne »
Međimurske novine, br. 1030, 12.06.2015.
e-vundano 16.06.2015.

Piše: Jožek radnik

Premišlavanje Jožeka radnika

Kasarna je naša, a ve je bolnica na redo!!!!

Minuli tjeden je Vlada zela doli hipoteko z negdašje naše Kasarne, a ve Vojarne, tak da ve mi Međimorci ne moramo delati skladišta za vojsko v Slunjo. Ne znati je li je to zbogradi toga kaj nemamo vojsko ili pak ne, nam je vsejeno sam nam je važno da na gruntovnomo izvadko piše da smo mi Međimorci vlasniki Vojarne.



Minul je i drugi spominek branitelov na jednoj strani i precednika i ministra na drugoj strani. Več je spominek ne bil onakši kak so se na prvomo čvenko dospomenuli. Još je nekak išlo dok je precednik Zoki držal cugle spominka vu svojimi precedničkimi rokami, ali dok je minister Fred Matič to zel vu svoje ministarske roke mam so zglajzali. Braniteli nekak ne štimajo Freda i to več dugo, kak da so nigdi i nigdar ne bili skupa. Znate kaj, ve si je več i Zoki pregruntal kak bi bilo čuda bole za jega, i jegove "kukurikače" kaj bi braniteli čim duže ostali v Savskoj i to tijam do izborov, a unda jif Zoki reši, očem reči, dospomene se prek noči jerbo bi mo to moglo pomoči kaj bi još štiri leti ostal v Banskim dvorima. Vidite, da na vse zadje vsako zlo (ak so braniteli zlo?)dojde na nekše dobro. Ak se to, nedaj Božek, pripeti, ne znati je li bode Fred Marič održal svojo reč? Nesmo pozabili jerbo je stopot več rekel da ne kani dati ostavko, ali čim mo mandat mine mam napušča ministarsko foteljo, ostavlja ministarsko plačo i odhaja v ropotarnico povjesti oliti v boračko penzijo. No, ne se tre čuditi ak se to nej pripetilo, pak mo to ne bi bilo prvič kaj je ne govoril istino. Vsi znamo kaj je politika, pak unda niti političari nebrejo biti drugačeši.

Minuli tjeden je Vlada zela doli hipoteko z negdašje naše Kasarne, a ve Vojarne, tak da ve mi Međimorci ne moramo delati skladišta za vojsko v Slunjo. Ne znati je li je to zbogradi toga kaj nemamo vojsko ili pak ne, nam je vsejeno sam nam je važno da na gruntovnomo izvadko piše da smo mi Međimorci vlasniki Vojarne. Vidite kak to zide na dobro dok se bracka, očem reči, koaliciska srca složijo. Čim so župan Matek Posavcov (HNS) i precednik Županiske skupštine Mladen Novak (SDP) skupa došli v Zagreb, precednik Zoki i vsi vu Vladi so mam znali da je vrag šalo zel i da tre nekaj tu napraviti. Kak vidimo mam so prešli z reči na dela tak da je ve Kasarna oliti Vojarna naša i moremo je dale hasnuvati kak smo i splanerali

Ne znati kak bode se ve naša županija dospomenula z Čakovčancima. Vsi se još navek dobro zmislimo kak so Čakovčari, pred osem let, gombali zakaj je undašji precednik Vlade, Ivek Sanaderov, dal Kasarno Županiji, a ne Čakovco, makar je vseposod drugdi po Lepoj našoj bila šega kaj Kasarna ostane Grado na čijem je hataro napravlena. Matek i Mladen so došli Zagreba z novim gruntovnim izvatkom, pak verjem da se bodo čuda leži dospomenuli z Čakovčarima. No, tak so se spominali da se bode Kasarna rešila mam čim "kukurikači" dojdejo na vlast jerbo so to jivi za razliko od hadezeovcov i Sanadera, ali je to mam trajalo tri i pol leti. Politika je čudapot jako čudna i teško jo je razmeti, a političare još i teži.

Nekak so vroče ove junske noči, pak sam ne mogel spati tak da sam mel pisanoga cajta za gruntati si o ve več našoj Kasarni, a i o državnoj bolnici vu našemo Čakovco. Još je preveč friško kaj se nej zmislili kak nam je banka zblokerala bolnico i pozobačila prek devet milijonov kuni kuliko je naša bolnica, z šterom ve hercuje i v šteroj je gazda minister za zdraviče, bila dužna. Vsi mi znamo da on što je gazda mora platiti i duge, a ne kaj se minister šepuri kak gazda, a nam zemejo peneze za jegov dug. Isto tak vsi znamo da je precednik Zoki obečal, a posle jega i prva potprecednica Vesna Pusič da bodo nam poravnali toga duga, ali kuliko vidimo prvi ljudi vu Vladi Lejpe naše so ne prešli z reči na dela i banka je z bolničkoga računa pozobačila vse peneze kuliko je nucala kaj se namiri. Bolnica je zmogla (čitaj: posodila si je) peneze kaj dale dela, kaj doktori (i sestrice) imajo za plače, betežniki za lekece, ali bode teh nekaj vejč od devet bolničkih milijonov falilo na krajo leta dok bo tre vrnuti posojeno. Pred jutro mi se je vužgala zadja žarulica: pak nam je ve brzčas Vlada, prek Kasarne, vrnula one peneze kaj je zahuzala v bolnici. A mortik Matek i Mladen morejo i te milijončeke rešiti ak pak skupa genejo v beli Zagreb grad. Rekel sam mam, čim se bracka, očem reči, koaliciska srca složijo vse se more. Još vejč od toga. Još vejč!

Verjem da vsi znamo, kak verniki tak i nezerenoši, da je papa Franjo minulo soboto bil v Bosni, očem reči, v Sarajevo. Došel je kaj se malo pospomina kaj bi vsi oni šteri živijo na bosanskomo hataro meli malo vejč mira i kaj se ne bi furt sfadili. Vse je vredo prešlo, Papa je vredo došel i kredno odišel. To je bil veliki događaj, kak za Bosno, tak i za jene sosede, pak so i naši Međimorci bili tam. Policaji so jif pregledavali več v Čakovco kaj se nej nekaj pripetilo kaj se nam ne šika. Vsi znamo kaj se je pripetilo prestolonasledniko Ferdinando da je 1914. leta došel z Beča v Sarajevo. Isto tak vsi znamo da je mladi Gavrilo Princip dočakal Ferdinanda v centro Sarajeva, a neje se potepal nekod okoli. Za vsaki slučaj Papo se ne pelali po toj vulici de se je svecka nevola pripetila. Nigdar se ne zna.

Nebrem razmeti ove Čakovčare šteri živijo na čakoskomo Jugo. Nejpredi so šteli i oni meti rotora i ve dok so jim ga gracki oci naprajli ve jim je premali. Nejsam točno vpučeni je li je to ženama premali ili pak moškima? Pak i deca so nejpredi mala, a unda zrastejo, pak bode tak i rotor. No, šalo na strano, pak je i te rotor napravleni za deco, štera tut idejo v školo. Najme kaj, ve dok je rotor unda se bodo šoferi i pomeje vozili, tak da bodo deca mogla pomalem i na vreme dojti v školo, a posle i dimo z škole. Ak je več rotor napravleni zbogradi dece unda tre i deco pitati je li so zadovoljni. A vsi znamo da deca nigdar ne lažejo, dok so mala.

Što bi rekel da ovi iz ZAMPA znajo gde je Peklenica? Ali vragi vse znajo, lohnijo na vse strane i iščejo gde bi mogli kakše peneze odnesti z Međimorja. Nebrem veruvati da se vsi šekutori, porezniki ili kak se vse več ne zovejo, nejpredi dotepejo k nam i tu haračijo peneze, makar znajo da jif mi nejmeje imamo jerbo nejmeje služimo. Bil sam minuli tjeden malo pre našaj sosedaj Dalmošaj, pak sam se malo intereseral kak oni zidejo na kraj z temaj vuteskaj, štere zobačijo peneze. Dok sam jim to prepovedal sam so me belo gledali i nejso me nikak mogli razmeti. Kuliko vidimo neje pravica jednaka za vse!


Zvir:
http://www.mnovine.hr/kolumne/Jožek%20radnik/1/Kasarna%20je%20naša,%20a%20ve%20je%20bolnica%20na%20redo!!!!
i(l) str. 56. sim:
http://issuu.com/mnovine/docs/mnovine1030is       
Aktuelni broj i rajneši su (i) sim:
http://www.mnovine.hr/informacije/2/issuu.com/mnovine   

* * * * * * * * * * * * * *

Ces(t)arica
Kajkavci Dalmaciji – Cesarica, 02:55

Kajkavci Dalmaciji – Cesarica
« Zadnja izmjena: Lipanj 25, 2015, 02:17:23 poslijepodne Ljudevit Kaj »
Švicarsko-nemački TV i radijski modél za spâs nestandardizéranoga kajkavskoga (čakavskoga)
(kajkavska, čakavska i štokavska inačica članka):
http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg23549/#msg23549

Offline Ljudevit Kaj

  • Jezerača
  • ******
  • Postova: 3935
Odg: Vsaki od nas ima svojega križa / HR.KAJ.NĚ?- Lépa naša kajkavska / tisKAJne
« Odgovori #723 : Srpanj 04, 2015, 10:02:47 poslijepodne »
Citat:
KOS-ov kukurikasti križ na 10. travnaku
Felix Srečkec 2015-06-17
http://www.forumgorica.com/politika/felix-sreckec/msg56077/#msg56077

Međimurske novine, br. 1031, 19.06.2015.
e-vundano 23.06.2015.

Piše: Jožek radnik

Premišlavanje Jožeka radnika

Vsaki od nas ima svojega križa


Na labodoritaškom igrališčo v Splito zrasel je kukasti križ šteroga je nešči skril v travo. Počeli smo si gruntati što je to itak napravil, što je toga hudiča mogel nacrtati. Nejpredi se počelo iskati po rukopiso. Unda se je spituvalo, što je kosil travo. Dok se je to rešilo, spituvali so: čija je itak kosilica? Več tu se zazvedilo da je kosilica taljanska i da bi vu tem grmo mogel spati zajec.

Imamo mi čuda drugih problemov štere moramo deti na stol ak očemo preživeti ova teška vremena i recesijo štera nikak da odide od nas.



Verjem da smo skorom vsi vidli, ostali so čuli, ali brzčas vsi znamo da je na labodoritaškom igrališčo v Splito zrasel kukasti križ šteroga je nešči skril v travo. Križ se je nejpredi ne videl, a unda kak je vreme odhajalo križ je, kak i puž, puščal roge vum tak da so ga do poluvremena tekme z Taljanima vsi mogli videti. Na poluvremeno se je več dobro vidlo kaj piše, očem reči, kaj je bilo nacrtano i počeli smo si gruntati što je to itak napravil, što je toga hudiča mogel nacrtati. Nejpredi se počelo iskati po rukopiso, ali tu se je ne dauko došlo jerbo so crte ravne sam ido sem tam. Unda se je spituvalo, što je kosil travo? Vse so to domaći dečki, šteri toga posla več na leta delajo, šterima je labodoritanje v krvi, a i imajo radi labodoritaško Lejpo našo, makar so ne ruon navek na istoj valnoj dužini z precednikom Davorom Šukerom. Dok se je to rešilo, spituvali so: čija je itak kosilica? Več tu se zazvedilo da je kosilica taljanska i da bi vu tem grmo mogel spati zajec. Najme kaj, vsi znamo da so Talijani bili strahom pred nami i da so oni to mogli naprajti kak bi mogli nas hiti vum z kvalifikaciji ak bi jif bili v Splito pobedili i predauko jim pobegli na lojtrici. To je još ne vse, Talijani so iskali nek se igrališče polevle predi utakmice i pod polovremenom, a dok smo to naprajli kukasti križ je došel vum z trave. Što bi rekel kakše se vse huncvutarije denes delajo v labodoritanjo sam kaj bi se došlo na evropsko prvenstvo? Talijani nas dobro poznajo i oni so bili sigurni da mi bodemo iskali petokolonaša med sobom i ne bodemo štrumfali dale, a isto tak imamo fleka z one lanjske utakmice v Milano, pak bodo vsi nas gledali kak krivce. Rečite mi, prosim vas lejpo, pak čiji je znak bil kukasti križ v drugom rato, naš ili pak Talijanski? Mi smo meli svoje znake šterih se nebremo nikak rešiti, kak je napriliko slovo U ili pak roka Đoa Šimuniča, šteri je zbog roke v zrako odišel po riti k meši. Kak bilo da bilo, ali trebali bi vsi, kak mi, tak i Talijani več jempot završiti toga Drugoga rata, pak je minulo več sedemdeset let, a još navek nekaj tam iščemo i furt rovlemo v pepelo. Tuliko je lepih stvari pred nami, a mi još navek rovlemo po zmazanom vešo ropotarnice povjesti. Nek povjesničari, skupa z političarima, več jempot denejo točko na vse ono kaj je minulo tak zdavnja. Imamo čuda drugih problemov štere moramo deti na stol ak očemo preživeti ova teška vremena i recesijo štera nikak da odide od nas.

  Na Tončekovom proščejo, minuli tjeden na čakoskomo Jugo, je trebala igrati i popevati Črlena Jabuka. Velim trebala je, bandisti so došli i celo odvečer so se naštimavali i prepravlali, ali so se ne fčakali svojega pevača Dražena Žeriča z conom zvanoga Žera. Znali smo za jegovo šego da nigdar ne dojde na vreme, kak i Mladen Grdovič, šteri se nejvečpot zadrži na bevandi, ali se je još ne pripetilo kaj ne bi bil došel ili da ga ne bi bili dopelali i kaj negdi ne bi bil popeval. Na čakoski Jug je ne došel i čuli smo kajkaj toga zakaj se je, itak, to pripetilo. Čakoski turistički težaki so mo rekli da bode popeval mam polek prvoga rotora v Čakovco i unda je on toga južnoga ne videl ili pak ga je fulal i produžil je dale, pak je zglajzal na prvomo rotoro prek štreke. Kaj se je tam pripetilo, koga je tam zišel, kaj je delal i kuliko ga toga posla bilo na stolo, šanko, ali vsi znamo da je popevat ne došel tak da so ga jegovi bandisti zabadav čakali. A i ne sam bandisti, bilo je par jezeri Čakovčancov i Međimorcov šteri so ga šteli čuti, ali so toga petka ne meli srečo. Pre čakoski gracki vuri se spominajo kak so najbrž turistički težaki to popevanje dospomenuli prek Express Toursa i Tihomira Kokoleka, pak so Žerini penezi otpotuvali v Tunis, tak da je publika odišla po riti k meši. Isto kak i školska deca. Kakša so to, itak, vremena došla kaj i tak jake i velike zvezde kak je Žera na držijo svojo reč? A ljudi, što se pak gde još briga za ljude?

 Kaka sam več rekel, gazda Ekspress Toursa, Tihomir Kolarekov je z školskim, očem reči, dečjim penezima pobegel v Tunis. No, nekaj si gruntam da on ne bode preveč dugo tam ostal jerbo da je on mel tak čuda penez kaj bi tam mogel dugo ostati unda ne bi pobegel. Vsi znamo da je Tihi več dugo mel agencijo i delal z školami i decom. Neje to bilo fkajuvanje na brzino, par let je delal vredo, a unda se je najempot nekaj pripetilo i zginul je. No, što zna kaj se je itak pripetilo z penezima jerbo da je ne peneze negdi zahuzal ne bi pobegel. Brzčas je predi nek je genul za Tunis bil v kockarnici ili pak kladionici i unda se je ne vse pripetilo kak je on planeral i senjal (Juve je zgubil), tak da je on moral zginuti, a školska deca so odišla po riti k meši.. Pak smo mi Međimorci došli na prve stranice novin, televizije, radija, ali ne po dobromo. Pred mesec dni je blagajnica z Kraljevca kaserala peneze za more, a ve pak je Tihi "preplaval" Sredozemlje i nasukal se v Tuniso. Nesam ruon siguren da je Tunis obečana zemla za takše špekolante?

Vsaki den zazvedimo nekaj novoga, pak je tak za ovih vručini zišla na svetlo dneva vest kak smo v Evropi mi, Bugari i Rumunji nejvekši bokci. To je nam ova naša "kukuriku" Vlada dala. Nebrem veruvati da so nas i Grkljani prestigli? Kuliko vidimo Čakovčanci so našli svoje pajdaše v Bugarskoj, bogec je našel bokca. Pak so mogli najti nekšega bolšega od nas kaj bi se mogli od jif nekaj nafčiti!

Turistički težaki z Hrvaške so zebrali naše Gornje Međimorje kak nejlepši i nejbolši falaček zemlje v Lepoj našoj. To je hatar gde je čoveko nejlepše jerbo se tam nejbole je, pije, spi, a i zrak je nejbolši. Neje preveč gosti, a i plučima paše. Posebno se lepo širijo ženska plučeca. Ovi z Hrvaške so stopram ve zazvedili, a mi Međimorci to unamo odnegda, od stoletja sedmog, sam smo ne šteli nikomo reči kaj ne bi po bregima, breščajkima, goricaj i pelnicaj bila preveč velika stiska. Najte to, prosim vas lepo, deti v novine ili pak na Internet kaj se ne bo zazvedilo, pak bodo vsi nahrupili k nam. A znamo vsi da je hatar premali za vse, on je dosti sam za zebrane, sam za nas Međimorce. Probajte si v pamet zeti kaj se bode pripetilo z našim bregecima i breščajkima ak Kinezi zazvedijo za nas. Ili pak Rusi, šteri so poznati po temo kaj spijejo nejveč vina na sveto. Čuda, čuda vejč spijejo nek mi Međimorci i čuda vejč nek naši Goričanci. Pak kaj nam tre takšo nevolo doživeti?

Nikak nebrem dojti na kraj som z sobom. Več par dni si gruntam je li je to vredo kaj na auto šteri vozi mrtve piše: Prevoz za vlastite potrebe. Prosim vas lejpo, pomorite mi jerbo več par noči nebre spati!


Zvir:
http://www.mnovine.hr/kolumne/Jožek%20radnik/1/Vsaki%20od%20nas%20ima%20svojega%20križa
i(l) str. 64. sim:
http://issuu.com/mnovine/docs/mnovine1031is     
Aktuelni broj i rajneši su (i) sim:
http://www.mnovine.hr/informacije/2/issuu.com/mnovine   

* * * * * * * * * * * * * *

Tu stara je hiža i vujne raspelo,
a pojdnem su isti i gazda i kmet.
Tu počijne sako i jelo i delo,
tak živiju moji več jezero let.

BOŽIĆ U GORICI, TS ALIBI, JEZERO LET, 27 12 2011, 03:21

BOŽIĆ U GORICI, TS ALIBI, JEZERO LET, 27 12 2011
Švicarsko-nemački TV i radijski modél za spâs nestandardizéranoga kajkavskoga (čakavskoga)
(kajkavska, čakavska i štokavska inačica članka):
http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg23549/#msg23549

Offline Ljudevit Kaj

  • Jezerača
  • ******
  • Postova: 3935
Odg: Đuro veli: Ostanite doma / HR.KAJ.NĚ? - Lépa naša kajkavska / tisKAJne
« Odgovori #724 : Svibanj 01, 2018, 01:21:40 poslijepodne »
Vuz 1. filipovščaka (rožnaka, svibna) – dan sv. Jožeka Težaka (Josipa Radnika)

Đuro veli: Ostanite doma…

Piše Jožek Radnik

mnovine.hr – vundano 23. travnja 2018.

Naš čovek, Međimurec z Donjega Kraljevca, gazda i direktor Tehnixa, Đuro Horvatov, ne sam kaj dobro posluje, ne sam kaj dobro plača svoje težake, neg i vuči naše političare kaj treba naprajti kaj bodo i drugim težakima v Lepoj našoj počele cvesti rože, a ne sa jegovima. Vuči druge kaj trebajo naprajti kaj jim ljudi ne bodo bežali z fabriki, išli vum, prek meje, iskat kruha za sebe i svoje familije. Plače v jegovi fabriki so prek jezero ojerov, a dela i na tomo kaj bodo još vekše sam kaj bodo težaki ostajali tu doma na svoji rodni grudi. Sakomo svojemo težako šteri dobi malo dete povečuvle plačo sam kaj ostanejo doma i kaj ne bodo furt gledali prek meje. Još nekaj, pomogel je svoji opčini Donjemo Kraljevco zazidati zabavište tak kaj bodo težaki meli de ostavlati svojo deco dok ido na posel. Do ve je dal cirka milijon kuni, a rekel je da bode nekaj dal i kcoj sam kaj to prelaufa onak kak si je on to pregruntal. Kaj je to ne lepo dok idete na posel usput ostavite dete, a dok idete dimo ga zemete nazaj, furt znate de je dete, što se za jega briga tak da na poslo morete sam misliti na posel. Još nekaj, gospon Đuro je doblokeral 35 svojih težakov i pomogel jim je kaj se rešijo toga mlinskoga kamena okoli šijaka, a kaj ne bodo morali pakerati kufre, stajti familijo i oditi prek meje i tam služiti za banke i ovrhe. Znate kakše so banke, najpredi vam dajo peneze, a posle štancajo kamate i to tak kaj se se smodi. Da bi si tak delali kak delajo v Tehnixo, kak dela gospon Horvat, bilo bi nam čuda bole i čuda lepše na ovomo našemo falačko zemle „med dvemi vodami“. A i drugi bi mogli nekšega navuka od nas zeti.

I to je još ne se. Gospon Horvat zove mlade ljude nek se zapišuvlejo vu one škole, na one fakultete de bodo posle dobili posla, a ne kaj dugo hodajo školo, nekaj se navčijo, zbavijo diplome i unda ne znajo kaj bodo žnjimi i de bi posla našli. A, kak veli Đurek, tu pri jemo posel čaka i tre v takše škole hodati. Posla ga dosti za železne meštre i za železne inženjere tak da mladi, šteri so na križajo života, morajo zebrati takše škole i unda bodo zanavek ostali tu prinas, v nejlepšemo cvetnjako na sveto i ne bodo morali zvedati de što kaj nudi v Evropi: Osterajho, Dojčlando, Irskoj… Ak bodo šteli služiti ojere, pak bode i Lejpa naša prešla na ojere tak da bodo i plače jednake z ovima vuni. Mladi, dobro si pregruntajte, ostanite doma jerbo kak je pjesnik lejpo rekel, sonce ljuckoga neba vas ne bode tak grelo kak vas greje ovo naše. Mi stareši to znamo i zato smo ne odišli vum, a Đurek Horvatov nam je sima pokazal kak se more i prinas doma pošteno delati i pošteno zaslužiti.

Minuli tjeden smo preživeli petka, pak petek je saki tjeden, ali to je ne bil prosti petek nego petek, trinajsti. Velijo stareši da se hajdi toga pripetilo v petek trinajstoga? Kuliko sam mel za čuti i Eva je prvo jabuku pojela (i to ono štero je ne smela) v petek trinajstoga i ne sam da jo je pojela nek joj je i Adamo dala. Kuliko vidimo greh je došel na svet v petek trinajstoga. Dosta se je nevoli pripetilo v petek trinajstoga, a minolu petek so naši Saborniki deli kcoj još jeno, ratificerali so Istanbulsko konvencijo. Bilo bi čuda bole da so svoje glase dali za Istanbulsko nevesto nek za Konvencijo, imamo još hajdi starih dečkov!

    Seposod i si prepovedajo, kak papige, kak Istanbulska konvencija dela na tomo kaj mi moški ne bodemo nekaj delali z našimi ženami i to na silo. To ovak, dok čovek prvipot čuje, jako lepo zgledi i nišči nema nikaj protiv toga, ali oni šteri se bole od mene, od nas, razmijo v to Konvencijo pripovedajo kak nas ona bode koštala nejmeje milijardo kuni na leto. Kaj velite, kuliko bi se zabavišti, školi, šporcki dvorani moglo sako leto naprajti za te veliki kup penez?

No, to je još ne se. Tak smo kak farizeji i to ne sam mi nek i oni šteri nam rivlejo i podrivavlejo to Konvencijo, a z druge strane so ne nikaj naprajli, a niti se ne brigajo kaj bi naprajli, za onih 2500 moških i ženi šteri so bili podsiljeni v Domovinskomo rato. Je, dobro ste prečitali, bilo je tak čuda podsiljenih, a od teh sih je 10 posto bilo moških. I v rato je bilo onih šteri imajo rajši kosmato moško rit od ženskoga jarčeka. Za te se nišči ne briga, a niti pak Konvencija nikaj ne piše o onima štero so več pretrpeli nasilje. Verjem da ste prečitali za ono ženo vu Vukovaro kaj je priznala kak skorom saki den zida moškoga šteri jo je podsilil, a ve se joj još smeje v lice. I unda bo nešči rekel da so te v EU ne farizeji?

Štef je odišel v ženski zahod i puščal je vodo. Došla je gospa Mica i dok je zgledala Štefa počela je kričati: Gospon, gospon, ovo je za ženske, ovo je za ženske…, a Štef se je obrnul onak kak je bil, z hrmakom v roki i mirno je otpovedal: I ovo je za ženske. No, ve posle kak je Istanbulska konvencija došla na vlast, ve Štef more iti vodo puščat kam oče, očem reči, more iti v moški šekret ili pak v ženski zahod.

Kak strela z vedroga neba me je potrefila vest da je Mateja odišla z županije. Nekak je lepše i mlajše zgledala tua naša Županija dok ste došli i zišli Matejo. Mlada i fajna Mateja, mladi i fajni župan i kaj ne bodem dale nabrajal. Ali kaj se more ak smo se mi joj nekaj zamerili i zebrala je drugoga pota. Bode vidla ona kak je to hodati po drugim potima de ne bode zišla nas? Mortik joj bodemo falili? Bar nešči? Ona nam brzčas bode!!!

Mi Međimorci smo nejspametneši, očem reči, preštimani, imamo najbolša vina na sveto kaj nem spominjal nejbolše meso z tiblice jerbo sam mam lačen, a denes je petek. No, to je ne se, ve se zazvedilo da imamo i nejspametnešega pesa. Barica Vnuk z Čestijanca ima nejspametnešega pesa v Lepoj našoj. A pes se zove Argo. I ja imam Argija, ali je ne bogzna kak spameten, bole vleče na đukelo. Najbrž je ne se v imeno, brzčas so ne si Argiji isti? Dok je teca Franca čula z kim si glavo terem mam mi je pošepetnola: Pak te ti je Argo z Čestijanca hodal v nekšo pesjo školo, a ne kak tvoj šteri se sam poteple od kuse do kuse!

Naš i međimorski župan, Matek Posavcov, je bil v Kanu (velijo da je to v Francuskoj) de so nas Međimorce falili kak smo jeni od nejbolših ne sam v Lepoj našoj, ne sam v Evropi, neg i v celomo sveto. Ak je nekši hasen od sega toga, a jeje, unda je to to kaj so ve si zazvedili za Međimorje naše malo i de je te Falaček zemle med dvemi vodami. Jedino kaj je za problem kaj oni šteri iščejo Međimorje na globuso ga malo teško najdejo, ali denes se se da povečati pak unda to muoči naprajti i z globusom. Pravzaprav štel sam vam reči kak se je župan v Kanu zišel z negdašjim ukrajinskim boksačom Vitalijom Kličkovim šteri je ve gradonačelnik Kijeva. Kaj si gruntate o čemo so se spominali naš međimurski župan (Međimorje, 120 jezeri) i Kličkov (Kijev, 3 milijone)? Kaj ne bodete dugo najgerek, spominali so se o Ukrajinkama. Naš župan se je žalili kak imamo još hajdi starih dečkov v Međimorjo, a Kličkov se je pofalil kak bi hajdi Ukrajinki jako rado išle v Međimorje. Spominek bode se nastavil prek matičnih uredov!


Zvir:
http://www.mnovine.hr/kolumna/jozek-radnik/v-kotoribi-cug-masina-fucnula-2-2-2-2/ http://www.mnovine.hr/kolumna/jozek-radnik/
Pismohrana (Listohrana): http://wwww.mnovine.hr/kolumne/Jo%C5%BEek%20radnik/1.html

Đuro veli: Ostanite doma…
str. 72 sim: https://issuu.com/mnovine/docs/mnovine1179i

Pri svetomo Đurđu na brego se deca delajo
str. 80 sim: https://issuu.com/mnovine/docs/mnovine1180i

Citat:
NEBO Zagreb World Music Festival: Vuprem oči (vu to nebo visoko) - koncert u čast Teti Lizi
SC - Teatar &TD , 4. studeni 2017.

NEBO festival: Vuprem oči (vu to nebo visoko) - u čast Teti Lizi, 11:56
https://www.youtube.com/watch?v=vafjNwSeUqY
« Zadnja izmjena: Svibanj 01, 2018, 01:31:37 poslijepodne Ljudevit Kaj »
Švicarsko-nemački TV i radijski modél za spâs nestandardizéranoga kajkavskoga (čakavskoga)
(kajkavska, čakavska i štokavska inačica članka):
http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg23549/#msg23549